Luke 7:6 - MÖNÖ KÖMÖ

⁶ Ñɨŋ aliö rɨmɨn nugwön, Jisas ñɨgö pɨsaŋ dumɨd dumɨd ramɨxrö il yöra umɨn nugugɨrön, ami nöbö nugwidɨx mɨdɨb nöbö aku nöbö nugub nuŋwa bli yad abmɨn, du Jisas nugwo möigw palön yadmä, “Ami nöbö nugwidɨx mɨdɨb nöbö an aku algör yada, ‘Nöbö Dib, nɨ nöbö wä yöi, ram na aku yamsö ölɨŋ wöröxɨp hömɨjɨnö.

Luke 7:6 Iomraidhean Croise

Matiu 20:28

Nöbö Ha nuŋ aku, nöbö mö bla ñɨŋ mabö na rɨŋ me rön hölöŋ; mabö ñɨgö rɨ nölɨp dumɨdön, mai ap kib mag gwogwo röi piaku höj rɨ wöröxmön, ñɨŋ kömö duŋ, me rön, hö,” röŋa.

Matiu 3:11

Ñɨŋ ap kib mag gwogwo röi aku, pödpöd rɨmɨn aliö alölɨŋö, rön, röböxöñ aku, nɨ ñɨgö röbö akwör pal nöina. Makwam nöbö nɨ mai hön aku, nuŋ nɨ röxgɨb yöi; nuŋ nöbö dib ödöriö, nɨ nöbö ulmɨdö. Nɨ nugwo nugwön möigw yöxna. Yam uñ nuŋwa pɨrag yönɨb maga mɨdöl. Nɨ ñɨgö röbö akwör pal nölmɨdla jɨ nöbö aku nuŋ hön, ñɨgö Inöm Leia pal nölön, rɨn pina alɨg pal nöiöna.

Mark 5:24

Aliö rɨmɨn, Jisas Jairas pɨsaŋ dum nugugɨrön, nöbö mö magöri maga rɨp duön, Jisas nugwo mibɨl mibɨl nɨgön pön dumɨdmä.

Luke 5:8

Akuyöbö almɨn nugwön, Saimon Pita nöbö nuŋ pɨsaŋ bɨyöj rol mɨdmä akuyöbö, dölöm mɨga pɨmä akuyöbö nugwön, rɨb mɨga akwör yöxmä. Sebedi ha nuŋwa Jems Jon yöŋö, bɨyöj i pön Saimon pɨsaŋ mabö nɨgiö nɨgön rɨmɨd nöbö hogwa, algör ör rɨb mɨga yöx nugumä. Makwam, Saimon du Jisas mɨdöŋ il yöra höxmax yuön yadöŋa, “Nöbö Dib, nɨ nöbö ap kib mag gwogwo rɨl aku, naŋ hör pikwo duö,” röŋa. Aliö rɨmɨn, Jisas yadöŋa, “Nagö ipöxmɨjɨnö. Weik wop mɨdö kɨ ila nɨgön, dölöm pɨb nöbö mɨdlö aku röböxön, nöbö mö yölɨŋ God adö pön höb nöbö mɨjnaŋö,” röŋa.

Luke 7:4

Aliö rɨmɨn, ñɨŋ Jisas mɨdöŋ yöra duön, nugwo mɨ ususör rɨ yad gögö rön yadmä, “Ami nöbö nugwidɨx mɨdɨb nöbö dib i nöbö wä mɨdöm. Anɨŋ Juda nöbö mö bla madmag nɨgön öim nugwidɨx mɨd ri abön ra. Mögum rɨb ram anɨŋ i rɨ nɨgöŋa. Makwam, nagö duön nag mabö rɨ nölɨb nöbö nuŋ aku raŋ kömö nɨgaŋ,” me rɨmä.

Luke 7:7

Nɨ nöbö wä mɨdlöxisöŋö ulöxa, jɨ nɨ nugula, God nagö pɨsaŋ mɨd aku, “Kömö nɨgaŋ,” mönö akwör yadmɨdaŋ, nöbö na ap rɨ aku kömö nɨgöna.

Luke 8:49

Jisas aliö rɨmɨn nugugɨrön, Jairas mabö rɨ nölmɨd nöbö i hön, Jairas nugwo yadöŋa, “Halöu naŋ aku mɨ wöröxa; yad nölɨb nöbö nugwo yadaŋ yödpɨlö ölɨŋa wöröxɨp henmöm; höbkal duaŋ,” me röŋa.

Aposol 10:38

Makwam ñɨŋ mödö nugwöia, Jisas Nasaret yöbö nöbö aku, God nuŋ nugwo pɨsaŋ mɨdön, Inöm Leia nugwo nölön, nugwidɨx mɨdmɨn nugugɨrön, ölɨsö nuŋ akwör pön, mögörɨb hörɨrör akuyöbö magalɨg yön gɨrön, nöbö mö piaku rɨ ri ab gɨrön, nöbö mö kɨjaki ñɨgö rɨmɨn öliöxön mɨdim piaku ñɨgö rɨmɨn, kömö nɨgmɨda.

Jems 4:10

Nöbö Diba nugu gör mɨd aku, an nöbö mö iba mɨdölö, rön, nugwo höjöpaiöña mɨ, nuŋ ib ñɨŋa raŋ bɨl sö diöna.

Jems 4:6

God nuŋ anɨŋ uliöxön, pɨ ösös rɨ ri abön, nugwidɨx mɨd ri ab mɨda. Mag akwör, God Mönö aku kai kɨtön yadmä, “Nöbö mö keir ör mɨdön, mɨd ri abölɨŋö, rɨmɨdöi piaku, God ñɨgö mönö ölɨsö yadmɨda; jɨ nöbö mö ib ñɨŋa keir yadɨŋ bɨl sö duen piaku, ñɨgö uliöxön, pɨ ösös rɨ ri abön, nugwidɨx mɨd ri ab mɨdö,” rɨmä.