2 Petero 2:1 - La Bible en Otetela (Bible K'Ekila) 1991

¹ Keli amvutshi wa kashi wakatumbi lʼatei wʼantu, uku embetsha wa kashi wukuyala lʼatei anyu, wayuya la akambu wa tamu wʼelanyelu lu usheshe. Vo wayanguna ndu Khumadiondjo lakatshungula, wayulanyema esadi.

2 Petero 2:1 Iomraidhean Croise

1 Khumi ya Dikanga 22:6

Khumʼekanga ka Isariyele akasanganya amvutshi lasuki la kama nyei kame, akawambula ati: Ololo dimi ntsho la ntohotola Ramota-Ngiliyade, kana tshiki dikambu? Vo wakûkaluya diui vati: Tshoka, ne dia khumeye ayakimo lʼanya aye, we khumʼekanga.

Etumbelu 15:16

Sasi la woma wambuwanda; Ne dia wuki wa lunya laye, vo wambuyala nyumi uku dive, Edja ndu wudja aye wambeta, We, Latuyalaka, edja ndu wudja aye wakayakundji wambeta.

Isaya 9:15

Ehangamendi la kanga lukumu weli ote, Ku umvutshi latetshaka kashi eli wela.

Jeremiya 29:21

Latuyalaka Kanga lulimbilimbi, Unyashungu wa Isariyele, kata lu dikambu dia Ahaba, onʼa Kolaya, ndu lu dikambu dia Zedekiya, onʼa Maseya, watunyutelaka akambu wahatayi wa kashi lu lukumbu lami vati: Nyuki, dimi layakimo lu anya wa Nebukadineza, khumʼekanga ka Babilona, ku ndi ayadiaka lu ashu anyu.

Jeremiya 37:19

Kakiane, lendʼeli amvutshi anyu wakanyutelaka akambu wahatayi vati: Khumʼekanga ka Babilona huya dia ndjolo la nyu, kuyanga la kete nye?

Jeremiya 6:13

Ndu wa tshitshe ndu a waki, Vo tshe weli akanga a lukaki. Ndu umvutshi ndu olombedi, Vo tshe watutshaka lukesu.

Delu dia Jeremiya 2:14

Amvutshi aye wakakenyi waenelo wa kashi ndu wʼanyanya, Vo hawushula kolo kaye dia nkukaluya uma lu fumbi, Vo wakakendjiyaka awulu wa kashi dia nkunganyiya.

Hosea 9:8

Umvutshi eli ulami wa Efarayima kame la Unyashungu ami, Keli tulunga ta umambi teko lu mbuka yandi tshe, La luhetshu lu luudu la Unyashungu andi.

Mika 2:11

Utunduyala untu omotshi ayeteta, Ayutataka aui wa lukesu lu aihuli la dihuli, Ati: Oimi layunyusambisha dia wanu la dinono dia wulu, Tshiki ndi kutuyala usumbisha wa wudja one!

Mika 3:11

Nyu ete wa Jerusalema nyatulumbuyaka Dia nkundja mbu yʼutshu. Nyu elombedi weli loko, Nyu nyatetshaka ne dia nkundja difutu. Nyatulimbitshiyaka akambu wa Unyashungu dia nkundja falanga. Keli nyu nyatekamaka le Latuyalaka, Nyata nyati: Undi, Latuyalaka kema lʼatei asu? Nduku elanyelu kayuya le su.

Mika 3:5

Latuyalaka kata okone lu dikambu dianyu, Nyu amvutshi watunganyiaka wudja ami, Lamʼatunyolekaka ma, nyu nyatuhangohangoka nyati: Ki! Keli le waku wahatudjaka nduku engo lʼenyo awo, Nyu nyatuyalongosolaka dia ndo la wo ta.

Malaki 3:5

Dimi layusukana lasuki la nyu lu elumbwelu. Dimi layusamanya dia ndjala omenyi lu dikambu dia akanga wʼaloka, dia akanga wa munanyi, dia atshibi wa lu kashi, dia wane watukimelaka afutu wʼasi ulimu, watusuyaka wadi waki edu la ana wa ditshiki, dia wane watukadimulaka sambu kʼololo uma le ongendangenda, ndu wahatumbukaka woma, mbata Latuyalaka Kanga lulimbilimbi.

Mateu 10:33

Keli untu tshe layumanguna la ntundu kʼantu, ndu dimi layuwanguna la ntundu ka Papa leli lʼulungu.

Mateu 24:11

Amvutshi efula wa kashi wayunela, wayunganyia antu efula.

Mateu 24:24

Ne dia wane wayudimbiya antu vati: Kristu mbesu, la amvutshi mbesu, wayutumba. Vo wayenya tulimbitelu la akambu wa mamba dia munganyia ndu esonami, naka vo wayeya ntsha.

Mateu 24:5

Ne dia antu efula wayuya lu lukumbu lami, wayuta untu lʼuntu ati: Dimi keli Kristu. Vo wayunganyia antu efula.

Mateu 7:15

Nyewo amvutshi wa kashi watuyakaka le nyu, wolotshi dikuhu dia ekoko, keli lʼetema awo weli ndjaundu ya ngala.

Mako 13:22

WaKristu wa kashi la amvutshi wa kashi wayunela, wayenya tulimbitelu la akambu wa mamba, dia munganyia ndu esonami, naka vo wayeya ntsha.

Luka 12:9

Keli untu layumanguna la ntundu kʼantu wayuwanguna lu ashu wa andjelo wa Unyashungu.

Luka 21:8

Ndi akati ati: Nyewo, nyatukunganyiama; ne dia efula wayuya lu lukumbu lami, wayuta untu lʼuntu ati: Dimi keli ndi; ndu ati: Etena kaya suki. Tanyayelaki.

Luka 6:26

Fono kayayi le nyu, lamʼayunyandula antu tshe; ne dia watshewo wakandula amvutshi wa kashi wuhu ako.

Romo 16:18

Antu wa wuhu oso, hawutukambelaka Khumesu Kristu ulimu, keli vo watukambelaka saki yawo hita. Vo watukesaka etema a waku waha la tumba la aui wa mpe, la wa diandu.

1 Koreto 11:19

Ne dia dieli ndu la ditshikitanelu ndjala lʼatei anyu, dia antu wʼololo wenami lʼatei anyu.

1 Koreto 6:20

ne dia nyu nyakasumbama la ushinga a wulu. Okone nyutumbuli Unyashungu lu alimba anyu.

1 Koreto 7:23

Nyu nyakasumbama lʼushinga a wulu, tanyuyalaki fumbi yʼantu.

Ngalatiya 2:4

Dikambu so diakayangi ndja, ne dia anyasu wa kashi wakayaotshiya lʼatei asu lu ushesne, dia monga ndiadjasela kasu le Kristu Jesu, ne dia ntudja lu fumbi —

Ngalatiya 3:13

Kristu lakatutshungula uma lu mananu kʼelembe, akayala mananu lu dihuli diasu. Ne dia ambufundama ati; Untu tshe lahanema lʼutamba a mpeketanya, andjami mananu!

Ngalatiya 4:17

Vo wambunyuyanga lʼukalanganu, keli aha dia nyutshela ololo. Mete, vo nangaka nyushimba, dia nyu mbayanga lʼukalanganu.

Ngalatiya 5:20

otemwelo wa dikishi, doka, lutunu, utshanu, kandjema, kele, diatanelu, lundju, tamu,

Efeso 1:7

etshungwelu keso keko le ndi uma lu dikila, lu edimanyelu ka kolo yasu, uku weli ongonyi wa ngandji kandi ka mamba,

Efeso 4:14

Diaha shu ntshikala uku akenda, diaha nsutshasutshama la pepe tshe ya dietshelu, uma lu yewu yʼantu, lu lukesu la munganyiya antu.

Euhwelu kʼElembe 32:6

Undi nyu nyambukitshiya Latuyalaka unungu wa dikambu ne, Nyu akanga a dinginya ndu waha la yimba? Aha ndi keli shenyu la utungi anyu, Lakanyutungi ndu lakanyushikike uka?

Filipi 3:19

Ekumelu kawo eko elanyelu, etemolatemola kawo eli dikundju. Vo watuyatumbulaka lu akambu wa sonyi yawo, watukanaka akambu wa la kete.

Kolosai 2:18

Tanyetawoki untu nyohotola ushasha anyu, ne dia ndi ambuyakitshakitsha anyanya, la atotemolaka andjelo, atukanaka yimba dia waenelo andi, atutakulaka ne dia tukanyi tandi ta akambu wa dimba.

Kolosai 2:8

Nyewo, untu tanyunganyiaki la yimba yʼantu ndu la akambu wa kashi, uku ditshelu diʼantu, watuyelaka akambu wa la kete, wahayeli Kristu.

1 Timote 5:8

Keli naka untu humbi wane wuto la ndi, djekaleka wa lu khumbu kandi, ndi ambutuna mbetawo kandi, ambuleka untu lahetawo kolo.

2 Timote 4:3

Etena kayukuka lamʼahulanga antu ntetemala lu dietshelu diʼololo, keli ne dia atui awo weko hwe, ku vo wayuyamotshiya embetsha uku saki yawo.

Tito 1:11

Dieli la wo dia ndjiha enyo awo. Vo watulanyaka khumbu la khumbu, watetshaka antu akambu weli kema ololo dia mbaetsha, ne dia pusa kʼukundji.

Tito 3:10

Utuni umbatudi lamʼayuyuhunwela etena otoi kana tena pendi.

Heberu 10:29

Ukundi akananyu diʼasui wa one lambukamela Onʼa Unyashungu la tshina diʼekulu andi, la ambete dikila dia sheki yako yakandakidiama ati: Anyanya, la ambonyola Nyuma ka ngandji ka mamba, ayuleka tena ngana lu anyelu kandi?

1 Petero 1:8

One lakinyu komena, nyu nyambuwuka ngandji. Nyu hanyuwenyi, keli nyambuwetawo, nyambutamanya ngenangena lu ongenongeno a lutumbu waheyama mvuta.

2 Petero 2:3

Ne dia okomiya mbayuwengonya la nyu ushinga la aui wa nyimbiya. Dianyelu diawo diakawanyema edjedja, hatshimbatshimba; elanyelu kawo hetama djo.

1 Joani 2:26

Akambu ane mbakamanyufundela dia antu walanga nyunganyia.

1 Joani 4:1

Elangimi ami, tanyetawoki nyuma tshe, keli nyuhimbi nyuma, kana yo yeko ya Unyashungu; ne dia amvutshi

Jude 1:18

Ne dia vo wakanyutela vati: Lu nshi yʼekumelu, asoki wayuyala, wayokendakenda lu saki yawo ya kolo.

Jude 1:4

Ne dia eko antu amotshi wamboto le nyu lu usheshe, antu ako waki la akambu awo, wakatatela nfundama edjedja dia manyema la dianyelu ne. Vo weko akanga a dionyo; wambuhilula ngandji ka mamba ka Unyashungu asu uku akambu wa kolo, wambanguna Uwandji asu wame, Khumadiondjo Jesu Kristu.

Enyelo 13:14

To katukesaka wa la kete ne dia tulimbitelu takawawusha dia ntsha lu ashu wa nyama kako, atela wa la kete ati: Nyutshi efanelu ka nyama kako, kaki la puta ka yombo, keli kakatshikala la lumu.

Enyelo 2:13

Dimi mbeyaka dihuli diudjashiye, lene eli kiti ka diulelu ka Satana. We ambumamema lukumbu lami wulu, kumanguna mbetawo kami ndu lu nshi yaki Atipa omenyi ami, kanga kolamelu, lakadiakema lʼatei anyu, lene udjashi Satana.

Enyelo 2:9

Dimi mbeyaka asui aye, ndu wula aye (keli we eko kanga ongonyi), ndu tengo ya wane wata vati: Asi Juda mbesu, keli vo kema asi Juda, weli uku etemwelo ka Satana.

Enyelo 3:8

Dimi mbeyaka etsha aye. Ulungi, dimi lambuketela lukuki hwe, nduku untu leya ludiha. We la yema ya wulu, akakitanyiaka diui diami, kumanguna lukumbu lami.

Enyelo 5:9

Ku vo wakimbi usambu wʼuyuyu, wata vati: We kukuki dia nungula wombo a buku one, Ndu dia ndjihula tulimbitelu tawo, Ne dia we akadiakema, Akasumbela Unyashungu antu la dikila diaye: Wʼuma lu wauhu tshe ndu wʼeteketa tshe, Ndu wʼuma lu wehu tshe, la waulelu tshe.

Enyelo 6:10

Vo wakawana la diui dia wulu, wata vati: Yee! Khumadiondjo ka ladiku kʼekila la ka mete, edja ndu etena kakona kayuyulumbuya ndu kayuyosomboya dikila diasu le wa la kete nye?