San Juan 16:13 - Triqui de San Juan Copala

¹³ Tza̱j ne̱ asa̱ꞌ caꞌnaꞌ Nimán Yaꞌanj yoꞌ, ne̱ tu̱cuꞌyón soꞌ nu̱ꞌ nana̱ ya̱ rihaan soj na̱nj ado̱nj. ꞌO̱ se si̱j aꞌmii ina̱nj nana̱ ya̱ me soꞌ ado̱nj. ꞌO̱ se se̱ caꞌmii soꞌ nana̱ cavi̱i̱ raa̱ soꞌ maꞌ. Tana̱nj caꞌmi̱i̱ soꞌ ina̱nj nana̱ cata̱j xnaꞌanj Yaꞌanj cuno̱ soꞌ, ne̱ dan me se cata̱j xnaꞌanj soꞌ cheꞌé se vaa caꞌna̱ꞌ rihaan soj rej rihaan soj na̱nj ado̱nj.

San Juan 16:13 Iomraidhean Croise

San Juan 12:49

Ne̱ ꞌu̱nj nihánj me se né ina̱nj nana̱ cavii raj me nana̱ caꞌmij maꞌ. ꞌO̱ se Réj síí caꞌnéé manj me síí caꞌneꞌ suun rihanj da̱j caꞌmi̱j na̱nj á.

San Juan 14:17

Dan me se Nimán Yaꞌanj me síí cuchi̱ꞌ rihaan soj, ne̱ ina̱nj nana̱ ya̱ rque̱ soꞌ man soj a. Tza̱j ne̱ se̱ guun nucua̱j nij síí noco̱ꞌ se‑chre̱j chumii̱ nihánj naca̱j nij soꞌ man Nimán Yaꞌanj a̱ maꞌ. ꞌO̱ se ne neꞌen nij soꞌ man soꞌ maꞌ. Tza̱j ne̱ soj me se neꞌen soj man soꞌ, cheꞌé se ya̱nj soꞌ ga̱ soj, ne̱ ꞌo̱ ca̱yáán soꞌ nimán soj ado̱nj.

San Juan 14:26

Tza̱j ne̱ vaa güii caꞌne̱j Réj Yaꞌanj man Nimán soꞌ cuchi̱ꞌ Nimán soꞌ rihaan soj cheꞌé se‑chu̱vií ꞌu̱nj a. Ne̱ ra̱cuíj ndoꞌo Nimán soꞌ man soj, ga̱a ne̱ tu̱cuꞌyón Nimán soꞌ nu̱ꞌ nana̱ man soj a. Ne̱ ninu̱j rá soj nu̱ꞌ nana̱ caꞌmij rihaan soj, quiꞌya̱j Nimán Yaꞌanj yoꞌ na̱nj ado̱nj.

San Juan 14:6

Ga̱a ne̱ cataj Jesús rihaan soꞌ a: ―Ma̱ꞌanj me guun chrej rihaan soj, ne̱ ma̱ꞌanj me nana̱ ya̱ cuno̱ soj, ne̱ ma̱ꞌanj me síí quiꞌya̱j ga̱a̱ iꞌna̱ꞌ nimán soj ado̱nj. Sese se̱ caꞌvej rá ꞌo̱ soꞌ canoco̱ꞌ soꞌ manj, ne̱ daj chiha̱a̱ míj se̱ cuchiꞌ soꞌ rihaan Réj Yaꞌanj a̱ maꞌ.

San Juan 15:26

’Dan me se caꞌne̱j ꞌu̱nj Nimán Yaꞌanj cavi̱i̱ soꞌ rej ya̱nj Yaꞌanj caꞌna̱ꞌ soꞌ rihaan soj, ne̱ ra̱cuíj ndoꞌo soꞌ man soj, ne̱ ina̱nj nana̱ ya̱ rque̱ soꞌ man soj a. Asa̱ꞌ caꞌnaꞌ Nimán Yaꞌanj rihaan soj, ga̱a ne̱ cata̱j xnaꞌanj soꞌ rihaan nij yuvii̱ cheꞌej ado̱nj.

San Juan 16:12

’Dan me se vaa uxrá doj chrej me raj cata̱j xnaꞌanj ꞌu̱nj rihaan soj, tza̱j ne̱ se̱ guun nucua̱j soj cuno̱ soj chrej yoꞌ cuano̱ a̱ maꞌ.

San Juan 3:32

Ne̱ aꞌmii soꞌ cheꞌé se vaa queneꞌen soꞌ rej xta̱ꞌ do̱ꞌ, cheꞌé nana̱ cuno soꞌ rej xta̱ꞌ do̱ꞌ, ne̱ taj va̱j síí amán rá snana̱ soꞌ maꞌ.

San Juan 8:38

Dan me se aꞌmii ꞌu̱nj ina̱nj se vaa queneꞌenj ga̱a nicúnꞌ ꞌu̱nj rihaan Réj a. Tza̱j ne̱ nij soj me síí ꞌyaj nda̱a vaa cataj rej soj rihaan soj ado̱nj ―taj Jesús rihaan nij soꞌ a.

Hechos 11:28

Ne̱ canicunꞌ ꞌo̱ nij síí nataꞌ snana̱ Yaꞌanj yoꞌ, ne̱ síí cuꞌna̱j Agabo me soꞌ a. Ne̱ nataꞌ soꞌ nana̱ rqué Nimán Yaꞌanj rihaan soꞌ se vaa vaa güii, ne̱ cache̱n xꞌnaa nu̱ꞌ chumanꞌ uun chij nij síí ma̱n Romá rihaan a. Ne̱ ga̱a cayáán síí cuꞌna̱j Claudio síí nica̱j suun emperador, ne̱ cachén ya̱ xꞌnaa nda̱a vaa cataj síí cuꞌna̱j Agabo a.

Hechos 20:23

Tza̱j ne̱ neꞌén ꞌu̱nj se vaa da̱j a̱ chumanꞌ va̱j ꞌu̱nj, ne̱ Nimán Yaꞌanj ꞌo̱ xraan ina̱nj taj xnaꞌanj rihaan ꞌu̱nj se vaa vaa güii, ne̱ caxri̱i̱ nii tagaꞌ manj ne̱ quiꞌya̱j ndoꞌo nii sayuun manj na̱nj ado̱nj.

Hechos 27:24

ne̱ cataj soꞌ a: “Se̱ cuchuꞌvíꞌ so̱ꞌ, maan Pablo. ꞌO̱ se no̱ xcúún so̱ꞌ ca̱nicúnꞌ so̱ꞌ rihaan emperador cuꞌna̱j César, ne̱ nihánj me se cata̱j xnaꞌanj ꞌu̱nj rihaan so̱ꞌ se vaa a̱j guun rá Yaꞌanj se vaa ya̱ ya̱ ca̱ráán Yaꞌanj rihaan sayuun cavi̱ꞌ cheꞌé so̱ꞌ ga̱ cunuda̱nj nij síí nu̱u̱ rque rihoo nihánj ado̱nj”, taj se‑mo̱zó Yaꞌanj rihanj a.

2 Tesalonicenses 2:12

Ga̱a ne̱ cata̱j Yaꞌanj se vaa ya̱ síí tumé cacunꞌ me cunuda̱nj nij yuvii̱ ne cuchuma̱n rá nana̱ ya̱, ne̱ ina̱nj chrej chiꞌi̱i̱ niha̱ꞌ rá nij soꞌ canoco̱ꞌ nij soꞌ ado̱nj.

2 Tesalonicenses 2:3

Dan me se naꞌvej uxrá raj tiha̱ꞌ yuꞌunj nii a̱ doj man soj a̱ maꞌ. Dan me se asino tucua̱j ndoꞌo yuvii̱ rihaan Yaꞌanj, ne̱ caꞌna̱ꞌ ꞌo̱ síí chiꞌi̱i̱ uxrá rihaan chumii̱, ne̱ síí se̱ caꞌvej rá cuno̱ rihaan Yaꞌanj gu̱un soꞌ a. Dan me se xa̱ꞌ soꞌ, tza̱j ne̱ si̱j a̱j caca̱a̱ gu̱un soꞌ vaa güii ado̱nj.

Hebreos 1:1

Nataꞌ uxrá Yaꞌanj snana̱ soꞌ rihaan nij síí nataꞌ snana̱ Yaꞌanj ga̱a naá, ne̱ nataꞌ nij soꞌ nana̱ yoꞌ rihaan nij xi̱i níꞌ nij síí cumán ga̱a naá a. Dan me se do̱ꞌ do̱ꞌ cataj xnaꞌanj Yaꞌanj snana̱ soꞌ rihaan nij síí nataꞌ yoꞌ, ne̱ ino̱ vaa tihaa̱n ꞌo̱ ꞌo̱ nij soꞌ rihaan nij xi̱i níꞌ da̱j taj Yaꞌanj a.

1 Juan 2:20

Ne̱ xa̱ꞌ soj, tza̱j ne̱ nu̱u̱ Nimán Yaꞌanj nimán soj, ne̱ xcaj soj cuentá ne̱ neꞌen cunuda̱nj soj nana̱ ya̱ ꞌyaj Nimán Yaꞌanj ado̱nj.

1 Juan 2:27

Ne̱ xa̱ꞌ soj, tza̱j ne̱ cheꞌé se nu̱u̱ Nimán Yaꞌanj nimán soj quiꞌyaj Cristó, ne̱ cheꞌé dan ꞌo̱ nocoꞌ soj man Cristó, ne̱ taj cheꞌé tu̱cuꞌyón nii doj nana̱ man soj a̱ maꞌ. Tana̱nj cheꞌé se nu̱u̱ Nimán Yaꞌanj nimán soj, cheꞌé dan a̱j nariꞌ soj nana̱ cheꞌé nu̱ꞌ rasu̱u̱n, ne̱ ina̱nj nana̱ ya̱ nariꞌ soj ado̱nj. Né na̱na̱ ne̱ me nana̱ nariꞌ soj, quiꞌyaj Nimán Yaꞌanj maꞌ. Dan me se ꞌo̱ canoco̱ꞌ soj man Cristó, nda̱a vaa tucuꞌyón ya̱ Nimán Yaꞌanj man soj ado̱nj.

1 Juan 4:6

Tza̱j ne̱ síí ya̱ noco̱ꞌ man Yaꞌanj me níꞌ, ne̱ nij síí neꞌen man Yaꞌanj roꞌ, uno nij soꞌ snana̱ níꞌ ado̱nj. Ne̱ xa̱ꞌ síí ne nocoꞌ man Yaꞌanj, tza̱j ne̱ ne uno nij soꞌ snana̱ níꞌ a̱ maꞌ. Cheꞌé dan neꞌen níꞌ me síí nu̱u̱ Nimán Yaꞌanj nimán, ne̱ neꞌen níꞌ me síí nu̱u̱ nana̱ tihaꞌ yuꞌunj nimán chugua̱nj.

1 Juan 5:6

Nihánj me Jesucristó síí caꞌnaꞌ cata̱ꞌ ne, ne̱ ꞌo̱ se ne caꞌna̱ꞌ soꞌ cata̱ꞌ ne u̱u̱n soꞌ maꞌ. Dan me se caꞌnaꞌ soꞌ cata̱ꞌ ne soꞌ, ne̱ caꞌnaꞌ soꞌ caya̱nj ton man soꞌ ne̱ cavi̱ꞌ soꞌ cheꞌé níꞌ uún ado̱nj. ꞌO̱ se Nimán Yaꞌanj taj xnaꞌanj rihaan níꞌ, ne̱ amán ya̱ rá níꞌ, ese ya̱ uxrá aꞌmii Nimán Yaꞌanj ado̱nj.

Apocalipsis 1:1

Nihánj me nij rasu̱u̱n tihaa̱n naca̱ Jesucristó rihaan nij síí nu̱u̱ rihaan soꞌ, nda̱a vaa cataj xnaꞌanj maꞌa̱n Yaꞌanj rihaan soꞌ, ne̱ rasu̱u̱n gu̱un raꞌya̱nj ya̱ vaa güii me nij rasu̱u̱n yoꞌ ado̱nj. Ne̱ Jesucristó roꞌ, soꞌ me síí caꞌnéé se‑mo̱zó soꞌ rihaan síí cuꞌna̱j Juan síí nu̱u̱ rihaan soꞌ, ne̱ dan me se xcaj Juan cuentá cheꞌé nu̱ꞌ nij rasu̱u̱n nihánj, quiꞌyaj Jesucristó ado̱nj.

Apocalipsis 1:19

’Cheꞌé dan me cachro̱n so̱ꞌ nana̱ rihaan yanj cheꞌé nu̱ꞌ se vaa queneꞌén so̱ꞌ nihánj do̱ꞌ, rasu̱u̱n ma̱n cuano̱ do̱ꞌ, rasu̱u̱n caꞌna̱ꞌ rej riha̱a̱n do̱ꞌ a.