Jems 1:12 - MÖNÖ KÖMÖ

¹² Nöbö mö ömörö höm, God nugwo röböxölön, cɨrɨp gö nɨg gör mɨjöñ piaku, usaŋ öim mɨdɨb mea aku pɨnɨŋö, rön, wahax pöña. Nöbö mö ñɨŋ God madmag nɨgmɨdöi piaku, God ñɨgö usaŋ öim mɨdɨb mea aku röb nöiöna. God nuŋ mönö ölɨsö ma yadön aliö yad nɨgöŋa.

Jems 1:12 Iomraidhean Croise

Matiu 10:22

Nɨ adö mɨjöñ aku, nöbö mö akuyöbö magalɨg ñɨŋ nugwɨŋ, ölɨsö diba wöiöna. Makwam nöbö mö yön ususör rön, nɨ pɨsaŋ mɨjöñ bla, wop maiyöbö aku haŋ, God ñɨgö pöna.

Matiu 25:34

Nuŋ Kiŋ diba makwam, nöbö mö imag mɨrɨx adö ñɨgö yajöna, ‘Acö ñɨgö pɨ ri ab makwam, mɨ ödöriö wahax pi. Nuŋ mögörɨb maduar rɨ nɨgöŋ wop aku, yör ñɨgö aku röb nɨgöŋa. Hön yör waiö aku pi.

Luke 6:22

Nöbö Ha nuŋwa nugwo cɨrɨpön mɨdɨŋ, nöbö mö bla ñɨgö rɨb gwogwo yöxön, höj nugwön, nöbö mö gwogwo pi bɨlɨk, nöbö kai pɨsaŋ mɨjöñɨŋö, rön, ñɨgö ib urön rɨb gwogwo yöxön, yad mönö nɨgön yad höimöumɨjöñ aku, ñɨŋ wahaxbör wahax pɨmɨjöña.

Romans 5:4

An ususör rön, Jisas Krais cɨrɨp ri abön, rɨp dumɨd dumɨd, an nöbö mö rɨb ölɨsö alɨg mɨjnɨŋa. Jɨ rɨb ölɨsö alɨg mɨjnɨŋ aku, an rɨbyöx gɨba alɨg mɨjnɨŋa.

Romans 8:28

An nugwöla, God nugwo madmag nɨgöl nöbö mö bla, God nuŋ anɨŋ nugwidɨx mɨdaŋ nugugɨrön, ap bli keir ren; mɨd ri abnɨŋ adakwör anɨŋ cöna. God nuŋ maduar ör rɨbyöx nugwön rɨg yadöŋ mag akuyöbö, anɨŋ “Ñɨgö nɨ pöl hönö,” röŋa.

1 Korid 2:9

Makwam God Mönö aku kai kɨtön yadmä, “Nöbö mö God nugwo madmag nɨgöi akuyöbö, God ñɨgö pɨ ri abön, ap wä wä nöiöna. Mämäga nugwölöi; yad nölmɨn audiöx nugwölöi; God rɨb nuŋ akwör yöx nugwön cönɨŋö, rön nugwölöi; God ñɨgö ap wä wä keiryöbö akwör nöiönɨŋö,” rɨmä.

1 Korid 8:3

Jɨ nöbö mö God nugwo madmag nɨgmɨdöi piaku, God nuŋ ñɨgö nugwa.

1 Korid 9:25

Nöbö mö ipalɨp duba rɨmɨdöi bla, höd duŋö, rön, rɨb ölɨsö akwör yöx nugwön, hölul rɨ ri abön, öim mɨ ususör rön höbai wob nugup dumɨd dumɨd yör pön bla, mai ipalɨp diöña. Usaŋ öim mɨdölɨb me aku, ap ulmɨdö mɨd aku pɨnɨŋö, rön, akuyöbö alöia. Makwam an usaŋ öim mɨdɨb mea pɨnɨŋö, rön, akuyöbö alöla.

2 Timoti 2:15

Nɨ God mabö nuŋwa rɨ ri abön, mönö mɨ nuŋ aku ödöriö akwör yad nöl ri abmɨjɨn aku, God nɨ wä cönɨŋö, rön, rɨba mag paŋ akwör yöx nugwön, ususör rön rɨ mɨdö.

2 Timoti 4:8

Nuŋ Nöbö Dib, nuŋ mönö pɨ nuöm nɨg ri abön yadmɨd aku mɨ, agap apɨm rɨla aku nugugu mɨdön, wop dib nuŋ aku haŋ, nɨ nöbö kömö wä nɨ, me cöna. Makwam nör wöhö; nöbö mö, Nöbö Diba hönɨŋö, rön, wä rɨmɨn nugugɨrön pöx mɨdöi akuyöbö, ñɨgö magalɨg paŋ mag akwör cöna.

Hibru 10:32

Höd rɨmɨdim mag aku uplöbmɨjeñ. Krais mil wä ñɨgö ab nölmɨn mönö wä nuŋ aku nugw pɨmɨn, ñɨgö nöbö mö bli ömörö diba pɨ nölmä aku, jɨ ñɨŋ nugwo röböxölim.

Hibru 11:17

Nɨ Ebraham nugwo yajɨn mag akuyöbö cönɨŋönö wöhö, rön, God nugwo yadöŋa, “Ha nagö Aisak, ‘Yöxɨm yöxɨŋ yöxɨp höuöilmel rɨŋ mɨga mɨjöñɨŋö,’ rɨm ha akwör, nugwo pön du pɨl pal nɨgön, nɨ höjöpal ur nölö,” röŋa. Aliö rɨmɨn, Ebraham nuŋ God nugw pön, God mönö yad aku mönö mi yadö, rön, nɨ yad mag akwör cönɨŋö, rön, yadöŋa, “Ha na aku yöxɨm yöxɨŋ yöxɨp höuöilmel rɨŋ mɨga mɨjöñɨŋö, röŋ mönö ölɨsö ma yad nɨg mönö aku God nuŋ röböxen; ha na paŋyöbö ödöriö aku pɨl pal nɨgmön, God nuŋ raŋ höbkal öbiönɨŋö,” rön, ha nuŋwa Aisak pön du rɨgpɨd rola nag nɨg nɨgön, yu meia pön pɨn nɨgɨba rɨmɨn, God yadöŋa, akuyöbö almɨjɨnö, röŋa. Makwam, ha nuŋwa Aisak mödö aŋadö wöröxöŋa, jɨ Ebraham nɨc pön yölɨŋ höuöil duöŋa.

Hibru 12:5

God ñɨgö halöu ha nɨ, me rön, mönö wä yadmɨn God Mönö aku kai kɨtim mönö aku uplöböiŋönö ä? Nuŋ yadöŋa, “Halöu ha nɨ kɨyöbö! Nöbö Diba ñɨgö mönö nölön ömörö nöiön aku, rɨb diba yöx nugumɨjeñ. Nöbö Diba ñɨgö yadyöxön aku, anɨŋ mödoŋwadö akwör röböxönɨŋö, rön, rɨb mɨga yöxmɨjeñ.

Hibru 6:15

Ebraham mönö nuŋ aku nugwön, tar pöx mɨdɨm mɨdɨm, God ap wä yadöŋ aku pöŋa.

Jems 2:5

Makwam haul nöbö mölöu nöbö wä nɨ bla nugwi! Nöbö mö mögörɨb il kɨ, nöbö mö lɨblɨb mɨdö bla nugwön, nöbö mö yöraku ñɨŋ nöbö mö mölyöbö piaku, me rɨmɨdöia. Jɨ God nuŋ nöbö mö lɨblɨb mɨdö bla ñɨgö aliö alöl. God nuŋ ñɨŋ pɨ ösös rɨ ri abön, rɨb wä nölaŋ, ñɨŋ God nugw pön cɨrɨp ri abön, inöm ñɨŋa yuö kwo nöbö mö rɨb nuŋ ödöriö piaku mɨdɨŋ nugugɨrön, nuŋ öim öim Kiŋ ñɨŋa mɨjöna. Nuŋ mönö ölɨsö ma yadön, nöbö mö nɨ mɨ madmag nɨgmɨdöi piaku nɨ ñɨgö akuyöbö ainö, röŋa.

Jems 5:11

Ñɨŋ nugwöia, nöbö mö rɨ ri abön, ipɨtaipɨtö rön röböxölim piaku, ñɨŋ wopik wahax pɨ gɨrön mɨd ri ab gɨ mɨdöiŋö, rɨmɨdöla. Nöbö nagö Job maduar ör mɨdmɨd, haiwo aku nugwöia. Nuŋ ömörö diba pön öliöx mɨdöŋa, jɨ nuŋ Nöbö Diba rɨbyöx nugu gör mɨdɨm, Nöbö Diba nuŋ Job pɨ ri ab gɨ mɨdɨm, mai mɨd ri aböŋa. Aku agapɨm: Nöbö Diba nuŋ öim öim nöbö mö ögwö ödöriö yöxön, pɨ ösös rɨ ri abmɨda.

1 Pita 3:14

Jɨ ñɨŋ mag wä akwör rɨŋ ñɨgö rɨ gwogwam rɨmɨjöñ aku, wahax pöña. Nöbö mö ñɨgö rɨ gwogwam rɨmɨdöi akuyöbö ñɨgö ipöxmɨjeñ, rɨb diba yöxmɨjeñ.

1 Pita 4:13

Krais nöbö mö nuŋwa mɨdöla aku mɨ, nugwo rɨg rim mag akuyöbö anɨŋ rɨmɨdöiŋö, rön, wahax pɨ gɨr mɨdɨŋ, nuŋ mil wä mag nuŋ alɨg hön wop aku, ñɨŋ wahax pɨ gɨr mɨjöña.

1 Pita 4:14

Ñɨŋ Krais nöbö mö nuŋ, me rön, ñɨgö yad höimöuöñ aku, wahax pɨ gɨr mɨjöña. God Inöma mil wä mag aku anɨŋ pɨsaŋ mɨd aku nugwön mɨ, mag akuyöbö almɨdöiŋö, rön, wahax pɨ gɨr mɨjöña.

1 Pita 5:10

God nöbö mö uliöxön, pɨ ösös rɨ ri abmɨd Nöbö aku, öim öim Krais nöbö mö nuŋwa mɨjne, rön, mögörɨb wä mɨda ñɨgö yad nɨgöŋ aku mɨ, wop kɨ ñɨgö rɨ gwogwam rɨm ölɨŋ höb pɨmɨdöia, jɨ mag ulul mɨŋi God nuŋ keir hön ölɨsö nuŋwa ñɨgö nölaŋ, ñɨŋ Krais nugw pɨ gö nɨgön, cɨrɨp ri abön, nöbö mö ölɨsö nuŋwa mɨdön, mɨd ri aböña.

1 Pita 5:4

Ñɨŋ aliö alɨŋ, Sipsip Urɨb Nöbö Dib aku hön, usaŋ ölɨsö mea öim öim mil milöu gɨ mɨjön aku ñɨgö nɨg nöiöna.

1 Jon 4:19

God nuŋ keir höd anɨŋ madmag nɨgöŋ aku mɨ, mai an nugwo madmag nɨgöla.

Repelesin 2:10

Ñɨŋ ömörö pɨba rɨmɨdöi aku, rɨb diba yöxmɨjeñ. Nugwi! Womiöx mɨda, ñɨŋ Krais cɨrɨp ri aböiŋönö pɨn bɨcöñɨŋö, rön, kɨjaki raŋ, ñɨgö bli pɨ nag nɨgöña. Wop akuyöbö ragpɨd sö ñɨgö mɨ rɨ gwogwam rön ömörö nöl gɨr mɨjöña. Jɨ ñɨgö mag kai rön aŋadö pɨl pal nɨgɨba rɨmɨjöñ aku, rɨb diba yöx nugumɨjeñ. Nɨ cɨrɨp gör mɨdɨŋ pɨl pal nɨgmɨjöñ aku, ñɨgö usaŋ kömö öim mɨdɨb mea nöina.

Repelesin 3:19

Nöbö mö ñɨgö madmag nɨgmɨdɨl akuyöbö rɨ gwogwam rɨmɨjöñ aku, ñɨgö röböxöin; mɨd ri abɨŋ, me rön, ömörö nölön mönö nölmɨdla. Makwam, ñɨŋ rɨb ölɨsö yöxön, ap kib mag gwogwo rɨmɨdöi aku, pödpöd rɨmɨn aliö alölɨŋö, rön, aŋadö röböxön mɨd ri aböña.

Repelesin 3:21

Seten nɨ ömörö diba pɨ nölöŋ wop aku, Acö na mönö nuŋ aku röböxölɨm; rɨg yadöŋ mag akwör rɨp duön mönö, Acö pɨsaŋ hogw rol kiŋ nuŋwa rola römɨdma. Mag aliö akuyöbö, nöbö mö Seten ñɨgö ömörö nölmɨn, mönö wä na aku röböxeñ, nɨ cɨrɨp gör mɨjöñ akuyöbö, ñɨgö yad pön hön nɨ pɨsaŋ hogw rol kiŋ na rola römɨjnɨŋa.