Sekaria 8:3 - ICIGHAN BIBILO

³ TER ngu kaan nahan er: Me shi Me hide hen Shion Me tema ken atô u Yerusalem; man á yila Yerusalem er Gar u mimi, man uwo u TER u akum a Sha er Icighanwo.

Sekaria 8:3 Iomraidhean Croise

Upasalmi 2:6

Nahan kpaa, Mo M ver Tor Wam sha icighanwo Wam, Shion.

Upasalmi 48:1

TER hemba, A kuma iwuese kpishi je, ken gar u Aôndo wase, sha icighanwo Na!

Ekesodu 29:45

Man Me tema a ônov mba Iserael imôngo, Me lu Aôndo ve kpaa.

Yesaia 1:21

Er nan man gar u mimi a hingir idyakwase nahana, wen u a mgbough a mimi la! Perapera yan lu ker a na, kpa hegen yô, mase kan mbawuanior tseegh ve lu ker ye.

Yesaia 1:26

Me hide a mbaajiriv ou her, er tsuaa nahan, man mbawasentor kpaa er sha hiihii nahan; ken masetyô, á yilan we er, gar u perapera, gar u mimi.

Yesaia 11:9

Vea vihi kwagh ga, vea tim kwagh sha icighanwo Wam cii kpaa ga, gadia tar ua mgbough a mfe u TER er mngerem ma ngee shin zegemnger nahan.

Yesaia 12:6

Genger imo, er ikenge, we u u tem ken Shion ne, gadia Icighan u Iserael u A tem hen atô wou ka u hemban cii je.

Yesaia 32:16

Tsô ijirôron i mimi ia tema ken desereti man perapera kpaa una tema ken sule u ikon i umen atam la.

Yesaia 60:14

Ônov mba ior mba ve er u ican yô, vea va her a we agurenu; man mba ve laha u cii, vea shalegh inya hen akevangahar a ou; vea yila u er: Gar u TER, Shion u Icighan u Iserael.

Yesaia 65:25

Gbaseela man waniyôngo vea ya toho imôngo, begha una ya toho er bua nahan, vuulevu ua lu kwaghyan u iyô. Vea kera er kwagh u vihin ga, shin vea tim kwagh sha icighanwo Wam cii mayange kpaa ga, kape TER A kaa la.

Yesaia 66:20

Vea va a anmgbianev enev cii ken akuraior cii, sha ci u nagh ku nan TER, sha anyinya man sha akeke a kpelan, man sha akaa a tôôn ior a mi, man sha mbaalfadari man sha urakumi, á va a ve hen icighanwo Wam Yerusalem, kape TER A kaa la, er Mbaiserael ka ve va a nagh shin tasa u wang, ken iyou i TER nahan.

Yesaia 8:18

Nenge, mo kua ônov mba TER A nem ne, se mba uivande kua akav hen Iserael sha ikev i TER u akum a Sha, u A tem sha uwo u Shion la.

Yeremia 14:9

Ka nyi man U hingir er or u i kondo nan iyol, er orageegh u nan fetyô u yiman or ga nahana? Nahan kpaa U ngu her atô wase TERE, mba yer se sha iti You; de undun se ga!

Yeremia 26:18

Mika Ormoresheti ôr kwaghôron u profeti sha ayange a Hisekia tor u Yuda, a ôr kwagh a ior i Yuda cii, a kaa er: TER u akum a Sha ngu kaan nahan er: Shion ne, á tsôghol un er sule nahan, man Yerusalem ne, una hingir atihi a alôgh, man uwo u tempel ne ua hingir er agungu a a lu ken ikô nahan.

Yeremia 31:23

TER u akum a Sha, Aôndo u Iserael, ngu kaan nahan er: Shi vea ôron kwagh ne ken tar u Yuda man ken agar a na, zum u Me gema mlu ve la er: TER A̱ ver u doo doo, we ya u perapera, we icighanwo.

Yeremia 33:16

Sha ayange shon la á yima Yuda, man Yerusalem una tema bem bem; iti i á yila un a mi yô, er: TER ka perapera wase.

Esekiel 48:35

Ikasen na cii lu aseva dubu pue kar dubu anigheni hii sha iyange la je á yila gar la iti er, Yehova-shama (TER ngu ker).

Daniel 9:16

Yô, Tere, sha aeren a Ou a perapera cii, shi goom a ishima i vihin You man iyugh You sha gar Wou Yerusalem kera, ka icighanwo Wou je la; gadia sha ci u asorabo ase, man aferakaa a uter asev, Yerusalem man ior Ou gema hingir kwagh u lahan hen mba ve kase se cii.

Yoel 3:17

Ka nahan man né fa er M lu TER, Aôndo wen ye, M tem ken Shion, icighanwo Wam; zum la Yerusalem una hingir icighanjiir, atôatyev aa kera kar ker ga.

Yoel 3:21

Tsô Me pase ishô i awambe a ve a M vande pasen ishô i a ga la; gadia TER tem ken Shion.

Mika 4:1

Kpa sha ayange a masetyô la, á ver uwo u ya u TER sha ityough ki iwoov, á kende a u sha, ua kar agungu; akuraior aa ur yemen her;

Sefania 3:13

Asande a Iserael a a shi her aa kera er ifer ga, man shi aa kera er aie kpaa ga; á kera zua a ma nombor u icughugh ken zwa ve kpaa ga; gadia vea ya kwagh, vea yav inya, ma or u tan ve mciem nana kera lu ga.

Sekaria 1:16

Nahan yô, TER ngu kaan nahan er: M hide hen Yerusalem a mhôônom ma zungwen; á maa iyou Yam ker, kape TER u akum a Sha A kaa ne; á samber kor u karen sha Yerusalem cii.

Sekaria 12:6

Sha iyange la Me er mbahemenev mba Yuda vea hingir er gbande u lun a usu ken atô u ikon, man er ikaghusu ken atô u aile a uyia nahan; vea nande akuraior a a kase ve la cii ken iyan kua ken imese kpaa; Yerusalem una lu her hen ijiir na, ka hen Yerusalem je la.

Sekaria 14:10

Tar la cii ua hingir shambe shambe, á hii hen Geba zan zan á za hen Rimon hen Yerusalem vegher u ken imbusutariyan la; kpa Yerusalem una tav sha, una lu hen ijiir na, á hii hen Hundagar u Benyamin zan zan á za ar hen ijiir i hunda u tsuaa la, kar za hen Hundagar u Zongo, man hii hen gôgôyou u taven u Hananel zan zan za ar hen ahungwa a shoghol wain a tor.

Sekaria 8:16

Ka akaa a né er a ne: Ôron nen kwagh sha mimi, hanma or a orgen; ôron nen ijir sha mimi man sha bem hen ihindagar yen;

Sekaria 8:19

TER u akum a Sha ngu kaan nahan er: Kwaghyan u hôron u sha uwer u sha unyiin man u sha utaan man u sha utaankaruhar man u sha pue, una hingir Yuda kwagh u msaanyol man u iember man uiniongo mba dedoo; nahan yô mimi man bem ve̱ doo ne ishima.

YOHANE 1:14

Man Imo la hingir or je, va tema her a vese, se kenger icivir Na, icivir la lu er ka i Wan u môm môm u Ter nahan, mgbough a mrumun u sha mhôôn man mimi kpaa.

YOHANE 14:23

Yesu gema kaa a na er: Aluer Mea doo or ishima yô, nana kuran kwaghôron Wam, Terem kpaa nana doo Un ishima; Sé va her a nan Sé va er ijiir i tsan her a nan kpaa.

2 Mbakorinte 6:16

Ka nyi i zough tempel u Aôndo a akombo? Gadia se yô, se mba tempel u Aôndo u uma je. Kape Aôndo A kaa je la er: Me tema hen ve shi Me zenden hen atô ve kpaa, Me lu Aôndo ve, ve kpaa vea lu nongoior Wam.

Mbakolose 2:9

Gadia ka ken a Na man m-iv u Aôndo cii a tem ken iyol je ye.

Mpase U Yohane 21:10

Tsô a yem a mo ken Jijingi a za a mo sha zegewo u taven Sha, a tesem icighangar, ka Yerusalem u he je la, lu senen Sha; a due her Aôndo,

Mpase U Yohane 21:27

Ma kwagh u lun wang ga shin ma or u eren akaa a ndôhôr ishima shin u eren aie vea nyôr ker ga, saa mba i nger ve ken ruamabera u uma u Waniyôngo la vea nyôr ker ye.

Mpase U Yohane 21:3

Shi m ungwa zegeimo due ken ikônough ki torough kila kaa er: Nenge, tenti u Aôndo ngu hen ior, Una tema a ve, vea lu nongoior Na, Aôndo iyol Na Una lu a ve.