Matayu 11:2 - Maaron Saveeŋ Tooni Patabuyaaŋ Tuam

² Saawe tana, ŋeer rughuzaaŋa Yoan ilepleep ila ruum to yavyavuuŋ loolo, ve iloŋlooŋ Krisi vaaru pa uraat naol tau i ighamgham zi na. Tauvene imbaaŋ ziŋeera siriv tila to Yesu, leso tighasoni pa uraat tooni.

Mutu (Oov)

² Sawa tonenen, Yoan ŋgeu rughuzaaŋa inepneep ila ruum to yabyabuuŋ lolo, ve ilooŋ Krisi varu pa uraat naol to ye ighamgham di. Tovenen imbaaŋ taghoniiŋa toni pida tila to Yesu, leso tighasoni pa uraat toni.

Matayu 11:2 Iomraidhean Croise

Matayu 1:17

Tauvene Abaram naatu Isak, Isak naatu Yakop, ve paaghu toozi tiparseeŋ tauvene taghon taghon le David ivot imin saŋavul ve paaŋ (14). Ve indeeŋ saawe to David, le ila imuul saawe tau yes Babilona tiyau yes Yuda ve tigham zi tila Babilon, paaghu to David tiparseeŋ irau saŋavul ve paaŋ (14) muul. Ve saawe tau yes Yuda tipul Babilon ve timuul tila tauzi nugh toozi, le ila imuul saawe tau Krisi tiina ipoopa na, paaghu to David tiparseeŋ irau saŋavul ve paaŋ (14) muul.

Matayu 14:3

Erod isaav tauvene pasaa, maata iŋgal ŋgar tau i igham pa Yoan na. Ŋgar tauvene: Muuŋ, Erod isan toogha Pilip azaawa Erodias ve ivaii. Saawe tana, Yoan ilala tooni, ve inoknok saveeŋ pani ighe: “Ŋgar tau yo ugham pa livaa tana, ene iduduuŋ pa tutuuŋ to Maaron mako.” Tauta Erod isaav gha tikis Yoan, tikauu pa ravraav, ve tighuru iloŋ ila ruum to yavyavuuŋ. Wkp 20:21

Matayu 4:12

Yesu ilooŋ Yoan vaaru tighe Erod ighuru iloŋ ila ruum to yavyavuuŋ, tauvene imuul ila pa taan sirivu to Galilaia. Lu 3:19+

Matayu 9:14

Saawe tana, ŋeer rughuzaaŋa Yoan ziŋeera siriv tiŋarui Yesu tila, ve tisaav pani tighe: “Saawe naol, yei niŋgunŋgun taumai pa ghaniiŋ aniiŋ itaghon suŋuuŋ ŋgara. Ve zeran tutuuŋa tighamgham tauvene paam. Puughu mindai ta mbiwa tsio titaghon ŋgar tauvene mako?” Lu 18:12

Markus 6:17

I isaav tauvene pasaa, maata iŋgal ŋgar tau i igham pa Yoan na. Ŋgar tauvene: Muuŋ, Erod isan toogha Pilip azaawa Erodias ve ivaii. Saawe tana, Yoan ilala tooni, ve inoknok saveeŋ pani ighe: “Ŋgar tau ugham pa togham azaawa na, ene iduduuŋ pa tutuuŋ to Maaron mako.” Wkp 18:16 Yoan saveeŋ tooni tane igham Erod azaawa aate yavyav. Tauvene iliil eez to iravu imaat. Eemon irao mako. Tauta Erod imbaaŋ tamtamon siriv tila tikis Yoan, ve tikauu, ve tighuru iloŋ ila ruum to yavyavuuŋ, leso igham azaawa loolo poia.

Lukas 3:19

Murei, Yoan iyaon Erod tau daaba to taan sirivu to Galilaia na. Pasaa, Erod isan toogha azaawa Erodias ve ivaii, ve igham ŋgar sasaghati siriv paam.

Lukas 9:7

Erod, i daaba tau iŋgin taan sirivu to Galilaia. Ilooŋ Yesu vaaru pa uraat tau i ighamghamu na, le igham ŋgar naol. Pasaa, tamtamon siriv tisavsaav tighe Yesu, i ŋeer rughuzaaŋa Yoan tau imaat na, ve Maaron ipaburigini pa mateegh.

Yoan 4:1

Saawe tana, zeran tutuuŋa tilooŋ tighe Yesu iyau tamtamon katini timin ziŋeera, ve irughuuz zi le tiliiv Yoan ziŋeera. Eemon Yesu tauu irughuuz tamtamon mako. Mbiwa tooni mon ta tighamgham uraat tana. Yesu iwatagh ighe zeran tutuuŋa tilooŋ uraat tooni vaaru wa. Tauvene ipul taan sirivu to Yudea, ve ighe imuul ila pa Galilaia.