Efesios 2:3 - Nuevo Testamento Toba Maskoy

³ Nenlhamakho ennengko'o nengeleliehekhavek anmahai'akha nke nak engelvalho'ok angellanangkok qaselha ngkolatsekama. Ngkolatsekama alketansema engelvalho'ok nahan, nengeleliehekhave lhta mota aliaspongkomakha nak engelvalho'ok vanlha mota akteniaikama nkolanak ngkolatsekama, hengelietemave lhta angetlhevangkok nema akiaqmongkasekha nnavek na m'a aplhamakho enenlhet anak meleliehekho.

Efesios 2:3 Iomraidhean Croise

Juan 1:13

Malha lhna lhta ntemak apalleiam alhnankok aniem'o Eniapom Neten, have m'a aniem'o apkeltemakha apankave nak enenlhet.

Juan 8:44

¡Aveske keliaqhameio' atkak ketlhengkap! Vanlha mota apkelleliehekho m'a, nentekioma niapom ma'a tep nak nanek ampai'osekha lhmankek ham, kakpota nhan akmovana ania'a anko ie, ngken na nenmopvana ania'a nak.

Hechos 14:16

Apkaiangkavek nak nanek Eniapom Neten aplhamakho enenlhet'avok apkenmahai'akha la etlhengkesek apanko'ok apankavek.

Romanos 1:24

Apkelhakhek koka nhan Eniapom Neten ma'a enenlhet'avok anak apkellanekamo mota ngkollatsekama kakpota etlhengkesek apankavek anmahai'elha la apvalho'ok ellanangkok qaselha ngkollatsekama, qaselha henmankaskama nak manganemmalhkelha nak antehek.

Romanos 11:30

Lhennenga lhta ketlhengkap metnangko nak judios ma lhta eleliehekhok Eniapom Neten, apkelietnai'avek koka napaqta'ak ketlhengkap Eniapom Neten aniem'o m'a meleliehekhok apkennemolhema apankave. Netamen hata nhan ma'a elietnahok napaqta'a apkennemolhema apanko ie', ka aptaiangko nak na apkellanei'o ketlhengkap.

Romanos 13:14

Alpeivekha koka etnamok, eleliehekhok koka mota Apveske engankok Jesucristo, mellanko nkek nkonmama altakha la apvalho'ok aliaspongkomakha nak.

Romanos 2:14

Mamma ley Moises apkellelto nak metnangko nak judios, koka apkeliavek akto ngkolatsekama, akto nhan aktaqmanma, nietnek ley apvalho'ok apankavek, malha nema aliatekama la'a nkelpaqmetkaske mota: —Mangkolatsema ham —nlhengkasema mota m'a. —Aktaqmanma ham —nketsevaskesama mota m'a. Koka malha ley ma'a aleliatekama apvalho'ok apankave nak, nkotlhengkasekhok hata atlheianma aptaiangkolha ngkolatsekama, aktaqmanma m'a napaqtek Eniapom Neten

Romanos 5:10

Nelammelhmakha lhta ennengko'o Eniapom Neten, nkaqhok koka hengellasekhekhave lhta apankek aniem'o lhta apketsepma Apketka. Kolhva koka hengellamelekhavek mokhom ma'a, have niapak ankek hata nha ngkotnek hengelvongkeskama tep ma'a aniem'o aktaiekha mokhom aphalhnankok Apketka.

Romanos 5:9

Kolhva koka hengeltemeskeskamak nengelpeivomo Eniapom Neten aniem'o apketsepma Cristo, have ta nha niapak ngkotnek hengelvongkesek tep ma'a akvo'o ta aknem nengeliekpelkammalhkelha.

Romanos 6:12

Ka ngkanek na ketlhengkap mellankek nkonmama mokhom ngkollatsekama, aliatekamok anak apvalho'ok ellanangkok ngkolatsekama.

Romanos 7:18

Aliaspongkomakha nak engelvalho'ok hengeliatengkek angellanangkok qaselha ngkolatsekama, niekhe mangeleltemo angellanangkok ma'a, koka nellanengkek ma'a.

Romanos 9:22

Malha niekhe la apmahai'a elvetaskesek aploma Eniapom Neten kanhan apmopvana, apvaskapma apkellailhema metka akpekhai'a ietangvalhva alietemo la apnaqtevasemmap.

1 Corintios 4:7

Nkanek Eniapom Neten apkeltemeskeskama apkelientalhnemo ketlhengkap ham, have aptaikamok apanke, ka ngkanek akhemo ellakpok ketlhengkap ma'a.

2 Corintios 7:1

Elialheng'a askellamelaiam, ka nkeniemai'ak ma'a apneskamo aplheianma hengellangkok hata Eniapom Neten, ntasek hengellalhnaskesek neliokha kanhan engvalho'ok aniem'o altamekha ngkollatsekama, antangkok neliokho engankavek nelalhnai'o aniem'o nellai'o Eniapom Neten.

Galatas 3:22

Aklheianma Eniapom Neten apaivoma nenlhamakho nengelelto hengenmaikamok ngkollatsekama, vanlha koka envanka'ak angetlhevangkok hata qaselha apeneskamo aplheianma Eniapom Neten aniem'o mongeliaskeiam Jesucristo.

Efesios 2:2

Apkellaneiangke lhta nhan ngkollatsekama ketlhengkap aptaiangkolha nak enenlhet'avok lhmankek ham, apkeleliehekhave lhta ketlhengkap kasekapo av'alho'ok aveske alloma nak ma'a neten, anmaikama aplhamakho apkellelto nak meleliehekho Eniapom Neten.

Efesios 4:22

Ka nkeniemai'ak na ketlhengkap ntasek elvatesangkok ngkollatsekama apkellaneiangko lhta mota lhennenga, etnangkok malha apkel·hatsosaikamok lhennenga apvalho'ok alpaisengkeskama aniem'o aliaspongkomakha nak apvalho'ok akmovana nak hengiennenkesek.

Colosenses 1:21

Apkellammelhme lhta ketlhengkap Eniapom Neten lhennenga, nketlheianme lhta apvalhok meliamolhma nak, apkellaneiangke lhta mota nhan ngkollatsekama.

1 Tesalonicenses 4:13

Elialheng'a, nenmak'ak angelleltennaksek akmak'akha ta ngkotnek apkellangiemhaikama apkellelto nak apkeletsepma kakpota ketlhengkap mankollaiose apvalho'ok malha aptaiangkolha nak ma'a enenlhet'avok metka nak alel·halhnekama apvalho'ok elvetak hata aktaqmanma.

1 Tesalonicenses 5:6

Melienmama nkek nahan malha aptaiangkolha nak ma'a po'ok enenlhet, ntasek koka etnangko mota malha apnaklhatekhai'a la'a, metka nhan alieihama lhma la'a.

1 Timoteo 6:9

Koka apkellelto la aptengiaikamo mota nkeskama patakkom apanko'ok, nkovak na aklheianma apvalho'ok eltok eniankesangkok qaselha apanko'ok la'a, koka nkovak na aktevasekha nkek ma'a, malha ta nhan ngkotnek anmama al·hanemmalhka m'a nkonnaqtevaksek hata nhan aplhamakho akvakmo apsavhekpo m'a.

Tito 3:3

Ennengko'o lhta nhan malha nengelelto metka enqatko'ok la'a, mangeleliehekho nhan ma'a, malha lhta nhan neltaiangko netlheneiam la'a, hengenmaikama lhta nhan lhamakho aktemakha aletsepma ennenio'ok anak, nkelleklemave lhta nhan engelvalho'ok nellanengko la qaselha ngkollatsekama. Neten anke lhta mongeliamolhma, neliasepkeskama nhan, neltaqnongvekhe lhta emmo'ok engankave nenieseksa m'a, kanhan hengeltaknongkongke lhta nhan enenlhet.

1 Pedro 1:14

Eniapom Neten apketkak ketlhengkap, ka ngkanek ntasek eleliehekho mota ma'a, melieplavkesek mokhom aliaspongkomakha lhta apvalho'ok aptaiangkolha lhta mota nhan lhennenga meliamelha lhta Eniapom Neten.

2 Pedro 2:14

Vanlha mota apkellanekama po'ok enenlhet la aptava apkenmahai'a ellanakteksek ma'a, metka apkenmangveianlha nhan apkenmahai'a ellanangkok ngkollatsekama. Apkeliatengkek na ellanangkok qaselha ngkollatsekama nkoliennaktema nak apvalho'ok, vanlha nha mota alletsepma apnenio'ok patakkom ka ngkanek ngkolhek aliemetkaso m'a.

2 Pedro 2:18

Etlhenakpo apankavek apkelammakpo, koka aqhemo m'a, apkenmopvanka'a ania'a, apkeliennengkaskek ma'a atlhenkeskama nak apkelvatesaikamok meliamolhma kakpota etnokhak mokhom alleniem'o nak ma'a aliaspongkomakha nak apvalho'ok.

1 Juan 2:16

Akiaspongkomakha nak envalhok hengiatengkek angelanak qaselha ngkolatsekama, aniasepkeskamo nenvet'akha la'a, nkaqhama nhan engvalhok qaselha engankok. Koka have aniem'o Eniapom, aniem'o ngkollatsekama nak.

1 Juan 2:8

kolhva koka asnaktalheskaskek kakpota atneskesangkok malha alhnankok la'a. Apkeliehekhave lhta nhan Cristo henganemakha nak ma'a, apkelleliehekhavek na ketlhengkap nenvanlha nak ma'a, ntaqmelkasavek na akmak'o nkomaskengvomok malha ienaqteskama lhma lhta akvakmo akiavengko atsai'a lhma aktema have niapak ankek la'a.