Apocalipsis 12:11 - Triqui de San Juan Copala

¹¹ Ne̱ quiꞌyaj canaán nij tinúú níꞌ man xcuáá tuꞌvi̱i cheꞌé ton cayanj man Matzinj Leꞌe̱j yoꞌ cheꞌé nij tinúú níꞌ, ne̱ cheꞌé se nataꞌ nij soꞌ nana̱ ya̱ sa̱ꞌ rihaan yuvii̱ roꞌ, cheꞌé dan quiꞌyaj canaán nij soꞌ rihaan xcuáá tuꞌvi̱i yoꞌ na̱nj ado̱nj. Ne̱ nij soꞌ me se ne cuchuꞌvi̱ꞌ nij soꞌ sese cavi̱ꞌ nij soꞌ cheꞌé nana̱ sa̱ꞌ nataꞌ nij soꞌ maꞌ.

Apocalipsis 12:11 Iomraidhean Croise

San Lucas 14:26

―Sese me rá ꞌo̱ soꞌ caꞌna̱ꞌ soꞌ rihanj, ne̱ sese gu̱un rá soꞌ se vaa vaa se uun doj rej soꞌ do̱ꞌ, nii soꞌ do̱ꞌ, nica̱ soꞌ do̱ꞌ, taꞌníí soꞌ do̱ꞌ, tinúú soꞌ do̱ꞌ, raꞌvij soꞌ do̱ꞌ, nda̱a nimán maꞌa̱n soꞌ do̱ꞌ, rihanj, ne̱ se̱ caꞌvee gu̱un soꞌ ꞌo̱ síí tucuꞌyón snana̱j a̱ maꞌ.

San Juan 16:33

Nu̱ꞌ nana̱ nihánj caꞌmij rihaan soj, cheꞌé se me raj ga̱a̱ xe̱j nimán soj cheꞌé se noco̱ꞌ soj manj a. Quira̱nꞌ soj sayuun rihaan chumii̱ nihánj, tza̱j ne̱ vaa cheꞌé gu̱un niha̱ꞌ rá soj, ne̱ gu̱un ya̱ ya̱ rá soj se vaa ꞌu̱nj nihánj quiꞌyaj canaán ya̱ rihaan chumii̱ nihánj na̱nj ado̱nj ―taj Jesús rihaan nij síí tucuꞌyón snana̱ soꞌ a.

Hechos 20:24

Tza̱j ne̱ a̱ doj ne chuꞌvíꞌ ꞌu̱nj sese nda̱a ticavi̱ꞌ nii mán ꞌu̱nj a̱ maꞌ. Tza̱j ne̱ veꞌé ina̱nj me raj ti̱síj suun caꞌneꞌ Jesús Si̱j ꞌNi̱j Raꞌa man níꞌ rihanj, ne̱ cheꞌé dan ꞌo̱ xraan ina̱nj taj xnaꞌanj ꞌu̱nj nana̱ sa̱ꞌ rihaan yuvii̱ cheꞌé se lu̱j ꞌyaj Yaꞌanj cheꞌé ta̱ranꞌ níꞌ a.

Hechos 21:13

Tza̱j ne̱ cataj Pabló a: ―Taj cheꞌé taꞌve̱e soj ne̱ nano̱ rá ꞌu̱nj quiꞌya̱j soj maꞌ. ꞌO̱ se ꞌu̱nj nihánj me se aꞌvej raj nu̱míj nii manj ne̱ nda̱a ticavi̱ꞌ nii manj rej Jerusalén cheꞌé se‑chuvi̱i Jesús Si̱j ꞌNi̱j Raꞌa man níꞌ chugua̱nj ―taj Pabló rihaan nij soꞌ a.

Romanos 16:20

Raꞌya̱nj quiꞌya̱j canaán soj rihaan Síí Chre̱e, quiꞌya̱j Yaꞌanj, si̱j ꞌyaj vaa xe̱j nimán níꞌ, ne̱ me raj quiꞌya̱j Jesús Si̱j ꞌNi̱j Raꞌa man níꞌ se lu̱j cheꞌé soj na̱nj ado̱nj.

1 Corintios 15:57

tza̱j ne̱ tinavij Jesucristó Si̱j ꞌNi̱j Raꞌa man níꞌ cacunꞌ tumé níꞌ, ne̱ dan me se ya̱ quiꞌyaj canaán níꞌ, ne̱ cheꞌé dan no̱ xcúún níꞌ cata̱j níꞌ guun niꞌya̱j níꞌ rihaan Yaꞌanj ado̱nj.

1 Juan 4:4

Tza̱j ne̱ ya̱j nihánj me se síí ya̱ noco̱ꞌ man Yaꞌanj me nij soj, tinu̱j, nocoj. Ne̱ a̱j quiꞌyaj canaán soj rihaan nij síí ne̱ cuano̱ ado̱nj. ꞌO̱ se nu̱u̱ Nimán Yaꞌanj nimán soj, ne̱ nucua̱j doj Nimán Yaꞌanj rihaan Síí Chre̱e va̱j rihaan chumii̱ nihánj chugua̱nj.

1 Juan 5:5

Dan me se síí amán rá se vaa Jesús me Taꞌníí Yaꞌanj roꞌ, soꞌ me síí ꞌyaj canaán rihaan se nij ma̱n rihaan chumii̱ nihánj ado̱nj.

Apocalipsis 1:2

Ne̱ Juan me síí taj xnaꞌanj nihánj rihaan nu̱ꞌ nij yuvii̱ cheꞌé nu̱ꞌ snana̱ Yaꞌanj nda̱a vaa cataj xnaꞌanj Jesucristó rihaan soꞌ, ne̱ rasu̱u̱n queneꞌen maꞌa̱n soꞌ me nu̱ꞌ nij rasu̱u̱n nihánj ado̱nj.

Apocalipsis 1:9

ꞌU̱nj si̱j cuꞌna̱j Juan roꞌ, tinúú soj mé ꞌu̱nj, ne̱ cheꞌé se nuu rcuꞌa̱a̱n níꞌ ga̱ Jesús roꞌ, síí ranꞌ sayuun ga̱ soj mé ꞌu̱nj, ne̱ síí uun chij Yaꞌanj rihaan mej ga̱ soj, ne̱ síí nucua̱j nimán rihaan sayuun mej ga̱ soj ado̱nj. Dan me se yáán ꞌu̱nj yoꞌóó ta̱j rihaan na yaꞌa̱nj yoꞌóó cuꞌna̱j Patmos, ne̱ yoꞌ me rej caꞌnéé nii manj cheꞌé se si̱j nataꞌ snana̱ Yaꞌanj mej ne̱ si̱j taj xnaꞌanj nana̱ cheꞌé Jesús mej a.

Apocalipsis 11:7

Ne̱ asa̱ꞌ quisíj caꞌmii natáj ro̱j soꞌ snana̱ ro̱j soꞌ, ga̱a ne̱ cavi̱i̱ xcuu yuva̱a̱ yuꞌuj cunu̱u̱ ndoꞌo yoꞌ a. Ne̱ cunu̱ꞌ xoꞌ ga̱ ro̱j soꞌ, ne̱ quiꞌya̱j canaán xoꞌ, ne̱ ticavi̱ꞌ xoꞌ man ro̱j soꞌ a.

Apocalipsis 12:17

Ga̱a ne̱ caꞌmaan ndoꞌo rá xcuáá tuꞌvi̱i niꞌya̱j soꞌ man chana̱, ga̱a ne̱ cavii soꞌ cunu̱ꞌ soꞌ ga̱ ꞌó nij taꞌníí noꞌ síí uno nij suun caꞌneꞌ Yaꞌanj rihaan níꞌ, síí nica̱j xraan snana̱ Jesús a.

Apocalipsis 19:10

Ga̱a ne̱ cayáán ru̱j ꞌu̱nj rihaan soꞌ cara̱a̱ gue̱e̱ ꞌu̱nj rihaan soꞌ a. Tza̱j ne̱ cataj soꞌ rihanj a: ―Se̱ quiꞌyáá so̱ꞌ da̱nj maꞌ. ꞌO̱ se ꞌu̱nj roꞌ, me síí nu̱u̱ rihaan Yaꞌanj ga̱ nij tinu̱j nij soj si̱j nataꞌ snana̱ Jesús rihaan yuvii̱ a. Rihaan o̱rúnꞌ Yaꞌanj cara̱a̱ gue̱e̱ so̱ꞌ á. ꞌO̱ se nu̱ꞌ nana̱ caꞌmii nij síí nataꞌ snana̱ Yaꞌanj roꞌ, me nana̱ rqué Nimán Yaꞌanj rihaan nij soꞌ, ne̱ snana̱ Jesús me nana̱ yoꞌ ado̱nj ―taj soꞌ rihanj a.

Apocalipsis 2:13

Neꞌén ꞌu̱nj rej ya̱nj nij soj, se vaa uun chij ndoꞌo Síí Chre̱e rej yoꞌ na̱nj á. Tza̱j ne̱ ꞌo̱ nocoꞌ soj manj, ne̱ ne ta̱náj xco̱ soj stucua̱nj ꞌu̱nj maꞌ. Dan me se vaa síí cuꞌna̱j Antipas síí ꞌo̱ nataꞌ rihaan yuvii̱ cheꞌé ꞌu̱nj, ne̱ nda̱ꞌ se ticaviꞌ nii man soꞌ rej ya̱nj soj rej ya̱nj maꞌa̱n Síí Chre̱e, tza̱j ne̱ ne caꞌne̱ꞌ rá soj ga̱ snana̱j maꞌ.

Apocalipsis 2:17

Sese ta̱j yuꞌuj xréé soj, ne̱ no̱ xcúún soj cuno̱ soj nana̱ nihánj nana̱ taj xnaꞌanj Nimán Yaꞌanj rihaan nij xꞌneꞌ nij síí noco̱ꞌ manj ya̱nj ꞌo̱ ꞌo̱ chumanꞌ a. Rihaan síí ꞌyaj canaán roꞌ, rque̱ ꞌu̱nj se cuꞌna̱j maná se ꞌni̱j yuve̱ cha̱ soꞌ, ne̱ caxri̱i̱ ꞌu̱nj ꞌo̱ yahij catzi̱i̱ ston soꞌ, ne̱ quino̱ naca̱ ꞌo̱ se‑chuvi̱i ꞌo̱ soꞌ ni̱caj síí quiꞌyaj canaán, ne̱ dan me se taj a̱ ꞌó síí caꞌve̱e naya̱a̱ nana̱ yoꞌ a̱ maꞌ. Ma̱an se o̱rúnꞌ síí ni̱caj yahij catzi̱i̱ yoꞌ me síí queneꞌe̱n me taj yoꞌ na̱nj ado̱nj.” Veé da̱nj síj nana̱ cachro̱n so̱ꞌ caꞌne̱j so̱ꞌ rihaan síí caꞌnéé Yaꞌanj ni̱caj yuꞌunj man xꞌneꞌ nij síí noco̱ꞌ manj ya̱nj chumanꞌ Pérgamo a ―taj soꞌ rihanj a.

Apocalipsis 2:26

Ne̱ síí ꞌyaj canaán ꞌo̱ ꞌyaj nij suun caꞌnéꞌ ꞌu̱nj rihaan nda̱a se cuchi̱ꞌ ꞌu̱nj rihaan soj roꞌ, gu̱un chij soꞌ rihaan nij xꞌneꞌ yuvii̱ naꞌvej rá canoco̱ꞌ manj, qui̱ꞌyáj ado̱nj.

Apocalipsis 2:7

Dan me se sese ta̱j yuꞌuj xréé soj, ne̱ no̱ xcúún soj cuno̱ soj nana̱ nihánj nana̱ taj xnaꞌanj Nimán Yaꞌanj rihaan nij xꞌneꞌ nij síí noco̱ꞌ manj ya̱nj ꞌo̱ ꞌo̱ chumanꞌ a. Dan me se rihaan síí ꞌyaj canaán rihaan nu̱ꞌ sayuun me se rque̱ ꞌu̱nj chruj ma̱n raa̱ chruun quiꞌya̱j ga̱a̱ iꞌna̱ꞌ yuvii̱ nu̱ꞌ cavii nu̱ꞌ caꞌanj ga̱ Yaꞌanj cha̱ soꞌ, ne̱ chruun yoꞌ roꞌ, nicunꞌ tanu̱u̱ rej sa̱ꞌ ndoꞌo rej rihaan maꞌa̱n Yaꞌanj ado̱nj.” Veé da̱nj síj nana̱ cachro̱n so̱ꞌ caꞌne̱j so̱ꞌ rihaan síí caꞌnéé Yaꞌanj ni̱caj yuꞌunj man xꞌneꞌ nij síí noco̱ꞌ manj ya̱nj chumanꞌ Éfeso a ―taj soꞌ rihanj a.

Apocalipsis 20:4

Ga̱a ne̱ dan me se queneꞌén ꞌu̱nj chruun xlá sa̱ꞌ, ne̱ vaa nij síí ta̱j nij chruun xlá sa̱ꞌ yoꞌ a. Dan me se caꞌneꞌ Yaꞌanj suun rihaan nij soꞌ se vaa caꞌne̱ꞌ nij soꞌ cacunꞌ cheꞌé nij yuvii̱ a. Ne̱ queneꞌén ꞌu̱nj man nimán ꞌó nij síí ya̱nj rej yoꞌ a. Ne̱ nij soꞌ roꞌ, me nij síí sa̱ꞌ tagüéj nii cúú yave̱ cheꞌé snana̱ Jesús nana̱ nataꞌ nij soꞌ do̱ꞌ, cheꞌé snana̱ Yaꞌanj do̱ꞌ a. Ne̱ nij soꞌ roꞌ, ne cara̱a̱ gue̱e̱ nij soꞌ rihaan xcuu yuva̱a̱ do̱ꞌ, rihaan se tinanga̱ꞌ xcuu yuva̱a̱ do̱ꞌ maꞌ. Ne̱ ne caꞌve̱j rá nij soꞌ cata̱ꞌ se‑taꞌnga̱ꞌ xcuu yuva̱a̱ yoꞌ caan rihaan nij soꞌ do̱ꞌ, raꞌa nij soꞌ do̱ꞌ maꞌ. ꞌO̱ se cunuu iꞌna̱ꞌ uún nij soꞌ, ne̱ ꞌo̱ míj yoꞌ cayáán nij soꞌ ne̱ guun chij nij soꞌ ga̱ Cristó a.

Apocalipsis 3:12

Ne̱ síí quiꞌya̱j canaán roꞌ, ase vaa ꞌo̱ chraan xca̱a̱n nicu̱nꞌ tacóó nuvií noco̱o rej aráj gue̱e̱ yuvii̱ rihaan Yaꞌanj roꞌ, da̱nj ga̱a̱ soꞌ rihanj, qui̱ꞌyáj, ne̱ se̱ curiha̱nj uún soꞌ rej ya̱nj ꞌu̱nj maꞌ. Ne̱ rihaan soꞌ roꞌ, cachro̱n ꞌu̱nj vaꞌnu̱j nana̱, ne̱ dan me se cachro̱n ꞌu̱nj se‑chuvi̱i Taꞌanj ꞌu̱nj, ne̱ cachro̱n ꞌu̱nj se‑chuvi̱i chumanꞌ ya̱nj Taꞌanj ꞌu̱nj chumanꞌ cuꞌna̱j Jerusalén naca̱ nani̱j rihaan chumii̱ nihánj, ne̱ cachro̱n ꞌu̱nj se‑chuvi̱i naca̱ ma̱ꞌanj cachro̱n ꞌu̱nj rihaan soꞌ ado̱nj.

Apocalipsis 3:21

Ne̱ síí quiꞌya̱j canaán roꞌ, ca̱yáán soꞌ rihaan xrúún ꞌu̱nj chruun xlá sa̱ꞌ ga̱ ꞌu̱nj, ne̱ gu̱un chij soꞌ ga̱j, qui̱ꞌyáj, nda̱a vaa quiꞌyaj Réj Yaꞌanj ga̱j ado̱nj. Dan me se ga̱a quiꞌyaj canaán ꞌu̱nj, ne̱ cayáán ꞌu̱nj rihaan xrúún Réj Yaꞌanj chruun xlá sa̱ꞌ ga̱ soꞌ, ne̱ uun chij ꞌu̱nj ga̱ soꞌ, quiꞌyaj soꞌ chugua̱nj.

Apocalipsis 3:5

Dan me se cunuda̱nj nij síí ꞌyaj canaán roꞌ, vaa güii rque̱ nii yatzíj catzi̱i̱ cu̱nuû nij soꞌ, ne̱ daj chiha̱a̱ míj se̱ naꞌnúꞌ ꞌu̱nj se‑chuvi̱i nij soꞌ no̱ rihaan yanj no̱ se‑chuvi̱i nij síí ga̱a̱ iꞌna̱ꞌ ga̱ Yaꞌanj nu̱ꞌ cavii nu̱ꞌ caꞌanj maꞌ. Ne̱ nata̱ꞌ ꞌu̱nj rihaan Réj Yaꞌanj do̱ꞌ, rihaan nij se‑mo̱zó soꞌ do̱ꞌ, se vaa me nij soꞌ síí noco̱ꞌ manj ado̱nj.

Apocalipsis 6:9

Ga̱a ne̱ ga̱a caꞌnéj Matzinj Leꞌe̱j selló ꞌu̱nꞌ no̱ tuꞌva yanj yoꞌ, ne̱ queneꞌén ꞌu̱nj rej rque mesá altar, ne̱ rque mesá altar me se naj nij nimán nij síí caviꞌ cheꞌé snana̱ Yaꞌanj cheꞌé se nataꞌ nij soꞌ nana̱ ya̱ rihaan yuvii̱ a.