Fol tebe Rom kutam imi suuk kon dola kobesa uta ko 14:13 - Telefol

¹³ Alugum numi im-kugu-bom-nala yegeman-tema tinum iyo God ita kale, nuyo numi duubal imi kuguup kanu-bilip boyo aget mafak uyo kupka-emin ba kale, nuyo aget fuguno-nulup e, “Nuyo intaben intaben nu-bulup uyo, kafale-bulup duubal iyo utam-nilip yang fengamin ba o,” agan-bom-nulupta o ageta ko.

Fol tebe Rom kutam imi suuk kon dola kobesa uta ko 14:13 Iomraidhean Croise

Matyu 16:23

Yesus iyo fupkela katam fen Fita iyo tele atama-bom an-togon-bom-nala e, “Kabo God imi aget fugun-be ulutap uta fugunbaalap binim kale minte, kafin diim komi tinum imi aget fugun-bilip ulutap uta fugun-balap kale, kabo tuum ilep kal bom-bulu tinum yang bomi diim yaan kwek mo bimbeng daa kumen daak aban-nuubip umi tuum ulutap ke-bom kabo nimi ilep uyo ugaa kwaapnelan o age-nalapta, kam agelap kale, kabo nimi waasi Saatan imi kuguup ulutap uta kupkane-balap kale, kupkalal o,” age-nala e minte,

Matyu 18:7

Kale kafin diim unang tinum kwiin tagang iyo kafin diim komi mufekmufek umi aget uta kup fugun-bom-nilipta, yang kuguup mafak uyo kem-nuubip kale, God iyo bomi kalan uyo yege-bom-nalata, imi kuguup mafak boyo yan ke-eman-tema kalaa age-nilita, fomtuup i-filin-bii kuba. Kuguup mafak uyo suun kup fen mitam tebe unang tinum imi aget fugunin uyo kufak daapmuta, iyo yang kube fengam-nuubip kuta, tinum dogap ita kuguup mafak kanu-bom-nala ipkumal imi kafalebela min, uget togo bogobela igil mungkup yang kuguup mafak uyo kanumip umdii, God yagal tebe tinum beyo yege-bom bemi ipkumal biinga kulep yang iinemin boyo fomtuup yan ke-eman-tema kale, ibo boyo tele utama-bom-nilipta o ageta ko.

Matyu 7:1

Kale Yesus iyo asok bogo-nala e, “Kabo, God imi abiin uyo ku-nilita, imi ogok ke-be boyo nisiik kuta ogok keman o agan-kalin ba ko. Kabo kapkumal iyo imkege-bom bogobe-nalap, ‘Ibo kuguup mafak ke-bilip o,’ agan-kalin ba kale, kupkalap umdii, God yagal kamkege-bom bogopke-nala, ‘Kabo kuguup mafak ke-balap o,’ agon-temaala ko.

Luk imi tebe Yesus imi sang dola kosa uta ko 12:57

Yesus iyo weng migik maak uyo bogobela, “Ibo, intaben nulum o age-nilipta, ipkil aget fuguno-nilipta, bota kanuman-temup boyo felepman-temu kalaa agan-nuubaalip a?

Luk imi tebe Yesus imi sang dola kosa uta ko 17:2

Kale kek kek iyo utamipta, tinum beyo, ise kanubelan o angba kalaa agelan-temip uyo, kanube bilip iyo tebe tuum afalik umaak ku sok de ko-nilip kwep yak tinum bemi fuk kun diim kwegal de kobe daalip daak yol ok kumun tem iina umdii, tinum beyo kaal fuyap uyo katip so ku-nalata, kaanan-tema kale minte, kanube kek kek iyo tinum beyo kanubelin-tem ke dupkalip tebe unang tinum God imi ilak dugamin katip katip ke-bilip iyo ifak daala kupkaa yang kuguup mafak uyo kemip umdii, God isiik tebe atin ki bemi ifak daala bomi yan uyo kobelata, tinum beyo kaal fuyap kwiin kiim uyo kugan kwep taban-bon-tema ko.

Fol tebe Rom kutam imi suuk kon dola kobesa uta ko 11:9

Devit yagal mungkup ilami waasi imi sang uyo God iyo aman duga-e-bom bogobe-nala e, “Bilip iyo iman tigimin min umi deng uyo deng taban-nuubip kuta, kabo bilip imi deng tebemin boyo fupkela kobelap kutok min, abil min, saaman kafin min umi tem diinin kelip e, bilip imi fengmin bomi kun uyo kabo yan kebe-nalap e minte,

Fol tebe Rom kutam imi suuk kon dola kobesa uta ko 14:10

Kale kabo intaben o age-nalapta, kapmi kapkum Kristen beyo weng mafak uyo bogobe-nalap, “Boyo fenga-balap o,” agan-balap a? Minte kapkal intaben o age-nalapta, kapmi kapkum Kristen beyo atafi-balap a? Kabo utamal. Alugum nuyo son-temu nala no God imi tibit diim molan-temup kota, yagal bogo-nala, “Boyo kuguup tambal o, mafak o,” agelan-tema kale, kanupmin weng boyo ipkum iyo bogobina tala kemin ba ko.

Fol tebe Rom kutam imi suuk kon dola kobesa uta ko 14:3

tinum mufekmufek alugum saak unan-kalin beyo tebe ipkum dimduum dimduum falamin beyo aget mafak uyo kupka-emin ba e minte, ipkum dimduum dimduum falamin begal tebe imi aget uyo fuguno-nala e, “Nugum bemi saak saak unan-be boyo fengmin o,” agan-kalin ba no ko. Kale kapkum saak unin beyo kapmi ogok kekemin tinum ba kale, God imi ogok ke-emin tinum kale, yagal du-se kale,

Fol tebe Rom kutam imi suuk kon dola kobesa uta ko 14:4

kabo tinum alugum saak unan-nuuba iyo duptu-balap kuta, kabo dogonupmin tinum kapta tebe-nalapta, tinum migik imi ogok ke-emin tinum iyo weng mafak uyo kupka-em-nuubap a? Kapmi kapkum imi bogobe-nalap, “Kapmi ogok ke-balap boyo mafak ke-balap o, tambal ke-balap o,” age kapkum imi baga-emin boyo kapmi san ba kale, imi kamok ilami san kale, bemi kamok iyo Yesus ita kale, yagal tebe tii kuntuk mobela beyo Yesus imi ilak uyo fomtuup duga-balata, bomi tolop diim uta dulan-tema ko.

Fol tebe Rom kutam imi suuk kon dola kobesa uta ko 16:17

Kale duubal ibaa. Tinum iip maak maak iyo tebe ipmi God imi weng ko tinangkusip boyo kwaasul-bom-nilip e minte, wengaal uyo kufolip Kristen unang tinum iyo dinan-bilip e minte, tebe imdep yang ilep migik uyo daaga-bom no kem-nuubip kale, niyo weng uyo fomtuup bogobelita, ibo bilip iyo umik ugobe tele itama-bom-nilipta o ageta kale,

1 Korin 10:32

Kristen unang tinum ibo utamipta, ipmi intap intap kuguup kanumip uyo, ipkumal kek kek igil utam-nilip e, God imi miit tem uyo kupkaa yang unon-temip kalaa agelip uyo, kanupmin kuguup boyo ibo kanumin ba kale, Juda kasel so e minte tinum miit migik so God imi tinum unang so imi aget uyo fugun-bom-nilipta o ageta ko.

1 Korin 11:13

Kale Kristen ipkil kuguup komi sang bogobelan-temi kek uyo utama-bom-nilipta o ageta kale, uyo ki, unang uyo ilim kaal ku dubom katilin-tem bisop ipkumal imi tiin diim uyo God iyo aman duga-eman-temu bota tambal kalaa mafak kalaa agan-bom-nilipta o ageta ko.

2 Korin 5:14

nuyo utamupta e, Krais iyo nuyo i-filin daa-se kalaa age-nulupta, bota imi ogok uyo kem tebesup kale, numi utabup uyo, tinum maagup Yesus Krais beta tebe alugum numi abiin uyo ku-nalata, kaan-se kalaa age-nulupta, utamupta e, bemi kaan-se kwek uyo, alugum numi fengmin uyo mo-nulup kaanabup ulutap ke-nalata, kaan-se kalaa agan-bulup kale,

2 Korin 6:3

Kale unang tinum iyo ninggil numi kuguup kanu-bom God imi ogok ke-bulup bomi kalan uyo God iyo umik ugobe-nimip o age-nulupta, nuyo kuguup mafak uyo maak kem-nuubaalup kale,

Filipai 1:10

tele utam, dogap uta atin tambal kalaa age kupkaa bota kup waafu-nilipta, kuguup mafak binim, yuum binim, atin tambaliim kup kala kala binim diim kugol bom-silipta, Krais iyo talak o agan-bom beten ke-em tebesi ko.

1 Timoti 5:14

unang kaluun miining unang iip maak maak iyo Krais imi ilep uyo kupka-nilip e, Tinum Mafagim ko age Saatan imi ilep uta abo dulu-silip kale, nimi aget fugunin uyo, “Unang kaluun miining unang bilip iyo asok tinum migik dulu man faga-bom ilimi am kutam iyo tiin mo no keman-temip bota felepmuta, kanuman-temip kale, kanu-bom-nilipta o,” agan-bii kale, kanuman-temip uta, waasi iyo tebe bilip imi kuguup mafak umaak kanu-bilip kalaa age utam-nilipta, weng mafak umaak Kristen nuyo kupka-eman-temaalip binim ko.

Jems 2:4

Kale kanube ibo kanupmin kuguup uyo waafulip umdii, boyo ibo aget fuguno-nilip e, “Yang be tinum tambal, meng be tinum mafak o,” agan-bilip kale, ibo weng telelmin tinum mafak ke-bom-nilip e, aget mafak fugun-bom no ke-bilip ko.

Jems 4:11

Nimi nugumal ibaa. Ibo ipkumal iyo titul weng uyo bogobina tala kemin ba ko. Waantap ita ipkum iyo titul weng baga-ema min, atafima umdii, boyo God imi weng ko age ulo kwep daasa uta utafi-bom titul weng baga-em-nuuba no ko. Kabo kanube ulo umi utafimap umdii, boyo kabo weng tinangkamin umi kuguup uyo kupkaa uk kugan ko-nalap e, yak ulo uyo utafiman-temap ko.

1 Jon 2:10

Kale tinum iyo ipkumal Kristen imi aget uyo kobela umdii, beyo God imi yogon dong kefolin diim kal bom-balata, ipkum iyo maak bemi kuguup uyo utam-nalata, kupkaa yang iinon-temaala kuta minte,

Revelesen 2:14

Kuta iip maak maak bomi kalan uta yegeman o agan-bii kale, iip maak maak ibo siin profet ko age weng kem bagamin tinum mafak Balam imi kuguup mafak uyo waafusip kale, Balam beyo tebe-nala e, kamok Balak imi kafale-balata, ita tebe Israel kasel iyo uget taga-balata, bilip iyo fenga-bii-silip kale, tinum migik tebe tam men amem umi sipsip min, kao min ano-nilip kupka-e-bilip uyo un-bom-nilip e minte, sa daga-bom no ke-bii-silip ko.