Pakaansuk kano, akau mamagun ru Sion! Pagitapap kano, akau mamagun ru Jirusalim! Ilai', raja' min matong! Matong io ra katulayan am kamanangan, kaa' ra minggana' guang, matong io nangura' ra kaladai, am nangura' ra anak kaladai ondo' mamulok.
Nakapandai takau no ra ragu ru Buuk Kitab kalo malulu'. I Aki Kapuuno' galama' nampiau risilo ra tuhan, ioginio ulun-ulun ondo' nampasukuan ra ragu Nano.
Mamaya' Nano kalo nakarati' kua baalo' no gini. Kaa' kalupus ayuk katulayan ri Jisus pinaintalang mansail ra pinatayan am linuatan Nano, kakara' nilo boo ragu ru Buuk Kitab ra ngaangai' ti binaal nilo Riso.
Makapandai kano toojo ra kataawan ru Tuhan takau i Jisus Kristus. Kabalu' pana langkaya' Io, kaa' koson ra kaatangan min, siminauk Io ra musikin, maa' raginio mansail ra kinamusikin nano lumangkaya' kau ra pagilangan ri Aki Kapuuno'.
