San Lucas 24:39 - Triqui de San Juan Copala

³⁹ Ni̱ꞌyaj soj raꞌaj ni̱ꞌyaj soj tacój ni̱ꞌyaj soj, ne̱ xca̱j soj cuentá se vaa ma̱ꞌanj me á. Xa̱ꞌ taꞌnaj, tza̱j ne̱ taj nee̱ man soꞌ do̱ꞌ, taj cúú man soꞌ do̱ꞌ maꞌ ―taj Jesús rihaan nij soꞌ a.

San Lucas 24:39 Iomraidhean Croise

San Lucas 23:46

Ga̱a ne̱ nucua̱j ndoꞌo caguáj Jesús, cataj soꞌ a: ―Naca̱j so̱ꞌ nimanj, Ata̱j Chij ―taj soꞌ a. Ne̱ veé dan caviꞌ soꞌ a.

San Lucas 24:38

Ga̱a ne̱ cataj Jesús rihaan nij soꞌ a: ―Me cheꞌé nanó ndoꞌo rá soj, ne̱ me cheꞌé uun vi̱j rá soj ga̱.

San Lucas 24:40

Ga̱a caꞌmii soꞌ da̱nj, ne̱ tihaa̱n soꞌ raꞌa soꞌ do̱ꞌ, tacóó soꞌ do̱ꞌ, rihaan nij soꞌ a.

San Juan 20:20

Quisíj caꞌmii soꞌ da̱nj, ga̱a ne̱ tihaa̱n soꞌ raꞌa soꞌ tihaa̱n soꞌ xꞌnúú soꞌ tihaa̱n soꞌ rihaan nij soꞌ a. Ga̱a queneꞌen nij soꞌ nu̱ꞌ yoꞌ, ga̱a ne̱ guun niha̱ꞌ ya̱ rá nimán nij síí tucuꞌyón snana̱ soꞌ niꞌya̱j nij soꞌ man Síí ꞌNi̱j Raꞌa man níꞌ a.

San Juan 20:25

Cheꞌé dan cataj xnaꞌanj ꞌó nij síí tucuꞌyón snana̱ Jesús rihaan Tomás se vaa queneꞌen nij soꞌ man Síí ꞌNi̱j Raꞌa man níꞌ a. Tza̱j ne̱ cataj Tomás rihaan nij soꞌ a: ―Sese se̱ queneꞌen ma̱ꞌanj rej catúj caquíí raꞌa soꞌ, ne̱ sese se̱ cutaj raꞌaj rej catúj caquíí raꞌa soꞌ do̱ꞌ, sese se̱ cutaj raꞌaj rej quiranꞌ chiꞌii̱ xꞌnúú soꞌ do̱ꞌ, ne̱ daj chiha̱a̱ míj se̱ cuchumán raj se vaa cunuu iꞌna̱ꞌ uún soꞌ maꞌ ―taj Tomás rihaan nij soꞌ a.

San Juan 20:27

Ga̱a ne̱ cataj soꞌ rihaan Tomás a: ―Tu̱cuaꞌanj so̱ꞌ raꞌá so̱ꞌ nihánj, ga̱a ne̱ xca̱j so̱ꞌ cuentá da̱j vaa raꞌaj, ne̱ cuta̱ꞌ so̱ꞌ raꞌá so̱ꞌ xꞌnúú ꞌu̱nj nihánj rej catúj chruun lanzá, ga̱a ne̱ gu̱un ya̱ ya̱ rá so̱ꞌ se vaa cunuu iꞌna̱ꞌ uún ꞌu̱nj á. Cuchuma̱n rá so̱ꞌ, ni̱ꞌyaj so̱ꞌ manj á ―taj soꞌ rihaan Tomás a.

Hechos 1:3

Dan me se ga̱a quisíj caviꞌ Jesús rihaan rcutze̱, ga̱a ne̱ guun queꞌe̱e̱ tihaa̱n soꞌ man soꞌ rihaan nij síí cuneꞌ soꞌ, cheꞌé rej gu̱un ya̱ rá nij soꞌ se vaa ya̱ cunuu iꞌna̱ꞌ uún soꞌ a. Dan me se quisíj queꞌe̱e̱ queneꞌen nij síí cuneꞌ Jesús man soꞌ rque vi̱j chiha̱a̱ (40) güii, ne̱ caꞌmii ndoꞌo soꞌ ga̱ nij soꞌ cheꞌé da̱j vaa uun chij Yaꞌanj a.

1 Tesalonicenses 5:23

Yaꞌanj roꞌ, me síí naquiꞌyaj xe̱j nimán níꞌ, ne̱ me rá núj cunu̱u sa̱ꞌ ina̱nj nimán soj rihaan soꞌ, quiꞌya̱j maꞌa̱n soꞌ, ne̱ tu̱mé Yaꞌanj man maꞌa̱n soj nda̱a se quisi̱j güii caꞌna̱ꞌ uún Jesucristó Si̱j ꞌNi̱j Raꞌa man níꞌ a. Ne̱ dan me se me rá núj tu̱mé Yaꞌanj man nimán soj do̱ꞌ, man nee̱ man soj do̱ꞌ, ne̱ a̱ ꞌó cacunꞌ se̱ tumé soj a̱ maꞌ.

Hebreos 12:9

Dan me se vaa rej níꞌ síí ya̱nj rihaan chumii̱ nihánj, ne̱ tucuꞌyón nij soꞌ chrej nucua̱j man níꞌ da̱j quiꞌya̱j níꞌ, ne̱ aráj cochro̱j níꞌ rihaan nij soꞌ ado̱nj. Cheꞌé dan táá a̱ doj sese cuno̱ sa̱ꞌ níꞌ rihaan Yaꞌanj na̱nj ado̱nj. ꞌO̱ se Rej nimán ya̱ níꞌ me Yaꞌanj chugua̱nj. Dan me se ꞌo̱ ga̱a̱ iꞌna̱ꞌ nimán níꞌ, quiꞌya̱j soꞌ ado̱nj.

1 Juan 1:1

Dan me se núj me se cata̱j xnaꞌanj núj rihaan nij soj cheꞌé ꞌo̱ síí cayáán ga̱a naá asi̱j guun cheꞌe̱ Yaꞌanj quiꞌyaj Yaꞌanj chumii̱, ne̱ ina̱nj se vaa cuno maꞌa̱n núj do̱ꞌ, se vaa queneꞌen rihaan maꞌa̱n núj do̱ꞌ, se vaa cutaꞌ núj raꞌa núj xráá do̱ꞌ, cheꞌé ina̱nj rasu̱u̱n vaa da̱nj cata̱j xnaꞌanj núj rihaan soj a. Dan me se cata̱j xnaꞌanj núj cheꞌé síí me Snana̱ Yaꞌanj, ne̱ soꞌ me síí quiꞌya̱j ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj ado̱nj.