Apocalipsis 1:2 - Triqui de San Juan Copala

² Ne̱ Juan me síí taj xnaꞌanj nihánj rihaan nu̱ꞌ nij yuvii̱ cheꞌé nu̱ꞌ snana̱ Yaꞌanj nda̱a vaa cataj xnaꞌanj Jesucristó rihaan soꞌ, ne̱ rasu̱u̱n queneꞌen maꞌa̱n soꞌ me nu̱ꞌ nij rasu̱u̱n nihánj ado̱nj.

Apocalipsis 1:2 Iomraidhean Croise

San Juan 1:32

Ga̱a ne̱ cataj xnaꞌanj ya̱ Juan cheꞌé se vaa queneꞌen maꞌa̱n soꞌ a: ―Queneꞌén ꞌu̱nj se vaa nanij Nimán Yaꞌanj rej xta̱ꞌ, ne̱ ase vaa ꞌo̱ chaꞌaa̱n vaa Nimán Yaꞌanj yoꞌ, ne̱ caꞌnaꞌ yoꞌ, cayáán yoꞌ ga̱ Jesús ado̱nj.

San Juan 12:17

Dan me se nij yuvii̱ cumán ga̱ Jesús me se cataj xnaꞌanj nij soꞌ nu̱ꞌ se vaa guun ga̱a canacúún Jesús man síí cuꞌna̱j Lázaro se vaa cu̱riha̱nj soꞌ yuꞌuj yuvej ne̱ cunuu iꞌna̱ꞌ uún ya̱ Lázaro quiꞌyaj Jesús a.

San Juan 19:35

Ne̱ síí taj xnaꞌanj nana̱ nihánj me se si̱j queneꞌen nu̱ꞌ se vaa guun me soꞌ, ne̱ ya̱ vaa snana̱ soꞌ, ne̱ neꞌen soꞌ se vaa ya̱ aꞌmii soꞌ, ado̱nj. Ne̱ taj xnaꞌanj soꞌ nu̱ꞌ nana̱ nihánj cheꞌé rej cuchuma̱n rá soj a.

San Juan 21:24

Dan me se síí tucuꞌyón snana̱ Jesús nihánj me se soꞌ me síí cataj xnaꞌanj cheꞌé nu̱ꞌ rasu̱u̱n no̱ rihaan yanj nihánj, ne̱ soꞌ me síí cachrón nana̱ rihaan yanj cheꞌé rasu̱u̱n nihánj ado̱nj. Ne̱ neꞌen núj se vaa ya̱ uxrá vaa nu̱ꞌ nana̱ cataj xnaꞌanj soꞌ na̱nj ado̱nj.

San Juan 3:11

Ya̱ ya̱ cata̱j xnaꞌanj ꞌu̱nj rihaan so̱ꞌ se vaa xa̱ꞌ núj, tza̱j ne̱ cheꞌé ina̱nj se vaa neꞌen núj aꞌmii núj ne̱ cheꞌé se vaa queneꞌen núj nataꞌ núj ado̱nj. Tza̱j ne̱ ne amán rá nij soj nana̱ aꞌmii núj maꞌ.

Hechos 22:15

Ga̱a ne̱ guún so̱ꞌ síí neꞌen cheꞌé soꞌ, ne̱ dan me se caꞌa̱nj so̱ꞌ, ne̱ nata̱ꞌ so̱ꞌ rihaan nu̱ꞌ nij yuvii̱ cheꞌé se vaa queneꞌén so̱ꞌ do̱ꞌ, cheꞌé nij nana̱ cunó so̱ꞌ do̱ꞌ a.

Hechos 26:16

Tza̱j ne̱ na̱xaga̱a̱ so̱ꞌ, canicu̱nꞌ ca̱yá so̱ꞌ á. ꞌO̱ se nihánj me se curuvíꞌ ꞌu̱nj rihaan so̱ꞌ cheꞌé se narii ꞌu̱nj mán so̱ꞌ qui̱ꞌyáá so̱ꞌ se‑su̱u̱n ꞌu̱nj ne̱ nata̱ꞌ so̱ꞌ rihaan yuvii̱ cheꞌé se vaa queneꞌén so̱ꞌ manj cuano̱ do̱ꞌ, cheꞌé nij rasu̱u̱n nari̱ꞌ so̱ꞌ asa̱ꞌ curuviꞌ uún ꞌu̱nj rihaan so̱ꞌ rej riha̱a̱n doj do̱ꞌ a.

Hechos 4:20

Se̱ caꞌvee caꞌne̱ꞌ rá núj ga̱ suun aꞌmii cheꞌé se vaa queneꞌen núj do̱ꞌ, cheꞌé nana̱ cuno núj do̱ꞌ a̱ maꞌ ―taj ro̱j soꞌ rihaan nij soꞌ a.

1 Corintios 1:6

ne̱ da̱nj quiꞌyaj soj cheꞌé se sa̱ꞌ uxrá nariꞌ soj snana̱ Cristó nana̱ tucuꞌyón ꞌu̱nj man soj a.

1 Corintios 2:1

Neꞌen nij soj se vaa ga̱a cuchíꞌ ꞌu̱nj chiháán soj, ne̱ natáꞌ ꞌu̱nj snana̱ Yaꞌanj rihaan soj, ne̱ ne gu̱un rá ꞌu̱nj caꞌmi̱i̱ ꞌu̱nj nana̱ nachranꞌ ndoꞌo rihaan soj, maan tinu̱j, maan nocoj. ꞌO̱ se ne gu̱un rá ꞌu̱nj cata̱j soj se vaa avii ndoꞌo raá ꞌu̱nj maꞌ.

1 Juan 1:1

Dan me se núj me se cata̱j xnaꞌanj núj rihaan nij soj cheꞌé ꞌo̱ síí cayáán ga̱a naá asi̱j guun cheꞌe̱ Yaꞌanj quiꞌyaj Yaꞌanj chumii̱, ne̱ ina̱nj se vaa cuno maꞌa̱n núj do̱ꞌ, se vaa queneꞌen rihaan maꞌa̱n núj do̱ꞌ, se vaa cutaꞌ núj raꞌa núj xráá do̱ꞌ, cheꞌé ina̱nj rasu̱u̱n vaa da̱nj cata̱j xnaꞌanj núj rihaan soj a. Dan me se cata̱j xnaꞌanj núj cheꞌé síí me Snana̱ Yaꞌanj, ne̱ soꞌ me síí quiꞌya̱j ca̱yáán níꞌ ga̱ Yaꞌanj nu̱ꞌ cavii nu̱ꞌ caꞌanj ado̱nj.

1 Juan 4:14

Ne̱ a̱j neꞌen núj se vaa caꞌnéé Rej níꞌ Yaꞌanj man Taꞌníí soꞌ rihaan chumii̱ nihánj cheꞌé rej gu̱un soꞌ Síí Ti̱nanii rihaan Sayuun man nij síí ma̱n rihaan chumii̱ nihánj, ne̱ a̱j nataꞌ núj nana̱ yoꞌ rihaan yuvii̱ ado̱nj.

3 Juan 1:12

Cunuda̱nj nij tinúú níꞌ taj xnaꞌanj cheꞌé síí cuꞌna̱j Demetrio se vaa síí sa̱ꞌ nimán me soꞌ, ne̱ ya̱ ya̱ síí sa̱ꞌ me soꞌ ado̱nj. Yoꞌ me nana̱ taj xnaꞌanj núj rihaan so̱ꞌ, ne̱ a̱j neꞌén so̱ꞌ se vaa nana̱ ya̱ me nij nana̱ taj xnaꞌanj núj rihaan so̱ꞌ a.

Apocalipsis 1:11

Ne̱ cataj soꞌ a: ―Cachro̱n so̱ꞌ nana̱ rihaan yanj cheꞌé nu̱ꞌ nij rasu̱u̱n que̱neꞌén so̱ꞌ, ne̱ caꞌne̱j so̱ꞌ rihaan chi̱j nij xꞌneꞌ nij síí noco̱ꞌ manj ya̱nj chi̱j chumanꞌ cuꞌna̱j Éfeso do̱ꞌ, Esmirna do̱ꞌ, Pérgamo do̱ꞌ, Tiatira do̱ꞌ, Sardis do̱ꞌ, Filadelfia do̱ꞌ, Laodicea do̱ꞌ, caꞌne̱j so̱ꞌ yanj yoꞌ á ―taj soꞌ cunoj a.

Apocalipsis 1:19

’Cheꞌé dan me cachro̱n so̱ꞌ nana̱ rihaan yanj cheꞌé nu̱ꞌ se vaa queneꞌén so̱ꞌ nihánj do̱ꞌ, rasu̱u̱n ma̱n cuano̱ do̱ꞌ, rasu̱u̱n caꞌna̱ꞌ rej riha̱a̱n do̱ꞌ a.

Apocalipsis 1:9

ꞌU̱nj si̱j cuꞌna̱j Juan roꞌ, tinúú soj mé ꞌu̱nj, ne̱ cheꞌé se nuu rcuꞌa̱a̱n níꞌ ga̱ Jesús roꞌ, síí ranꞌ sayuun ga̱ soj mé ꞌu̱nj, ne̱ síí uun chij Yaꞌanj rihaan mej ga̱ soj, ne̱ síí nucua̱j nimán rihaan sayuun mej ga̱ soj ado̱nj. Dan me se yáán ꞌu̱nj yoꞌóó ta̱j rihaan na yaꞌa̱nj yoꞌóó cuꞌna̱j Patmos, ne̱ yoꞌ me rej caꞌnéé nii manj cheꞌé se si̱j nataꞌ snana̱ Yaꞌanj mej ne̱ si̱j taj xnaꞌanj nana̱ cheꞌé Jesús mej a.

Apocalipsis 12:11

Ne̱ quiꞌyaj canaán nij tinúú níꞌ man xcuáá tuꞌvi̱i cheꞌé ton cayanj man Matzinj Leꞌe̱j yoꞌ cheꞌé nij tinúú níꞌ, ne̱ cheꞌé se nataꞌ nij soꞌ nana̱ ya̱ sa̱ꞌ rihaan yuvii̱ roꞌ, cheꞌé dan quiꞌyaj canaán nij soꞌ rihaan xcuáá tuꞌvi̱i yoꞌ na̱nj ado̱nj. Ne̱ nij soꞌ me se ne cuchuꞌvi̱ꞌ nij soꞌ sese cavi̱ꞌ nij soꞌ cheꞌé nana̱ sa̱ꞌ nataꞌ nij soꞌ maꞌ.

Apocalipsis 12:17

Ga̱a ne̱ caꞌmaan ndoꞌo rá xcuáá tuꞌvi̱i niꞌya̱j soꞌ man chana̱, ga̱a ne̱ cavii soꞌ cunu̱ꞌ soꞌ ga̱ ꞌó nij taꞌníí noꞌ síí uno nij suun caꞌneꞌ Yaꞌanj rihaan níꞌ, síí nica̱j xraan snana̱ Jesús a.

Apocalipsis 20:4

Ga̱a ne̱ dan me se queneꞌén ꞌu̱nj chruun xlá sa̱ꞌ, ne̱ vaa nij síí ta̱j nij chruun xlá sa̱ꞌ yoꞌ a. Dan me se caꞌneꞌ Yaꞌanj suun rihaan nij soꞌ se vaa caꞌne̱ꞌ nij soꞌ cacunꞌ cheꞌé nij yuvii̱ a. Ne̱ queneꞌén ꞌu̱nj man nimán ꞌó nij síí ya̱nj rej yoꞌ a. Ne̱ nij soꞌ roꞌ, me nij síí sa̱ꞌ tagüéj nii cúú yave̱ cheꞌé snana̱ Jesús nana̱ nataꞌ nij soꞌ do̱ꞌ, cheꞌé snana̱ Yaꞌanj do̱ꞌ a. Ne̱ nij soꞌ roꞌ, ne cara̱a̱ gue̱e̱ nij soꞌ rihaan xcuu yuva̱a̱ do̱ꞌ, rihaan se tinanga̱ꞌ xcuu yuva̱a̱ do̱ꞌ maꞌ. Ne̱ ne caꞌve̱j rá nij soꞌ cata̱ꞌ se‑taꞌnga̱ꞌ xcuu yuva̱a̱ yoꞌ caan rihaan nij soꞌ do̱ꞌ, raꞌa nij soꞌ do̱ꞌ maꞌ. ꞌO̱ se cunuu iꞌna̱ꞌ uún nij soꞌ, ne̱ ꞌo̱ míj yoꞌ cayáán nij soꞌ ne̱ guun chij nij soꞌ ga̱ Cristó a.

Apocalipsis 22:21

Dan me se me rá ꞌu̱nj quiꞌya̱j ndoꞌo Jesús Si̱j ꞌNi̱j Raꞌa man níꞌ se lu̱j ga̱ nij soj na̱nj á. Veé da̱nj ga̱a̱ ya̱ ado̱nj.

Apocalipsis 6:9

Ga̱a ne̱ ga̱a caꞌnéj Matzinj Leꞌe̱j selló ꞌu̱nꞌ no̱ tuꞌva yanj yoꞌ, ne̱ queneꞌén ꞌu̱nj rej rque mesá altar, ne̱ rque mesá altar me se naj nij nimán nij síí caviꞌ cheꞌé snana̱ Yaꞌanj cheꞌé se nataꞌ nij soꞌ nana̱ ya̱ rihaan yuvii̱ a.