JOSUA 6:4 - Tanou Moonsoi Timugon

⁴ Tulu' ngaulun imam ondo' sigagama' magibit ra rondo' bujung musiti' mugar giu' ra saang ru Kaban Nabantuan. Paat orou Katulu', okou am saujor-saujor muno musiti' mugar lumiput ra bandar no intulu', liliwa' imam-imam manamput ra bujung.

JOSUA 6:4 Iomraidhean Croise

KASAUKAN 2:3

Nambarakat i Aki Kapuuno' ra orou ra katulu' ti am orou raginio sinauk ra orou patimpokon sabap ra paat orou raginio tumangus i Aki Kapuuno' ra nopongo noyo kandoi Nali.

1 RAJA'-RAJA' 18:43

Kono ra ulipon nano, “Pagaloi no, ilai' tampilon ra raat.” Ugar ulipon no, am saguli' am indagu, “Kolondo' atan-atan nakito ku.” Saboi intulu' i Ilia nanusub riso mongoi pagilong tampilon ra raat.

2 RAJA'-RAJA' 5:10

Panusub i Ilisa ra sangulun ulipon mingkual koson mambala' ri Naaman maa' raginio mariu' intulu' giu' ra Sungoi Jordan, maruol nano pana mababas boo.

2 RAJA'-RAJA' 5:14

Ginio ra tuun i Naaman ra Sungoi Jordan am linjob io intulu' koson ra ondo' nanusuban ru Nabi Ilisa. Kopongo raginio napali' maruol nano kalingon. Inan nano maligag saguli' koson ra inan ru sangulun lalaing boborok.

2 TUNUNG RU BANSA' ISRAIL 13:12

I Aki Kapuuno' galama' ondo' nasauk ra tingganai mai. Imam-imam Nano soroi ragiti am nakatampos manamput ra bujung koson ra tatandu' mai koson mamulunsar ramuyun. Mamagun kau ru Israil, pai' anggal ra Tuhan, i Aki Kapuuno' ru kinamatuaan min! Kalo lair mamanang kau!”

2 TUNUNG RU BANSA' ISRAIL 20:17

Kalo pana mangayou kau ralalom ru pangayawan ti. Alapo' noyo intok min am paginaa no. Makakito kau ra Tuhan mangani' ramuyun ra kamanangan. Pai' no kalaa' kapoam pagantangan, akau mamagun ru Jiuda am Jirusalim! Uma' kano ra pantula'; Tuhan mabaya' ramuyun!”

2 TUNUNG RU BANSA' ISRAIL 20:19

Bansa' ru Kigat am Kora intor ra bansa' ru Liwi minigor, pagilakup ra nagindii boo mongompor ra Tuhan, i Aki Kapuuno' ru Israil.

2 TUNUNG RU BANSA' ISRAIL 20:21

Pakapansusunur ra mamagun, panusub raja' ra kukula' ngaulun maririmbai maa' raginio mambayang ra ondo' kaindalaman bayangon ra upacara-upacara ru ugama. Ulun-ulun maririmbai no musiti' mugar giu' ra saang ru saujor liliwa' marimbai, “Omporo' noyo Tuhan! Togom Nano mantilayun!”

AYUP 42:8

Raino ibito' tulu' ngainan sapi' gawayan am tulu' ngainan domba gawayan ri Ayup, am pataako' ngaangai' no koson ra taak simbalui koson mapabansuk ra guang Kuno, sabap ra kaatangan ru inan min. Makiasi' i Ayup ra tayar min, am iowon Ku pakiasian nano. Aku pana kalo boo manauyu' ramuyun kabalu' pana musiti' kau mangapu ra ukuman. Kalo mindagu kau ra motopot intor Raki' koson ra binaal ri Ayup.”

JISAYA 27:13

Bulintok raginio, bujung samputin koson mampiau mampauli' ra ngaangai' ulun ru Israil ondo' pinatiran giu' ra Asyur am Misir. Matong ilo ra Jirusalim am sumamba ra Tuhan giu' ra rasawat ru bulur Nano ondo' matulai.

IMAMAT 14:16

am pososopon no boo bubua' ru kalindu' ra pamiris nano ra umau no am patakison no intulu' giu' ralalom Kim ru Tuhan.

IMAMAT 4:6

Musiti' io mopososop ra bubua' ru kalindu' nano ra raraa' no, patakison boo raraa' no intulu' ra saang ru tabir ondo' mapatuliar ra Lamin Matulai.

JAKARIA 4:2

Nangkuot io, “Atan kia nakito muno?” Taam aku, “Nakito ku rondo' tampakan ra lampung mas. Tampilon ra rasawat nano mokoondo' rondo' mangkuk ru umau. Tampilon ra ragana' ru lampung no mokoondo' tulu' lampung ondo' moonong rondo' mokoondo' tulu' intok ru sumbu'.

JAKARIA 4:6

Nanusub malaikat no raki' nampasaboi ra tanou ru Tuhan ti ri Jirubabil, “Makasugut kou sala' ka kaikangan ru saujor kapoam kaikangan muno galama', kaa' ra Ambiluo Kuno.

UNTABAN 23:1

Indagu i Biliam ra Raja' Balak, “Baali' aku ra tulu' altar ragiti, am potomposo' tulu' ngainan sapi' gawayan am tulu' ngainan domba gawayan.”

JOSUA 6:3

Okou am saujor-saujor muno musiti' mugar lumiput ra bandar no igondo' songorou buoi onom ngoorou.

JOSUA 6:5

Mopongo raginio ilo musiti' manamput ra bujung ra bolos ondo' maawar, am morongog min ayuk ginio, ngaangai' ulun musiti' gumolok ra mosongou, am mapuut boo timbok ru bandar no. Paat raginio ngaangai' saujor muno musiti' marayus mumpos ra bandar no.”

PINAINTALANG 1:20

Gitio noyo arati' ru tulu' butitin ondo' makito muno ra kalindu' pamiris Kutu, am intor ra tulu' tampakan ra lampung binaal intor ra mas no: Tulu' butitin raginio iono malaikat ru tulu' pasimpungan ulun Kristian no, am tulu' tampakan ra lampung no ioginio tulu' pasimpungan ulun Kristian.”

PINAINTALANG 1:4

Intor raki', i Juanis, posoboyon ra tulu' pasimpungan ulun Kristian giu' ra pagun ru Asia! Gama' ru aniin kau ra barakat am pabansayan ri Aki Kapuuno', ondo' soroi raino, galing i am pupus no pana. Am intor ra tulu' ambiluo ondo' soroi ra saang ru takhta Nano.

PINAINTALANG 10:3

Golok io ra bolos mosongou, koson ra kukula' ngainan singa' nansangal. Pokopompogolok io, taam tulu' timpalak no ra mapuor.

PINAINTALANG 15:1

Giu' ra limbowon no makito ku boo rondo' poyo tatandu' ondo' makaimuag am maayo. Mokoondo' tulu' malaikat nabaya' ra tulu' sauk malaat ra pupus. Gitio noyo pamupusan ri Aki Kapuuno' mapaingkual ra sangit am ukum Nano.

PINAINTALANG 15:7

Rondo' boo intor ra apat baal ru ilo ondo' maayag no nangani' ra tulu' malaikat no ra tulu' sangkir mas ondo' nototop ra sangit am ukum ri Aki Kapuuno' ondo' maayag ra matilayun.

PINAINTALANG 16:1

Pokorongog aku boo ra bolos mosongou intor ra Baloi Tuhan minindagu ra tulu' malaikat no, “Ugar no am pasasaro' suang ru sangkir ru sangit am ukum ri Aki Kapuuno' no ra tana'!”

PINAINTALANG 5:1

Kakito ku rondo' naskhah rinulun soroi ra kalindu' pamiris ru Io ondo' nanturung ra takhta no. Sapapa' mansapapa' no natitip ra tinulisan. Naskhah no ginaam ra tulu' segel.

PINAINTALANG 5:6

Kakito ku boo sanginan Anak Domba minigor ra tatanga' ru takhta no ondo' liniputan ru apat ilo ondo' maayag am ngaangai' ru tingganai no. Makito ku io ti koson pinatoi. Mokoondo' Io tulu' sangau am tulu' mato, ioginio tulu' Ambiluo ri Aki Kapuuno' ondo' sinusub mongoi ra tikop-tikop ru tana' ti.

PINAINTALANG 8:2

Kakito ku boo katulu'-tulu' malaikat ondo' minigor ra saang ri Aki Kapuuno' no am inanian ilo sigagama' ra bujung.

PINAINTALANG 8:6

Tulu' malaikat no pana ondo' nampaguut ra tulu' bujung no nakatampos noyo manamput ra bujung.