Ap 13:1 - Porciones del Nuevo Testamento en el idioma Letuama

^1-2 Iꞌsia beꞌerõꞌõ ĩꞌrĩka werikaᵽakiaki maikoribeyukare riaᵽakiakaᵽi marĩraꞌaraᵽe. Ĩꞌᵽotẽñarirakao kiruᵽukoꞌa, suᵽabaatirã ĩꞌᵽaᵽitarakabi kiwaka buꞌya tuaeka kimaraᵽe. Suᵽabaatirã jiamarĩa Tuᵽarãreka jaika kiruᵽukoꞌarakakaja oꞌojĩꞌaekaki kimaraᵽe. Yaiuᵽaka ĩoiki imakoꞌomakaja oso ũꞌᵽua uᵽaka joꞌbaka ũꞌᵽuiki kimaraᵽe. Suᵽabaatirã león rijokoᵽe uᵽaka simaraᵽe kirijokoᵽea. Kajuyaiᵽakiaka uᵽaka ĩoiki kiõñua kire jaꞌataekaki kimaraᵽe. Suᵽa imarĩ, “Yiruᵽarikũmuarã ĩᵽi uᵽaka miruᵽabe. Tẽrĩritaka ñima uᵽaka mire ñimarũjeyu. Suᵽabaatirã ritaja wejeareka imarã ᵽoꞌimajare yijãꞌmeika uᵽaka nare mijãꞌmebe”, kajuyaiᵽakiaka uᵽaka ĩoikire kire ãrãᵽe.

Ap 13:1 Iomraidhean Croise

Ap 11:7

Torãjĩrã mae, Tuᵽarãroꞌsi jaiwaᵽuꞌataĩjibaraka nima ᵽuyarirãka ᵽoto werikaᵽakiaki koᵽea tiyibeyurõꞌokaki naka jĩrĩrĩ mirĩetaraki. Suᵽa baatirã, nare kijããrãñu.

Ap 12:3

Beꞌerõꞌõjĩte ate ñiaraᵽe: Kowãꞌtarã kajuyaiᵽakiaka uᵽaka ĩoka jũꞌaᵽakiaka, ĩꞌᵽotẽñarirakao buꞌya ĩᵽarimarãrikakaka tuaeka ruᵽukoꞌaika simaraᵽe. Suᵽabaatirãoka ĩꞌᵽaᵽitarakabi sawaka imaraᵽaka.

Ap 13:11

Iꞌsia beꞌrõ aᵽika weriki waᵽu koꞌtorõꞌõᵽiji kaꞌiaᵽi kiwararĩkamaka ñiaraᵽe. Oveja weiwaꞌyua waka mamaka waraika uᵽaka ĩꞌᵽabi wakaiki imakoꞌomakaja, kajuyaiᵽakiaka jaika uᵽaka kijairaᵽe.

Ap 13:14

Mamarĩkakire jeyobaaikaᵽi baꞌirabewaꞌri ritatojo wejeareka imarã ᵽoꞌimajare kiᵽakiraᵽe. Nare kiᵽakimaka, “Tuᵽarã uᵽakaja imaki kime”, mamarĩkakireka ãrĩᵽuᵽajoairã najaraᵽe. Mamarĩkaki matãrĩberijĩka uᵽaka kãmia yayaeka mirãki jẽrãka ᵽoꞌimajare kiᵽoꞌijiarũjeraᵽe. “Baꞌitakaja ᵽoꞌimajare ᵽakibekaja mimabe”, Tuᵽarãre kire ãrĩbeᵽakãꞌã iꞌsuᵽaka kibaaraᵽe.

Ap 13:15

Tuᵽarãre kika jaibeyukajia simamaka, mamarĩkaki jẽrãka baaᵽoꞌijiaeka kiᵽuᵽatõrõraᵽe. Ᵽoꞌimaja uᵽaka jaika sakijarirũjeraᵽe. Suᵽa imarĩ, “Jiyiᵽuᵽaka yire õrĩbeyurã, jããrũkirãroꞌsi oyiaja nimarãñu”, sãrãᵽe.

Ap 15:2

Suᵽabaatirã riaᵽakiaka jia waria okoika, ᵽeka jũꞌrẽika uᵽaka imaria ñiaraᵽe. Iꞌsiriarijerã rĩkimakaja ᵽoꞌimajare rĩkajiyeraᵽe. Werikaᵽakiaki uᵽaka imaki jẽrãka ᵽoꞌimajare baaeka, jiyiᵽuᵽayeebeyurã, kinúmero jĩꞌĩtabeyurã imarĩ werikaᵽakiakire tẽrĩkarã nimaraᵽe. Suᵽabaatirãoka arᵽa Tuᵽarãre nare ĩjika ᵽariji narĩkajiyeraᵽe.

Ap 16:13

Suᵽa simaraᵽaka beꞌrõ Satanárika ima maekarakamarã ĩᵽaruka uᵽaka ĩoika ñiaraᵽe. Ĩꞌrĩka imaraᵽaki kajuyaiᵽakiaka uᵽaka ĩoiki rijokoᵽeaᵽi ᵽoraᵽaki. Aᵽika ĩᵽaruka ᵽoraᵽaki werikaᵽakiaki rijokoᵽeaᵽi. Aᵽika ĩᵽaruka ᵽoraᵽaki weriki waᵽuju ᵽakibaraka, “Tuᵽarãroꞌsi bojaĩjirimaji ñime”, ãrãᵽaki rijokoᵽeaᵽi.

Ap 17:16

Ĩꞌᵽaᵽitarakamaki ĩᵽarimarã werikaᵽakiaki uᵽaka imakika miakoꞌorã, rõmore ĩariᵽeꞌyoirã nime. Suᵽa imarĩ baꞌiaja kore baawaꞌri, ritaja kobaꞌirĩjia ẽꞌmatirã jariromarĩko kojarirãñu. Suᵽa imarĩ, koriꞌia baꞌaᵽatatirã, koũꞌa ᵽuri ᵽekarã najoeriatarãka.

Ap 17:3

Iꞌsuᵽaka yire kẽrãᵽaka ᵽoto Esᵽíritu Santore jeyobaaikaᵽi ikuᵽaka yire sabaaraᵽe: Ĩꞌrĩka ángel ᵽoꞌimajamatorã yire eꞌewaꞌraᵽaki. Torã eyatirã werikaᵽakiaki jũꞌaka imaraᵽaki ᵽemarã rõmore tuyumaka ñiaraᵽe. Tuᵽarãre jaiyuyerikakaka wãmea oꞌoeka kireka jĩꞌĩjiyeraᵽaka. Suᵽabaatirã ĩꞌᵽotẽñarirakao kiruᵽukoꞌa, ĩꞌᵽaᵽitarakabi wakaiki kimaraᵽe.

Ap 17:5

Majẽrãkoꞌabeyua wãmea kokũꞌarã oꞌojĩꞌaeka imaraᵽaka. “Babiloniawejea”, ãrĩrikoᵽakaja simaraᵽe iꞌsia wãmea. “Ritaja baꞌiaja baawãꞌimarĩrimajare wãrõrirõmo imarĩ, naᵽako uᵽaka koime. Suᵽabaatirã ritaja baꞌia Tuᵽarãre yaᵽabeyuakaka ᵽoꞌimajare wãrõrimaja Babiloniawejeakarãre ime”, ãrĩrika simaraᵽe kokũꞌarã oꞌojĩꞌaeka.

Ap 19:19

Ika beꞌrõ werikaᵽakiaki uᵽaka imaraᵽaki ritaja ĩᵽarimarãre nasurararãkaᵽitiyika kirẽamaka ñiaraᵽe. Suᵽabaatirã torã imaraᵽaki kijeyomaki, “Yiꞌi imaki Tuᵽarãroꞌsi bojaĩjirimaji”, ãrĩkoᵽebaraka werikaᵽakiakire ĩaika wãjitãji maikoribeyua baabeawaꞌri, werikaᵽakiaki jẽrãka jiyiᵽuᵽaka õrãᵽarãre, suᵽabaatirã kiwãmea oꞌojĩꞌaraᵽarãre kiᵽakiraᵽe. Ritaja narẽrãᵽe, kawaru ᵽemarã tuyuraᵽakika, suᵽabaatirã kisurararãkaka ᵽitãꞌmua koꞌaᵽiꞌyaokoroꞌsi. Kawaru boika ᵽemarã tuyuraᵽaki naka jĩᵽaraka ĩꞌᵽarã baꞌiaja baarimajare kiñiꞌaraᵽe, werikaᵽakiakire, suᵽabaatirã, “Tuᵽarãroꞌsi bojaĩjirimaji ñime”, ãrĩroyiraᵽakireoka. Suᵽa imarĩ õñirãja azufreᵽi jũꞌrẽiritarã nare kitaaraᵽe.