Ap 11:8 - Porciones del Nuevo Testamento en el idioma Letuama

⁸ Suᵽa nare baatirã, bikija yaᵽua tetaekarã niᵽamakire naᵽatakĩaeka weje maꞌa ñeꞌmetãjirã nare kiᵽããjiyerãñu. Torã imatiyaika wejea Sodomareka imaekarã, Egiᵽtoreka imarã baꞌiaja baaroyika uᵽaka baairã nimaeka. Suᵽa imarĩ Jerusalén nawãmeyeeyu Sodoma, Egiᵽto.

Ap 11:8 Iomraidhean Croise

Los Hechos 9:4

Toᵽi mae marãkãꞌã baaberiwaꞌri sarãja Saulote ñaꞌrĩka. Torãjite mae, ikuᵽaka kire sãrĩka: —Saulo, Saulo, ¿dako baaerã baꞌiaja yire mibaariwãꞌimañu?==kire sãrĩka.

Ap 11:13

Maboꞌikakurirã naꞌraᵽakarõꞌõjĩte jimarĩ jãjia kaꞌia iyiraᵽaka. Iꞌsuᵽaka sabaamaka 1000rakawiꞌi imaraᵽakakaka 100rakawiꞌi sakuyuᵽateraᵽe. Suᵽa baawaꞌri siete mil rakamarã ᵽoꞌimajare sariataraᵽe. Õñia jariwaꞌraᵽarã ᵽuri sĩatirã ᵽuᵽatawaꞌri, “Tẽrĩritakaji maboꞌikakurirã imakire ime”, narãᵽe Tuᵽarãreka.

Ap 11:9

Maekarakarĩmi imaeka aᵽerĩmi wãjitãji aiyarõꞌõjĩrã namajaka torã imarãka. Torãjĩrã ritaja ᵽoꞌimatatarãre namajaka ĩarãñu. Namajaka ĩakoꞌomakaja nare ãꞌmijĩaekarã imarĩ, nare nayayerũjebesarãñu.

Ap 14:20

Suᵽa imarĩ weje aꞌriwaꞌrirã iyaka narĩꞌkaᵽaꞌseraᵽe. Sanarĩꞌkaᵽaꞌsemaka riaka uᵽaka sajururaᵽe riwea. Suᵽabaatirã trescientos kilómetro rõꞌõjĩrã yoerã sajuruwaꞌraᵽe. Iꞌsuᵽaka baawaꞌri kawaru wãmujãꞌãrõꞌõjĩrã ĩki sajaraᵽe riaka.

Ap 14:8

Sabeꞌrõ aᵽika ángelre wiraᵽaka ñiaraᵽe. Ikuᵽaka kijaikoraᵽe: —Babiloniawejea, Tuᵽarãre riataraᵽe. Ritatojo wejeareka imarã Tuᵽarãre najaꞌataokaroꞌsi baꞌiaja baataꞌairã nimaraᵽe Babiloniakarã,==ángelre ãrĩkoraᵽe.

Ap 16:19

Siyiraᵽakaka ĩꞌrãtiji Babiloniawejea imakoᵽeraᵽaka maekarakaweje uᵽaka sajarirĩkaraᵽe. Iꞌsuᵽakajaoka ritatojo wejeareka imakoᵽeika wejea ririᵽataraᵽaka. Babiloniakarãre baꞌiaja baaika yeꞌkariribeyuka imarĩ, nare boebariwaꞌri naᵽareareka baꞌitakaja Tuᵽarãre nare jũarũjeraᵽe.

Ap 17:1

Suᵽabaatirã ĩꞌᵽotẽñarirakamarã ángelrãka seroa rikaraᵽarãkaki ĩꞌrĩkare yiᵽõꞌirã etaraᵽe. Toᵽi ikuᵽaka yire kẽrãᵽe mae: —Õꞌõrã miꞌtabe, rĩkimakaja riamaka imarõꞌõrã baꞌiaja baariwejea ima, sakaka mire yibojaerã baayu. Mia: Ritaja ĩmirĩjaka wãꞌimarĩtiyaiko uᵽaka sareka imarãre imamaka, Tuᵽarãre baꞌiaja nare jũarũjerãñu.

Ap 17:18

Iꞌko rõmo miakoꞌoko imatiyaweje koᵽakaja koime. Tokarã ĩᵽarimarã aᵽea wejeakarã ĩᵽarimarãre tẽrĩwaꞌribaji jãꞌmerimaja nime,==yire kẽrãᵽe ángel.

Ap 17:5

Majẽrãkoꞌabeyua wãmea kokũꞌarã oꞌojĩꞌaeka imaraᵽaka. “Babiloniawejea”, ãrĩrikoᵽakaja simaraᵽe iꞌsia wãmea. “Ritaja baꞌiaja baawãꞌimarĩrimajare wãrõrirõmo imarĩ, naᵽako uᵽaka koime. Suᵽabaatirã ritaja baꞌia Tuᵽarãre yaᵽabeyuakaka ᵽoꞌimajare wãrõrimaja Babiloniawejeakarãre ime”, ãrĩrika simaraᵽe kokũꞌarã oꞌojĩꞌaeka.

Ap 18:10

Imakoꞌomakaja Babiloniakarãka baꞌiaja jũarika yaᵽaberiwaꞌri ñoakurirã natuirãñu. Toᵽi imatirã oᵽaraka ikuᵽaka narĩrãñu: “¡Ayoo jaꞌa! Jimarĩ joꞌbaka wejeᵽakiaka imakoꞌomakaja sooriyu. Ritaja aᵽeriweje boꞌibajirã imatiyairõꞌõ simakoᵽeraᵽe. Imakoꞌomakaja tokarãre baꞌiaja baariᵽareareka ikuᵽarõꞌõᵽiji suᵽa sakibaayu Tuᵽarã”, nawejeareka imabayurã ĩᵽarimarãre ãrĩrãñu.

Ap 18:18

Ate, oobaraka Babilonia jimarĩ ũmakaᵽuᵽakãꞌã ĩawaꞌri ᵽañebaabaraka ikuᵽaka nakasererãñu: “Iꞌsiweje imaroyiraᵽarõꞌõjĩrã ima weje imabeyua mae”, narĩrãñu.

Ap 18:2

Iki, jãjirokaᵽi ikuᵽaka ãrĩkoraᵽaki mae: —Babiloniawejea riyua mae. Iꞌsuᵽakajaoka naᵽuyu sareka imakoᵽeirã. Suᵽa baawaꞌri Satanárika ima wejearoꞌsi, ritaja wiribaꞌia dajakakaka wejearoꞌsi sajayu.

Ap 18:21

Torãjĩrã ate aᵽika ángel jãjikare ñiaraᵽe. Suᵽa imarĩ, joꞌbaka ãta trigo mukerũkia uᵽaka ima eꞌetirã riakarã kiyiataraᵽe. Suᵽabaatirã, ikuᵽaka kẽrãᵽe: —Ãta yiyiataika uᵽaka, Babilonia Tuᵽarãre riataᵽatarãñu. Suᵽa imarĩ aᵽekurioka ᵽoꞌimajare ĩaᵽeꞌarũkimarĩa simarãñu.

Ap 18:24

Tuᵽarãre nare ãñua bojaĩjirimajare, kire yiꞌyurãre, ritaja ᵽoꞌimajatatarãre jããbaraka mija imaroyiraᵽe. Suᵽa mija baaroyiraᵽaka waᵽa baꞌitakaja mija jũayu mae,==riakarã ãta joꞌbaka yiataraᵽakire ãrãᵽe.