Lukas 14:13 - En Taar Weru a nunuwu' é Tontemboan

¹³ Anaé, sa ko méma' im pésta kuman wo melep, enoteno mangé sé tou lengéi, sé tou ra'ica lekep en owak, sé tou késo' wo sé tou wola.

Lukas 14:13 Iomraidhean Croise

Matius 15:30

An tutuw itu keli en tou meréro-rérot maai ai Sia. Iwali éra mai sé tou késo', sé tou wola, sé tou kénto', sé tou wowo' wo keli ka'i en sakit walina, wo iweta' éra an dior i Yesus. Wo séra im baya sinama'-Na.

Matius 22:10

Kumawus in itu sé ata itu mangém. Wo pakasa sé tou ipeta'up éra an lala-lalan, tou léwo' kuma'pa tou sama', enoten éra mai am pésta itu. Akar an tampa im pésta itu mawutao é sakéi.

Lukas 11:41

Ampa'paan in ituo iwééo mio' sapa sé ai camu en tumawang sé tou lengéi. An tutuw iow iméma' in tanu siitu, pakasa waya uli-ulit maweresi.

Lukas 14:12

Wo icua i Yesus ka'i a si tou imenot Sia, “Kawisa mangé, sa ko méma' im pésta endo kuma'pa wengi, tioo ko menot sé kara-karapimu, sé katuarimu, sé poo-poowmu, kuma'pa sé katana'mu siya'. Ampa'paan kawisa mangé enoten éra oka ko wo in taniitu suliin éra oka ai co sapa si niéma'mu.

Lukas 14:14

Pakakamangen oka ko, ampa'paan séra ra'ica wana sapa-sapa en suli' ing kalooranmu. Suliin oka i Amang Kasuruan eng kalooranmu itu an tutuw touen-Na sumawel sé tou wutu-wutul maéman wo le'tek ai Sia.”

Lukas 14:21

Wo si ata itu maréng angé sumawel wo icuana waya en itu a si tuang si méma' im pésta. Wo si tuang itu mae'bow keli wo icuana a si atana, ‘Mario-rioro mangé an lala-lalan wangko' wo an lala-lalan pesut ang kota wo iwali mai sé tou lengéi, sé tou ra'ica lekep en owak, sé tou wola wo sé tou késo'.’

Kisah Para Rasul 9:39

Kelinga in itu, si Petrus makala'us tumu'tul wo mangé ang karapi éra. Icateka' mangé am bitu, iwali éra sia ang kamar an dangka'. Wo pakasa sé wéwéné balu tumulung rumuru mangé a si Petrus. Wo ang karapi i mengamé-ngamé' ituru' éra ai sia pakasa eng karai wo en juba si niéma'na tutuw i menonou.

1 Timotius 3:2

Si mengatilik an jamaat, sia itu musti ra'ica wana tou e ro'na méé kaséaan, si wéwéné penanaanna waya in esa, makawoo tumang in owak, mengapaké ing kapinteran asi Casuruan owo, makaperi sumoma, tansaléén mengaterima sé tou am baléna, pinter masusui sé tou,

1 Timotius 5:10

wo kailekan ka'i é tou sapaoka sia matawoi in loor tanumai: pengaurusenna in sama' sé toyaangna, pengasungkulenna in sama' sé tou mengaai am baléna, pengaselewiranna in sama' sé tou maéman wo pengatawangenna sé tou ang kasusaan wo mengéma-ngéma' in loor a sé pakasa in tou.

Titus 1:8

Taan séra musti masalé' materima sé tou walina en lumosér am baléna, masalé' mengaéma' sé loor, pinter, ra'ica marapit, menonou le'nas wo makawoo tumang ing kasalé'an in owak.

Filemon 1:7

Poowku Filemon, ico mengaupuso sé tou le'nas akar séra kinaiborano in upusmu. Ampa'paano in itu yaku arui keli.

Ibrani 13:2

Tioo marua-rua até en tumerima si séike' en lumosér am balé miow mandé ka'i ra'ipé' katuusan iow. Ampa'paan ang karapi méma' in taniitu, awéan sé piraan tou indior ra'ica kinailekan éra itumerimao sé malaékat am balé éra.