PILIPI 2:3 - Tanou Moonsoi Timugon

³ Pai' kano paguyum ra kaatangan ayuk galama' kapoam paliso lumimbau. Kaa' sotopot no paingganaa' min guang mino koson mangkara' ra ulun bokon maatang poyo intor ramuyun.

PILIPI 2:3 Iomraidhean Croise

AMSAL 13:10

Limbau magibit ra kapaganan; ulun mapintar mangapu ra pangilaan.

LUKAS 18:14

“Balain takamin: Intor ra ruo ngaulun i, sala' ka ulun-ulun ru Parisi i, kaa' ulun mampalulur ra cukai i ondo' motopot ra pagilangan ri Aki Kapuuno'. Moonong ulun minsawat guang, paingganaan, am moonong ulun minggana' guang, painsawaton.”

ROMA 12:10

Raino mabubukat kau sabap ri Kristus, pontotogom kano ra rondo' am bokon. Pirot kano pagugurumat ra rondo' am bokon.

ROMA 13:13

Kaayag takano ra matanda' koson ra kaindalaman ru ulun paat ra matawang. Pai' kano rumamai ra jajajou kapoam mangagauk. Pai' kano pansawa' kapoam mambaal ra makauyuyu'. Pai' kano pansangor am pai' pangusolon.

ROMA 2:8

Kaa' ilo ondo' masalok maguyum ra kasingkatan galama', manginggi' ri Aki Kapuuno' am poyo gumagaya' ra kalaatan, ilo no kasangitan am ukumin ri Aki Kapuuno'.

1 KORINTUS 15:9

Aku no rasul ru Tuhan ondo' nakatauli toojo. Aku kalo maaya' piawon ra rasul, sabap ra nangimbolo' aku ra pasimpungan ulun Kristian.

1 KORINTUS 3:3

Sabap ra paliso mino lakat ayuk poyo koson ra ulun ru tana' ti. Mangusolon am mansasangor kau ra rondo' am bokon. Sala' kia ka gitio mampakito ra kaayagan min lakat ayuk poyo sumugut ra paliso ru ulun ondo' kalo makaulig ri Aki Kapuuno'?

2 KORINTUS 12:20

Maimamang aku ra paat ra mongoi aku ramuyun, ilain ku sala' kau boo intor ra atan ondo' lansanin kuli, am aku pana sala' boo intor ra atan ondo' lansanin min. Maimamang aku ra akau mansasangor, magugusolon, mansisang, matayar-tayar, magagasab, mangilaat ra ulun, malilimbau am kumuliangi-angi kau.

GALATIA 5:15

Amon ru malaat kau saboi mamparuol ra rondo' am bokon, ilalai' min, amon ru kalo, makapabaya' kau ngaangai' mapuso.

GALATIA 5:26

Pai' takau pakiompor, mamparuol ra guang ru bokon, kapoam magusolon ra sangulun am bokon.

IPISUS 4:2

Paingganaa' noyo guang min, kolomoi am kasalok kano mataan guang. Pakitono' noyo kinotogom min ra mangindangan kau ra rondo' am bokon.

IPISUS 5:21

Gagaya' kano ra sangulun am bokon, sabap ra akau mangurumat ri Kristus.

PILIPI 2:14

Atan ayuk kondoyon min, moonsoi kalo mambulingot kau kapoam makimansangor.

KOLOSI 3:12

Akau nakasimpung noyo ri Aki Kapuuno', nampili' Io no ramuyun am monogom Io ramuyun. Ginio nai ra pakitono' min noyo togom min, bonsoi ru guang min, inggana' ru guang min, kinolomoi ru guang min am poyo kinataan ru guang mino.

KOLOSI 3:8

Kaa' raino inggaluri' min noyo paliso ragitio: masasangit, mataki' malasu' guang, guang masisang, ragu magasab am poyo ragu ondo' makauyuyu' iningon.

1 TIMOTIUS 6:4

io noyo ulun masumbung am kolondo' toojo kapandayan. Ulun koson ragitio kalo matanda', magail ayuk mantataam ra arati' ru rorondo' ragu, saboi mampasalula' ra kaingatan, pagagansangan, pangalimutan, panalaan malaat,

1 PITRUS 3:8

Pamupusan raginio: Korondoo' noyo guang min am pakaasi' kano ra rondo' am bokon. Ponogom kano ra rondo' am bokon mogondo' ra akau tumogom ra pabukat min galama'. Am poyo musiti' kau mataau am minggana' guang.

1 PITRUS 5:5

Koson niayuk ramuyun tuu'-bagu kau ngai', gagaya' kano ra ulun matutuo. Pabukat kau ngai', paingganaa' noyo guang mino am pangindangan kano ra rondo' am bokon. Sabap ra mokoondo' tinulisan ra Buuk Kitab, “I Aki Kapuuno' gumula' ra ulun mangasumbung, kaa' motogom io ra ulun minggana' guang.”