Yucha sawalh jamapayniya an yu tama'alh'ajnan, jantu katicha'xmaj'alhi an makat'ikt'i k'iw yu wa lh'awilh, chi jantu katimamixilhi tan k'ischa takilhnulh jikmi, sta akxni kalats'awala'oyacha an tanlhun.
Ancha tach'ixlicha'anilh la ixputamat pumatam yu ixlakalhtukulunta. Chi jala'ts'incha li tajakiklaka'inin, pus juniy an yu lakalhtukulunta: ―Oximaj'ayi k'a'unt'i, kints'alh, amintala'alhin ikmala'mixini'oyan.
Pus an Jesús, tala'asp'itlhi sa'cha la'ts'in, juniy: ―Jant'u k'at'a'oxila'alhit'i, kintsi', amijakiklaka'inti p'ut'ak'uch'ut'icha. Wa akxni ta'oxilhcha an t'aku'.
Pus akxni an t'aku la'ts'ilhi li jantu lay kati'alhtats'e'lhi, talhanajla'alhi an Jesús chi tatso'ottanilhcha la ixjach'aja. Junilhcha an Jesús la ix'ukxlakapuk'an chux an yu ixta'ayxto'nun tuchini lhi'aych'apachalhcha chi li akxnicha ta'oxilh.
Mu kitnan wachu kintamak'atsaanikantani an laj'oxi chiwinti tacha yu'uncha. Pero yu'uncha jantu tu'u talhitapalhnilh masi ta'asmatlhi, mu jantu takiklaka'ilhi an chiwinti.