Levitiku 1:3 - ICIGHAN BIBILO

³ Aluer nagh ku nan, á lu ku nanden ku sha abua yô, nana̱ na nom u a lu a ihogholough iyol ga yô, nana̱ za na hen hunda u tenti u kohol ker la, sha er TER Una rumun nan yô.

Levitiku 1:3 Iomraidhean Croise

Genese 22:13

Aberam kenden ashe sha yô, a nenge nomiyôngo ken ijime na wever akor ken ageva. Tsô Aberaham za, za kôr iyôngo la, va na nagh ku nanden a mi sha ityough ki wan na.

Genese 22:2

A kaa er: Tôô Isaka wan wou u môm môm u a doo u ishima la, yem ken tar u Moria, za na nagh ku nanden a mi sha uwo ugen u Me tese u yô.

Genese 22:8

Aberaham kaa er: Aôndo Una na waniyôngo u nanden nagh a mi iyol Na, wan wam; tsô ve gba yemen imôngo ve uhar cii.

Genese 8:20

Tsô Noa ta atse a nanden TER nagh sha mi, a pande hanma injanyam i wang, man hanma injanyon i wang, a na nagh ku nanden sha atse la.

2 Kroniku 29:32

Iyenge i iniav mbi nanden mbi mkohol u ior va a mi la yô, lu: anomabua akunduatargber, anomaiyôngo deri, man agumaiyôngo deri uhar; angan cii lu sha ci u nagh ku nanden TER.

2 Kroniku 35:12

Ve pav iniav mbi nanden, ve ver er vea kar mbi sha uipaven mba uya mba uter mba ior mba ken inya la, sha u vea na TER nagh, er i nger ken ruamabera u Mose nahan. Kape ve er a ibua kpaa la.

Upasalmi 110:3

Ior Ou vea na nagh sha ayol a ve sha asema a dedoo je sha iyange i ikumutya You, a uicighanmbaakondov iyol, sha mve u use; er avure a lu nahan kape ikaior You ia va la.

Upasalmi 40:8

Doom u eren ishima You, Aôndo wam; atindiakaa a Ou ngam ken ishima.

Ekesodu 12:5

Yô, gumile wen a̱ de lu a ihogholough iyol ga, a̱ lu u nom u a kom inyom i môm yô, ka ken iyôngo shin ivo man ne kôr un ye;

Ekesodu 24:5

Shi a tindi mbayevikaior mba ken Mbaiserael ve na TER nagh ku nanden, shi ve sôngo TER nagh ku bem sha anomabua.

Ekesodu 29:18

Nande nomiyôngo la jimin cii sha atse, ka nagh ku nanden TER, ka ihuma i doon, man nagh ku usugh ku nan TER je la.

Ekesodu 29:4

Yô, va a Aron man ônov nav hen hunda u tenti u kohol ker la, ôô ve iyol sha mnger.

Ekesodu 29:42

I̱ hingir ne nagh ku nanden gbem sha ikov ikov hen hunda u tenti u kohol ker la, sha ishigh ki TER, henpe Me kohol ne sha u ôron kwagh a we her yô.

Ekesodu 32:6

Kper nan yô, ve mough pepe, ve na iniav mbi nanden, shi ve va a iniav mbi bem kpaa; tsô ior tema inya gba yan akaa man akaa, shi ve mough ve gba vinen amar.

Ekesodu 35:21

Nahan hanma or u ishima i tor nan ityô man hanma or u jijingi u nan a mgbegh nan yô, ve va a nagh ku TER sha ci u tom u tenti u kohol ker la, man sha ci u ityom i keregh cii, man sha ci u uicighanmbaakondov.

Ekesodu 35:29

Mbaiserael na TER nagh sha ishima i dedoo, hanma nomsoor man hanma kwase mba asema a mgbegh ve u van a kwagh sha ci u tom u TER A kaa a Mose er i̱ er a la cii yô; Mbaiserael na TER nagh sha mi sha asema a dedoo.

Ekesodu 35:5

Tsuwa nen nagh ken akaa a en, sha u nan TER; hanma or u i doo nan u nan yô, nana̱ va a mi, ka nagh ku á na TER ne: zenaria man azurfa man togula

Ekesodu 36:3

Ve gema ve ngohol nagh ku Mbaiserael va a mi sha u eren tom u icighanjiir a mi la cii, hen Mose. Hanma sev ve zer van a nagh sha ishima i dedoo.

Ekesodu 38:1

Shi a er atse a nanden nagh sha kon u saa, iniembe i a lu aseva ataan, igbanger i a kpaa aseva ataan; lu a ambusu anyiin akuku, ityaven i a lu aseva atar.

Yesaia 1:11

Ka nyi i gbem a iniav yenev mbi sôngon kpishi laa? kape TER A pin la. Iniav mbi nanden mbi sha anomaiyôngo, man ahôm a uicighanmbaabuav duem ishima; awambe a abua man a agumaiyôngo kua a ukpev kpaa, kera doom ga.

Esekiel 20:40

Gadia sha uwo Wam u tseghan, sha uwo u taven u Iserael, kape Ter AÔNDO A kaa ne, ka keela ya u Iserael cii, vea civir Mo ken tar la; ka keela Me rumun ve, man ka keela kpaa Me ker iniav yenev, man iwua yen i sha iyiav mbi tsutswa, a akaa a en a tseghan cii.

Esekiel 40:39

Hen puadwer u hunda, utebul lu uhar ken vegher ne, man utebul uhar ken vegher ngula kpaa, sha u sôngon nagh ku nanden man nagh ku isholibo man nagh ku iboogh sha mi.

Levitiku 1:10

Man aluer nagh ku nan, ku nanden á lu sha iyôngo shin ivo yô, nana̱ na nom u a lu ihogholough iyol ga yô.

Levitiku 14:10

Sha iyange i anigheni la nana̱ kôr agumaiyôngo ahar a a lu a ihogholough iyol ga yô, man tuleiyôngo môm u a kom inyom i môm u a lu a ihogholough iyol ga yô, shi nana̱ tôô mwem ma kengese ma ma kom uikaren utar-ken-upue, ma i nongo mkurem sha mi, sha ci u nagh ku sha samuyia, man logi u mkure môm

Levitiku 16:7

Shi a̱ kôr ukpev mba uhar mbala, a̱ ver ve sha ishigh ki TER, hen hunda u tenti u kohol ker la.

Levitiku 17:4

nana kera va a mi hen hunda u tenti u kohol ker la, er nana va na TER nagh a mi sha ishigh ki tabernakel u TER ga yô, i̱ na or la ibo i awambe, nan haa awambe inya je; i̱ dugh or la ken nongo u nan kera;

Levitiku 17:8

Shi kaa a ve wer: Hanma or u hen ya u Iserael shin u hen ushirmbaiorov mba ve nyer a nyôr ve yô, u nan ne nagh ku nanden shin nagh ku sôngon

Levitiku 17:9

man nan ve a mi hen hunda u tenti u kohol ker la, sha u nan TER ga yô, or la i̱ dugh nan ken nongo u nan kera.

Levitiku 23:12

Iyange i ne cie ile la, va nen a gumiyôngo u lun a ihogholough iyol ga, u a kom inyom i môm yô, sha u nan TER nagh ku nanden a mi,

Levitiku 23:18

Va nen a agumaiyôngo ataankarahar a a lu a ihogholough iyol ga, a a kom inyom i môm i môm yô, man gumbua môm kua anomaiyôngo ahar, a ubredi mbala imôngo, i̱ na TER nagh ku nanden mi, a nagh vegh ku sha samuyia, kua iniav mbi man imôngo cii ka nagh ku usugh ku human doon ku nan TER je la.

Levitiku 3:1

Aluer nagh ku nan á lu nagh ku sôngon ku bem yô, man aluer nana na bua, á lu nom shin mgbian, nana̱ na, u a lu a ihogholough iyol ga yô, sha ishigh ki TER.

Levitiku 4:15

nahan mbatamen mba mkohol u ior ve̱ penda ave sha ityough ki nombua la sha ishigh ki TER, i̱ sôngo gumbua la sha ishigh ki TER.

Levitiku 4:23

aluer nana̱ va kav isholibo i nan la yô, nana̱ va na nagh sha kpev u a lu a ihogholough iyol ga yô,

Levitiku 4:3

aluer pristi u i shigh un mkurem la, una er isholibo una haa ior ibo iyol yô, a̱ na TER nagh ku isholibo sha gumbua u a lu a ihogholough iyol ga yô, sha ci u isholibo na i a er la;

Levitiku 4:32

Man aluer nana na waniyôngo sha ci u nagh ku nan ku isholibo yô, nana̱ va a tule u a lu a ihogholough iyol ga yô.

Levitiku 5:15

Aluer hanma or nana er kwagh sha mimin ga, nana er isholibo abu, nana nzughul sha akaa a i tsegh a sha ci u TER yô, nana̱ va na TER nagh sha nomiyôngo shin kpev u a lu a ihogholough iyol ga yô, u a kom sha ishe i u we, sha ushekel mba azurfa yô, i̱ lu shekel u icighanjiir la, sha ci u nagh ku iboogh;

Levitiku 5:18

nana̱ va na pristi nomiyôngo, shin kpev u a lu a ihogholough iyol ga yô, sha ishe i u we yô, sha ci u nagh ku iboogh; pristi a̱ na iwom sha ci u nan, sha kwagh u nan er abu nan fe ga la, nahan á de nan isholibo i nan.

Levitiku 6:2

Aluer anti or nana er isholibo nana er TER kwagh u a lu sha mimi ga, nana tuna er or u wan ndor a nan, na nan inyaregh nan koso ga, shin ityungu kpaa ga, shin nan ii nan kwagh kpaa ga; shin nana ya or u wan ndor a nan kwagh sha apera;

Levitiku 6:8

TER shi ôr kwagh a Mose, kaa er:

Levitiku 7:16

Kpa aluer nagh ku nan á lu iceghzwa shin nagh ku sha ishima i nan je yô, i̱ ya ku sha iyange i nan ne nagh ku nan la, kper nan kpaa i̱ ya kwagh u a tse her la;

Levitiku 8:18

Shi a va a nomiyôngo u nagh ku nanden la, Aron kua ônov nav ve penda ave sha ityough ki nomiyôngo la,

Levitiku 8:21

A ôô ikav mbi kimi kua angahar sha mnger; tsô Mose nande nomiyôngo la jimin sha atse a nanden nagh sha mi; lu nagh ku nanden ku human doon; ka nagh ku usugh ku nan TER, er TER kaa Mose nahan.

Levitiku 9:2

a kaa a Aron er: Kôr gumbua sha ci u nagh ku isholibo man nomiyôngo sha ci u nagh ku nanden, ve̱ de luun a ihogholough iyol ga, va a mi sha ishigh ki TER.

Sekaria 13:7

Nder, we sanker, za ta sha orkuranilev Wam, sha or u a lu ijende Yam la, kape TER u akum a Sha A kaa ne. Gbidye orkuranilev, iyôngo i̱ sambe; Me naregh uwegh sha mbakiriki.

Malaki 1:14

Ifan i̱ kôr orcugh, u ka nan lu a nomile ken ikumuile i nan la, man nan tôndo zwa je, kpa nan gema nan na TER nagh sha kwagh u lun a ihogholough iyol; gadia Mo M ngu Zegetor, kape TER u akum a Sha A kaa ne, iti Yam kpaa cier iyol ken akuraior.

Numeri 15:3

man á sar ne ka nan TER nagh ku usugh, a lu nagh ku nanden, shin nagh ku sôngon, sha u kuren iceghzwa, shin nagh ku sha ishima i dedoo, shin ku sha uiniongo mba i ver sha ashighe ashighe la, sha u eren TER kwaghhumandoon sha ibua shin sha iyôngo yô,

Numeri 15:8

Aluer wea na nagh ku nanden, shin nagh ku sôngon sha gumbua sha u kuren iceghzwa, shin a lu nagh ku bem ku nan TER kpaa,

Numeri 19:2

Ka tindi u i̱ eren sha mi u TER A we je ne er: Ôr kwagh a Mbaiserael ve̱ va u a tulebua u nyian u a lu a iyolough ga, shi a lu a ihogholough iyol kpaa ga yô, u i lu a vande tan un igbur mayange ga yô;

Numeri 23:19

Aôndo ka or man Una er aie ga; shi ka wan u or man Una vaa afanyô kpaa ga; Una kaa kwagh yô, Una kera er sha mi gaa? Man Una ôr kwagh yô, Una kera kure sha mi vough gaa?

Numeri 23:27

Balaki kaa a Balaam er: Va, m̱ za a we hen ijiir igen; alaghga á za lu Aôndo pe ú wam ve ifan her.

Numeri 23:3

Nahan Balaam kaa a Balaki er: Lu hen nagh ough ku nanden, mo me za; alaghga TER Una va kohol mo; hanma kwagh u Una pasem cii me ôr u. Tsô a unde sha igungu i kpuun kpuun.

Numeri 23:30

Tsô Balaki er er Balaam kaa un nahan, a na nagh sha nombua man nomiyôngo sha atse la ser ser.

Numeri 28:11

Sha mhii u hanma uwer wen yô, naan nen TER nagh ku nanden, agumabua ahar man nomiyôngo môm man agumaiyôngo ataankarahar a a kom inyom i môm i môm, a a lu a ihogholough iyol ga yô,

Numeri 28:19

na nen TER nagh ku usugh, ka nagh ku nanden je la, sha agumabua ahar man nomiyôngo môm man agumaiyôngo ataankarahar a a kom inyom i môm i môm yô, a a lu ne a ihogholough iyol ga yô;

Numeri 28:31

Naan nen mbi a nagh ku nanden ku gbem kua nagh ku sha samuyia ku maghen sha mi la imôngo, i̱ lu mbi mbi lu ne a ihogholough iyol ga yô, kua iniav mbi man mbi maghen sha mi la kpaa.

Numeri 29:13

na nen TER nagh ku nanden, ka nagh ku usugh ku humandoon, sha agumabua pue kar atar man anomaiyôngo ahar, man agumaiyôngo pue kar anyiin a a kom inyom i môm i môm, a a lu a ihogholough iyol ga yô,

Numeri 29:2

Na nen TER nagh ku nanden ku humandoon sha gumbua môm man nomiyôngo môm man agumaiyôngo ataankarahar a a kom inyom i môm i môm, a a lu a ihogholough iyol ga yô;

Luka 1:35

Ortyom la gema kaa a na er: Icighan Jijingi Una sen sha a we, man agee a Uhembansha la kpaa aa kase u; ka sha ci u nahan man Un u á mar Un la á yilan Un er Icighanwan u Aôndo ye.

YOHANE 1:36

Tsô a nenge Yesu lu zenden, a kaa er: Nenge, Waniyôngo u Aôndo Ngula!

YOHANE 10:7

Nahan Yesu shi kaa er: Mimi mimi je, M kaan ne ne, Mo M ngu hunda u iyôngo.

YOHANE 10:9

Mo M ngu hunda; aluer anti or nana nyôr her a Mo yô, á yima nan; nana nyôron, nana duen nana zuan a ijiir i yan toho.

2 Mbakorinte 8:12

Gadia aluer gbashima una lu yô, á rumun un sha kwagh u or nan lu a mi la, ka sha kwagh u nan lu a mi ga la ga.

2 Mbakorinte 9:7

Hanma or nana̱ na er nan we ken ishima i nan la nahan, i̱ de lu zunguluu ga, i̱ de lu sha apera kpaa ga, gadia ka or u nan ne kwagh sar sar la je nan doo Aôndo ishima ye.

Mbaefese 2:18

Gadia ka sha a Na man se uhar cii se lu a ian i nyôron hen Ter ken Jijingi môm ye.

Mbaefese 5:27

sha u Una ver nongo Na sha ishigh Nagh, u̱ engem u̱ de kera lu a ahuar shin adivir shin mô u ken ambaakaa la kpaa ga, kpa u̱ lu ken mtsegh, u̱ de lu a acôghol iyol ga.

Duteronomi 12:27

Va a iniav you mbi nanden, inyam man awambe la, va penda sha atse a nanden nagh sha mi a TER, Aôndo wou; awambe a iniav you mbi sôngon yô, i̱ gema a, i̱ haa sha atse a nanden nagh sha mi a TER, Aôndo wou, kpa inyam la yô, ya.

Duteronomi 15:21

Man aluer una lu a ma ihogholough yô, de ne TER, Aôndo wou, nagh sha mi ga.

Duteronomi 17:1

De ne TER, Aôndo wou, nagh sha bua shin iyôngo, kwagh u a lu a ihogholough iyol, shin u a lu a ma kwagh iyol u vihin kpaa ga, gadia nahan ka TER, Aôndo wou, kwagh u ihôngorough je.

Mbaheberu 7:26

Gadia ka imbazegepristi ne i kom se ye; ka u wang, u lun a ibo ga, shin acôghol a wan iyol kpaa ga, u a lu paleghaa a mbaasorabo, man u i kende Un sha A kar Usha cii.

Mbaheberu 9:14

man hira awambe a Kristu, Un u A na Aôndo nagh ku lun a ihogholough mape ga, sha iyol Na sha Jijingi u tsôron, aa kera wanger imo i ken asema a en sha aeren a a lu kpenegh la, sha u eren Aôndo u uma tom ga yee?