Matayu 12:18 - Maaron Saveeŋ Tooni Patabuyaaŋ Tuam

¹⁸ “Aghita besooŋa tsiau tana. Yau taug nasiigho ve naghuru pa uraat tsiau. Yau lolog igheen tooni, ve igham ghau lolog poia kat. Yau aat nagham Avuvug pani, ve i pale ivotia ŋgar duduuŋa pa nugh nugh tau Yuda mako. Is 42:1+; Mt 3:17

Mutu (Oov)

¹⁸ “Aghita mbesooŋa tiou tonene. You taug nasia, ve naghuri pa uraat tiou. You lolog pani, ve igham ghou lolog poia kat. You pale nagham Avuvug pani, ve ye pale ivotia ŋgar deŋia pa ndug ndug to Yuda maau ne. Is 42:1+; Mt 3:17

Matayu 12:18 Iomraidhean Croise

Matayu 12:17

Tauvene Maaron aliiŋa tau muuŋ propet Isaia ivotia na, anooŋa ivot. Saveeŋ tauvene:

Matayu 17:5

Petrus isavsaav soone, ve taitai tau milmilia, izi le ikau zi. Ra tilooŋ Maaron aliiŋa ivot ila taitai tawe loolo ighe: “Ena yau taug natug tau lolog igheen tooni, ve igham ghau lolog poia kat. Alooŋ aliiŋa ve ataghoni.” Igham 40:34+; Mbo 2:7; Mt 3:17

Markus 1:11

Ra saveeŋ sambam ve izilam ighe: “Yau natug yo. Yau lolog igheen tsio, ve yo ugham ghau lolog poia kat.” Mbo 2:7; Is 42:1; Mt 12:18; Mk 9:7

Markus 9:7

Malau mako na, taitai izi le ikau zi. Ra tilooŋ Maaron aliiŋa ivot ila taitai tawe loolo ighe: “Ena yau taug Natug tau lolog igheen tooni kat. Alooŋ aliiŋa ve ataghoni!” Igham 40:34+; Mt 3:17; 2Pe 1:17+

Lukas 23:35

Eval tiina tiyozyooz ve timarar gabua tau ivotvot na. Ve yes daaba to Yuda paam tiyozyooz ve tisiksik saveeŋ veleghiiŋ pa Yesu tighe: “I iuluul tamtamon naol. Isaav ighe onoon i Mesia, ve Maaron ighuru pa uraat tooni, na iuul tauu lak!” Mbo 22:7

Lukas 4:18

“Maaron Avuvu ileep tomani ghau. Pasaa, i ighur ghau to navotia vaaru poia pa yes mbolaaŋa. Ve imbaaŋ ghau nalam to nasaav pa yes tau tileep ila koiazŋa nimazi na tauvene: ‘Avot ala! Yam aleep ila koiamimŋa nimazi muul mako.’ Ve yes tau matazi kumkuuma na, Maaron ighe yau nasaav pazi tauvene: ‘Matamim pakia ve aghita nugh.’ Ve yes tau koiazŋa titatan zi ve tighurghur pataŋani pazi na, Maaron imbaaŋ ghau nalam to nagham mulin zi. Ve i ighe navotia saveeŋ pa tamtamon tauvene: Saawe to Ŋeer Tiina itotoi poia tooni ivot ighazooŋ, tauta ivot wa.” Is 61:1+; Yo 3:34; 2Kor 6:2

Lukas 9:35

Ra tilooŋ Maaron aliiŋa ivot ila taitai tawe loolo ighe: “Ena yau natug. Yau taug nasiigho ve naghuru pa uraat tsiau wa. Alooŋ aliiŋa, ve ataghoni!” Mbo 2:7; Is 42:1; Lu 3:22

Yoan 3:34

Ŋeer tau Maaron imbaaŋo izilam na, i ivovotia Maaron tauu aliiŋa. Pasaa, Avuvu tau Maaron ireii pani na, i igham ŋgiira ŋgiira pani mako. Ipul suvinia ila tooni. Is 42:1; Mbaŋ 10:38

Uraat To Yes Mbaŋooŋa 11:18

Tilooŋ saveeŋ tana, ra atezi izi, ve lezi saveeŋ muul mako. Ve tipait Maaron eeza tighe: “Onoon kat, aazne, Maaron ighe igham poghania yes tau Yuda mako na paam. Tauta ipaburigin zi gha titoor ŋgar toozi ila pani. Leso tigham lepoogh poia ila tooni.” Ro 10:12+, 15:9

Uraat To Yes Mbaŋooŋa 14:27

Yesuru tila tivot Antiok, ra tipoi lupuuŋ to Krisi tilam tilup zi, ve tipaes pazi pa uraat naol isov tau Maaron igham zi tivot ila nimazi. Ve tipaes pazi tighe Maaron igharaat eez pa yes tau Yuda mako na, tauta tighur ila to Yesu wa.

Epesus 1:6

Maaron ighe tamtamon tipaiti pa poia tooni. Tauta igham poghani ghiit sorok itaghon tauu loolo ve ŋgar tooni, ve ighur poia tooni tiina kat izaa to iit tau tapaak Naatu Yesu Krisi ve taleep ila tooni. Naatu tana, Taama Maaron loolo igheen tooni kat. Mt 3:17

Kolosi 1:1

Yau Paulus. Maaron itaghon tauu loolo, ve ighur ghau namin mbaŋooŋa to Yesu Krisi. Yeiru toŋvetaz toit Timoti nibood rau tane ilat pa yam tamtamon patabuyaaŋa to Maaron tau aleep izi nugh Kolosi. Yam toŋvetaz tau apaak Yesu Krisi ve aleep tuŋia ila tooni, ve akis ghuruuŋ ila tsiam ariaaŋ. Poia to Tamaan Maaron izaa tsiam, ve iŋgin gham aleep poia toman lolomim luuma. Onoon.

Kolosi 1:13

Muuŋ, ŋgar to ndoroom ighamgham pooz pait. Ve aazne, Maaron ipas ghiit tavot pa ndoroom tapiri, ve ighur ghiit taleep ila Naatu Yesu Krisi saamba, leso tataghon pooz tooni. Naatu tawe, i loolo igheen tooni kat. Mbaŋ 26:18; 1Pe 2:9

1 Petrus 2:4

Krisi, i imin maet maata yaryaare tau ikis rumei to Maaron iyooz ariaaŋ. Tauvene yam aŋaruini ala. Onoon, tamtamon tiveleghi tighe i tamtamon sorok, ve tizori. Eemon Maaron tauu ighuru pa uraat tooni, ve loolo igheen tooni kat. I ighita Krisi imin maet paghuuna ee tau atuya tiina kat.

2 Petrus 1:17

Aghita. Muuŋ, yeŋa Krisi nilepleep, ve nighita Tamaan Maaron tau tapiri ve mbonari tiina na ipakuru ve igham Krisi mbonari isul tiina. Ve nilooŋ Maaron aliiŋa isaav pani ighe: “Ena yau taug natug tau lolog igheen tooni, ve igham ghau lolog poia kat.”