Efeho 2:3 - Tokelauan New Testament

³ Ko te mea moni lava, ko ki tātou uma lele nae vē foki lava ko ki lātou. Ko ki tātou nae ola e tuha ai ma o tātou manakoga fakatetagata, ma nae mulimuli ki ho he mea e nanau ki ei o tātou tino ma o tātou māfaufau. I to tātou natula tēnei, ko ki tātou e vē foki lava ko iētahi tino uma lele, na tuku e pa ki ei te tōkahā o te Atua.

Efeho 2:3 Iomraidhean Croise

Maleko 4:19

kae ko popōlega o te ōlaga ma te mānumanu ki koloa o te lalolagi ma iētahi mea uma e naunau ki ei, kua tumu ai te loto ma kua taomia ai te fekau ma hē fua mai ai ni fua.

Ioane 1:13

E hēki kavea ki lātou ma fānau a te Atua, e vē ko te tūlaga māhani fakatetagata, e fānanau mai ni fānau e a he tamana; kae ko te Atua lava ia, ko to lātou Tamana.

Ioane 8:44

Ko koutou ko nā fānau a te koutou tamana, te Tiāpolo, ma e fofou lava koutou ke fai te mea e fofou ia ki ei. Mai te kāmataga, ko ia ko he fahioti tagata ma nae hē fofou lele ki te meamoni, ona e hēai he meamoni e ia te ia. Kāfai e tautala i te pepelo, e fai lava e ia te mea kua māhani ai, auā ko ia ko he tino talapepelo, ma ko te tamana o talapepelo uma.

Gāluega 14:16

I nā aho kua loa, na ia tukua ia tagata uma ke fai lava te mea e loto ki ei te tino.

Loma 1:24

Ma ko te mea ia kua tīaki ai ki lātou e te Atua ke fai nā mea kino e nanau ki ei o lātou loto, ma ko o lātou māfaufauga kino, e fai ai e tētahi ki tētahi, nā uiga mātagā ki o lātou tino.

Loma 11:30

Kae vē la ko koutou tagata nukukehe, e i ei te taimi na teteke ai koutou ki te Atua. Kae i te taimi nei, kua teteke ia tagata Ihalaelu ki te Atua, ma kua fakaalia tona alofa fakahao mo koutou.

Loma 13:14

Kae tātou hiki ake nā meatau a te Aliki ko Iehu Keliho, ma nahe ki tātou toe manatu ki nā uiga mātagā fakatetagata ma te fakamaliega o ona tuinanauga.

Loma 2:14

Ko tagata nukukehe e hē ki lātou iloa te Tūlāfono; kae i ho he taimi lava e fai ai e ki lātou he mea e fakatonu mai e te Tūlāfono e ala i o lātou lava lagona lilo, e fakaali mai i kinā e iloa e ki lātou nā mea e tatau ma nā mea e hē tatau ke ki lātou faia, e ui lava e hē ki lātou iloa te Tūlāfono.

Loma 5:10

Ko ki tātou nae fili ki te Atua, kae na ia faia ki tātou ma ana uō, e ala i te oti o tona Ataliki. Nei la ko ki tātou ni uō e a te Atua, ka hē hili atu nei la te mautinoa ko ki tātou ka fakahao e ala i te ola o Keliho?

Loma 5:9

E ala i tona toto, kua fakalelei ai to tātou va ma te Atua, ma ka hē hili atu nei la te mautinoa ko ki tātou ka fakahao e ia mai te tōkahā o te Atua!

Loma 6:12

Ko te agahala e hē tatau ke pule ki outou tino e fano e pala, kae ke uhitaki ai koutou ki nā tuinanauga o koutou.

Loma 7:18

E iloa e au e hēai he mea lelei e nofo i loto ia te au — i toku natula fakatetagata. Auā e ui lava ko te loto naunau ke fai te mea e lelei e ia te au, kae e hē kō mafaia oi fai.

Loma 9:22

E vēhea kāfai te Atua e fofou ke fakaali tona tōkahā ma tona mālohi, kae kua lahi pea lava tona onohai ki nā tino e tatau ke pakū ki ei tona tōkahā, nā tino e tuku e fakaumatia;

1 Kolinito 4:7

Na hei faia nei koutou ke hili atu i lo iētahi tino? E hēki fōkiatua nei e te Atua nā mea uma ki a te koutou? He ā la te fāfifia tauanoa ai koutou, e vē lele ko nā mea ia te koutou, e hē ni meaalofa?

2 Kolinito 7:1

Te kau uho pele, ko nā folafolaga iēnei kua uma te fai e te Atua mo ki tātou. Ko te mea ia, fakamamā loa ki tātou mai nā mea uma e hē mamā ai o tātou tino ma o tātou agaga, ma ke paia kātoatoa ki tātou e ala i te mataku i te Atua.

Kalatia 3:22

Kae ko te tuhituhiga paia e leamai ko tagata uma o te lalolagi kua i lalo o te pule a te agahala; ma ko te meaalofa la tēia kua folafola e ala i te fakatuatua ki a Iehu Keliho, e fōki ki a te ki lātou e talitonu.

Efeho 2:2

I nā aho iēnā, ko koutou nae mulimuli ki nā uiga kino o te lalolagi; ko koutou nae uhitaki ki te pule o agaga i te vānimonimo, tē e ia pūlea nā tino e hē uhitaki ki te Atua.

Efeho 4:22

Ko te mea ia, tīaki loa outou uiga tuai nae ola ai koutou muamua — nā uiga tuai e fakaumatia ai koutou ona e maua mai ai e koutou nā tuinanauga e fakahehē ai.

Kolohe 1:21

E i ei te vāitaimi na mamao lele ai koutou ma te Atua ma na kavea ai koutou ma ona fili, ona ko nā āmioga kino a koutou nae fai vēnā ma outou māfaufauga kino.

1 Tehalonia 4:13

Te kau uho, ko ki mātou e fofou ke iloa e koutou te meamoni e uiga ki nā tino kua oti, kae ke nahe fakanoanoa ai koutou e vē ni tino kua hēai he fakamoemoe.

1 Tehalonia 5:6

Ko te mea ia, ko ki tātou e hē tatau ke momoe e vē ko iētahi tino; ko ki tātou e tatau ke āla ma ke hako te māfaufau.

1 Timoteo 6:9

Kae ko nā tino e fofou ke lahi ni a lātou koloa, e maua ki lātou i nā fakaohoohoga ma lave i te māilei a nā tuinanauga valea e fakakino ai ki lātou, ma toho ai ki lalo ki te mea e fakatāugā ma fakaumatia ai ki lātou.

Tito 3:3

Auā ko ki tātou foki nae vālelea, hē uhitaki ma nae hehē. Ko ki tātou nae fai ma pologa ki manakoga ma tuinanauga kehekehe. Ko ki tātou nae ola i he ōlaga tau fakakino ma te fuā; nae inohia ki tātou e tagata ma nae inoino foki ki tātou ki a te ki lātou.

1 Petelu 1:14

Uhitaki ki te Atua, ma nahe pūlea outou ōlaga e nā manatu nae ia te koutou kae ko hēki koutou iloa ai te Tala Lelei e uiga ki a Iehu Keliho.

2 Petelu 2:14

Oioti lava te mea e fano ki ei o lātou māfaufau, ke i ei he avanoa ke fai ai e ki lātou te mulilua; ko to lātou umiti ki te agahala e hē mafai ke uma. E takitaki hehē e ki lātou nā tino e fakahehē gōfie, ma ko o lātou loto e akoako ke iloa oi manako lahi. Kua fakamālaia ki lātou e te Atua.

2 Petelu 2:18

E fai e ki lātou nā tala mimita ma te valea, ma fakatōhina e ki lātou e ala i nā tuinanauga o te tino, nā tino fātoā mafai ke olo kehe mai i te ōlaga hehē.

1 Ioane 2:16

Ko nā mea uma o te lalolagi — te nanau ki te tino, nanau ki nā mea e kitea e nā mata, te fāfia i nā mea o te ōlaga — e hēai he mea o nā mea iēnei e hau mai te Tamana; e hau uma lele mai te lalolagi.

1 Ioane 2:8

Kae ko te fakatonuga e tuhi atu ai au i te taimi nei, ko he fakatonuga fou, auā ko tona fakamāoniga e kitea e ala ia Keliho ma vēnā foki ia te koutou. Auā ko te pōuliuli e gaholo e matafi kehe, ma ko te mālamalama moni kua huhulu mai.