2 Corintios 3:7 - Õꞌacʉ̃ Yere Ucũrĩ Turi

⁷ Õꞌacʉ̃ Moisére dutiꞌquere ʉ̃tãpjĩpʉ ojanoꞌcaro niwʉ̃. Te dutise marĩ yʉꞌrʉnʉꞌcãse buꞌiri wẽjẽcõꞌadutise weronojõ nicaro niwʉ̃. Õꞌacʉ̃ tere oꞌogʉ, ʉpʉtʉ asistese meꞌrã oꞌocʉ niwĩ. Tojo weero Moisé tere ojacã, cʉ̃ diapoa asistecaro niwʉ̃. Israe curuacjãrã cʉ̃ asistecã ĩꞌapõtẽomasĩticãrã niwã. Siape meꞌrã cʉ̃ asistese peꞌtidijacaro niwʉ̃.

Tukano

⁷ Õ'âkɨ̃hɨ Moisére dutî'kere ɨ̃tâ pĩhipɨ ohâ no'okaro niîwɨ. Teé dutisé marî yɨ'rɨ́ nɨ'kase bu'iri wẽhé kõ'a dutise weeró noho niîkaro niîwɨ. Õ'âkɨ̃hɨ teeré o'ôgɨ, ɨpɨ́tɨ asistése me'ra o'ôkɨ niîwĩ. Tohô weéro Moisé teeré ohakã́, kɨ̃ɨ̂ diâpoa asistékaro niîwɨ. Israel kurakãharã kɨ̃ɨ̂ asistékã ĩ'yâ põo tẽo masitikãrã niîwã. Siâpe me'ra kɨ̃ɨ̂ asistése pe'ti dihákaro niîwɨ.

2 Corintios 3:7 Iomraidhean Croise

Génesis 3:21

Beꞌro Õꞌacʉ̃ narẽ na suꞌti sãñatjere weebosacʉ niwĩ. Waꞌicʉrã caseri meꞌrã weecʉ niwĩ.

Éxodo 24:12

Õꞌacʉ̃ Moisére aꞌtiro nicʉ niwĩ: —Yʉꞌʉ tiro ʉ̃rʉ̃gʉ̃pʉ mʉjãtinemoña. Mʉjãti, topʉ yʉꞌʉre coꞌteya. Yʉꞌʉ ʉ̃tã meꞌrã weeꞌque pjĩrĩrẽ mʉꞌʉrẽ oꞌogʉti. Te pjĩrĩpʉ yʉꞌʉ ojaꞌque nipeꞌtise yʉꞌʉ weedutiꞌquere mʉꞌʉ Israe curuacjãrãrẽ weregʉsaꞌa.

Éxodo 31:18

Õꞌacʉ̃ ʉ̃rʉ̃gʉ̃ Sinaípʉ Moisé meꞌrã ucṹca beꞌro cʉ̃rẽ pʉa pjĩ ʉ̃tã meꞌrã weeꞌque pjĩrĩrẽ oꞌocʉ niwĩ. Te pjĩrĩpʉ Õꞌacʉ̃ diez dutise cũuꞌque nicaro niwʉ̃. Õꞌacʉ̃ basuta cʉ̃ omopica meꞌrã tere ojacʉ niwĩ.

Éxodo 32:19

Moisé na nirõpʉ etagʉ, wecʉ wĩꞌmagʉ̃ na uru meꞌrã wĩorẽꞌcʉre ĩꞌagʉ̃, na noꞌo ʉaro basanuꞌcũcusiasere ĩꞌagʉ̃, uayʉꞌrʉacʉ niwĩ. Tojo weegʉ cʉ̃ cʉose pjĩrĩrẽ tigʉ ʉ̃rʉ̃gʉ̃ dʉꞌpocã́pʉ doquemʉtõcũucʉ niwĩ.

Éxodo 34:1

Õꞌacʉ̃ Moisére cʉ̃ asistesere ĩꞌóca beꞌro cʉ̃rẽ nicʉ niwĩ: —Pʉa pjĩ ʉ̃tã pjĩrĩ mʉꞌʉ doquemʉtõꞌque pjĩrĩ weronojõta daꞌreya. Ne waro ojaꞌquereta ojagʉti tja.

Hechos 6:15

Na tojo nicã tʉꞌorã, wiorã Estebare pũrõ ĩꞌacãrã niwã. Na cʉ̃rẽ ĩꞌacã, cʉ̃ ya diapoa asistea waꞌacaro niwʉ̃. Õꞌacʉ̃rẽ werecoꞌtegʉ ʉꞌmʉsecjʉ̃ weronojõ bajuri diapoa waꞌacaro niwʉ̃.

Romanos 10:4

Dʉporopʉ Moisé ojaꞌquepʉ “Õꞌacʉ̃ cʉ̃ beseꞌcʉ masã ñaꞌarõ weeꞌquere yʉꞌrʉogʉsami”, ni ojanoꞌcaro niwʉ̃. Jesucristota nipeꞌtise Moisé cʉ̃ dutiꞌquere weetuꞌajanʉꞌcõpeꞌocʉ niwĩ. Tojo weerã Jesucristore ẽjõpeose meꞌrã diaꞌcʉ̃ Õꞌacʉ̃ meꞌrã añurõ nita basioꞌo. Cʉ̃rẽ ẽjõpeocã, Õꞌacʉ̃ “Añurã, buꞌiri marĩrã nima”, ni ĩꞌasami.

Romanos 4:15

Marĩ Õꞌacʉ̃ Moisére dutise cũuꞌquere weepeꞌomasĩtisaꞌa. Tojo weegʉ cʉ̃ dutisere masĩmirã yʉꞌrʉnʉꞌcãcã, marĩrẽ buꞌiri daꞌregʉsami. Te dutise marĩcã pũrĩcãrẽ, te dutisere yʉꞌrʉnʉꞌcãse marĩbopã.

Romanos 5:20

Õꞌacʉ̃ Moisére dutise cṹúgʉ̃, marĩ ñaꞌarã niꞌi nisere masĩdutigʉ cũucʉ niwĩ. Cʉ̃ tojo weemicã, ñaꞌarõ weenemopeocãrã niwã. Õꞌacʉ̃ peꞌe ñaꞌase weenemocã, nemorõ pajañaꞌnemopeocʉ niwĩ.

Romanos 7:10

Marĩ Õꞌacʉ̃ dutisere wéérã, añurõ nicãꞌbosaꞌa. Yʉꞌʉ peꞌe te dutise deꞌro weepeꞌomasĩtigʉ, buꞌiritigʉ tojawʉ. Te dutise masãrẽ Õꞌacʉ̃ meꞌrã añurõ tojacã weeboronojõ nírõ, yʉꞌʉ peꞌere buꞌiritigʉ tojacã weewʉ.

Romanos 7:22

Yʉꞌʉ basu peꞌe Õꞌacʉ̃ dutisere tʉꞌsayʉꞌrʉamiꞌi.

Romanos 7:5

Todʉporopʉ marĩ tʉꞌsasenojõ ñaꞌasere ʉaripejawʉ. Moisé dutiꞌquere marĩrẽ cãꞌmotaꞌacã, weeya nírõnojõ waꞌawʉ. Nipeꞌtise marĩ upʉpʉ nise meꞌrã marĩ ñaꞌarõ ʉaripejasere weewʉ. Te ñaꞌasere wéérã, pecameꞌepʉ buꞌiri daꞌrenoꞌo, yapatidijabopã.

1 Corintios 13:10

Beꞌropʉ Jesucristo apaturi aꞌticã, masĩpeꞌocãꞌrãsaꞌa. Marĩ masĩpeꞌocãma, marĩ masĩmiꞌque mejõ nise tojarosaꞌa.

2 Corintios 3:3

Mʉsãrẽ Cristo masãrẽ yʉꞌrʉomi nisere werewʉ. Tere ẽjõpeocã, Cristo mʉsãrẽ añurõ weewĩ. Cʉ̃ mʉsãrẽ tojo weesere ãpẽrã quẽꞌrãrẽ masĩcã ʉami. Tere masĩdutigʉ, papera pũrĩpʉ ojacjʉ meꞌrã ojaticʉ niwĩ. Tojo nicã todʉporopʉ Õꞌacʉ̃ catinuꞌcũgʉ̃ ʉ̃tãpjĩpʉ ojaꞌcaronojõta weeticʉ niwĩ. Aꞌtiro peꞌe weecʉ niwĩ. Espíritu Santu tutuaro meꞌrã mʉsã wãcũsere dʉcayucʉ niwĩ. Te meꞌrã Cristo mʉsãrẽ añurõ weesere ĩꞌomi.

2 Corintios 3:6

Õꞌacʉ̃ta “Masã meꞌrã apogʉti” níꞌquere ʉ̃sãrẽ werecã weewĩ. Cʉ̃ níꞌque aꞌtiro niꞌi: “Yʉꞌʉ na wiogʉ nigʉ̃ti. Na peꞌe yarã nirãsama.” Õꞌacʉ̃ tojo níꞌque Moisé dutise ojaꞌquere yʉꞌtise weronojõ niweꞌe. Espíritu Santu masãrẽ Õꞌacʉ̃ ʉaro weecã weemasĩmi. “Moisé dutise ojaꞌquere yʉꞌtirãti”, níꞌcãrã peꞌere ne basioweꞌe. Na buꞌiritirã pecameꞌepʉ waꞌabopã. Espíritu Santu peꞌe marĩrẽ catinuꞌcũcã weemi.

2 Corintios 3:8

Te dutise asistese meꞌrã oꞌoꞌque nemorõ Espíritu Santu cʉ̃ marĩrẽ buꞌese peꞌe totá nemoꞌo.

Gálatas 3:10

Ãpẽrã pũrĩcãrẽ Õꞌacʉ̃ buꞌiri daꞌresami. Na aꞌtiro wãcũsama. “Moisé dutiꞌquere wéérã, yʉꞌrʉrãsaꞌa”, nisama. Tojo wãcũmirã, nipeꞌtise tere weepeꞌotisama. Õꞌacʉ̃ ye queti ojáca pũrĩpʉre aꞌtiro niwʉ̃: “Nipeꞌtise Moisé dutiꞌquere weepeꞌotigʉnojõ buꞌiri daꞌrenoꞌgʉ̃sami”, niwʉ̃. Tojo weerã “Moisé dutiꞌque meꞌrã yʉꞌrʉrãsaꞌa”, nimisama. Niweꞌe. Õꞌacʉ̃ narẽ buꞌiri daꞌregʉsami.

Gálatas 3:21

To pũrĩcãrẽ Abrahãrẽ cʉ̃ níꞌque wapatiyʉꞌrʉnʉꞌcãcã, ¿Moisére cʉ̃ dutiꞌque peꞌe wapamarĩpari? Niticaro niwʉ̃. Masã nipeꞌtise Moisé cʉ̃ dutisere weeta basiocãma, marĩrẽ Õꞌacʉ̃ meꞌrã añurõ nita basio nibopã. Basioticaro niwʉ̃.

Hebreos 12:18

Mʉsã Õꞌacʉ̃rẽ ẽjõpeorã dʉporocjãrã Israe curuacjãrã weronojõ weeweꞌe. Na sõꞌonícʉ ʉ̃rʉ̃gʉ̃ ĩꞌata basiocjʉ, ñeꞌeñaꞌta basiocjʉ pʉꞌto waꞌacãrã niwã. Tigʉ ʉpʉtʉ ʉ̃jʉ̃caro niwʉ̃. Topʉre pũrõ naꞌitĩꞌacaro niwʉ̃. Bʉpo paa, wĩꞌrõ ʉpʉtʉ waꞌacaro niwʉ̃.

Hebreos 3:3

Jesure Moisé yʉꞌrʉoro añurõ wãcũyʉꞌrʉnʉꞌcãrõʉaꞌa. Aꞌte weronojõ niꞌi. Niꞌcʉ̃ wiꞌire weesami. Ti wiꞌi nemorõ wiꞌi weeꞌcʉ peꞌe añurõ ucũnoꞌsami. Jesúta wiꞌi weeꞌcʉ weronojõ nimi.

Hebreos 9:4

Ti tucũpʉ ʉꞌmʉtise ʉ̃jʉ̃amorõpeowʉaro uru meꞌrã weeꞌcaro nicaro niwʉ̃. Tojo nicã Õꞌacʉ̃ “Masã meꞌrã añurõ weegʉti” níꞌquere cʉori acaro, uru casero meꞌrã omabiꞌaca acaro cũñaꞌcaro niwʉ̃. Ti acaro poꞌpeapʉ niꞌcãrʉ̃ uru meꞌrã weecarʉ nicaro niwʉ̃. Tirʉpʉ baꞌase maná wãmetise sãñacaro niwʉ̃. Apeye quẽꞌrãrẽ tuacjʉ Aarṍ yagʉ ñasãwijicjʉ nicaro niwʉ̃. Tojo nicã Õꞌacʉ̃ dutiꞌquere ojaꞌque pjĩrĩ ʉ̃tã pjĩrĩ sãñacaro niwʉ̃.