Mbaromanu 11:22 - ICIGHAN BIBILO

²² Nahan nenge mhôônom ma zungwen man shi ipila i Aôndo. Mba ve gbe yô, ka ipila, kpa we yô, ka mhôônom ma zungwen ma Aôndo aluer wea tile sha mhôônom ma zungwen yô. Gayô, we kpaa á tôndo u kera.

Mbaromanu 11:22 Iomraidhean Croise

Upasalmi 31:19

Kpash! Mdoon Ou vese je, ma U ver sha ci u mba ve cie U la, ma U ser sha ci u mba ve suur sha a We, sha ishigh ki ônov mba iorov yô!

Yesaia 66:14

Nea nenge nahan, man ishima yen ia ember, akuhe a en aa hingir gese gese er gwergwer nahan, man á fa er uwegh ku TER ku lu a mbayev Nav yô, man Una yuwe a mbaihomov Nav.

Esekiel 18:24

Kpa aluer orperapera nana gema á undu perapera u nan man nana er iferkwagh nana eren akaa a ndôhôrshima a iferor nan eren yô, nahan nana lu uma jee? Á kera umbur aerenakaa a nan a perapera a nan lu eren la kwa môm tsô kpaa ga; ka sha ci u mimi ga u nan man sha ci isholibo i nan er la je, nana kpe ye.

Esekiel 3:20

Man shi aluer ormimi nan gema nan undu perapera u nan, man nana er iferkwagh, man M ver kwagh u nôngon gbev sha ishigh ki nan yô, nana kpe; er u we nan kwagh ga yô, nana kpe ken isholibo i nan, á kera umbur aeren a perapera a nan, a yan nan lu er la ga; kpa awambe a nan yô, Me ker a her a we.

Luka 8:15

Kpa i hen inya i dedoo yô, ka mba ve ongo kwaghôron la man ve kusu un ken ishima i mimi i dedoo man ve ume atam sha ishimawan.

YOHANE 15:2

Hanma gbaa u ker a Mo u a um ga yô, ka A kar a mi sha; man shi hanma gbaa u a um yô, ka A sôr un sha er una shi á hemba umen atam yô.

YOHANE 8:31

Tsô Yesu kaa a Mbayuda mba ve na Un jighjigh la er: Aluer nea lu ken kwaghôron Wam zan zan yô, ne mba mbahenen Av mimi je;

Aerenakaa A Mbaapostoli 11:23

Un kpaa, er a za ar man a nenge mrumun u sha mhôôn u Aôndo yô, a ember, a taver ve ishima cii er ve̱ var ken Ter sha gbashima je;

Aerenakaa A Mbaapostoli 14:22

Ve lu taver mbahenen asema, nyôôso ve asema er ve̱ var ken jighjigh u nan, man shi er: Ka sha atsan kpishi keng je man sé nyôr ken tartor u Aôndo ye.

Mbaromanu 11:21

Aluer Aôndo de agbaa jim jim la ga yô, we kpaa Una de u ga.

Mbaromanu 2:7

Mba ve lu keren iengem man icivir man mtsôr sha u eren kwagh u dedoo sha ishima i wan yô, Una na ve uma u tsôron.

1 Mbakorinte 15:2

Ka sha u kpaa i lu yiman ne ye, aluer ne kôr ave sha mi gbang er m lu pasen ne kwaghôron la nahan, saa di nea na jighjigh gbilin tsô.

Mbagalatia 6:9

Sé gba nen uwer u eren akaa a dedoo ga, gadia shighe á va kuma yô, sé sunda aluer se yina ishima ga yô.

1 Mbatesalonika 3:5

Ka nahan man mo kpaa er m kan wan ishima shio yô, m tindi sha u me fa jighjigh wen u nan shin alaghga ormeen vande meen ne kera man tom wase u hingir gbilin tsôou?

1 Mbatesalonika 3:8

Gadia hegen yô, se mba uma aluer ne tile ken Ter dông yô.

Mbaheberu 10:23

Se kôr nen ave gbang sha mpase u ishimaverenkeghen yase, i̱ de tenger ga, gadia Un u A tende zwa a vese la yô ka u jighjigh je.

Mbaheberu 3:14

Gadia se hingir mbalun a kwar ken Kristu aluer se kôr ave gbang gbang sha imagh ki hiihii ki ishimaveren yase zan zan mkur yô.

Mbaheberu 3:6

Kpa Kristu yô lu jighjigh sha ya Na, lu Wan je. Man ka se se lu ya Na ye, aluer se kôr ave gbang gbang sha vangertiôr wase man ihagh i sha ishimaverenkeghen yase la zan zan mkur yô.

1 Yohane 2:19

Ve due ken vese, kpa ve lu mba ken a vese ga, gadia vea lu mba ken a vese yô, ma ve lu a vese heregh, kpa ve due sha u á pase er i lu ve cii ve lu ken vese ga yô.

Mpase U Yohane 2:5

Umbur hen ape u gbe yô, gema ishima, er aeren a hiihii la. Gayô, Me va hen we, Me tôô daarimenger wou ken ijiir na kera, aluer wea gema ishima ga yô.