Jeremiya 15:2 - La Bible en Otetela (Bible K'Ekila) 1991

² Lamʼayuwukumbula vati: Lendi ayututsho? Kakaluya diui wati: Latuyalaka kata ati: Waku wakasonwama lu nyoi, wayutsho lu nyoi; waku wakasonwama lu yombo, lu yombo; waku wakasonwama lu ndjala ka kasha, lu ndjala ka kasha; la waku wakasonwama lu fumbi, wayutsho lu fumbi.

Jeremiya 15:2 Iomraidhean Croise

Isaya 10:4

Vo wayukutakuta lʼului wʼasi lukanu, Wayoko lʼului a waku wambudiakema. Kuyanga osoku, kele kandi hakitakita, Ndu lunya landi lakasimbemadi.

Isaya 24:18

Okone one latulawoka lundju la woma, atutambelaka lu wawu; La one latutumbaka uma lu wawu, atutalaka lu djunga. Adidishi wa lʼulungu wambudihwama, La atshina wa kete wambusukasuka.

Jeremiya 14:12

Lamʼakilawo ma, dimi haluka esengosengo awo. Lamʼalambulawo elambu wa lutshumba la wa shima, dimi halelungula. Keli dimi layadiaka la yombo la ndjala ka kasha ndu la elandu.

Jeremiya 14:16

Ndu antu watuwutelaka akambu wahatayi, wayukadjema lu esese wa Jerusalema dikambu dia ndjala ka kasha la yombo. Nduku untu ayuyala leko dia mbakhunde: vo, wadiewo, anʼawo wʼapami kuyanga anʼawo wʼamantu. Dimi lajakaluya kolo yawo lu ete awo.

Jeremiya 16:4

Vo wayuvo la elandu a wulu, hawuwalela kuyanga mbakhunde. Vo wayuyala uku tumi ladiku dia kete. Vo wayudiakema la tombo la ndjala ka kasha. Edu awo wayuyala ma dia fudu ya lʼulungu la dia nyama ya la kete.

Jeremiya 19:7

Dimi layulanya sangweyu dia Juda la Jerusalema lu dihuli ne. Dimi layakosha la ntundu kʼatunyi awo ndu lʼanya a waku watuyangaka mbadiaka. Dimi layukimo edu awo le fudu ya lʼu-lungu la nyama ya la kete, dia yo mbele.

Jeremiya 43:11

Ndi ayuya, ayuyulanya kete ya Edjibitu. Waku wakasonwama lu nyoi, wayutsho lu nyoi; waku wakasonwama lu lohombo, lu lohombo; la waku wakasonwama lu yombo, wayutsho lu yombo.

Ezekiyele 12:11

Uti wati: Dimi leko djimbitelu le nyu. Uku akamatshi, mbayuwatshela. Vo wayutsho utsha lu fumbi, utsha lu lohombo.

Ezekiyele 14:21

Khumadiondjo Latuyalaka kata ati: Naka osoku, ukundi ayuyala Jerusalema lamʼayumutumela asui ami anei ane: yombo, ndjala ka kasha, nyama ya ngala la elandu dia nshila antu la nyama ushiki?

Ezekiyele 33:27

Uwateli wati: Khumadiondjo Latuyalaka kata ati: Uku wemi la lumu! Waku wudjashi lu ahuli wakalanyema, wayudiakema la yombo; waku weli lʼusui, wayuyala mbu ya nde ya nyama; ndu wane weli lu ahuli a wulu la lu weuku, wayuvo la elandu.

Ezekiyele 5:12

Etenyi ka satu kanyu kayuvo la elandu, la ndjala ka kasha kayashila ushiki lʼatei anyu. Etenyi ka satu kanyu kayudiakema la yombo lʼutshimba anyu. Dimi layuhandjula etenyi ka satu kanyu lu beke tshe dia la kete. Ku dimi layosomola yombo dia ndjelana la wo.

Ezekiyele 5:2

Kutshumbi etenyi ka satu ka divu lʼatei wʼusumba lamʼayuyushidiya nshi yʼedingelu; kose etenyi ka satu kadio kudihimbuhi-mbuya la yombo lʼutshimba wʼusumba; kudianganya etenyi ka satu lu lopepe, ku dimi layosomola yombo dia ndjelana la dio.

Danyele 9:12

We ambushidiya aui wakayati lu dikambu diasu, ndu lu dikambu diʼembuledi asu wakatolombolaka lamʼambuyututumela elanyelu kene ka wuki, ne dia dikambu ne diakayala la Jerusalema, diatayala nduku lʼesi ulungu wʼutundu.

Amose 5:19

Nyu nyayuyala uku untu latalawo tambwe, Ku ndi ambutuhumana la koi; Kana untu lamboto lu luudu landi, Lambutahe lunya landi lʼeheli, Ku ului ambulumata.

Zekariya 11:9

Ku dimi lakati nti: Dimi haluyala ulami anyu: one wahumba mvo, wavu; one wahumba ndjakema, wadiakemi; ndu ene wambutshikala, okoko lʼokoko ali umunyi wa unyandi.

Enyelo 13:10

Naka untu eko la dia mundama lu fumbi, Dieli la ndi dia ntsho lu fumbi. Naka untu ambudiaka untu la yombo, Dieli la ndi dia ndjakema la yombo. Dikambu so mbeli leta lʼetetemalu la mbetawo ka ekilami.