Wahyu 11:3 - En Taar Weru a nunuwu' é Tontemboan

³ Wéan-Ku oka kawasa a sé rua sairi-Ku e mangé kumua i nunuwuun-Ku ang karapi ing kumarai ing karai mala'lu eng kauréna sangariwu rua ngaatus enem ngapulu' ngando.”

Wahyu 11:3 Iomraidhean Croise

Matius 11:21

“Icawangkuro mio' kamu sé tou ang kota Khorazim! Wo icawangkuro ka'i kamu sé tou ang kota Betsaida! Ampa'paan niéma'-Kuo eng kakaya'kaan an uner iow taan ra'ica pinercaya miow wo ra'ica mape'dis. Sa sé kakaya'kaan itu niéma'-Ku an Tirus wo an Sidon indior, tantu séra imape'diso wo kumarai ing karai tanu tuus mala'lu wo mu'bur in awu an do'kos éra tanu tuus séra manesel mengéma-ngéma' ing kamesé-meséaan.

Matius 18:16

Taan sa ra'ica kiimna tumerima in sina'u miow, iwalio mangé esa kuma'pa rua tou mamuali sairi. Ampa'paan ang Kitap Le'nas aipatic, ‘En tumantu si esa tou meséa', musti awéan rua kuma'pa telu tou e mamuali sairi.’

Lukas 10:13

Icua ka'i i Yesus, “Icawangkuro mio' kamu sé tou ang kota Khorazim! Wo icawangkuro ka'i kamu sé tou ang kota Betsaida! Ampa'paan niéma'-Kuo eng kakaya'kaan an uner iow, taan ra'ica pinercaya miow wo ra'ica kiim mape'dis. Sa sé kakaya'kaan itu niéma'-Ku an Tirus wo an Sidon indior, tantu séra imape'diso wo kumarai ing karai tanu tuus mala'lu wo mu'bur in awu an do'kos éra tanu tuus séra manesel i mengéma-ngéma' ing kamesé-meséaan.

Lukas 24:48

Wo icamuo en suméré an tutuw-Ku i mawendu, maté wo tumou sumawel. Anaé, sapa en sinéréo miow, icuao mangé a sé pakasa in tou.

Yohanes 15:27

Wo icamu ka'i musti méé ing kasairian a sé tou walina andumoro' Yaku, ampa'paan kamu mewali-walio wo Yaku tumo'tolke' mai asi kataré.”

Yohanes 3:27

Isowat i Yohanes ai séra, “En tou ra'ica toro tumerima in sapa-sapa sa ra'ica aiwéé i Amang Kasuruan ai sia.

Kisah Para Rasul 1:8

Taan an tutuw i Roh Le'nas tumumpa mai ai camu, kamu makéré oka kawasa. Wo kamu mamuali oka sairi andumoro' Yaku an Yerusalem, am pakasa in Yudea wo an Samaria wo akar an tempok ing kayo'baan.”

Kisah Para Rasul 13:31

Piraan ngando eng kauréna si Yesus mapaturu' in owak-Na a sé murit-Na, sé sumangkumo kumiit Sia ang Galilea owo wo mangé an Yerusalem. Sérao intarépé' sé mamuali sairi-sairi-Na a sé tou Israel.

Kisah Para Rasul 2:32

Si Yesus anioo si tinou sumawel i Amang Kasuruan. Wo icamio im baya e mamuali sairi andumoro' in itu.

Kisah Para Rasul 3:15

Sia si Le'nas itu palemboian ing katouanta pinatéo miow taan Sia tinou sumawel i Amang Kasuruan an uner é tou imaté. Kamio e mamuali sairi sapaoka Sia tumou sumawel.

1 Korintus 12:28

An jamaat, awéan piraan tou sé aitantuo i Amang Kasuruan mamuali: kataré ruru'du'an, karua nabi, katelu guru. Wo ka'i winéanai kamang tatambér e maéma' sé kakaya'kaan, in sumama' sé tou, tumawang sé tou sé perlu tawangen, mamuali kikiiten wo ka'i maroma' a membam-balinaan nunuwu' i roh.

2 Korintus 13:1

Asi kumatelu anio' woo aku masalé' maai ai camu. Ang Kitap Le'nas aipatic, “Susur in awéan perkara musti awéan kasairian é rua kuma'pa telu tou, wo em perkara itu uli-ulit ro'na percayan.”

Efesus 4:11

Wo Siao en tumambérai ing kamang a sé tou. Awéan tou sé aitantu-Na mamuali ruru'du'an, mamuali nabi, mamuali tou mengakua in Abar Kaaruien andumoro' i Yesus Kristus, mamuali gembala é jamaat wo ka'i guru.

Wahyu 1:5

Wo en upus aitambér wo eng kaeluran itu ka'i mai asi Yesus Kristus owo. Siao en sairi le'tek, wo eng kataré-taré itumou sumawel an uner é tou imaté, wo ka'i e makakawasa a sé kolano asi cayo'baan anio'. Sia mengaupus icita, wo mekar ing kamesé-meséaanta ang karapi in enda'-Na.

Wahyu 11:2

Taan tioo peuku-ukurenmu eng kintal si ang kesot im Balé Le'nas, iwayao mio' en itu ampa'paan eng kintal itu aiwééo a sé bangsa walina. Wo ipeléa-léak oka éra eng Kota Le'nas epat ngapulu' rua ngaserap eng kauréna.

Wahyu 11:6

Wo séra in dua awéan kawasa en lumémpen in langit wosama' ra'ica muran ang karoro'an éra makua i nunuwuun i Amang Kasuruan. Séra awéan kawasa ka'i méma' im palemboian in dano mamuali enda', wo kawasa e méma' pakasa ing kawangkuran ang kayo'baan, kawisake' en itu icasalé' éra émaan.

Wahyu 12:6

Wo si wéwéné itu tumincas angé an tana' kapayasan, asi esa tampa si aitu'tulo i Amang Kasuruan ai sia. Am bitu sia paliaran oka sangariwu rua ngaatus enem ngapulu' ngando eng kauréna.

Wahyu 13:5

Asi binatang itu winéan wa'ba' si wuta ing katirayoan wo mengaojat. Wo sia winéano ka'i kawasa e méma' ing kasalé'- anna epat ngapulu' rua ngaserap eng kauréna.

Wahyu 19:10

Wo aku kumundu an dior ing kécéi i malaékat itu en sumiri' sia, taan icuana a yaku, “Tioo ko méma' taniitu a yaku! Ampa'paan yaku asaloke' ata i Amang Kasuruan kaputému wo kaputé é poo-poowmu an esa paémanen sé masairi andumoro' i Yesus. Apoono mangé si Amang Kasuruan, ampa'paan eng kasairian i Yesus ituo e méma' sé tou mengakua in Taar i Amang Kasuruan.”

Wahyu 20:4

Kekawus in itu sérénku em palukutan pasiri-siriin, wo sé makalukut am bawona. Séra winéan kawasa e makim. Wo sérénku ka'i sé mu'kur é tou sé imaté pinokolan in do'kos ampa'paan mengasairi in andumoro' i Yesus wo ka'i mengakua in Taar i Amang Kasuruan. Séra sé tou sé ra'ica makuru en sumiri' a si binatang itu wo im patongna, wo ra'ica tumerima in tuusna an tuintung wo ang kama éra. Séra itu tinou sumawel wo merénta mewali-wali wo si Kristus sangariwu ngata'un eng kauréna.