Ap 3:8 - Porciones del Nuevo Testamento en el idioma Letuama

⁸ Ritaja mija baaika õñuka ñime. Ᵽoꞌimaja mijare ĩaikareka ᵽuri ‘Imatiyarimaja nime’, mijareka ãrĩbeyurã. Imakoꞌomakaja yiwãrõeka jia yiꞌririjayurã mija ime. Suᵽabaatirãoka aᵽerãre kĩkiwaꞌri ‘Jesucristore yiꞌribeyurã yija’, ãrĩbeyurã mija. Suᵽa imarĩ, maki mijare jãjibaakoreka, koᵽereka mijaroꞌsi yiwieyu, yibojariroka mija wãrõrijayaokoroꞌsi.

Ap 3:8 Iomraidhean Croise

Los Hechos 14:27

Torã ᵽeꞌrietatirã Jesúre ãꞌmitiriᵽẽaekarãte narẽrĩrũjeka. Suᵽabaatirã ritaja naturitaᵽaekarõꞌõrã Tuᵽarãte nare jeyobaaekakaka tokarãre nabojaeka. “Jia Tuᵽarãte yijare jeyobaaraᵽe. Suᵽa imarĩ judíorãkamarĩrã imarãoka Jesúrika bojariroka jia ãꞌmitiyurã imarĩ Jesúre nayiꞌyu”, ãrĩwaꞌri nabojaeka.

2 Co 2:12

Troade wãmeika wejearã yeyaraᵽaka ᵽoto Maĩᵽamakire yire jeyobaaikaᵽi ãrĩwaꞌri imatikaja ᵽoꞌimajare imaraᵽe yire ãꞌmitiyaokaroꞌsi. Suᵽa imarĩ Jesúrika bojariroka nare yiwãrõmaka, jĩjimakaᵽi tokarãre yire ãꞌmitiraᵽe.

Filipenses 4:13

Kaꞌwisikareka, kaꞌwisimarĩarekaoka imawãrũtikaki ñime.

Ap 2:13

Ritaja mija imarijayua ñiaika simamaka, Satanáre jãꞌmeirõꞌõrã mija imaoka ñorĩᵽatayu. Torã imakoꞌomakaja yire yiꞌriwaꞌri Satanáre ãꞌmitiriᵽẽabeyurã mija ime. Mia, torã jia yire yiꞌriwaꞌri Antiᵽas wãmeikire yirika bojariroka bojajaꞌatabeyuka kimamaka, kire najããeka. Iꞌsuᵽaka tokarãre kire baakoꞌomakaja yire mija yiꞌyua jaꞌatabeyurã mija.

Ap 2:2

Ritaja mija baaika õñuka ñime. Suᵽa simamaka, ᵽoꞌimajare yire yiꞌririka yaᵽawaꞌri mija kaꞌwisijũayu. Iꞌsuᵽakajaoka aᵽerãre baꞌiaja mijare baakoꞌomakaja yire mija yiꞌririjaꞌatabeyua jia ñoñua sime. Iꞌsuᵽakajaoka ‘Cristorika bojariroka bojarimaja yija ime’, ĩꞌrãrimarãre ãrĩkoꞌomakaja, ‘¿Yaje rita nañu?’, ãñurã mija ime. Suᵽa imarĩ nabaarijayua jia ĩawãrũtirã, nawãrõika ãꞌmitiritirã, ‘Waᵽuju ᵽakibaraka baꞌiaja baairã nime’, mija ãñua ñorĩᵽataika.

Ap 22:7

Ikuᵽaka aᵽea yire kẽrãᵽe: —Ikuᵽaka Jesúre ãñu: “Mija ãꞌmitiᵽe. Ñojimarĩji mija ᵽõꞌirã yaꞌrirãñu ate. Ika majaroka ‘Ikuᵽaka simarãñu’, ãrĩwaꞌri Tuᵽarãre bojaekakaka oꞌoeka ᵽũñurã ima yiꞌyurã jĩjimakaᵽi imarãñurã”, kẽñu,==ángelre yire ãrãᵽe.

Ap 3:1

Iꞌsia beꞌrõ ikuᵽaka yire kẽrãᵽe ate: —Sardes wejeareka yire ãꞌmitiriᵽẽairãre imaruᵽutarimajiroꞌsi ikuᵽaka mioꞌoĩjibe: “Ĩꞌᵽotẽñarirakamarã uᵽaka imaki tẽrĩwaꞌribaji imatiyaiki Esᵽíritu Santo ᵽuᵽakaᵽi baarijayuka, ĩꞌᵽotẽñarirakamarã tãꞌᵽia rikaiki ñime. Mia: Ritaja mija baaika õrĩᵽataiki oka ñime. Mijare ĩatirã ‘Cristore jia yiꞌyurã nime’, ᵽoꞌimajare mijareka ãrĩkoꞌomakaja yireka ᵽuri yiyaᵽaika uᵽaka baabeyurã imarĩ, yire ãꞌmitiriᵽẽabeyurã uᵽaka mija ime.

Ap 3:10

‘Aᵽerãre baꞌiaja mijare baakoꞌomakaja, yire ãꞌmitiriᵽẽabaraka mija imabe’, mijare ñarãᵽaka uᵽakaja yiꞌyurã mija ime. Suᵽa imarĩ ritaja ᵽoꞌimajare baꞌiaja jũarijẽꞌrãka seyarãka ᵽoto mijare ĩarĩᵽaraka ñimarijarirãñu. Iꞌtojĩte ritatojo wejeareka imarãre ĩatirã ‘Ĩrã imarã baꞌiaja jũawaꞌri ᵽuᵽaᵽeꞌritirã yire ãꞌmitiriᵽẽairã, aᵽerã ᵽuri jẽnoꞌobaji jayurã’, ñarĩwãrũrãñu.

Ap 3:15

Ritaja mija baaika õrĩᵽataiki ñime. Yire yiꞌririjaꞌatabeyurã mija imakoꞌomakaja, ‘Jiibaji kika maimajĩkareka jia sime’, yireka ãrĩbeyurã mija. Suᵽa imarã imarĩ, ukurũkia ijitakamaria, jijitakamarĩa uᵽaka mija ime. Suᵽa mija imarika yaᵽabeyuka yiꞌi.

Ap 3:7

—Toᵽi ate Filadelfia wejeareka yire ãꞌmitiriᵽẽairãre imaruᵽutarimajiroꞌsi ikuᵽaka mioꞌoĩjibe: “Tuᵽarãᵽi imarijayuka imarĩ ñañu uᵽakaja baaiki ñime. Suᵽabaatirã ĩᵽi David imaekaki riᵽarãmi imarĩ, kiuᵽakajaoka Tuᵽarãrirãre jãꞌmerimaji ñime. Suᵽa simamaka yijãꞌmerũkirõꞌõrã kãkaokaroꞌsi koᵽereka yiwierãka, maki satãtewãrũberijĩki. Suᵽabaatirã kãkakoreka koᵽereka yitãterãka maki sawieberijĩki.