Mathiu 23:34 - Ȧŋlemrȧnɛ Ȧfu

³⁴ Te ba ti, kǝla, i somra nu anȧbi, afǝm atempi yi akarmɔkɔ; alɔm ŋati nǝ tǝ dif, nǝ tǝ tȧŋ ŋa rǝ tǝnt tǝpǝŋkinɛ, alɔm nǝ tǝ sapa ŋa nǝkɛt ka ɛseth ɛ nu ɛgbanɛ, nǝ tǝ bȧl ŋa kǝwur ka kǝpet kin kǝkɔ ka kǝlɔm,

Mathiu 23:34 Iomraidhean Croise

Mathiu 10:23

Bepi a sompa nu ka kȧpet ake-e, gbukɛ nu nǝ kɔ ka kȧlɔm. Tǝ tɛntɛnɛ i kanɛ nu, nǝ gbǝli hɛ po kori tapet ta aŋIsrɛl bɛ haŋ ɔWan ka wuni ɔ po der.

Mathiu 13:52

Kɔ pa ro ŋaŋ, Tiyȧŋ ukarmɔkɔ o karmɔkɔ ɔwe a thǝksa ta rȧbȧy ra ro riyana ɔ bȧlȧnɛ mɔ ulaŋgba ɔwe ba aseth-e, ɔwe mǝ wur ka ɔbɛnɛnɛ wɔŋ yɛt ɛfu yi yɛt ɛkur.

Mathiu 23:31

Tiyȧŋ nǝ gbakɛnɛ kǝpa nǝ yi awuth ŋa ŋaŋ aŋa difǝth Aŋnȧbi.

Luk 24:47

kȧmȧ a taməs kathupi yi katerɔ ka ɛhakɛ ka ȧŋes ŋɔŋ ka tȧbona bɛ, kətəp ro Yerusalɛm.

Yɔn 16:2

Aŋ tə bȧl nu ka ɛseth ɛgbanɛ: aŋko, ȧŋlɔkɔ aŋ tə der, ma wuni o wuni ɔwe mə dif nu, ɔ tə nanɛ kəpa ɔ yɔ mapanth ma Kuru.

Yɔn 20:21

Ka Yisɔsȧŋ ɔ kȧl pa ro ŋaŋ, Ta məthɔfəl mə yi ro nu: mɔ mə ɔKas ɔ po som mi, yaŋ minɛ sɔ i som nu.

Mȧyɔs ma aŋsom 1:8

Kɛrɛ nə tə sɔthɔ afɔsɔ ma ɔYina məsəm ɔ derər nu; ɔwa nə tə yi maseri ma mi ro Yerusalɛm-o, ro Yudia bɛ-o, ro Samaria-o, ɔwa haŋ ka ɔthalnɛ wa ȧdȧru.

Mȧyɔs ma aŋsom 11:27

Ɔwa ka marey ame anȧbi aŋ thor ro Antiɔk kəwur ro Yerusalɛm.

Mȧyɔs ma aŋsom 12:2

kɔ dif Yeməs ɔwɔnt ka Yɔnȧŋ yi aŋgbathɔ.

Mȧyɔs ma aŋsom 13:1

Ɔwa anȧbi yi akarmɔkɔ alɔm aŋ yi ka aŋchɔch ŋa ro Antiɔk, Banabasȧŋ yi Simiyɔnȧŋ ɔwe a bont Nikər, yi Lusiɔsȧŋ ɔwe ro Sirini yi Manɛnȧŋ ɔwe a rusəm yi Hɛrɔd ɔTɛtrark, yi Sɔlȧŋ.

Mȧyɔs ma aŋsom 14:19

Kɛrɛ aŋYuda alɔm aŋ der kəwur ro Antiɔk yi ro Ikoniɔm; ɔwa maŋ po pər aŋfəm-e, aŋ ləməs Pɔlȧŋ məsar, kaŋ liŋ kɔ aŋ wurɔ kɔ ro pet, aŋ nanɛ kəpa ɔ po fi.

Mȧyɔs ma aŋsom 15:32

Ka Yudasȧŋ yi Sailas-əŋ, maŋ yi Aŋnȧy sɔ-e, aŋ maŋ aŋwɔnt rə sim təlai, aŋ bȧksər ŋa.

Mȧyɔs ma aŋsom 5:40

kaŋ malanɛ ȧrim rɔŋ. Ɔwa maŋ po tela aŋsom-e, aŋ sap ŋa, kaŋ kanɛ ŋa kȧmȧ aŋ te sɔ fɔf ka ȧŋes ŋa Yisɔs, kaŋ ter ŋa.

1 AŋKɔrenth 2:6

Kɛrɛ halisa, bepi sə yi kətɔŋ ka ŋaŋ aŋa yi abȧki mədɛr ka kəlanɛ-e, sə tə fɔf kətemp; kɛrɛ kȧtemp ka ȧdȧru are thahɔ, thalɔm kȧtemp ka aŋgbəka ŋa ȧdȧru are, aŋa mə ba kəthas.

1 AŋKɔrenth 3:10

Kətaŋanɛ ka ȧŋboŋa ŋa Kuru aŋa a sɔŋ mi-e, mɔ wuni tȧrȧ seth, i po bot ɔtəmər, ka ulɔm ɔ seth rokɔm kati. Kɛrɛ tha wuni o wuni ɔ botər ȧmerȧ mɔ mə ɔ sal ri.

AŋKɔlɔsi 1:28

Ɔwa sə taməs rə kəmaŋ wuni o wuni dɛ yi kəthəksa wuni o wuni rə kətemp bɛ; kȧmȧ sə gbəli lȧnki wuni o wuni ugbenthis rokor ka Krayst Yisɔs.

1 AŋThɛsȧlonika 2:16

Aŋ yema bɛnt su kəfɔfanɛ təbona təlɔm kȧmȧ aŋ gbəli kisi. Yaŋ aŋ lasər maləs maŋ; kɛrɛ rabaŋ ra Kuru rə fumpər ŋa selbentheŋ.

AŋHibru 11:37

a ləməs ŋa yi məsar, a sera ŋa ratɔŋ, a gbɔns ŋa, a difȧ ŋa yi ɛgbathɔ, aŋ thasəsnɛ gbo ka ȧŋthɔf ka ɛreka ya təlɔmɛ yi atir. Aŋ tiyȧ rə amɔnɛ, ka a bȧr sɔmpar ŋa tə kəyɔ ŋa ɔbaŋ.

Kȧŋȧibinɛ 11:10

Ɔwa aŋfəm nɔru aŋ tə yasanɛ məbɔnɛ, aŋ tə kȧl sel, ɔwa aŋ tə somra ɛboya ukin ka ulɔm, pəkasifɛ Aŋnȧbi ŋarəŋ aŋe aŋ la sɔmpar ŋaŋ aŋa yi nɔru.