LUKAS 4:23 - Tanou Moonsoi Timugon

²³ Indagu i Jisus risilo, “Maaru' magabig kau Raki' koson ragitio, ‘Duktur, okou galama' mibabas. Kaimuagan ondo' norongog mai ra binaal Muni giu' ra Kapirnaum, baalo' niayuk giti ra intok Muno galama'.’ ”

LUKAS 4:23 Iomraidhean Croise

MATIUS 13:54

Io pana minuli' boo ra pamagunan Nano galama'. Nangila' Io giu' ra baloi sambayangan am ulun ondo' nangkirongog Riso no nangimuag. Pangkuot ilo, “Ati naalapan No ra kapintaran koson raginio? Ilai' kuasa' Nano mambaal ra kaimuagan!

MATIUS 4:13

Kalo minayan Io ra pekan Nasarit kaa' minongoi Io ayan ra pekan Kapirnaum, io ti rondo' pekan kiing ru Tasik Galilia ra libung ru Jibulon am Naptali.

MATIUS 4:23

Sinuku' ri Jisus titikop libung ru Galilia. Nangila' Io ralalom ru baloi sambayangan am nampatanou Io niayuk ra Tanou Moonsoi ra mamarinta i Aki Kapuuno'. Namabas Io ra ngaangai' maruol ru ulun masuang.

MARKUS 6:1

Tauli i siminaguli' i Jisus ra pamagunan galama' Nali, am maamaya' Nano minaya' Riso.

LUKAS 2:39

Kabaal noyo ngaangai' nanusuban ra Ukum ru Tuhan, i Jusup am i Maria siminaguli' ra intok nilo, pekan Nasarit, giu' ra libung ru Galilia.

LUKAS 2:51

Kopongo ragili, saguli' i Jisus baya' ra matuo Nano ra Nasarit am gumagaya' risilo. Nampaguang ina' Nano ra ngaangai' raginio.

LUKAS 4:16

Kopongo ragili, ongoi i Jisus ra Nasarit, intok nasukaran Nali. Paat ra orou Sabat, maya' ra kaindalaman Nano, mongoi Io ra baloi sambayangan. Bigor Io koson mambasa' ra Buuk Kitab,

LUKAS 4:31

Ongoi boo i Jisus ra pekan Kapirnaum giu' ra Galilia. Moonong orou Sabat nangila' Io ra ulun ru giu' i.

LUKAS 4:35

Sawayo' ri Jisus riwato no, indagu Io, “Pongkoror am ingkual no intor ra ulun ti!” Bigogo' ru riwato ulun no ra saang ru ulun masuang no am ingkual kaa' kalo nampakaruol ra ulun ti.

LUKAS 6:42

Kalo noyo lair mindagu kou ra pabukat muno, ‘Rangan, ibok, paingkualo' ku tipolon ru tataun intor ra mato muno,’ kaa' tataun makalu ra mato muno galama' kalo matutunan mu! Maabau-abau kou! Ingkualo' poyo galing tataun makalu intor ra mato muno. Bagu makakito kou toojo am maalap mu kaingkual tipolon no intor ra mato ru pabukat muno.”

JUANIS 4:28

Kopongo ragili, tatango' ru ruandu' i rarapu' nali am saguli' ra pekan pambala' ra ulun ru giu' i, kono,

2 KORINTUS 5:16

Sabap raginio, akai kalo boo mangimumui ra osoi ayuk pana sumugut ra pagilangan ru ulun. Kabalu' pana nangimumui akai niayuk ri Kristus koson raginio ragili, kaa' raino kalo boo.