KAINGKUALAN 16:4 - Tanou Moonsoi Timugon

⁴ Indagu Tuhan ri Musa, “Raino maparatu' Aku ramuyun ngaangai' ra akanon intor ra limbowon. Moonong orou ulun musiti' mingkual manimung ra ruti' kaukapan ra songorou. Ralan ragitio makapangkinam Aku ra ulun Kuno, maa' raginio mapandayan Ku ru gagayaan nilo susuban Kuno kapoam kalo.

KAINGKUALAN 16:4 Iomraidhean Croise

NIGIMIA 11:23

Aturan ru raja' nangaru' ra paat ru moonong bansa' ondo' manalingapu ra miujik giu' ra Baloi ru Tuhan ra moonong orou.

NIGIMIA 9:15

“Paat ra ilo maitilan, ruti' intor ra limbowon pinaratu' Muno, paat ra ilo paason, timug intor ra batu pinaingkual Mu. Nanusub Kou risilo manguasa' ra tana' ondo' binantu' Mu noyo risilo.

NIGIMIA 9:20

Sabap ra kinoonsoi Muno, nambala' Kou ramon ra atan ondo' musiti' baalon; nangani' Kou risilo ra manna koson ra akanon, nangani' Kou risilo ra timug koson ra inumon.

MAZMUR 105:40

Makitaak ilo ra akanon, am inataran No susuit tantarau, binasug ilo ra ruti' intor ra limbowon.

MAZMUR 78:23

Kaa' mindagu i Aki Kapuuno' ra limbowon giu' ra rasawat, am manusub koson paukabin kulobon.

KAINGKUALAN 15:25

Pakiasi' toojo i Musa ra Tuhan, am papakito Tuhan riso ra rondo' tataun. Patapungo' ri Musa tataun no ralalom ru timug, am kalo boo mapait timug no saboi mainum. Giu' ra intok no, nangani' Tuhan risilo ra ukum, am giu' no niayuk nangkinam Io risilo.

KAINGKUALAN 16:15

Pakakito ulun ru Israil raginio, kalo makapandai ilo atan ginio. Pasakuot ilo ra rondo' am bokon, “Atan kia ginio?” Indagu i Musa risilo, “Gitio noyo akanon pinataak ru Tuhan ramuyun ra akanon.

AMSAL 30:8

indangano' aku no maa' raginio kalo magabau aku, am indangano' aku no maa' raginio ra aku ti kalo lumangkaya' am kalo musikin. Intor raginio, anii' aku ra atan ondo' kasagaan kuno ayuk.

MATIUS 6:11

Anii' akai no ra akanon ra orou raiti'.

LUKAS 11:3

Anii' akai no ra akanon ra moonong orou.

1 KORINTUS 10:3

Ilo ngaangai' nangakan ra akanon ondo' inanian ri Aki Kapuuno' ralalom ru kuasa' Nano.

SAGULION 8:16

Giu' ra tana' kaagisan nanaak Io ramuyun ra manna, rondo' salinut ru akanon ondo' kalo igondo' akano' ru kinamatuaan min. Naparatong Io ra kapaganan koson mangkinam ramuyun, maa' raginio paat ra pupus no mobonsoi Io ramuyun.

SAGULION 8:2

Karaa' noyo ati kulaan Tuhan i Aki Kapuuno' min naningganai ramuyun ralalom pangkiralanan ra maalur giu' ra tana' kaagisan buoi apat ngoopor ngambilor ragili; naparatong ra kapaganan koson mangkinam ramuyun maa' raginio makapandai Io ra suang ru guang min, am makapandai ra gumagaya' kau kapoam kalo ra susuban Nano.

JOSUA 24:15

Amon ru kalo masaga' kau mangandoi ayuk Riso, aruo' noyo raino ri osoi akau mangandoi ayuk, ra tuhan-tuhan ra bokon ondo' sinamba ru kinamatuaan min giu' ra Misopotamia, kapoam ra tuhan-tuhan ru ulun ru Amori giu' ra pagun ondo' inayanan min raino. Kaa' ra aku am sasambaloi kuno, masaga' akai mangandoi ayuk ra Tuhan.”