Filipi 4:1 - En Taar Weru a nunuwu' é Tontemboan

¹ Ampa'paano in itu, é poo-poow sé icaupusku wo sé pengalelonku, pangilekenku entééno mangé em paémanen iow a si Apo' Yesus tanu in tou si uli-ulit keter makatulung. Icamuo eng kaaruianku wo eng katirayoanku si tanu mahkotaku.

Filipi 4:1 Iomraidhean Croise

Matius 10:22

Wo pakasa in tou masuut oka icamu ampa'paan kamu makiit Yaku. Taan sé tou le'tek makiit Yaku akar imaté makéré oka ing kalowiran.

Yohanes 8:31

Wo icua i Yesus a sé tou Yahudi sé maémano ai Sia. “Sa kamu menonou kumiit in sususuien-Ku, kamu uli-ulit murit-Ku,

Kisah Para Rasul 11:23

An tutuw i Barnabas icateka' a mangé mbitu, sérénna sé tou maéman am bitu tinambéranai ing kamang i Amang Kasuruan, wo sia wutu-wutul arui. Wo sina'uenna séra im baya wosama' uli-ulit ang karapi in lekep en até, le'tek a si Apo' Yesus.

Kisah Para Rasul 14:22

An tampa-tampa itu, si Paulus wo si Barnabas kumeter in até é tou maéman wo sumina'u iséra wosama' le'tek am paémanen. Wo icua i Paulus wo si Barnabas, “Sa kita masalé' mamuali tou i Amang Kasuruan si Kumawasa tanu Kolano, kita musti meta'up ing keli kawenduan.”

Kisah Para Rasul 2:42

Séra mengali'us mewali-wali wo le'tek mengalinga sé ruru'du'an mengasusui in andumoro' i Yesus. Wo séra tatap mengaéma' im perjamuan wo mengasombayang.

Roma 2:7

Sé tou le'tek mengaéma' sé loor sé masalé' makéré i rarayo wo in sisiri' wo ing katouan sé ra'ica maka'pu, séra wéan-Na oka ing katouan akar ing kauré-uré.

1 Korintus 15:58

Ampa'paan in ituo é poo-poow sé icaupusku, keteren em paémanen iow wo ra'ica toro marua-rua wasa. Wo mare'de-re'dem an tawoien i Casuruan, ampa'paan kailekano miow sapaoka sé tinawoi iow an dior i Casuruan ra'ica wana si ra'ica wana en torona.

1 Korintus 16:13

Mareti-retio mangé! Wo kasake' i makatimboi asi paémanenmu. Mabrani-branio wo makete-ketero.

2 Korintus 1:14

Intarépé', mandé kamu ra'ipé' talos makailek andumoro' icami, taan an tutuw i Apo' Yesus maai sumawel, kamu tirayo oka ampa'paan kami taniitu ka'i kami tirayo oka ampa'paan icamu.

Galatia 5:1

Si Kristus iméma'o icita ra'io ka'i ang kakawasaan in ukum Torat, wosama' kita ra'io pakawa'kesen in ukum Torat. Ampa'paano in itu timboieno sumama-sama' eng kaloasan itu, wo tioo maréng menonou tanuoka ata si pakawa'kesen in ukum Torat.

Filipi 1:27

Anaé, em penting keli kamu musti menonou kumiit in sapa sé aisusui an Abar Kaaruien andumoro' i Kristus. Wo in taniitu, aku maai meta'up wo icamu kuma'pa ra'ica, kailekanku oka sapaoka kamu enté' makatulung an esa wasa wo rumaméji mewali-wali an esa até torona im paémanen ampa'paan makiit in Abar Kaaruien.

Filipi 1:8

Kailekan i Amang Kasuruan sapaoka kamu im baya lelonku keli wo icaupusku tanu si Kristus Yesus mengaupus icamu.

Filipi 2:16

Ang karoro'an in itu turu'o miow ka'i ai séra en Taar si mawéé ing katouan. Wo in taniitu an tutuw i Kristus maai sa, yaku ro'na tumirayo ampa'paan pakasa sé pinaraméjianku a si tawoienku ra'ica mara'i-ra'i wo sé pinala'lé-la'léanku mai awéan en torona.

Filipi 2:26

Icasalé'ku sia yutus angé sumawel, ampa'paan icamu im baya lelonna keli wo en aténa ka'i mendam in susa ampa'paan pinalingao miow sapaoka sia sumakit.

Kolose 4:12

Si Epafras méé ka'i mai in siri' ai camu. Sia esaan an jamaat iow wo ata i Yesus Kristus. Kamu penomba-nombayangna wosama' em paémanen iow a si Kristus Yesus makaenté-enté' tanu tou wangkoo wosama' kamu ka'i wutu-wutul makailek sapa waya sé icasalé' i Amang Kasuruan.

1 Tesalonika 3:13

Pangileken ami a si Casuruan eng kumeter in até miow wosama' en até miow ra'ica wana kaséaan wo le'nas an dior i Amang Kasuruan si Amangta, an tutuw i Yesus Apo'ta maai sumawel mewali-wali ang kerapi é tou le'nas-Na.

2 Tesalonika 2:15

Ampa'paan ito é poo-poow, male'te-le'teko am paémanen wo timboien sumama-sama' en sususuien si aisusuio ami ai camu ang karapi in surat kuma'pa sé nuwu' sé lininga miow ai cami.

2 Timotius 2:1

Timotius, toyaangku! Si Kristus Yesus tumambéro mai in upus-Na ai co, ampa'paan in ituo pakéno en itu eng kumeter in atému.

Ibrani 10:23

Mayoo timboianta mauli-ulit em paémanen itu, tioo marua-rua wasa. Ampa'paan si Amang Kasuruan le'tek asi sapa sé aijanji-Na.

Ibrani 3:14

Ampa'paan kita imeesao wo si Kristus, anaé timboienta sumama-sama' em paémanenta akar ing kaka'puan ing katouan, kaputé kita ing kataré-tarépé' maéman ai Sia.

Ibrani 4:14

Kita intarépé' makaanuo Imam si Mangko-wangko' si mangéo muntep an sorga wo an dioro i Amang Kasuruan en tumawang icita. Sia ituo si Yesus, Toyaang i Amang Kasuruan. Ampa'paan in ituo mayoo kita mauli-ulit tumimboi im paémanenta a si Yesus meputé im paémanen si pengaakunta.

2 Petrus 3:17

Taan kamu é poo-poow sé icaupusku, kailekano miow andumoro' sé itu. Ampa'paano in itu, mareti-retio mangé in sususuien é guru ra'ica wutul itu, wosama' kamu ra'ica kumiit in sususuien éra wo kamu ra'ica mekar im paémanen iow.