Lukas 22:37 - Maaron Saveeŋ Tooni Patabuyaaŋ Tuam

³⁷ Pasaa, Maaron aliiŋa ziiri ee tau tiboode na isaav ighe: ‘Yes tighita tighe i tamtamon saghati ee tau imalaaŋ pa tutuuŋ.’ Mboŋ aazne, saveeŋ tane aat ighur anooŋa ivot payau itaghon Maaron ŋgar tooni. Pasaa, saveeŋ naol tau tiboode izaa tsiau na, anooŋa ighe ivot tane.” Is 53:12; Lu 24:26+

Mutu (Oov)

³⁷ Pasa, Maaron aliŋa waaro eez to timbooda, isaav ighaze: ‘Yes tighita tighaze ye tamtoghon samia eez to imalaaŋ pa tutuuŋ.’ Is 53:12 Mboŋ aazne, saveeŋ tonene pale anoŋa ivot payou itaghon Maaron ŋgar toni. Pasa, saveeŋ naol to timbooda iza tiou, anoŋa ighaze ivot tonene.” Lu 24:26+

Lukas 22:37 Iomraidhean Croise

Markus 15:27

Saawe tau tirav Yesu izala ai pambarooŋ, tirav tamtamon ru paam. Ee, tipayooze ila pa Yesu niima tapir, ve ite ila pa ŋas. Yesuru zeran to taliiŋzizi ve ghamuuŋ malmal. Is 53:12

Lukas 18:31

Ra Yesu ipet mbiwa tooni saŋavul ve ru tila soghan, ve isaav pazi ighe: “Alooŋ. Iit taghe tala pa Yerusalem tane. Ve saveeŋ isov tau yes propet tiboode izaa to Tamtamon Naatu na, ene pale anooŋa ivot. Mbo 22; Is 53:3-7

Lukas 22:22

Onoon, Tamtamon Naatu, i aat itaghon eez tau Maaron ighuru pani na. Eemon ŋeer tau pale ighuru ila koiŋa nimazi, ene ikaria tauu wa.” Mbaŋ 1:6, 2:23

Lukas 22:36

Yesu isaav pazi muul ighe: “Aazne, ene saawe ite. Isaav ighe lemim lugluug, na aghamu tomania pepeel, ve alaagh tomania. Ve ighe lemim mbuzaagh mako, na ala agholia nonoghiiŋa tsiam to ŋgoaaŋ, mako agham maeta, ve ala aghol lemim mbuzaagh.

Lukas 22:52

Ra Yesu isaav pa yes zeran to watooŋrau tomania ŋginiiŋa to Rumei Tiina, ve pooza siriv tau tilam pa kisiiŋni na ighe: “Mindai ta alaagh tomania mbuzaagh ma zaab, ve alam pa kisiiŋ ghau? Yau ŋeer to ghamuuŋ malmal?

Lukas 23:32

Yes zaaba tigham zeran sasaghati ru gha yesŋa tila paam. Leso tirav zi timaat tomania Yesu.

Lukas 24:27

Ra Yesu ipaghazoŋai zi pa Maaron aliiŋa isov tau tiboode izaa tooni na. Ipaburigin saveeŋ tooni pa saveeŋ to Mose, ve itaghon ila ila le ipasovu ila saveeŋ isov to yes propet. Gnp 3:15; Lo 18:15; Mbo 22

Yoan 17:4

Uraat naol isov tau ughur zi ila nimag na, yau napasovuur zi tisov wa. Tauta napaghazoŋai ezam tiina tomania tapirim ve poia tsio izi taan. Yo 4:34, 13:31

2 Korin 5:21

Aghita. Krisi, i le sosor eta mako. Eemon Maaron ighur sosor toit izaa tooni ve imaat imin watooŋrau to ireua. Leso iit tau tapaak Krisi ne, tamin tamtamon duduŋazi ila Maaron maata. Is 53:6+; Ro 5:19; Ga 3:13; Pil 3:9; 1Yo 3:5

Galesia 3:13

Tauvene eez to taghoniiŋ tutuuŋ, ene igham pataŋani pait. Pa ighe tataghon duduŋai tutuuŋ mako, ene pale aatyavyav to Maaron izaa toit ve ivaghamun ghiit. Eemon Yesu igham niaan gha ibaad aatyavyav to Maaron izala ai pambarooŋ. Tauta igham mulin ghiit pa pataŋani tawe. Saveeŋa igheen pataghaaŋ wa: “Ŋeer tau ighe tiravu ve ituuk ila ai, ene aatyavyav to Maaron igheen izaa tooni.” Lo 21:23; Ro 8:3; 2Kor 5:21