JAKUBUS 3:15 - Tanou Moonsoi Timugon

¹⁵ Ginio sala' ka kapintaran intor suruga'. Kaa' intor io ayuk ra tana' ti, intor ayuk ra paliso ru ulun am intor poyo ra riwato.

JAKUBUS 3:15 Iomraidhean Croise

2 SAMUIL 13:3

Kaa' i Amnon mokoondo' ra sangulun rangan ondo' mapintar, inggalan nano i Jonadab anak ri Simia; i Simia ti maayo ra ungkuyon ru Raja' Daut.

2 SAMUIL 15:31

Paat ra Raja' Daut binalaan ra i Agitopil niayuk minaya' gumuor ri Absalom, pakiasi' Raja' Daut, “Iou Tuhan, sulango' bilin ri Agitopil!”

2 SAMUIL 16:23

Paat raginio moonong bilin ri Agitopil inapu toojo, koson ayuk ra ngaangai' no ragu ri Aki Kapuuno' galama'; ra Raja' Daut am niayuk i Absalom manugut ra bilin ri Agitopil.

JIRIMIA 4:22

Indagu Tuhan, “Sasambungon ulun Kuno; kalo makaulig ilo Raki'. Koson ilo ra lalaing sasambungon, kolondo' karatian nilo. Mapandai ilo toojo mambaal ra malaat, kaa' mailo mambaal ra moonsoi.”

LUKAS 16:8

Inompor ru ulun langkaya' i manijor ondo' kalo kalalansanan no sabap ra mapintar io. Sabap ra ulun ru tana' ti mapintar toojo maguyum ra rangan ka ulun ondo' makaulig ri Aki Kapuuno'.”

JUANIS 3:17

Sabap ra i Aki Kapuuno' nanusub ra Anak Nano mongoi ra tana' ti sala' ka mongoi pangakim ra ulun, kaa' mongoi pamayag risilo.

JUANIS 8:44

Tingganai ru riwato no ama' min am maayo guang min gumagaya' ra kasagaan nano. Naintaran ra galing i, mamamatoi io ayuk am kalo igondo' giminagaya' ra katapatan, sabap ra kolondo' katapatan riso. Paat ra io magabau, maya' io ayuk ra paliso nano, sabap ra io no maabau-abau, am puun io ru ngaangai' abau.

RINALATAN 13:10

am indagu, “Okou no anak ru Tingganai ru riwato! Okou pantula' ru ngaangai' moonsoi. Mototop kou ra ruung malaat am manumbalik kou ra pangilaan motopot intor ra Tuhan!

ROMA 1:22

Indos nilo mapintar ilo, kaa' sotopot no sasambungon ilo.

1 KORINTUS 1:27

Siningon ri Aki Kapuuno' nampili' ra ondo' kinara' ra sasambungon ru ulun ru tana' ti, koson mampakauyu' ra ulun-ulun mapintar no. I Aki Kapuuno' niayuk nampili' ra ondo' kinara' ra malawo ru ulun ru tana' ti, koson mampakauyu' ra ulun-ulun maikang no.

1 KORINTUS 2:14

Ulun ondo' kalo nokoowot ra Ambiluo ri Aki Kapuuno', io kalo makaapu ra taak intor ra Ambiluo no. Totopot kalo makarati' io ra taak no. Pangkaraan no, ginio sasambungon ayuk. Sabap ra kalo makarati' io amon ru kalo indanganon ru Ambiluo ri Aki Kapuuno' no.

1 KORINTUS 3:19

Sabap ra ondo' karaan ru ulun ru tana' ti ra mapintar, karaan ri Aki Kapuuno' ra sasambungon. Sabap ra mokoondo' tinulisan ra Buuk Kitab, “Linandak ri Aki Kapuuno' ulun mangapintar ra kapintaran nilo galama'.”

1 KORINTUS 3:3

Sabap ra paliso mino lakat ayuk poyo koson ra ulun ru tana' ti. Mangusolon am mansasangor kau ra rondo' am bokon. Sala' kia ka gitio mampakito ra kaayagan min lakat ayuk poyo sumugut ra paliso ru ulun ondo' kalo makaulig ri Aki Kapuuno'?

2 KORINTUS 1:12

Maringkuanang akai toojo sabap ra bolos ru guang mai maminson ramon ra kiralan ru kaayagan mai ra tana' ti, mulu' poyo pabukatan mai ti ramuyun, masalok mabanis am matanda'. Ginio mabaal mai ralalom ru kuasa' ri Aki Kapuuno' am asi' Nano galama', am sala' ka mansail ra kapintaran ru ulun.

2 KORINTUS 11:3

Maimamang aku ramuyun ra maampon kinulau lair pampagagayaan min ri Kristus, mogondo' ri Awa, ondo' ra galing i rinuung ru kukuo ra maabau-abau i.

PILIPI 3:19

Kaa' pupus no ilo ti poongoyon ak ra naraka, sabap ra kasagaan ru guang nilo galama' ti noyo ondo' alapon nilo koson ra tuhan nilai. Mongompor ilo toojo ra baal nilai ondo' sotopot no makauyuyu' am mangkara' ilo ayuk ra atan ondo' guangon ru ulun ru tana' ti.

2 TISALONIKA 2:9

Ulun Malaat ti mintalang mabaya' kuasa' ru Tingganai ru riwato am mambaal io ra mansalinut sauk makakuasa', tatandu' am kaimuagan ondo' abau ayuk ngaangai'.

1 TIMOTIUS 4:1

Mindagu Ambiluo ri Aki Kapuuno' ra totopot paat orou ra tauli, mokoondo' ulun tumalikur intor ra pangintapatan ri Jisus Kristus; sumugut ilo ra ambiluo ondo' mampakalayau am maya' ra pangilaan ru riwato.

JAKUBUS 1:17

Ngaangai' taak ra moonsoi am kolondo' sala, intor noyo ra suruga'; ioginio intor ri Aki Kapuuno' ondo' nampasauk ra ngaangai' sinda ru limbowon. Io ti kalo noyo makulau koson ra babara' ondo' kalo rumoro'.

JAKUBUS 1:5

Amon ru mokoondo' intor ramuyun no kalo mapintar, moonsoi ru makiasi' io ayuk ri Aki Kapuuno', maa' raginio aniin io ra kapintaran; sabap ri Aki Kapuuno' ti noyo manaak ra osoi ayuk ulun mabaya' ra asi' am kinataau ru guang Nano.

JAKUBUS 3:17

Kaa' kapintaran ondo' intor ra suruga', kasaa' no io mapasau am kolondo' sala; am poyo masaga' ra pabansayan, masamba, minsugut; mapanu' ra asi' am baal moonsoi; kalo mainggi' io am mabanis ayuk guang.

JUDAS 1:19

Ilo ti noyo ulun ondo' mangkinibit ra pantutuliaran ra ulun Kristian. Ilo ti kalo kinuasa' ru Ambiluo ri Aki Kapuuno', kaa' maingkinibitan ayuk ru guang malaat nilai no.

PINAINTALANG 12:9

Ginio nai ra tambuakal maayo no pinatiran ra liwar! Io ti kukuo intor ra galing i ondo' ininggalanan ra “Tingganai ru riwato”, kapoam “Ambiluo Malaat”, ondo' nampakalayau ra ngaangai' ulun ru tana' ti. Pinatiran io ra tana' ti nabaya' ra ngaangai' malaikat nano.

PINAINTALANG 2:24

“Kaa' akau ondo' bokon no ra bandar Tiatira, ondo' kalo minaya' ra pangilaan malaat no am kalo mila' ra kapandayan ru Tingganai ru riwato, balain takamin: kalo boo ruangin Ku kapaganan maagat min.

PINAINTALANG 9:11

Ilo ti mokoondo' ra sangulun raja' ondo' mamarinta risilo, am raja' ti noyo malaikat ondo' makakunsi' ra intok ru ulun namagatoi. Inggalan nati ralalom ragu ru Ibrani iono Abadon, am ralalom ragu ru Junani iono Apolion (ondo' arati' no “i Mampalunsai”).