KAINGKUALAN 4:5 - Tanou Moonsoi Timugon

⁵ Indagu Tuhan, “Baalo' koson raginio ra mapainono' ra bansa' ru Israil ra Aku, Tuhan i Aki Kapuuno' ru kinamatuaan nilo, i Aki Kapuuno' ri Abragam, ri Isak am ri Jakub, minintalang noyo rirun.”

KAINGKUALAN 4:5 Iomraidhean Croise

KASAUKAN 12:7

Minintalang Tuhan ri Abram am indagu Io riso, “Gitio noyo pagun ondo' pataakon Ku ra papag muno.” Intok raginio, nambaal boo i Abram ra altar ru Tuhan ondo' minintalang noyo riso.

KASAUKAN 17:1

Paat umur ri Abram siam ngoopor am siam ngambilor, minintalang Tuhan riso am indagu, “Aku noyo i Aki Kapuuno' Ondo' Maayo Kaga' Kuasa'. Gagaya' no Raki' am kasalok no mambaal ra kasagaan Kuno.

KASAUKAN 18:1

Minintalang Tuhan ri Abragam maar ra puun-puun matulai giu' ra Mamri. Nakapaat ra mapangit toojo orou am nanturung i Abragam ra kulobon ru kim nano.

KASAUKAN 26:2

Intalang Tuhan riso am indagu, “Pai' ongoi ra pagun ru Misir, ayan ayuk ra pagun tuluon Kuno rirun.

KASAUKAN 28:13

Bigor Tuhan ra sapapa' ri Jakub am indagu, “Aku noyo Tuhan i Aki Kapuuno' ri Abragam am i Isak. Pataakon Ku rirun am papag muno tana' ra nambalangan muno.

KASAUKAN 48:15

Barakato' no i Jusup, kono, “Gama' ru i Aki Kapuuno' ondo' sambaan ru kinamatuaan kuli i Abragam am i Isak, mambarakat ra anak-anak ti. Gama' ru i Aki Kapuuno' ondo' nagalung raki' saboi orou raiti', mambarakat risilo.

KASAUKAN 48:3

Indagu i Jakub ri Jusup, “I Aki Kapuuno' Ondo' Maayo Kaga' Kuasa' minintalang raki' ra Lus giu' ra tana' ru Kanaan, am nambarakat noyo raki'.

1 RAJA'-RAJA' 18:36

Paat ra mapataak ra taak simbalui ru mamai', inggaari' ru Nabi Ilia altar no am pakiasi', “Iou Tuhan, i Aki Kapuuno' ri Abragam, i Isak am i Jakub, raino painonoo' ra Okou i Aki Kapuuno' ru Israil am ra aku ti ulipon Muno. Painonoo' niayuk ra binaal ku gitio ngaangai' sumugut ra susuban Muno.

2 TUNUNG RU BANSA' ISRAIL 20:20

Nokorondom ra suabon no ilo ngaangai' minongoi ra tana' kaagisan mamaar ra Tikoa. Paat ra ilo minintor, kon ru Raja' Josapat risilo, “Mamagun kau ru Jiuda am Jirusalim, pangintopot no ra Tuhan, i Aki Kapuuno' min, am akau pana mokoorot! Pangintopot no ra bilin ru nabi-nabi Nano, am akau pana makasugut.”

KAINGKUALAN 19:9

Indagu Tuhan ri Musa, “Matong Aku ramuyun ralalom ru gaun makapal maa' raginio makaining ulun ra Aku mindagu rirun; intor raginio masalok ilo boo mangintopot rirun.” Pinasaboi ri Musa taaman ru ulun raginilo ra Tuhan.

KAINGKUALAN 3:15

Balai' ulun ru Israil ra AKU, Tuhan i Aki Kapuuno' ru kinamatuaan nilai, i Aki Kapuuno' ri Abragam, ri Isak am ri Jakub, nanusub noyo rirun mongoi risilo. Ginio noyo inggalan Kuno ra sabuoi-buoi no. Ginio noyo panabitan Raki' ru ngaangai' papag ra orou matong.

KAINGKUALAN 3:16

Ongoi noyo am timungo' tingganai-tingganai ru ulun ru Israil no am balai' ilo ra Aku, Tuhan i Aki Kapuuno' ru kinamatuaan nilai, i Aki Kapuuno' ri Abragam, ri Isak am ri Jakub minintalang noyo rirun. Balai' ilo ra minatong Aku noyo risilo am nakakito noyo ra atan binaal ru ulun ru Misir risilo.

KAINGKUALAN 3:18

Ulun Kuno mangining ra ragu muno. Mongoi kou toojo uma' ra raja' ru Misir mabaya' ra tingganai-tingganai ru ulun ru Israil no am mindagu riso, ‘Tuhan i Aki Kapuuno' ru ulun ru Ibrani minintalang noyo ramon. Raino iowo' akai no mugar buoi talu ngoorou pangkiralanan mongoi ra tana' kaagisan, mampataak ra taak simbalui ra Tuhan i Aki Kapuuno' mai.’

KAINGKUALAN 3:4

Paat ra nakito ru Tuhan ra minggaar i Musa, pampiau Io riso intor ra tanga' ru bulungkut no, “Musa! Musa!” Taam i Musa, “Iou, giti aku.”

KAINGKUALAN 3:6

Aku ti i Aki Kapuuno' ondo' sambaan ru kinamatuaan muli, i Aki Kapuuno' ri Abragam, ri Isak am ri Jakub.” Ginio ra silii' ri Musa bulos nano sabap ra malaa' io magilong ri Aki Kapuuno'.

KAINGKUALAN 4:1

Indagu boo i Musa ra Tuhan, “Ati kulaan boo amon ulun ru Israil kalo mangintopot raki' am marara' mampalio ra ragu-ragu kuno? Atan kia baalon kuno amon ru mindagu ilo ra Okou kalo minintalang raki'?”

KAINGKUALAN 4:31

Mangintopot ilo, am igulatur samba paat ra nakaining ra nampalio Tuhan risilo am nakakito ra ngaangai' kaimbalaan nilo.

KAINGKUALAN 4:4

Indagu boo Tuhan ri Musa, “Inggaari' kukuo no am guuto' iku' nano.” Inggaari' ri Musa kukuo no am rokopo' no iku' nano; am kasauk saguli' kukuo no ra jujuga'.

JISAYA 7:9

Israil kalo maikang poyo intor ra Samaria, pusor bandar nano, am Samaria pana kalo maikang poyo intor ra Raja' Pika. Amon ru kalo totopot kau mangintopot Raki', maaru' akau no maratu'.”

JIRIMIA 31:3

intor ra maalur minintalang Aku risilo. Ulun kau ru Israil, intor ragili masalok Aku motogom ramuyun, am parayuson Ku mampakito ra masalok Aku motogom ramuyun.

JUANIS 11:15

Kaa' naringkuanang Aku niayuk ra kalo nokosoroi ra giu' i, maa' raginio mangintopot kau. Raino ongoi takau ra intok ri Lajarus no.”

JUANIS 11:42

Nakapandai Aku ra masalok Kou mangkirongog ra pakiasian Kuno. Kaa' rinagu Ku kon raginio, koson giatilo ondo' soroi ragiti mangintopot ra Okou noyo nanusub Raki'.”

JUANIS 20:27

Indagu Io boo ri Tomas, “Ilai' noyo kalindu' Kutu am kamaa'! Pakamaa' poyo kalindu' muno ra tiagang Kutu. Sala' ka pagantangan, kaa' pangintopot ayuk!”

JUANIS 20:31

Kaa' ngaangai' ti tinulisan noyo, maa' raginio mangintopot kau ri Jisus noyo Mamamayag ondo' sinusub ri Aki Kapuuno' i, ioginio Anak ri Aki Kapuuno'. Sabap ra pangintapatan mino Riso, mokoowot kau ra kaayagan motopot.

JUANIS 5:36

Kaa' mokoondo' kaintutunan ra bokon ondo' maatang poyo intor ra kaintutunan ri Juanis i. Io ginio atan ondo' baalon Kutu, ondo' pinalansan ri Ama' Raki', ngaangai' ti mampainono' ra i Ama' noyo nanusub Raki'.

RINALATAN 7:2

Taam i Stipanus, “Pabukat ku ngaangai'! Rongogo' min gitio! I Aki Kapuuno' nampakito ra katulayan Nano ra kinamatuaan takau i Abragam paat ra io lakat ayuk poyo minayan giu' ra pagun Misopotamia, ra kalo poyo minanding ra pagun ru Aran.

IBRANI 11:16

Kaa' sotopot no, mompogogot ilo ra pagun ondo' moonsoi poyo ka inayanan nilo i, iono suruga'. Ginio sabap ri Aki Kapuuno' pana kalo mauyu' ra Io no piawon i Aki Kapuuno' nilo, sabap ra nokopomongo Io noyo ra rondo' bandar risilo.