Apocalipsis 20:4 - Nuevo Testamento Toba Maskoy

⁴ Asvet'o lhta mokhom apkelveskai'e apkakhangko apkeltanema apkelveskai'e m'a neten, nne lhta allangko apkenmopvanka'a kakpota eliekpelkok apkeltemakha enenlhet'avok lhamakho aiempek lhmankek ham. Asvet'o nhan apkel·hangok ma'a nema aliaqtemanma lhta apiaspok aniem'o mota apkelpaieskama ania'a aplhenammap Jesús kakpota nhan apkeleltennaikama Eniapom Neten apaivoma. Ma lhta nhan elteklheiangkok aptapno'ok naqtavek qaselha nevhak alhta nengai'o kakpota nhan nema akietkeskamo akiokha nke alanemmalhka m'a. Meleltemo lhta nhan ngkolhek apnaqtalheso akvesai'a alpaihakha napaqta'a, apmeio'ok nahan. Koka apnaklhatekhangvakme lhta nhan ma'a apieseksek apkenmaskengvaiakmo enenlhet'avok alhta m'a, aptangkokho lhta nhan apkelveskai'e apkelpasmekha Cristo akvakmo ta 1.000 anio.

Apocalipsis 20:4 Iomraidhean Croise

Marcos 6:16

Koka lhna aptemak Herodes: —Juan annenga m'a, ka skeltemo lhta ngkolhek akiaqtemeno apiaspok, koka aplhatekhangvakmek mokhom ma'a apieseksek apkenmaskengvaiakmo m'a —lhna aptemak.

Marcos 6:27

Ka apkapaskamo lhnak lhema soldado akieto nengaqlhengkasemmalhkelha kakpota eiaqtemangvakhak apiaspok Juan, kakpota epekkenek na lhema aphak, apkangkongvekho lhnak na ngkelvana tkok. Netamen angkongvekho lhnak na ngken ma'a.

Marcos 9:11

Netamen apkelelmalhneiangka lhnak Jesús ma'a, lhna aptaiangkok: —¿Have nlho niapak apketlheianmo nak escribas evak hata apmanie m'a Elias? —lhna aptaiangkok.

Lucas 1:17

Ka nematka nak evak hata apmanie m'a Apveske ta, nkolhok hata nhan ma'a apvalhok aktemo lhnak na nek apvalhok Elias kakpota nhan aknema apmopvana. Ellasekhaskesekhok hata apiapma'ak apketkak, etlhekmosangkok hata apkellelto meleliehekho nak kakpota eleliehekhok ma'a. Elpeneskasok hata nhan enenlhet'avok kakpota enmankok takha m'a Apveske ta —lhna aptemak apkanemo ángel Zacarias.

Lucas 14:14

Ka enenlhet'avok anak ma'a mankollapvankek eliaqmongkasekha lheiap apkellanema la'a eltasemok, koka aktaqmelakho nke ta nkotnek lheiap akvo'o ta aknem apnaklhatekhangveianlha apieseksek apkenmaskengvaiakmo apkellelto apkelpeivomo, hata nhan nkotaqmelek lheiap ma'a —lhnak aptemak Jesús apkanemo apto apankok ma'a.

Lucas 22:30

Hata antavokhak ma'a, anienangkok nahan nelpasmekha akieto ta m'a astakhelha ta apveske, eniaqhengvomok hata nhan ma'a apkeltanema apkelveskai'e kakpota eleliekpelkoho apkeltemakha m'a 12 apkelpasmekha apketkak neptamen Israel —lhna aptemak ma'a.

Juan 14:19

Ketsek nkaimelhkak manghelvetekhek hata enenlhet'avok nalhepop anak, ketlhengkap hato ka helvetekhak hata, elloka ta mokhom ma'a tep ngkanek ko'o aloka ta nhan ma'a.

Romanos 11:15

Apkenmangkek takha Eniapom Neten metnangko judios aniem'o apkeltaqnongvekha judios apankave nak. Netamen hata m'a apkenmokho la takha Eniapom Neten judios apankave nak, neten ankek hata ngkotnek altakmalveiam apkellangiemhaikama aplhamakho enenlhet'avok lhmankek ham, ngkolhek hata nhan aknaqlhatekhaskakmo mokhom apieseksek apkenmaskengvaiakmo.

2 Timoteo 2:12

Ka nengvaskapo la nhan neksa nellengaiangko akientalhnema metka nengai'a nhan, antangkok hata malha apkelveskai'e lhemek ma'a, kanhan nenlheno la mangiamo apvesai'a Cristo, elhenek hata nhan manghengiamo m'a.

Apocalipsis 1:2

Netamen ma'a Juan aplhenekho mokhom aptemakha apaivoma Eniapom Neten kanhan Jesucristo, aplhenekho nhan ma'a aklhamakho qaselha apvetai'a m'a.

Apocalipsis 1:9

Ko'o Juan asto elialheng'a ketlhengkap, nengelelto nhan nennemolhema akieto nak aptemakha apveske Eniapom Neten. Aslengaiangkek na lhemek akientalhnema ketlhengkap, nengetlhevaikamok na nengeliennaktema kakpota angelvaskapok ma'a. Asne lhta ko'o m'a akieto akiaqiema lhepop iemmen nekhav'ak akvesai'a Patmos aniem'o aspaieskama mota ania'a apankok Eniapom Neten, kanhan ania'a aktemakha asvetaiangko lhta Jesucristo.

Apocalipsis 11:11

Koka akieko'o lhta hanetolhema aknem medio apkeletsepma m'a, apkelvatepnapo lhta Eniapom Neten aptangkokho lhta aphalhnanko'ok apqanet alhta apkeleltennasemmap ania'a, avanhek anke lhta apkellai'a apkellelto apkelvetai'a m'a.

Apocalipsis 11:15

Netamen apaivaso mokhom trompeta septimo ángel, ka asleng'o lhta nema alpaqmeiasma aliennaktema nkek neten, lhta ntak: —Kolhvave nak lhmankek ham aptangkek apkelveskai'e Apveske engankok kakpota nhan apto apkapasammap apvesai'a Cristo, aptaikamok apkelveskaie metka akvaiam annelha aliekaikamok iantelhkapa —lhta ntangkok nema alpaqmeiasma.

Apocalipsis 11:3

Koka allapaksek hata apqanet askellasennaikama apkellelto apkelioho astemakha ko'o etlhenek hata astakha alheianma ko'o akvakmo 1.260 aknem, elentalhnekhak hata mota apkelentalhnema apkeltavkeskama nak apiempeiok anmaiosak'a nak apvalho'ok anko'ok.

Apocalipsis 11:7

Hata apkelpeneso ta apkelpaieskama ania'a astemakha ko'o m'a, nkotiepok hata nhan lhema kaselha nevhak nengai'o nkek konne malhek konne kankek, nkonnapalhkak hata m'a apqanet anak askellasennaikama apkelioho ko'o astemakha, nkoltemeskasenta ta koneng, nkonnapok hata nhan ma'a.

Apocalipsis 12:11

Koka apkeleltemeskesakhe lhta koneng ma'a aniem'o lhta akiangkenammalhka ema apankok Nepkesek Apketkok, aniem'o lhta nhan apketlheianma apvesai'a m'a metka apkellai'a, nkaqhok apkenmahai'a etekio'ok

Apocalipsis 14:11

Mankotnengvomek hata nha nnelha anmekha neten talha eten ankok nema akiaqmongkasekha aktemakha m'a. Mankotnengvome ta nnelha apkeliampai'a apkellelto nak apkelteklheikamok aptapno'ok naqtavek kaselha nevhak nengai'o kanhan nema akietkeskamo lhta akiokha alanemmalhka m'a. Meliamposakpek hata nhan aknem, pelhasep, apkellelto nak nema alqaskama akvesai'a kaselha nevhak nengai'o apiempeiok ma'a —lhta aptak ángel.

Apocalipsis 15:2

Asvet'a lhta nhan malha alvata alhnai'o nkek iemmen malha ieiam appok la'a nenvetai'o konne, nema angkaiekha lhtoka talha. Apkelaknama lhta m'a takhalhet iemmen alvata apkellelto lhta apkeltemeskesekha koneng qaselha nevhak alhta nengai'o kanhan nema akietkeskamo lhta alanemmalhka akiokha m'a. Mellaiangko lhta nhan nkolelqaksek numero ankok akvesai'a apiempeiok ma'a. Apnangke lhta nhan arpa apankok Eniapom Neten ma'a.

Apocalipsis 17:8

Ka kaselha nevhak lhek nengai'o, lhennenga lhnak nanek akienaqtemakha m'a, mmaskengvakmek koka nenvetai'a m'a. Koka nkotiepok hata mokhom ma'a konne malhek konne kankek, nkoiaihama ta takhalhet lhepop anak lhmankek ham, koka nkotvasalhkak hata mokhom ma'a. Nkopalesemmak hata apvalho'ok apkelvet'o ta apkellelto nak nkolhnaikamok apkelvesai'a vakkahak akiennaktema enneniek, lhennenga lhnak na nek na akietnemakha m'a vakkahak anak, amanie alanemmalhka lhnak na ne lhma nkek ham.

Apocalipsis 2:26

Apkellelto ta apkeliephongveiakmo, apketlhengkaso la nhan askellanemakha etnangkok metka nnelha, allangkok hata aptaikamok apkelientalhnemo apieseksek lhamakho apkellavakha,

Apocalipsis 20:6

¡Aktaqmelakho nkek apkellelto apnaklhatekhangveiakmo apmaniaie! Apkelpokkenammap asongkek ma'a, mellengankek hata mokhom hanet aktaiekho nengetsepma m'a. Etnangkok hata sacerdotes Eniapom Neten apankok kakpota nhan Cristo, etnangkok hata lhemek apkelveskai'e akvakmo 1.000 anio.

Apocalipsis 22:5

Melhek hata pelhasep ma'a, mankaimalhkek hata nhan talha alhankok ma'a kakpota nhan aknem apommatema la'a, ngkanek Eniapom Neten apto apveske hata eniapommetek ma'a. Etnangkok hata nhan apkelveskai'e metka akvaiam annelha aliekaikamok iantelhkapa.

Apocalipsis 3:21

Apkellelto ta apkeliephongveiakmo, altok hata eniakhangkok lheme astanema nak, ko lhta nhan asto asiephongveiakmo, asnek na aptanema nak Tata".

Apocalipsis 4:4

Nnangke lhta nhan 24 apkeltanema apkelveskai'e nema alpeneskeskamo m'a nekhav'ak apnakha m'a aptanema apveske. Apkakhengveiakmo lhta nhan 24 metno apketko'ok ma'a, apkenmopai'a lhta apkelentalhnema, nnaianke lhta nhan apkelelhnekha apqatko'ok oro alanemmalhka.

Apocalipsis 6:9

Netamen Nepkesek Apketkok apkentaso quinto nema aliepetkeskama, asvet'o lhta nhan apkel·hangok aptekioma lhta neksa apkelpaieskama ania'a aplhenammap Eniapom Neten, aniem'o lhta apkelleliehekho m'a, nkakhaiangke lhta m'a koneng alvanlhemmalhkelha qaselha.

Apocalipsis 7:3

—¡Ellaielh sekhe! Menaqteves ankek lhepop anak, kanhan alvata, iamet nahan. Nkaimelhkek sekhek annaktalhaksek alpaihakha napaqta'a apkellelto la apkellasennaikama Eniapom Neten engankok —lhta aptak ma'a.