Duteronomi 13:5 - ICIGHAN BIBILO

⁵ Profeti shon la, shin or u mnyam ma cie nan la, i̱ wua nan sha ci u nan tese er i̱ hendan kwagh a TER, Aôndo wen, u A dugh a ven ken tar u Igipiti A paa u hen ya u ikpan la yô; sar nan ka urugh we sha gbenda u TER, Aôndo wou, A kaa u er u̱ za sha mi la kera. Kape ú er man ú dugh ifer ken a we kera ne.

Duteronomi 13:5 Iomraidhean Croise

1 Utor 13:19

Tsô a hide a na je, a va ya kwagh hen ya na, shi a ma mngerem kpaa.

1 Utor 18:40

Nahan Eliya kaa a ve er: Kôr nen uprofeti mba Baal, mô ve môm a̱ de waren ga. Tsô ve kôr ve, Eliya sen a ve hen kpeuwagh u Kishon, za wua ve heregh.

2 Kroniku 34:31

Tor tile hen ijiir na, nahan a tôndo zwa sha ishigh ki TER er una dondo TER man una waan atindi a Na iko man mbampase Nav kua akaawan a Na kpaa, a ishima na cii, kua uma na cii kpaa, una er sha akaaôron a ikuryan a i nger ken ruamabera la vough.

Yeremia 14:15

Nahan TER ngu kaan nahan er: Sha kwagh u uprofeti mba ve pasen kwagh ken iti Yam, man M tindi ve ga, mba ve kaan er: Sanker man ijen vea lu ken tar ne ga ne: Ka sha sanker kua ijen á tim uprofeti mbala ye.

Yeremia 29:32

nahan yô, TER ngu kaan nahan er: Nenge, Me tsaha Shemaia Ornehelam kua tsombor na; una lu a ma or u nana tema ken ior mban ga, man shi una nenge a kwagh u dedoo u Mea er a ior Av kpaa ga, kape Ter A kaa ne gadia a tese er i̱ hendan kwagh a Ter.

Yeremia 50:6

Ior Av, iyange ve lu er iyôngo i i ndiir yô; mbakuran mba i tsume a i, ve yem a i sha iwo; i zende wue wue sha iwo man agungu, ijiir i tsan i i hungul i.

Yeremia 7:23

Kpa tindi ne M wa ve, M kaa Mer: Ver nen ato sha imo Yam, nahan Me hingir Aôndo wen, man shi ne kpaa né hingir ior Av, man zende nen sha gbenda u M kaa ne la cii, sha u i̱ kpe ne iyol yô.

Sekaria 13:3

Tsô aluer ma or shi nana ôr kwaghôron u profeti yô, hen shighe la ter u nan man ngô u nan mba ve mar nan vea kaa a nan er: Ú kera lu uma ga, gadia u ôr kwagh sha aie ken iti i TER; nahan ter u nan man ngô u nan mba ve mar nan la vea kuma nan á due kera, zum u nan lu ôron kwaghôron u profeti la.

Aerenakaa A Mbaapostoli 13:8

Kpa Elima, orahir la—gadia ka inja i iti na je la—hendan a ve; lu nôngon u ma un gem gomna sha u a̱ de ne jighjigh ga yô.

1 Mbakorinte 5:13

Mba ken won yô, ka Aôndo A er ve ijir ye. Dugh nen iferor la ken a ven kera.

Duteronomi 13:10

Ta un awen, a̱ kpe, sha ci u a nenge u urugh we er, u̱ undu TER, Aôndo wou, u A dugh a we ken tar u Igipiti ken ya u ikpan la yô.

Duteronomi 13:15

tim mba ve tem ken gar la sha zwa u sanker, ú tim un purututu a akaa a a lu kimi cii, kua uzendenya mba ker kpaa, sha zwa u sanker.

Duteronomi 13:9

kpa wua un kpee; uwegh ough ku̱ vande lun sha a na sha u wuan un man ave a ior mbagenev cii aa mase ye.

Duteronomi 17:5

due a or la, shin kwase la, u nan er ifer la, hen ihindagar you, or la shin kwase la, ta ve awen ve̱ kpe.

Duteronomi 17:7

Uwegh ku mbashiada la kua vande lun sha a nan sha u wuan man ave a ior mbagenev cii aa mase ye. Kape ú er man ú dugh ifer ken we kera ne.

Duteronomi 18:20

Kpa profeti u nana cihi nana ôr kwagh ken iti Yam, u M kaa a nan Mer nana̱ ôr ga, shin nana ôr kwagh ken iti i mbaaôndo mbagenev yô, profeti la nana̱ kpe.

Duteronomi 19:19

er nen a nan er i sar nan ka i̱ er a anngô u nan la nahan, kape ú er man ú dugh ifer ken a we kera ne.

Duteronomi 22:21

ve̱ due a wankwase la hen hunda u ya u ter na, nomsombaiorov mba hen gar na la ve̱ ta un awen a̱ kpe sha ci u a er ibumekwagh ken Iserael, er a er idya ken ya u ter na yô; kape ú er man ú dugh ifer ken a we kera ne.

Duteronomi 22:24

due nen a ve uhar cii hen hundagar la, ta nen ve awen ve̱ kpe, un wankwase la yô, ka sha ci u a lu ken gar je, kpa a gbir vaa ga yô, man or la yô, ka sha ci u nan hee kwase u or u nan we ndor a nan yô; kape ú er man ú dugh ifer ken a we kera ne.

Duteronomi 24:7

Aluer á kohol or nana lu iin or u ken anmgbianev mba nan ken Mbaiserael, nan gema un, una hingir kpan, shin nan ngu teen un yô, ormbaiv la nana̱ kpe; kape ú er man ú dugh ifer ken a we kera ne.

Duteronomi 26:14

M pande kwagh ker m ya, zum u m lu zungwen ku ga; m tôô ma kwagh u ker kera, zum u m lu wang ga la kpaa ga; shi m pande ma kwagh m na mbakpenev kpaa ga, m wa imo i TER, Aôndo wam, iko, m er akaa a U kaam cii.

Duteronomi 4:19

man shi sha er u̱ de kera kenden ashe sha man zum u ú nenge iyange man uwer man asan, akum a sha la cii, ú rumun wer a̱ urugh we zan zan ú gure ú civir a ga; ka akaa a TER, Aôndo wou, A kar kwar a mi A ne akuraior a a lu sha won cii yô.

Duteronomi 6:13

Ka TER, Aôndo wou, cian Un ye, shi ka Un kpaa eren Un tom, ka iti Na kpaa bumun nen ye.

Duteronomi 7:4

Gadia vea gema ônov ou vea de u dondon Mo, vea gema á civir mbaaôndo mbagenev; nahan ishima á vihi TER a ven, Una tim u fese je.

Yosua 23:8

kpa var a TER, Aôndo wen, er ne lu eren zan zan nyian nahan.

Mpase U Yohane 19:20

Tsô i kôr inyam la man shi profeti u aie la kpaa, un u a lu eren uivande sha ishigh ki inyam, a lu tsughun ior mba ve ngohol ikav i inyam la man shi mba ve civir eev mbu i la kpaa, i gbihi ve uhar cii uma ken berusu u a lu yeghen sha sulfur la.

Mbaajiriv 20:13

Hegen yô, dugh nen udangmbaiorov mba ken Gibea la, se̱ wua ve, se̱ dugh iferkwagh ne ken Iserael kera. Kpa Mbabenyamin rumun u ungwan imo i anmgbianev vev, Mbaiserael, ga.

1 Samuel 12:14

Aluer né cian TER, né civir Un, né ungwan imo Na, né hendan a tindi u TER ga yô, man aluer ne kua tor u a tem sha a ven ne, né lu mbadondon mba TER, Aôndo wen yô, á doo;