Taitas 2:13 - Telefol

¹³ Kale kafin diim kaa nup koyo, boyo kanu-bom fen-bulupta bii, Yesus Krais imi tolon-tema uyo kamok tambal ke tiin bulusii kup sigin-bulu talata, atam-nulupta, deng tebeman-temup ko. Kale beyo ki numi Bisel God e minte numi ilim bo-emin tinum no kale,

Taitas 2:13 Iomraidhean Croise

Matyu 16:27

Son-temu uyo, Mo Tibil imi Man niyo nalami Aatum imi titil uyo ku kamok kesa ilatap keli ensel tambal iso tolon-temup uyo, tal-nilita, alugum unang tinum maagup maagup imi intap intap kuguup kanum unsip uyo yan kebelan-temi ko.

Matyu 25:31

Kale Yesus iyo bogobe-nala e, “Biilan-temu kota, Mo Tibil imi Man niyo tebe God imi ensel iyo alugum kulep tal tolita, bilip iyo nimi tok uyo baga-bilipta, nagal kamok king ke-nilita, nimi titil afalik uyo ku-nilita, alugum unang tinum iyo tiin molan-temi kale,

Matyu 26:64

kota Yesus isiik yan kebe-nala e, “Dam bogolap kale, alugum ibo tolong do-silipta, nimi weng uyo bogolan. Son-temu kutop uyo ibo nitamipta, Mo Tibil imi Man niyo abiil tigiin kal bom titil kup tebesa tinum God imi sagaal ipkuk diim ko age kamok imi baan diim kal tonbi kalaa agelip suukta minte, aaltam uyo utamipta, abiil tigiin umi iip namaal umi tip diim kugol ton-nalata, tala kalaa age no ke nitaman-temip o,” age Yesus iyo kamok kamok imi baga-ema ko.

Mak imi tebe Yesus imi sang dola kosa uta ko 14:62

kota Yesus isiik bogobe-nala e, “Kam agan-balap iyo nita kale, son-temu uyo, ibo nitamipta, Mo Tibil imi Man niyo abiil tigiin kal bom God titil tebesa imi sagaal ipkuk ilo keng kal tonbi kalaa agelip suukta minte, aaltam kota utamipta e, abiil tigiin umi iip namaal umi diim ku-tele tala kalaa age no ke nitaman-temip o,” age Yesus iyo kamok kamok imi baga-ema ko.

Mak imi tebe Yesus imi sang dola kosa uta ko 8:38

Unang tinum kwiin tagang iyo kuguup mafak uta waafuna-bom-nilipta, God iyo umik ugobe dupkaa yang iinan-nuubip kale, dogap ita kulip imi diim uyo nimi win uyo kufunemin binim e minte, kulip imi atul finano nimi weng uyo baga-emin binim ke no kema umdii, son-temu nala Mo Tibil imi Man niyo nalami Aatum imi titil uyo ku kamok kesa ilatap keli ensel tambal iso ninggil tolon-temup uyo, nisiik tinum bemi win uyo kufobelan-temaali kale, ‘Beyo nimi duup ba o,’ agelan-temi kale,

Aposel 24:15

Falosi kalip imi utamsip ulutap mungkup nagal utamipta e, God tebe fengmin binim tinum so fengmin tinum so alugum ifola fen tigi molan-temip uyo aafentap kalaa agan-bom no ke-bii kale,

Fol tebe Rom kutam imi suuk kon dola kobesa uta ko 15:13

Kale God yagal ibo kuntuk saane-balata, fen-bulupta, atin imdulan-tema kalaa age-nilipta, fen-nuubip kale, niyo beten ke-bilita, yagal dong daga-e-balata, ilami ilak dugamin bomi diim ilep ibo deng tebemin afegen so bilili agan-kalin aget afaligen sino uyo ku-nilipta, ibo tebe God imi Sinik Tambal imi titil uyo kulipta, ipmi God imi am tambal maak daanan-temu umi fen-bilip uyo titil fagaa tam tam abe-buluta o ageta ko.

Fol tebe Rom kutam imi suuk kon dola kobesa uta ko 5:5

utamupta, nuyo ulaa imtamo ilami abiip unon-tema kalaa agelup umdii, yagal tebe tuluun ulaa imdep no daalata, deng tebeman-temup kale, boyo dok uta ba kale, God iyo ilami Sinik Tambal iyo dobelata, Sinik yagal kafale-balata, numi aget fugunin uyo utamupta e, boyo God iyo numi aget kup kobeba kalaa agan-bulup ko.

Fol tebe Rom kutam imi suuk kon dola kobesa uta ko 8:18

Kale nimi aget fugun-bii uyo, kamano komi kaal fuyap kugan-bulup uyo saak katip kale, son-temu nala abiil tigiin umi tambaliim kup tonan-temup kota, kuguup tambal God tebe numi kobelan-tema boyo kwiin kiim kale, tambaliim kup nan-temup kalaa agan-bii ko.

1 Korin 1:7

Kale God yagal tebe alugum yak aget fugunin tambal tambal uyo ibo kobelata kale, boyo ibo maagup umaak duumatanin-tem ke-bom-nilipta, nulumi Kamogim Yesus Krais imi tala ataman-temup uta fen-bilip kalaa age-nilita, God iyo, “Misam o,” agan-bomi ko.

2 Korin 4:4

Kale kanupmin unang tinum bilip iyo, kafin diim komi sinik mafak imi kamogim Saatan iyo tebe-nala e, unang tinum imi aget fugunin tambal uyo namdabe imdep mililep tem daalata, atin ilumanosip kale, dogonubeta utamipta e, God imi weng boyo atin fen kalaa age utam-nimip binim kale, kanube God imi weng tambal uyo imi tolong uyo dugan-bilip e minte, Yesus imi dong uyo tal imi diim aban-bo no kuta, iyo boyo utam-nimip binim ke-nilipta, imi aget tem uyo kefobe-numu binim kelu kale, Krais maagup beta kup Aalap God ilatap kale, ilata kup God imi ilak dolin unang tinum nuyo God imi kuguup tambal uyo kafalebe-nala e, “God iyo kanupmin o,” agelata, nugol utaman-bulup ko.

2 Korin 4:6

Kale God imi dong ko age ilagenamin boyo ki, sugamiyok uyo God iyo kamaki kafin kaa kutufosu kota telela kola kuta minte, uyo mililep tem kal nu kalaa age-nala e, bogo-nala e, “Kafin diim kubo ilagenal o,” agela e, maak fagalin tap kafin diim uyo ilagen kupka-suu kale, ulutap kale, God imi dong uyo numi aget tem uyo kefobelata, bam daa utam Krais imi kuguup uyo utamupta e, Aalap God yagal mungkup kanupmin kalaa agan-bulup ko.

Kolosi 1:27

Kale God imi aget fugunin uyo, “Nimi unang tinum iyo kafalebeli utamipta e, weng yang waansu boyo atin tambaliim kalaa age-nilip e, unang tinum miit maak maak iyo alugum dong dogopmomu kalaa agelin o,” agesata kale, weng yang waansu boyo bogo-nulu e, “Krais iyo ipmi tilin tem kal alba o,” agesu kale, ipkil fen-bilipta, imtamo tam abiil tigiin daalata, iso nan-temip kuba.

Kolosi 3:4

Kale ipmi kamaa unang tinum ke-silip bomi magam uyo Krais ita kale, son-temu nala imi mitam kemanan-tema kota, ipkil mungkup God imi titil diim ilep iso ipso kemanan-temip ko.

2 Tesalonaika 2:16

Ninggil nuyo utamupta e, numi Kamogim Yesus Krais beyo alugum numi aget kobe-nala e minte, kuguup tambal uyo kobe no ke-se kalaa age-nulup e, boyo utamupta, yagal titil kobe dong dogobelata, titil fagaa mo-nulupta, mufekmufek tambal telela kobesa uyo fenin kup kem-sulupta, kobelan-tema kalaa age-nulupta, ninggil nuyo Kamogim Yesus Krais sino Aatum God sino ulim iyo dagaga-bulupta bole,

2 Tesalonaika 2:8

Kale God imi tebe tinum ilep ugaa kwaagan-be bemi dupkan kelan-tema kota, maak fagaa God imi weng kwaasulemin miit kayaak iyo meng kem diim e talata, unang tinum iyo alugum ataman-temip kuta minte, Kamogim Yesus imi tolon-tema uyo, ilami weng afek titil tebesu so ilami dong ko age atanim kefobu ulutap so uta tebe tinum be angkolu binimanan-tema ko.

1 Timoti 1:1

Timoti kabo nuubap aga? Niyo Yesus Krais imi kalaan tinum Fol nita kale, numi ilim bomin God so minte numi fen-bulup tolon-tema Yesus Krais so ulim igil ulaa nimdu-nilipta, ogok koyo kopne-silip ko. Kabaa. God imi weng bogopkeli fomtuup tinangku-nalap yak Krais imi ilak do-salap bota, nalami man ilatap ke-salap kale, suuk kon koyo dola kopkelan o age-nilita, dolke-bii ko. Niyo Aatum God so numi Kamogim Yesus Krais so dagaga-bilita, ulim iyo tebe kabo ka-filin-bom telelke-bilipta, kapmi aget tem uyo bilili age-bom-nalapta o agan-bii ko.

2 Timoti 1:2

Timoti kabaa. Kabo nalami man diil ilatap kesap kalaa age-nilita, suuk kon koyo dola kop-kaman o ageta ko. Kale niyo Aatum God so numi Kamogim Yesus Krais so dagaga-bilita, ulim iyo tebe ka-filin daa telelke-bilipta, kapmi aget tem uyo bilili age-bom-nalapta o ageta ko.

2 Timoti 4:1

Yesus Krais iyo unang tinum tiin kafan albip sino kaansip sino iyo im-kugu-bom yegeman-tema kale, Yesus Krais iyo tal-nalata, alugum unang tinum imi tiin diim uyo mitam kamok miton ke suun kup nan-tema kale, God imi tiin diim sino Yesus Krais imi tiin diim so uyo niyo alaang weng maak bogopkelan-temi kale, tinangku-salapta.

2 Timoti 4:8

tinum yuut no ita ita kela tisol kupka-ebip ulutap kale, kamano koyo God iyo tisol uyo kan ke-nala nimi fen-be kale, tisol boyo tol kup tebesu kuguup waafuu kwep tibin tinum imi kupka-emin tisol uta kale, Kamogim Yesus imi afungen am daanu unang tinum iyo tol kup im-kuguman-tema kota, niyo iliba namo-nalata, tisol boyo kopnelan-tema kale, nita kup tisol uyo kulan-temaali kale, alugum unang tinum God imi aget kobe-nilip, mitam kemana atamum o agan tebesip isino tisol bo kulan-temup ko.

Taitas 1:2

Kale God iyo sugayok uyo bogo-nala e, “Nimi tinum dil mosi iyo suun nin tinum kelan-temip o,” agesa kale, God iyo bisop bagamin keluta ba kale,

Taitas 1:4

Tatias kabo fen nalami man ilatap kale, kapso niso God imi ilak uyo dosup kale, niyo Aatum God sino numi ilim bo-emin tinum Yesus Krais sino ulim iyo dagaga-bilita, iyo tebe kabo telelke-bilipta, kapmi aget tem uyo bilili agepkeluk o ageta ko.

Taitas 3:4

Kuta numi ilim bo-emin tinum God iyo alugum unang tinum imi aget uyo kupka-e-bom-nala e minte, kuguup tambal uyo kupka-e-bom no kem-nuuba kale, bomi kafalebela utam dagaa ku-silip kota,

Hibru 9:28

Ulutap kale, Krais iyo ilep maagup uta kup fagaa imi dam uyo God imi kobe-nalata, unang tinum kwiin tagang imi fengmin uyo mobe-se kale, aaltam asok tolon-tema uyo, talta fengmin takan ke-eman o age-nalata, tolon-temaala kale, boyo unang tinum, tolon-tema o age-nilip imi fen-nuubip ita imtamo ilami abiip unon o ageta tolon-tema ko.

1 Fita 1:3

God beyo numi Kamogim Yesus Krais imi God e minte imi Aalap no kale, bemi tok uyo baga-bom-nulup imi win uyo waafuu kwep tebe-bulupta o ageta kale, bomi magam uyo dok uta ba kale, Yesus Krais imi kaana God tebe dufola fen-se bomi diim ilep God iyo nuyo i-filinin afegen uyo kobe-nalata, kan ke imola mitam kamaa unang tinum ke-sulup kale, nuyo utamupta e, suun nin unang tinum ke-sulup kalaa age-nulupta, Kamogim imi ilep uyo tele bigim tebesup ko.

1 Fita 1:7

Kale God imi tebe ipmi ilami ilak dugamin bomi im-kugumin boyo fen kalaa, bisop bagan-bilip kalaa agelan o agan-bom-nalata kale, ipmi God imi ilak dugamin boyo tuum gol ulutap kale, tinum iyo tuum gol kululip uyo, kup-kugu utamupta, gol kululup koyo atin tambal kalaa, ifip umaak albu kalaa agelum o age-nilipta, kwe fuulip ifip uyo ken tebe-nuluta, gol uta kup afeta kupkalu atin tambal kem-nuubu kuta, gol boyo kafin diim mufekmufek kale, boyo binim kelan-temu kuta, God iyo ipmi ilami ilak dugamin bomi aget uta atin ugaa kwaasa kale minte, kafin diim tinum imi tebe gol umi aget ugaa kwaagamin bota kubagansu no kale, kanu-bom-nalata, yak mufekmufek mafak boyo kupkala tebe ibo im-kugum-nuubu kale, son-temu nala Yesus Krais imi asok tala alugum tinum unang imi ataman-temip kota, kanube ipmi God imi ilak dugamin uyo utamata, mitam tol kelu kalaa agela umdii, kota win tambal so deng afegen so uyo kobe-nala e, win uyo kufu-eman-tema ko.

2 Fita 1:1

Nugumal nuubip aga? Niyo Saimon Fita Yesus Krais imi ogok kemin tinum e minte kalaan tinum no nita suuk kon koyo ipmi dola kobelan o ageta kale, Yesus Krais beyo numi God e minte, beta numi ilim bo no ke-se kale, bemi aget fugunin uyo, maak beta win tibin e minte, maak beta win tibin binim no agan-bom-nalata, kanubesaala binim kale, alugum nuyo atin ki maagup dong dogobelata, ibo Krais ilami kalaan tinum numi tambaliim kup God imi ilak do-sulup ulutap ke-silip kale, suuk kon koyo alugum ipmi finang kwaabeli no tuluk o ageta ko.

2 Fita 3:18

Kale Yesus Krais numi Kamogim iyo tebe numi ilim uyo bo-se kale, ibo dital fagaa Yesus iyo maak so fomtuup tele ataman-temip uta, yagal tebe ipmi ilami ilak dugamin uyo telela kobela mitam titil fagaa som, minte ipmi tiinemin uyo mitam tambalan no keluk o ageta kale, nimi aget fugunin uyo, unang tinum iyo Yesus imi win uyo kufu-e-bilipta, kamano koyo mitam win soyaap ke-nalata, suun kup tebe-balata o ageta kale, bota kwa.

1 Jon 4:14

Kale Aalap iyo, nimi Man iyo daali daak kafin diim kasel iyo ulaa imdep meng nimi miit tem tola waalanin o age-nalata, daala ti-se kale, bemi daala ti-se boyo ninggil nuyo utam-nulupta, bomi sang uta ibo baga-em tebesup ko.

Jut imi suuk kon dola kosa uta ko 1:21

Kale God iyo ipmi aget uyo ugaa kwaasa kale, suun kup ilami mep so kugol bom-bilipta, dong daga-e-balata o ageta ko. Kale numi Kamogim Yesus Krais yagal ibo i-filin daa-nalata, imtamo no ilami abiip daalata, iso suun kup nan-temip kale, ibo boyo fenin kup ke-bilipta o ageta ko.

Revelesen 1:7

Ibaa. Beyo, iip tem kutam-tele tolon o angba kale, tolon-tema kota, alugum unang tinum so alugum bemi angkolip kaan-se so iyo atam-nilipta, alugum kafin kaa kutufosu komi tinum miit maak maak iyo bemi atul uyo finan-bom-nilipta, fomtuup ameman-temip kale, tuluun mitam tolon-temu ko.