Hibru 7:3 - Maaron Saveeŋ Tooni Patabuyaaŋ Tuam

³ Ve gabua ite. Ighe tawaat Maaron aliiŋa, ene taghita saveeŋ ziiri eta tau isavia Melkizedek taama gha tiina ve puughu tooni mako. Ve saawe tau tiina ipoopa, ve saawe tau i imaat na paam, tibood saveeŋa eta mako. Tauvene taghita taghe i imin ilaal poia ee pa Maaron Naatu. Pasaa, i ŋeer to watooŋrau tau iyooz bodbodaaŋ pa Maaron ve iit tamtamon irau saawe. Mbo 110:4

Mutu (Oov)

³ Ve mbeb ite. Ighaze tawaat Maaron aliŋa, nene taghita saveeŋ waaro eta to isavia Melkizedek tama ve tina ve pughu toni ne maau. Ve sawa to tina ipoopa, ve sawa to ye imaat, nene paam, timbood saveeŋa eta maau. Tovenen taghita taghaze ye inim ghilalooŋ poia eez pa Maaron Natu. Pasa, Yesu ye ŋgeu to watooŋrau to iyoon bodbodaaŋ pa Maaron ve iit tamtoghon irau sawa isob. Mbo 110:4

Hibru 7:3 Iomraidhean Croise

Matayu 4:3

Ra Ŋeer To Watiiŋ ivot tooni, ve isaav pani ighe: “Laak, isaav ighe yo Maaron Naatu, na usaav pa maet tane, ve tivot timin lem aniiŋ.”

Hibru 4:14

Tauvene ghuruuŋ ila toit tau tavovotia ne, iit takisi tuŋia. Pa iit leen daaba tiina ee to watooŋrau. Ene Yesu. I Maaron tauu Naatu. I izala le ila peria geeg to Maaron ta sambam we, leso igham avoon ve isavia saveeŋ toit ila tooni. Hib 3:1, 6:11, 10:35+

Hibru 7:1

Melkizedek tau nasavia ne, i kinik to nugh Salem, ve i ŋeer to watooŋrau tau ibesbees pa Maaron Tiina Tau Iliiv Zimaronŋa Tisov. Saawe tau Abaram yesŋa kinik siriv tigham malmal le iliiv zi, i imuul ila le izaa to Melkizedek izi eeze. Ra Melkizedek ighur poia to Maaron izaa tooni. Gnp 14:17+

Hibru 7:17

Pasaa, Maaron aliiŋa isavia ighe: “Yo ŋeer to watooŋrau imin Melkizedek. Ve yo aat uleep tauvene taghon taghon gha ila.” Mbo 110:4; Hib 5:6

Hibru 7:2

Mako Abaram iburig gha ilup gabua isov tau tila tigham malmal ve tiyau zi tilam na, ve ivalagh zi timin ŋgun saŋavul, ve igham ŋgun ee ila pa Melkizedek. Aiyo, Melkizedek eeza puughu tauvene: ‘Kinik to ŋgar duduuŋa.’ Ve i iŋgin nugh Salem. Ve Salem puughu, ene ‘ŋgar luuma.’ Tauvene i kinik to ŋgar duduuŋa ve ŋgar luuma.

Hibru 7:6

Melkizedek, i ivot ila to Levi mako. Eemon gabua tau Abaram iyau zi na, tauta ivalagh zi imin ŋgun saŋavul, ve igham ŋgun ee ila pa Melkizedek. Aghita. Abaram eeza tiina kat. Pasaa, Maaron imbu saveeŋ tomania pa gabua naol. Eemon Melkizedek eeza tiina iliiv Abaram. Tauta ipaloti, ve ighur poia to Maaron izaa tooni.