Ap 1:9 - Porciones del Nuevo Testamento en el idioma Letuama

⁹ Yiꞌi Juan, mija jeyomaki, Jesucristore yiꞌyuka ñime. Mija uᵽakaja Tuᵽarãre yire jãꞌmeokoroꞌsi ñime. Suᵽa imarĩ, mija uᵽakajaoka ᵽoꞌimajare yire baꞌiaja jũarũjerijayu, Maĩᵽamakirirã uᵽatiji iꞌsuᵽaka oyiaja jũarũkirã maima simamaka. Baꞌiaja jũakoꞌomakaja Jesucristore ãꞌmitiriᵽẽaiki imarĩ, sayirakajeᵽããyu. Suᵽa imarĩ Ᵽatmos wãmeirõꞌõ jũmurikarã yire nataaraᵽe Tuᵽarãrika bojariroka yibojari ᵽareaja wẽkomaka ñimaokoroꞌsi.

Ap 1:9 Iomraidhean Croise

Los Hechos 1:15

Iꞌsuᵽaka nabaaroyika ᵽoto Jesúre ãꞌmitiriᵽẽarĩ naka narẽrĩroyika, ciento veinte rõꞌõjĩrã ᵽoꞌimaja nimaeka. Ĩꞌrãkuri iꞌsirakamarã watoᵽekaᵽi miꞌmirĩkatirã ikuᵽaka Ᵽedrore nare bojaeka:

Los Hechos 14:22

Wejerakakaja neyarijarikarõꞌõrã Jesúre ãꞌmitiriᵽẽairãka najaika. Sãꞌmitiriwaꞌri, jiibaji Jesúre yiꞌritirã okajãjia tokarãre jarika. “Jesúre mija yiꞌyua mija jaꞌataꞌsi. Tuᵽarãte jãꞌmeirõꞌõrã maeyaerã baarãka ruᵽu rĩkimakaja baꞌiaja majũarãñu”, ãᵽaraka nabojarijarika.

2 Co 1:7

Yija uᵽakaja Cristore yiꞌyurã imarĩ, baꞌiaja jũairã mija ime. Suᵽa imarĩ, “Yijare kijeyobaaika uᵽakaja Tuᵽarãre nare jeyobaarãñu, jia kire nayiꞌyaokoroꞌsi”, mijareka ãrĩᵽuᵽajoairã imarĩ, baꞌiaja yija ᵽuᵽaribeyu.

Filipenses 1:7

Mijare wãtaiki imarĩ, iꞌsuᵽaka mijareka yiᵽuᵽajoayu. Yire jeyobaariᵽuᵽakirã imarĩ, ĩꞌrãkurimarĩa yiyaᵽaika yiroꞌsi mija ᵽũatarijayu. Wẽkomaka imariwiꞌiarã Jesúrika bojarirokakaka yaᵽabeyurã wãjitãji, “Ikuᵽaka sime”, ãrĩwaꞌri nare okaeꞌebaaraka, yibojajiirijayu. Suᵽa yibaayu ᵽoꞌimajare yibojawãrõrũkia Tuᵽarãte yire jaꞌataeka simamaka. Iꞌsuᵽaka ñimarijayua simamaka yiwayuoka õrĩwaꞌri yire mija ᵽũatarijayua jia sime.

Filipenses 4:14

Iꞌsuᵽaka ñimakoꞌomakaja yire jeyobaawaꞌri niñerũ yire mija ᵽũataraᵽaka jiitakaja yire mija baaraᵽe.

2 Ts 3:5

“Baꞌiaja mijũaeka ᵽoto mirakajeᵽããeka uᵽakaja sanarakajeᵽããwãrũokaroꞌsi, suᵽabaatirã Tuᵽarãte nare wayuĩaika norĩwãrũrũ, nare mijeyobaabe”, ãrĩwaꞌri maĩᵽamaki Jesúre mijaroꞌsi yija jẽñeĩjirijayu.

Ap 1:1

Ika ᵽaᵽerareka oꞌoeka ikuᵽarõꞌõᵽiji imarũkiakaka bojaika. Kiyaᵽaika uᵽaka baarijayurãre sõñaokoroꞌsi Kimaki Jesucristore sakijaꞌataeka Tuᵽarã, nare sakibojaokoroꞌsi. Suᵽa imarĩ ángelre yiᵽõꞌirã kiᵽũataeka yire sakiõrĩrũjewãrũokoroꞌsi. Juan, kiyaᵽaika uᵽaka baaiki ñime.

Ap 1:2

Yiꞌi Juan ᵽõꞌirã ᵽemakotowiritirã ángelre ritaja yire bearaᵽakarõꞌõjĩrãja yibojayu, saᵽemawaꞌribaji ᵽakibekaja. Tuᵽarãrika bojariroka Jesucristore yire õrĩrũjemaka.

Ap 1:4

Mae, ĩꞌᵽotẽñarirakaweje Asia kaꞌiareka Jesúre yiꞌririjaᵽaraka imarãroꞌsi ika yoꞌoyu yiꞌi, Juan. Suᵽa imarĩ Tuᵽarã, Jesucristo, Esᵽíritu Santoka maekarakamarã jia mijare najeyobaarũ, jia naka mija imaerã. Bikija imaraꞌaekaki imakoꞌomakaja maekakaoka imarijayuka Tuᵽarã. Ñamajĩoka imajiᵽarãki kime. Tuᵽarãre jãꞌmeruᵽa wãjitãji imarã ĩꞌᵽotẽñarirakamarã. Esᵽíritu Santo ritaja õrĩᵽataiki, ritaja baaiki kime ãrĩrikoᵽakaja kiwãjitãji nimarijayu. Suᵽabaatirã Jesucristo kime Kiᵽakire ãñu uᵽakaja bojarimaji. Suᵽa imarĩ, reyakoꞌomakaja õñia kijariᵽeꞌrika ate. Iꞌsuᵽaka kibaaũꞌmuekaᵽi ãrĩwaꞌri reyakoꞌomakaja rĩkimarãja sabeꞌerõꞌõ õñia jariᵽeꞌrirãñurã ate. Suᵽa imarĩ ritatojo weje ĩᵽamarãre jãꞌmeiki kime. Iꞌsuᵽakajaoka mare wãtawaꞌri maroꞌsi riwejurubaraka kireyaekaᵽi baꞌiaja mabaaika kiwaᵽakoyika.

Ap 1:6

Iꞌsuᵽaka mare kibaaeka simamaka, kijãꞌmerũkirãroꞌsiji maime. Suᵽabaatirã kurarãka uᵽaka Kiᵽaki Tuᵽarãre yaᵽaika uᵽakaja baarimaja maime. Suᵽa imarĩ, “Ritaja ĩᵽamaki imarĩ dika jariwaꞌririmarĩa jãꞌmeᵽataiki kime. Aᵽea ᵽemawaꞌribaji jiitakaja jiyiᵽuᵽaka morĩrũkika kime”, ãrĩwaꞌri jĩjimaka kika maimarijarirãñu. Iꞌsuᵽaka oyiaja imarũkia simarũ.

Ap 11:7

Torãjĩrã mae, Tuᵽarãroꞌsi jaiwaᵽuꞌataĩjibaraka nima ᵽuyarirãka ᵽoto werikaᵽakiaki koᵽea tiyibeyurõꞌokaki naka jĩrĩrĩ mirĩetaraki. Suᵽa baatirã, nare kijããrãñu.

Ap 12:11

Suᵽa kijaiᵽakikoꞌomakaja, Oveja weiwaꞌyua uᵽaka imakire reyaeka riweaᵽi baꞌiaja nabaaika kijũjemaka, Satanáre tẽrĩkarã majeyomarã. “ ‘Jesúrika bojariroka mawãrõmaka õrĩwãrũbeyurãre mare jããrãñu jeꞌe’, marĩkoꞌomakaja okajãjia rakajebekaja maimayeꞌe. Suᵽa imarĩ samabojajaꞌataꞌsi”, narĩᵽuᵽajoaeka. Suᵽa baawaꞌri baꞌikare natẽrĩka.

Ap 12:17

Sĩatirã, jimarĩ rõmore kiboebaraᵽe. Suᵽa imarĩ kore jããwãrũberiwaꞌri koriᵽarãmerãka jĩrĩrĩ keꞌraᵽe. Ĩꞌrã imaraᵽarã, Tuᵽarãre jãꞌmeika yiꞌyurã, suᵽabaatirã ritaja Jesucristore nare bojaekakaka jaꞌatabeyurã.

Ap 13:10

“Yirirã imawaꞌri Cristore naꞌmitiriᵽẽamaka wẽkomaka imariwiꞌiarã ĩꞌrãrimarãre neꞌewaꞌrirãñu”, Tuᵽarãre ãñu uᵽakaja naroꞌsi simarãñu. Iꞌsuᵽakajaoka, “Aᵽerimarã najããrũkirã nime”, kẽñu uᵽakaja naroꞌsi simarãñu. Yirirã imarĩ, baꞌiaja jũakoꞌomakaja, rakajeᵽããekaja mija imabe. Suᵽabaatirã, yire mija yiꞌyua jaꞌatabekaja mija imabe.

Ap 14:12

Iꞌsuᵽaka simamaka, Tuᵽarãrirã, kijãꞌmeika yiꞌᵽaraka Jesúreoka yiꞌririjayurã imarĩ, kire yiꞌririjaꞌatarimarĩa sime naroꞌsi.

Ap 19:10

Suᵽa kẽᵽakãꞌã, jiyiᵽuᵽaka kire õrĩwaꞌri kiwãjitãji yimoꞌiᵽãñaraᵽe. —Mimoꞌiᵽãñaꞌsi yiwãjitãji. Mima uᵽakaja, mijeyomarã Jesúre yiꞌyurã uᵽakajaoka Tuᵽarãre yaᵽaika uᵽakaja baaiki ñime. Suᵽabaatirã, “Ikuᵽaka kime Tuᵽarã”, ãrĩwaꞌri Jesúre wãrõekakaka bojarijayurã maa. Ĩꞌrãtiji bojarijayurã maimamaka, Tuᵽarãre takaja mijiyiᵽuᵽayeetiyabe,==ángelre yire ãrãᵽe.

Ap 20:4

Toᵽi mae jãꞌmebaraka naruᵽarõꞌõrã ruᵽajiyeraᵽarãre ñiaraᵽe. Mia, Jesúre yeꞌkaririberiwaꞌri, kimajaroka jaꞌatabeyurã, werikaᵽakiakire kijẽrãkaoka jiyiᵽuᵽayeeberiwaꞌri kiwãmea nakũꞌarã, naᵽitakarã oꞌojĩꞌaberika nimaraᵽe. Nawãmua toataꞌruikarã imakoꞌomakaja, õñia jariᵽeꞌritirã mil rakakuri wejejẽꞌrãka Cristoka ñamajĩ jãꞌmerimaja nimaraᵽe.

Ap 3:10

‘Aᵽerãre baꞌiaja mijare baakoꞌomakaja, yire ãꞌmitiriᵽẽabaraka mija imabe’, mijare ñarãᵽaka uᵽakaja yiꞌyurã mija ime. Suᵽa imarĩ ritaja ᵽoꞌimajare baꞌiaja jũarijẽꞌrãka seyarãka ᵽoto mijare ĩarĩᵽaraka ñimarijarirãñu. Iꞌtojĩte ritatojo wejeareka imarãre ĩatirã ‘Ĩrã imarã baꞌiaja jũawaꞌri ᵽuᵽaᵽeꞌritirã yire ãꞌmitiriᵽẽairã, aᵽerã ᵽuri jẽnoꞌobaji jayurã’, ñarĩwãrũrãñu.

Ap 6:9

Torãjĩrã ate aᵽekuku ᵽaᵽera buᵽeka ᵽaᵽatãteka Oveja weiwaꞌyua uᵽaka imakire wieraᵽe. Suᵽa kibaaraᵽaka ᵽoto joeĩjiritẽrĩ wãꞌtarã najããekarãre imamaka ñiaraᵽe. Torã ñiaraᵽarã, õñia nimaeka ᵽoto Tuᵽarã majaroka wãrõbaraka, “Jesúre yiꞌyurã yija ime”, nañua jaꞌatabeyurã nimamaka Tuᵽarãre ãꞌmitiriᵽẽabeyurãre nare jããekarã nimaraᵽe.

Ap 7:14

Suᵽa kẽᵽakãꞌã, —Õrĩbeyuka yiꞌi. Miꞌi ᵽañaka õñuka jeꞌe, yire samibojabe,==kire ñarãᵽe. Suᵽa kire ñaᵽakãꞌã ikuᵽaka yire kibojaraᵽe: —Jiamarĩa jũarũkijẽꞌrãka seyamaka sareka baꞌiaja aᵽerãre nare baamaka rakajeᵽããwaꞌri nareyarijarika imakoꞌomakaja Jesúre yiꞌririjaꞌataberikarã nime. Suᵽa imarĩ, baꞌiaja baakoribeyurã nime Tuᵽarãre ĩamaka. Suᵽa imarĩ Oveja weiwaꞌyua uᵽaka imaki riweaᵽi najariroaka nasaya uᵽaka ima jũjetirã, jia boioyiaja jããirã uᵽaka nime.