Daniel 2:11 - ICIGHAN BIBILO

¹¹ Kwagh u tor a pin ne ka u ican, ma or ngu u nana fatyô u pasen tor un ga, saa di mbaaôndo, mba ve tem a ior imôngo ga la.

Daniel 2:11 Iomraidhean Croise

Genese 41:39

Farao gema kaa a Yosev er: Er Aôndo A tese u akaa ne cii, nahan yô, ma or u tsôngon ishima fan kwagh er we nahan ngu ga;

Genese 41:8

Tsô sev mbu aven yô, hingir un ken ishima hang; a tindi er i̱ za yila mbaahiriv mba Igipiti kua mbafankwagh cii, ve̱ va; tsô Farao ôr ve mnyam nam; kpa mô ve môm u pasen Farao ma, lu ga.

1 Utor 8:27

Aôndo Una tema shin tar mimi jee? Nenge, Sha man Sha u a hembe gban ca la je kpa fatyô u ngohol We ga, man hide iyou i m maa ne?

2 Kroniku 6:18

Aôndo Una tema shin tar a ior imôngo mimi jee? Nenge, Sha man Sha u a hembe gban ca la je kpaa, fatyô u ngohol We ga; man hire iyou i m maa ne!

Upasalmi 132:14

Ingin ka ijiir Yam i memen ker gbem sha won je ne, ka ker Me tema ye, gadia i sarem yum.

Upasalmi 68:18

U kôndo U yem Sha, U yem a mbakwarev uikangen, U ngohol uiwua hen ior, een, zan zan hen mbahendan kpaa, sha er TER Aôndo Una tema a ve imôngo yô.

Ekesodu 29:45

Man Me tema a ônov mba Iserael imôngo, Me lu Aôndo ve kpaa.

Ekesodu 8:19

Tsô mbaahiriv mbala kaa a Farao er: Kwagh ne ka ihôwe u Aôndo je; kpa ishima i Farao cighir, a wa ve iko ga; er TER kaa yô.

Yesaia 47:12

Gba zan hemen a akaasôron a ou kua ahir a ou a a ngee yum ne, a u lu eren tom u zan we iyol sha mi, hii sha iyev ou la je; alaghga ú fatyô u eren ma kwagh, alaghga ú ta mciem iyol!

Yesaia 57:15

Gadia u A lu Sha, u A hemba Sha, Un u A tem sha ajiir a tsôron gbem, Un u iti Na i lu Icighanti je yô, ngu kaan nahan er: M tem sha ijiir i Sha i i tsegh i yô, shi M tem hen un u a lu a jijingi u vaan afanyô man u hiden a iyol ijime, man Me nder ishima i mbavaanafanyô la.

Yesaia 8:18

Nenge, mo kua ônov mba TER A nem ne, se mba uivande kua akav hen Iserael sha ikev i TER u akum a Sha, u A tem sha uwo u Shion la.

Daniel 4:4

Mo Nebukadinesar m tema bem bem ken ya wam, lu kpen mo iyol ken iyou yam i tor.

Daniel 5:11

Orgen ngu ken tartor wou u jijingi u uicighanmbaaôndo a lu ken a na yô; sha ayange a teru la, i zua a iwanger man mkav man mfe, inja er mfe u mbaaôndo nahan ken a na; nahan tor Nebukadinesar teru ver un orvesen u mbaahiriv man mbaasorov man u Mbakaldi man mbatsenganôron akaa; ka teru je, tor.

Yoel 3:21

Tsô Me pase ishô i awambe a ve a M vande pasen ishô i a ga la; gadia TER tem ken Shion.

Numeri 35:34

De hôngor nen a tar u ne tem ker, u Mo M tem hen atô u u ne ga; gadia Mo TER M tema hen atô u Mbaiserael.

Mateu 19:26

Kpa Yesu gem kenger ve yô, kaa a ve er: Or yô, fe kwagh ne ityô ga, kpa Aôndo yô, fe akaa cii ityô.

YOHANE 1:14

Man Imo la hingir or je, va tema her a vese, se kenger icivir Na, icivir la lu er ka i Wan u môm môm u Ter nahan, mgbough a mrumun u sha mhôôn man mimi kpaa.

YOHANE 14:17

ka Jijingi u mimi u tar u fetyô u ngohol Un ga yô, gadia ngu nengen a Na ga, mfe kpaa u fa Un ga; ne yô, ne fa Un, gadia ngu a ven, shi Una lu ken a ven kpaa.

YOHANE 14:23

Yesu gema kaa a na er: Aluer Mea doo or ishima yô, nana kuran kwaghôron Wam, Terem kpaa nana doo Un ishima; Sé va her a nan Sé va er ijiir i tsan her a nan kpaa.

2 Mbakorinte 6:16

Ka nyi i zough tempel u Aôndo a akombo? Gadia se yô, se mba tempel u Aôndo u uma je. Kape Aôndo A kaa je la er: Me tema hen ve shi Me zenden hen atô ve kpaa, Me lu Aôndo ve, ve kpaa vea lu nongoior Wam.

Mpase U Yohane 21:3

Shi m ungwa zegeimo due ken ikônough ki torough kila kaa er: Nenge, tenti u Aôndo ngu hen ior, Una tema a ve, vea lu nongoior Na, Aôndo iyol Na Una lu a ve.