Yoele 2:3 - Tonga Bible 1986

³ Moto ukole paurongo pawo, ndi kuvuli kwawo mlipu utocha. Charu chenge ndi munda wa Edene paurongo pawo, kweni kuvuli kwawo mabozwa ghasokwa, kulivi kanthu kakupozomoka kwaku iwo.

Yoele 2:3 Iomraidhean Croise

Chiyambo 13:10

Ndipo Lote wangulereska ndi wanguwona kuti dambo la Yordane lenga ndi maji ghakukwana kosekose uli ndi munda wa Ambuya, uli ndi charu cha Egipiti; pakuza ku Zoara; yapa ndipo Ambuya ŵenga ŵandanange Sodomu ndi Gomora.

Chiyambo 2:8

Ndipo Ambuya Chiuta wangupanda munda mu Edene, ku vuma mwenimo wanguŵika munthu mweniyo wangulenga.

Sumu 50:3

Chiuta widu watuza, kuti waja chisisi cha, moto wakunyekeska we paurongo pake, wazingirizgika ndi lirondo la nthazi.

Sumu 97:3

Moto undajiya paurongo pawo, kocha ŵakupindikana ŵawo kwakuzunguliya.

Chituwa 10:15

Pakuti ŵanguburumutizga charu chose, ndipo charu chenga cha mdima bi ndipo ŵangurgha vyakume vyose mu charu chiya, ndi vipasi vyose vyamu miti vyeniyo matalala ghangusiya; palivi kaŵisi nanga nkhamoza kangujako, chingana ndi muti pamwenga chakupanda mu munda, mu charu chose cha Egipiti.

Chituwa 10:5

ndipo ŵakaburumutizganga charu chose, mwakuti paulengevi yumoza wangawona charu; ndipo ŵakarghanga vyo vingumujariyanipo pavuli pa matalala, ndipo ŵakarghanga muti wako we wose weniwo ngwakume mu munda,

Yesaya 14:17

yo wanguchichita charu chapasi kuŵa mapopa yo wanguthereska mizi yake, yo wengavi kuzomerezga ŵamagoŵa ŵake kuya kwawo?’

Yesaya 15:6

Maji ghamu Nimrimi ndi phasulu, uteka wamira, chipozwa chitondeka kume, nyata kuti yiripu so cha.

Yesaya 33:4

ndipo vyakuskoŵa viunjikika uli ndimo ghaunjikiya matondo; nge ndimo ŵazombe ŵajwanthiya, ŵanthu ŵajwantha pachanya.

Yesaya 51:3

Pakuti Ambuya akasangaruskanga Zioni; akasangaruskanga malo ghawo ghose gha uyiku, ndipo akasanduskanga mabozwa ghake, kuŵa nge ndi Edeni, lisuwa lake ulaka ndi munda wa Ambuya; likondwa ndi chimwemwe vikasanirikanga mwake, kuŵaonga ndi mazu gha sumu.

Yesaya 9:18

Pakuti utimbanizi ukole uli ndi moto, utocha kankhande ndi minga; ukozga matundu ndi lisuwa, ndipo viputiya kuchanya mu ukhomi wa usi.

Yesaya 9:19

Kutuliya mu ukari wa Ambuya wa maŵanja charu chitufya, ndipo ŵanthu ŵe uli ndi nkhuni za moto; palivi munthu yo wachitiya lisungu mwana munyake.

Yeremiya 5:17

“Ŵazamkurgha vuna yinu ndi kurgha kwinu; ŵazamkurgha ŵana ŵinu ŵanthurumi ndi ŵana ŵinu ŵanthukazi; ŵazamkurgha mberere zinu ndi viŵetu vinu: ŵazamkurgha mphereska zinu ndi miti ya mikuyu; ŵazamubwanganduwa ndi lipanga mizi yinu ya malinga mwaku yo mugomezga.”

Ezekiele 36:35

Ndipo ŵakatinge, ‘Charu ichi cho chenga phasulu chasanduka ulaka ndi munda wa Edeni; ehe mizi ya mapopa ya phasulu ndi yakubwanganduka sono nja malinga ndipo yendi ŵanthu ŵakujamo.’

Amosi 7:4

Viyo ndimo Ambuya Chiuta wangundiwoneske: wonani, Ambuya Chiuta wangudana cheruzgu cha moto, ndipo ungocha ndimba yikuru ndi warghanga charu.

Habakuku 1:6

Chifukwa wonani; ndiyuska ŵaKaldiya, mtundu ukari ndi upusu, wo wendenge mu usani wa charu, kwachironda malo ghakujamo gho kuti ngawo cha;

Zekariya 7:14

“Ndipo ndinguŵambininiska ndi kanthenga mukati mu mitundu yose yo iwo kuti ŵangiyiziŵa cha. Viyo charu cho ŵangutuwamo chinguja mahame, kwengavi munthu wakwendamo, ndipo charu chakutowa chenga bozwa.”