JOSUA 3:1 - Tanou Moonsoi Timugon

¹ Tawang ra suabon no, kiminarat mataki' i Josua am ngaangai' ulun ru Israil. Nangiruan ilo ra pangkiman giu' ra Sitim, am ongoi ra Sungoi Jordan. Nangkim ilo ra giu' no liliwa' naginaa koson lumaup ra sungoi no.

JOSUA 3:1 Iomraidhean Croise

KASAUKAN 21:14

Paat ra suabon no, rondomo' anii' ri Abragam i Agar ra akanon am rondo' kantungan ru kungkung sinuangan ra timug. Paibaa' no anak no ri Agar am paugaro' no ruandu' no. Ongoi boo i Agar ra tana' kaagisan ru Birsyiba.

KASAUKAN 22:3

Paat ra suabon no, rinondom ri Abragam nampalapak ra luton koson ponolob ra taak simbalui am pobongkoso' no ra kaladai nano. Ugar io nabaya' ri Isak am karuo ngaulun ulipon nano ra intok ondo' rinagu ri Aki Kapuuno' riso i.

MAZMUR 119:60

Maringkaagou aku am kalo maginaa koson mapaugar ra panusuban Muno.

JIRIMIA 25:3

“Buoi ruo ngoopor am talu ngambilor, intor ra bilor koopor am talu ru Raja' Josia anak ungkuyon ru Raja' Amon namarinta giu' ra Jiuda saboi ra orou raiti', minindagu Tuhan raki' am kalo igondo' aku pakalilian mampasaboi ra atan ondo' rinagu Nano ramuyun. Kaa' akau kalo igondo' nampalio raginio.

JIRIMIA 26:5

Musiti' kau niayuk rumongog ra atan ondo' rinagu ru ulipon Kuno, iono nabi-nabi ondo' kalo langgain Ku manusub poongoyon ramuyun. Kaa' kalo igondo' kau rongog risilo.

JIRIMIA 7:13

Binaal min ngaangai' tula no; inda' pana ra ruruli' Aku minindagu ramuyun, kaa' marara' kau rumongog. Marara' kau tumaam paat ra Aku mampiau ramuyun.

MIKA 6:5

Ulun Ku ngai', karaa' noyo atan inatangan ri Balak, raja' ru Moab no ramuyun, am taam ri Biliam anak ri Bior riso. Karaa' noyo kasaukan-kasaukan ondo' nasauk ralalom pangkiralanan intor ra pangkiman giu' ra Sitim saboi ra Gilgal. Karaa' noyo baal-baal raginio, am akau pana makaliman ra atan ondo' binaal Kuno koson mamayag ramuyun.”

UNTABAN 25:1

Paat ra ulun ru Israil nangkim giu' ra Limayak Sitim, bala ru ungkuyon nilono tumalimpuun makimarulug ra ruandu' ru Moab ondo' minayan ra giu' no.

MARKUS 1:35

Suabon no, maar matawang, luat i Jisus am ongoi ra lisar ru pekan. Minongoi Io ra intok masiluk sabap ra makiasi' Io ra giu' no.

JOSUA 2:1

I Josua pana nangator ra ruo ngaulun pansigo intor ra pangkiman giu' ra Sitim mongoi ra Kanaan. Sinusub ilo maa' raginio lumiput ra tana' ru Kanaan koson mangintutun ra sinokon, mulu' poyo toojo bandar Jiriko. Pakasaboi ilo ra bandar no, minayan ilo ra sangulun ruandu' mantalan ra inan inggalan no i Ragab.

JOSUA 6:12

Suabon no, riminondom i Josua kiminarat, am koson ra kainduo ru imam-imam am saujor-saujor lumiput ra bandar no maya' ra tinampos paat ra orou kalo poyo raginio: talimpuun no, magalung ra saang; am tulu' ngaulun imam ondo' manamput ra bujung; am imam-imam ondo' nansaan ra Kaban Nabantuan ru Tuhan; am pupus toojo magalung ra tinaulian. Narayus sinamput bujung no.

JOSUA 6:15

Paat ra orou katulu', kiminarat ilo paat sumirang mato ru orou. Minugar ilo liminiput ra bandar no intulu' ra nogondo' binaal. Paat ra orou raginio ayuk, minugar ilo liminiput ra bandar no intulu'.

JOSUA 7:16

Suabon no, i Josua kiminarat mataki' am paumaa' no ulun ru Israil ra Tuhan, bansa' am bansa', am bansa' ru Jiuda tinulu'.

JOSUA 8:10

Orou ra suabon no, i Josua kiminarat mataki' am nampiau ra saujor timinimung. I Josua pana am tingganai-tingganai ru ulun ru Israil naningganai ra pulalai ru saujor no mongoi ra bandar Ai.

TINGGANAI RU BANSA' 20:19

Suabon no ra iosusuab ulun ru Israil minugar am nangkim maar ra bandar Gibia.

1 SAMUIL 17:20

Suabon no ra iosusuab ayuk poyo, timinirong i Daut am timinampos. Nanusub io ra ulun bokon magalung ra domba. Io pana nagibit ra akanon no am minugar koson ra nanusuban ri Isai. Nakasaboi io ra pangkiman nakainamot ra ulun ru Israil tatanga' baris liliwa' mompogolok ra pulanu ru pangayawan.