Efesios 2:12 - Triqui de San Juan Copala

¹² se vaa ga̱a rque̱ roꞌ, né si̱j noco̱ꞌ man Cristó me nij soj maꞌ. ꞌO̱ se si̱j yaníj rihaan núj si̱j israelitá me soj ga̱a naá na̱nj ado̱nj. Dan me se né si̱j no̱ xcúún a̱ ꞌó xcoꞌ canoco̱ꞌ man Yaꞌanj me soj ga̱a rque̱ maꞌ. Ma̱an se si̱j ya̱nj rmaꞌa̱n rihaan chumii̱ me soj na̱nj ado̱nj. Dan me se ya̱ cataꞌ tuꞌva Yaꞌanj cheꞌé núj si̱j israelitá da̱j caꞌve̱e cavi̱i̱ sa̱ꞌ núj, tza̱j ne̱ taj nana̱ cataꞌ tuꞌva Yaꞌanj cheꞌé nij soj ga̱a rque̱ maꞌ. Dan me se a̱j queneꞌen nij soj se vaa se̱ cavii sa̱ꞌ nij soj do̱ꞌ, se̱ racuíj Yaꞌanj man nij soj do̱ꞌ, ga̱a maan ado̱nj. Ma̱an se chéé u̱u̱n nij soj rihaan chumii̱ ga̱a rque̱ na̱nj ado̱nj.

Efesios 2:12 Iomraidhean Croise

San Lucas 1:72

Dan me se cunuu ꞌe̱e̱ rá soꞌ man xi̱i níꞌ, ne̱ ꞌo̱ nuû rá soꞌ nana̱ gue̱e̱ se vaa cataꞌ tuꞌva soꞌ se vaa quiꞌya̱j soꞌ cheꞌé níꞌ do̱ꞌ a.

San Juan 10:16

Ne̱ vaa doj daán ꞌu̱nj matzinj uún, tza̱j ne̱ nuviꞌ nij xoꞌ rej nu̱u̱ nij matzinj nihánj maꞌ. Ne̱ vaa cheꞌé caꞌna̱ꞌ ꞌó matzinj yoꞌ uún, qui̱ꞌyáj, ne̱ cuno̱ nij xoꞌ snana̱ ꞌu̱nj a. Ga̱a ne̱ cunu̱u chre̱ꞌ nij xoꞌ ga̱ matzinj nihánj, ga̱a ne̱ tu̱mé ꞌu̱nj man cunuda̱nj nij xoꞌ ado̱nj.

San Juan 15:5

’Dan me se ꞌu̱nj nihánj me maꞌa̱n chruun uvá, ne̱ soj me raꞌa catu̱u̱n avii xráá raꞌa ma̱nj na̱nj á. Ne̱ sese ꞌo̱ cuno̱ soj rihanj, ne̱ sese ꞌo̱ cu̱nuû ꞌu̱nj nimán soj, ne̱ quiꞌya̱j uxrá soj se vaa me rá Yaꞌanj quiꞌya̱j soj chugua̱nj. ꞌO̱ se sese se̱ racuíj ꞌu̱nj man soj, ne̱ se̱ guun nucua̱j soj quiꞌya̱j soj a̱ doj suun sa̱ꞌ maꞌ.

San Juan 4:22

Dan me se ne neꞌen nij soj man síí aráj gue̱e̱ soj rihaan maꞌ. Tza̱j ne̱ xa̱ꞌ núj si̱j israelitá, tza̱j ne̱ neꞌen núj man síí aráj gue̱e̱ núj rihaan a. ꞌO̱ se scaꞌnúj núj si̱j israelitá cavi̱i̱ síí ti̱nanii man nij yuvii̱ rihaan sayuun a.

Hechos 2:39

Dan me se cataꞌ tuꞌva Yaꞌanj se vaa quiꞌya̱j soꞌ da̱nj cheꞌé nij soj do̱ꞌ, cheꞌé taꞌníí soj do̱ꞌ, cheꞌé nij síí ya̱nj ga̱nꞌ do̱ꞌ a. Dan me se me maꞌa̱n síí nacu̱nj Yaꞌanj Si̱j ꞌNi̱j Raꞌa man níꞌ canoco̱ꞌ man soꞌ me se quiꞌya̱j Yaꞌanj da̱nj cheꞌé soꞌ ado̱nj ―taj Pedró rihaan nij yuvii̱ israelitá yoꞌ a.

Hechos 28:20

Cheꞌé dan canacúún ꞌu̱nj man nij soj caꞌna̱ꞌ soj, cheꞌé se guun rá ꞌu̱nj que̱neꞌén ꞌu̱nj man soj do̱ꞌ, caꞌmi̱i̱ ꞌu̱nj ga̱ soj do̱ꞌ a. ꞌO̱ se cheꞌé síí naꞌvi̱j níꞌ síí caꞌve̱e quiꞌya̱j cavi̱i̱ sa̱ꞌ níꞌ si̱j israelitá roꞌ, me nu̱mií ꞌu̱nj agaꞌ ne̱ꞌ nihánj ado̱nj ―taj Pabló rihaan ꞌó nij síí israelitá yoꞌ a.

Hechos 3:25

’Ne̱ rihaan maꞌa̱n nij soj caꞌmii nij síí nataꞌ snana̱ Yaꞌanj, ne̱ maꞌa̱n nij soj me nij síí cavi̱i̱ sa̱ꞌ quiꞌya̱j Yaꞌanj, nda̱a vaa cataꞌ tuꞌva Yaꞌanj rihaan xi̱i níꞌ ga̱a naá na̱nj á. Dan me se rihaan xi̱i níꞌ síí cuꞌna̱j Abraham cataj Yaꞌanj a: “Dan me se cavi̱i̱ sa̱ꞌ ta̱ranꞌ nij xꞌneꞌ yuvii̱ ino̱ vaa stucua̱nj ma̱n rihaan chumii̱, quiꞌya̱j taꞌníí taꞌnij siꞌno̱ so̱ꞌ a”, taj Yaꞌanj rihaan Abraham a.

Romanos 9:8

Dan me se cataj Yaꞌanj se vaa se̱ guun taꞌni̱j Yaꞌanj man cunuda̱nj nij taꞌníí taꞌnij siꞌno̱ Abraham maꞌ. Ma̱an se taꞌa̱j nij soꞌ narii Yaꞌanj, ne̱ ina̱nj cheꞌé nij síí narii Yaꞌanj caꞌmii Yaꞌanj, ga̱a cataꞌ tuꞌva Yaꞌanj se vaa ya̱ canoco̱ꞌ nij soꞌ man soꞌ a.

Gálatas 4:8

Ga̱a rque̱ me se ne neꞌen ya̱ soj da̱j vaa Yaꞌanj maꞌ. Cheꞌé dan me soj mozó rihaan nij yaꞌanj uun chij rihaan rasu̱u̱n ma̱n rihaan chumii̱ nihánj, tza̱j ne̱ né yaꞌa̱nj ya̱ me nij yaꞌanj yoꞌ maꞌ.

Efesios 2:19

Cheꞌé dan né si̱j ma̱n ꞌó chumanꞌ me soj a̱ maꞌ. ꞌO̱ se si̱j neꞌen man Yaꞌanj me nij soj cuano̱ na̱nj ado̱nj. Né si̱j noco̱ꞌ ꞌó tucuáán me soj maꞌ. Tana̱nj maꞌa̱n soj cunuu rcuaꞌa̱a̱n ga̱ nij síí noco̱ꞌ man Yaꞌanj ya̱j ado̱nj.

Efesios 4:18

ne̱ ne uun nucua̱j nij soꞌ xca̱j sa̱ꞌ nij soꞌ cuentá a̱ maꞌ. Se̱ cavii sa̱ꞌ nimán nij soꞌ, quiꞌya̱j Yaꞌanj maꞌ. Ma̱an se quira̱nꞌ nij soꞌ sayuun cheꞌé se síí niꞌyo̱n me nij soꞌ ne̱ nichra̱j ndoꞌo nimán nij soꞌ ado̱nj.

Colosenses 1:21

Ga̱a naá me se yuvii̱ yaníj me soj, ne̱ yuvii̱ ta̱j riꞌyunj man Yaꞌanj me soj a. ꞌO̱ se qui̱j vaa rá soj, ne̱ ina̱nj se chiꞌi̱i̱ quiꞌyaj soj ado̱nj.

Colosenses 1:27

Dan me se guun rá Yaꞌanj xca̱j cunuda̱nj níꞌ si̱j noco̱ꞌ man soꞌ cuentá cheꞌé nana̱ sa̱ꞌ yuve̱ nihánj nana̱ tihaa̱n naca̱ Yaꞌanj se vaa niꞌndaj ya̱ sa̱ꞌ quiꞌyaj Yaꞌanj cheꞌé soj si̱j yaníj na̱nj ado̱nj. Dan me se yuvii̱ yaníj me soj, tza̱j ne̱ ya̱nj Cristó nimán soj, ne̱ cheꞌé dan uun ya̱ rá níꞌ se vaa niꞌndaj ya̱ cavi̱i̱ sa̱ꞌ soj ga̱ Yaꞌanj vaa güii na̱nj ado̱nj.

Colosenses 1:5

Da̱nj vaa rá soj cuano̱, cheꞌé se cuno soj nana̱ sa̱ꞌ cheꞌé Cristó nana̱ ya̱, ne̱ uun ya̱ rá soj se vaa ma̱n ndoꞌo se sa̱ꞌ rej xta̱ꞌ quiri̱ꞌ soj vaa güii ado̱nj.

1 Tesalonicenses 4:13

Me rá núj queneꞌe̱n soj da̱j quira̱nꞌ nij tinúú níꞌ nij síí noco̱ꞌ man Cristó nij síí a̱j caviꞌ, tinu̱j, nocoj. Ne̱ se̱ quinanó rá soj cheꞌé tinúú níꞌ síí caviꞌ maꞌ. Dan me se nij síí ne nocoꞌ man Yaꞌanj roꞌ, nanó ndoꞌo rá nij soꞌ cheꞌé tuviꞌ nij soꞌ síí caviꞌ cheꞌé se ne uun ya̱ rá nij soꞌ se vaa cunu̱u iꞌna̱ꞌ uún tuviꞌ nij soꞌ síí caviꞌ maꞌ.

1 Tesalonicenses 4:5

Dan me se se̱ guun canoco̱ꞌ soj tucuáán noco̱ꞌ nij yuvii̱ ne neꞌen man Yaꞌanj maꞌ. Ma̱an cheꞌé se veꞌé vaa chana̱ rihaan nij soꞌ, ne̱ uun rá nij soꞌ coto̱j nij soꞌ ga̱ chana̱ a.

2 Tesalonicenses 2:16

Ne̱ me rá núj nari̱ꞌ nucuaj nimán soj, quiꞌya̱j maꞌa̱n Jesucristó Si̱j ꞌNi̱j Raꞌa man níꞌ do̱ꞌ, Rej níꞌ Yaꞌanj do̱ꞌ a. Ne̱ Yaꞌanj roꞌ, me síí ꞌe̱e̱ rá man níꞌ, ne̱ quiꞌyaj ndoꞌo soꞌ se lu̱j ga̱ níꞌ se vaa naquiꞌyaj nucua̱j soꞌ nimán níꞌ nu̱ꞌ cavii nu̱ꞌ caꞌanj, ne̱ uun ya̱ rá níꞌ se vaa cavi̱i̱ sa̱ꞌ níꞌ, quiꞌya̱j uún soꞌ ado̱nj. Ne̱ me rá núj gu̱un nucua̱j soj quiꞌya̱j soj nu̱ꞌ suun sa̱ꞌ, ne̱ caꞌmi̱i̱ soj nu̱ꞌ nana̱ sa̱ꞌ, quiꞌya̱j Yaꞌanj ado̱nj.

1 Timoteo 1:1

ꞌU̱nj nihánj me síí cuꞌna̱j Pabló síí cuneꞌ Cristó Jesús caꞌa̱nj nata̱ꞌ snana̱ soꞌ rihaan yuvii̱ a. Yoꞌ me suun caꞌneꞌ Yaꞌanj Si̱j Tinanii man níꞌ rihaan Sayuun do̱ꞌ, Cristó Jesús si̱j nucua̱j ya̱ rá níꞌ quiꞌya̱j cavi̱i̱ sa̱ꞌ níꞌ do̱ꞌ ado̱nj.

Hebreos 11:34

tinaꞌáj nij soꞌ yaꞌan yuva̱a̱ se̱ gaa na̱nj caca̱a̱ nij soꞌ quiꞌya̱j yaꞌan do̱ꞌ, nanii nij soꞌ rihaan yuvii̱ nica̱j neê espadá me rá ticavi̱ꞌ man nij soꞌ do̱ꞌ, nariꞌ nucuaj nij soꞌ quiꞌyaj Yaꞌanj ga̱a ninaj nij soꞌ do̱ꞌ, guun nucua̱j nij soꞌ quiꞌyaj canaán nij soꞌ rihaan síí ma̱n ꞌó chumanꞌ síí cunuꞌ ga̱ nij soꞌ do̱ꞌ, tucunánj nij soꞌ man xꞌneꞌ tanuu ꞌnaꞌ ꞌó chumanꞌ me rá cunu̱ꞌ ga̱ nij soꞌ do̱ꞌ ado̱nj.

Hebreos 6:18

Dan me se asino cataꞌ tuꞌva Yaꞌanj, ga̱a ne̱ cutaꞌ Yaꞌanj raa̱ maꞌa̱n soꞌ a. Dan me se quisíj vi̱j nana̱ caꞌmii soꞌ, ne̱ daj chiha̱a̱ míj se̱ natuná Yaꞌanj snana̱ soꞌ maꞌ. ꞌO̱ se ne uun nucua̱j Yaꞌanj aꞌmii Yaꞌanj nana̱ ne̱ maꞌ. Cheꞌé dan me ndoꞌo rá níꞌ ra̱cuíj Yaꞌanj man níꞌ, ne̱ cheꞌé dan vaa cheꞌé ndoꞌo cuchuma̱n rá níꞌ, ne̱ gu̱un ya̱ rá níꞌ se vaa ya̱ cavi̱i̱ sa̱ꞌ níꞌ, nda̱a vaa cataꞌ tuꞌva Yaꞌanj rihaan níꞌ na̱nj ado̱nj.

Hebreos 8:6

Tza̱j ne̱ cuano̱ roꞌ, sa̱ꞌ uxrá doj vaa suun ꞌyaj Jesús rihaan suun ꞌyaj nij xrej ma̱n rque nuvií noco̱o, cheꞌé se suun ꞌyaj Jesús me nicunꞌ soꞌ tanu̱u̱ Yaꞌanj ga̱ níꞌ ado̱nj. ꞌO̱ se sa̱ꞌ uxrá doj vaa tucuáán naca̱ nihánj rihaan tucuáán nga̱ cheꞌé se sa̱ꞌ doj vaa nana̱ cataꞌ tuꞌva Yaꞌanj rihaan níꞌ ga̱a cuchruj soꞌ tucuáán naca̱ chugua̱nj.

1 Pedro 1:21

Ne̱ cheꞌé se vaa quiꞌyaj Cristó cheꞌé soj roꞌ, cheꞌé dan amán rá soj niꞌya̱j soj man Yaꞌanj cheꞌé se soꞌ me síí naquiꞌyaj iꞌna̱ꞌ man Cristó, ne̱ soꞌ me síí quiꞌyaj se vaa taj yuvii̱ se vaa niꞌndaj ya̱ sa̱ꞌ cavii Cristó a. Ne̱ cheꞌé se da̱nj quiꞌyaj Yaꞌanj roꞌ, cheꞌé dan amán rá soj niꞌya̱j soj man Yaꞌanj, ne̱ naꞌvi̱j soj quisi̱j güii cavi̱i̱ sa̱ꞌ ndoꞌo soj quiꞌya̱j soꞌ a.

1 Pedro 1:3

Cata̱j níꞌ se vaa ina̱nj sa̱ꞌ uxrá vaa Yaꞌanj Rej Jesucristó Si̱j ꞌNi̱j Raꞌa man níꞌ á. Cheꞌé se ꞌe̱e̱ uxrá rá Yaꞌanj niꞌya̱j soꞌ man níꞌ, ne̱ naquiꞌyaj iꞌna̱ꞌ soꞌ man Jesucristó, yan caꞌnga̱a̱ naca̱ nimán níꞌ ne̱ uun ya̱ rá níꞌ se vaa ca̱yáán níꞌ rihaan soꞌ nu̱ꞌ cavii nu̱ꞌ caꞌanj ado̱nj.

1 Pedro 3:15

Cara̱a̱ cochro̱j soj ni̱ꞌyaj soj man Cristó Si̱j ꞌNi̱j Raꞌa man níꞌ á. Xca̱j soj cuentá da̱j ga̱a̱ caꞌmi̱i̱ soj ga̱ me maꞌa̱n síí xnáꞌanj man soj me cheꞌé me uun ya̱ rá soj se vaa cavi̱i̱ sa̱ꞌ soj quiꞌya̱j Yaꞌanj vaa güii a. Veꞌé nata̱ꞌ soj rihaan nij síí xnáꞌanj man soj, ne̱ se̱ naquiꞌyaj xta̱ꞌ soj nimán soj asa̱ꞌ nataꞌ soj snana̱ Yaꞌanj maꞌ.

1 Juan 3:3

Ne̱ nij síí uun ya̱ rá se vaa queneꞌe̱n nij soꞌ man Cristó roꞌ, ya̱ cunu̱u sa̱ꞌ nimán nij soꞌ quiꞌya̱j nij soꞌ, ne̱ ase vaa sa̱ꞌ nimán Cristó roꞌ, da̱nj ga̱a̱ sa̱ꞌ nimán nij soꞌ uún ado̱nj.