Apocalipsis 22:1 - Nuevo Testamento Toba Maskoy

¹ Heteskaske lhta mokhom ángel alvata alhnai'o nkek iemmen akto lhta nhan akiennakteskama enneniek ma'a, malha lhta akto nak ieiam appok nenvetangveiakmo taiep. Ntepke lhta alvata akieto naqtek aptanema Eniapom Neten kakpota nhan Nepkesek Apketkok.

Apocalipsis 22:1 Iomraidhean Croise

Juan 15:26

Ko'o ta allapaskesek apto Hengiatekho niapom ketlhengkap, Espíritu apto have niapak anke niapom apkeniem'o nhan ma'a Eniapom, hata etlhekmoksek lhamakho qaselha aniem'o ko'o.

Juan 4:14

Koka enenlhet apiama nak iemmen askaikamok anak ko'o, meimakiek hata mokhom. Nkotepangkok hata mota iemmen konne apvalhok, ngkankok hata nhan akiennaktema apneniek mankotnengvaianlha nnelha —lhna lhta aptemak Jesús.

Hechos 2:33

Ka apiantemakho lhta nhan neten apneso napokha akieto akiennakha apoktong, apkaiangkek na Espíritu Santo. Kolhva koka Jesús apiangkenkek tekhenlhet'ok ennengko'o m'a aptemakha lhta nhan apaivoma apeneskamo hengeleltennaskama, ka nkeniem'ak ma'a apkelleng'o lhkek, kanhan apkelvet'o lhkek qaselhaha.

Apocalipsis 1:1

Koka hengka vakkahak anak aktalhesammalhka nietnek qaselha apvetaskeskama Eniapom Neten Jesucristo akmak'akha ta ngkotnek angketvai'a lhmankek ham kakpota elvetaskesek apkellasennaikama. Netamen apkapaso lhta Jesucristo lhema ángel kakpota esantengkesek ania'a m'a apkasennaikama apankok apvesai'a Juan.

Apocalipsis 21:11

Nkapommatke lhta natemma nak aniem'o Eniapom neten, malha lhta kto nak metaimong aktek altaqmanma nkoie akvesai'a nak jaspe, alhnakho nke lhta m'a malha lhta kto nak ieiam appok nenvetai'o nak taiep.

Apocalipsis 21:6

Netamen ma'a, lhta aptak na mokhom heiano: —Mpenesalhkehe, ko'o asto nak alfa kakpota nhan omega, ampakhasekha kakpota nhan aktakha nnelha. Enenlhet akiemak'o la apiaspok, angvangkok hata apiama iemmen akteiapma nalhepop hengaikamok akiennaktema nenganiemhaikama, metka akianmoma.

Apocalipsis 21:9

Asvet'o lhta lhema phapak ángel apkeniem'o m'a apieseksek 7 lhta apnaikamok 7 nohaikok apanko'ok allaneiangko aktakha nnelha 7 qaselha akmovana hentevaksek ma'a, lhta aptak heiano: —Elheng, ateskesek hata apmahai'akha Nepkesek Apketkok kakpota etnek aptava m'a —lhta aptak heiano.

Apocalipsis 22:17

Espíritu ka nhan ngkelvana nema akmahai'akha, lhta ntangkok ma'a: —¡Elheng! —lhta ntangkok ma'a. Koka aplhamakho apkellelto apkellengai'a ania'a nak ntasek etnangkok na hengke'e: —¡Elheng! Koka enenlhet apkellelto la aliemai'a apiaspo'ok ntase eliangvetak iemmen hengke'e akto akiennaktema enneniek metka akianmoma.

Apocalipsis 22:6

Koka lhta aptak heiano ángel ma'a: —Koka iokhalhmek ankek ma'a astakha lhkek alheianma, nietavek ankek na mei'askamek lheiap ma'a. Eniapom Neten apkamnoma alenteiapvekta apatno'ok apkeleltennaskamo ania'a apankok ma'a, apkapaskek na ángel apankok kakpota elvetaskesek apkellasennaikama akmak'akha ta ngkotnek kolhvave nak —lhta aptak heiano ángel.

Apocalipsis 3:21

Apkellelto ta apkeliephongveiakmo, altok hata eniakhangkok lheme astanema nak, ko lhta nhan asto asiephongveiakmo, asnek na aptanema nak Tata".

Apocalipsis 5:13

Asleng'a lhta nhan aklhamakho qaselha apkelentepkeskama lhta Eniapom Neten akieto neten, nalhepop, alvata kanhan koneng lhepop anak, lhta ntangkok ma'a: —Nietavek eliavenkaskesok apkelvesai'a, ellahok nahan, elteskasangkok na apkelientalhnemo kanhan apkenmopvanka'a m'a metka akvaiam annelha aliekaikamok iantelhkapa apto apnema aptanema apveske, kakpota nhan Nepkesek Apketkok —lhta ntangkok ma'a.

Apocalipsis 5:6

Netamen asvet'o lhta Nepkesek Apketkok apiangko m'a akieto aiseksek aptanema apveske, kanhan 24 metno apketko'ok alhta, kanhan ma'a aiseksek 4 kaselha allaniemhaiangka m'a. Lhta m'a nepkesek apketkok apmatnamo lhta lhennenga, 7 lhta apkapet'ok ma'a, 7 lhta nhan apaqto'ok ma'a, koka m'a alietkesammalhka 7 espíritus apankok Eniapom Neten, ka apkellapaskamo nkolloka lhmankek ham.

Apocalipsis 7:17

Eltaqmelkesek hata mota Nepkesek Apketkok akieto m'a aiseksek aptanema apveske, malha akto nak ma'a apkellanekama nak nepkesek apkeliantemekha akieto akteiapmakha iemmen hengaikamok akiennaktema ennenio'ok, Eniapom Neten hata nhan el·hatsoskasangkok aimen'ok apaqto'ok ma'a —lhta aptak heiano m'a.