Fol tebe Rom kutam imi suuk kon dola kobesa uta ko 12:2 - Telefol

² Kale kanube kafin diim komi God imi ilak dolin binim unang tinum iyo tebe uget tagamip umdii, ibo bilip imi kuguup mafak uyo waafunamin ba kale, ipmi aget fugunin uyo kwaalip yak God imi diim abeluta, God yagal tebe fupkela kobela aget fugunin migik uyo kulip e minte, ipmi kuguup uyo telela kobela mitam migik kebe no keluta, bota atin utamipta e, God iyo, ipmi tiinemin tonamin uyo kanumin o, ageba uyo kulbu kalaa agelin o ageta kale, ibo utamipta, dogonupmin kuguup uyo tambal kalaa, dogonupmin kuguup uta nuyo waafuu bulupta, God iyo deng tebeman-tema kalaa, dogonupmin kuguup uta fengmin binim, atin tambaliim kup keman-temup kalaa age utam-nilipta o ageta ko.

Fol tebe Rom kutam imi suuk kon dola kobesa uta ko 12:2 Iomraidhean Croise

Matyu 13:22

Minte unang tinum iip maak maak iyo tinum imi wiit san segela kulula daak ifuul mafak umi iibak tem abebu ulutap kale, bilip iyo God imi weng uyo tolong dolan-temip kuta, kafin diim komi mufekmufek duumatanan-temip umi aget afek fugunin min, mani kwaa-bom deng tebemin uta kale, kanupmin aget fugunin uta afaligen ke-nuluta, God imi weng umi aget uta kubaganu kupkalan-temu kale, wiit umi dam binim, ol kup kelu ulutap ke-nilipta, God imi weng uyo fomtuup dital fagaa waafulan-temaalip ko.

Mak imi tebe Yesus imi sang dola kosa uta ko 4:19

kafin diim komi mufekmufek duumatanan-temip umi aget afek fugunin min, mani kwaa-bom deng tebemin min, yak abe mufekmufek boyo nalami alugum kululan o age aget kup ugel kalagamin uta afaligen ke-nuluta, God imi weng umi aget uyo kubaganu kupkalan-temu kale, wiit umi dam binim, ol kup kelu ulutap ke-nilipta, God imi weng uyo fomtuup dital fagaa waafulan-temaalip ko.

Jon imi tebe Yesus imi sang dola kosa uta ko 14:30

Kale kafin diim komi kuguup tiin molin kamok ko age Saatan iyo, nimdaak tamalan o age mep tolon o angba kale, koyo niyo ipso weng yamyam uyo maak so bagaman-temaali ko. Kale Saatan beyo bagang-kale-nalata, weng umaak bogopnelata, kanube-nimi binim kuta,

Jon imi tebe Yesus imi sang dola kosa uta ko 15:19

Kale ibo kafin diim tinum kalitap maagup ke-nimip uyo, mangkal tambaliim nimip kuta, niyo ulaa imdulita, ibo kafin diim kasel imi kuguup kupkabe iit tip tinum kebip atamta, kafin diim kasel kalip iyo ibo itafinonan-temip ko.

Jon imi tebe Yesus imi sang dola kosa uta ko 17:14

“Niyo tinum kalip iyo kapmi weng uyo kafalebeli utam-nilip e, tinangku waafusip ko. Niyo kafin diim tinum ba kale, niyo tip tinum kale, bilip igil mungkup tip tinum kebip kalaa age-nilipta, kafin diim kasel bilip iyo olsak kupka-e-bilip ko.

Jon imi tebe Yesus imi sang dola kosa uta ko 7:7

kafin diim komi unang tinum iyo ipmi itafinonan-temaalip kale minte, niyo bilip imi kuguup mafak kem-nuubip umi sang uta baga-e-bilita, nitafinon-nuubip ko.

Fol tebe Rom kutam imi suuk kon dola kobesa uta ko 12:1

Kale nimi duubal ibaa. Niyo God imi i-filinin afek bomi aget uta fugun-bom-nilita, ibo titil weng maak bogobelita, ipmi aget fugunin so dam so boyo ibo God imi kobe tinum tolop ungkwaa aligaap God imi kupka-ebip ulutap ke kobelin o ageta kale, ipmi dam uyo kafan so bom-suluta, ibo God iyo kobelipta, ibo God imi aligaap kelip e minte, God imi kuguup uyo, God imi, “Bo kanumin o,” agan-be bota kup kanu-bom-nilipta o ageta kale, kanuman-temip bota fen ipmi God imi ulotu kemin umi kuguup umdii kulbu ko.

Fol tebe Rom kutam imi suuk kon dola kobesa uta ko 13:14

ibo Kamogim Yesus Krais bemi ilak dolip beyo tal ipmi diim abela uyo, ipmi waasi dinan-kalin umi ilim tiilin ulutap kelip kale, ibo yak ipmi aget fugunin umi tebe-nulu, yak kanupmin kanupmin kuguup mafak uyo kanumin o agan-bo uyo yang kanum tiinemin ba ko.

Fol tebe Rom kutam imi suuk kon dola kobesa uta ko 7:12

God imi ulo boyo fengmin umi magam uyo kulbaalu kale, boyo atin tambaliim e minte, weng alugum God imi ulo tem albu kwek uyo atin tambaliim tol kup felebesu no ko.

Fol tebe Rom kutam imi suuk kon dola kobesa uta ko 7:14

Kale nugol utamsup kale, ulo tam kwek uyo God imi Sinik Tambal iyo tebe kafalebe-nala e, “God imi aget fugunin, bota kanubelin o agan-be uyo kulbu o,” age kafalem-nuuba kuta, niyo aget mafak fugunin uyo bom-buluta kale, God imi, “Bota kanumal o,” agan-be uyo kupkalita kale, fengmin uyo tebe-nulu e, niyo sok de namolin keluta kale, umi ogok uta waafubesi ko.

Fol tebe Rom kutam imi suuk kon dola kobesa uta ko 7:22

nalami aget fugunin bole God imi ulo bomi aget uyo ugaa kwaasi kuta minte,

1 Korin 3:19

Kale bomi magam uyo ki, kafin diim komi unang tinum iyo bogo-nilip, “Nuta dagaa kusup unang tinum o,” agan-nuubip kuta, God beyo bogo-nala kano, “Ibo ilum ilum kemin unang tinum o,” agan-nuuba kale, God imi suuk kon tem uyo bomi sang uyo bogo-nulu kano, “God iyo tebe tinum ilimi kuguup mafak bisop bagamin-waafulin iyo tinum abil fobelip yuut anolu dalan-nuubip ulutap ke-bomta yuut imdep meng daa-nalata, ilimi kuguup mafak bomi kalan uyo yega duga-em-nuuba o,” agelu e minte,

2 Korin 4:4

Kale kanupmin unang tinum bilip iyo, kafin diim komi sinik mafak imi kamogim Saatan iyo tebe-nala e, unang tinum imi aget fugunin tambal uyo namdabe imdep mililep tem daalata, atin ilumanosip kale, dogonubeta utamipta e, God imi weng boyo atin fen kalaa age utam-nimip binim kale, kanube God imi weng tambal uyo imi tolong uyo dugan-bilip e minte, Yesus imi dong uyo tal imi diim aban-bo no kuta, iyo boyo utam-nimip binim ke-nilipta, imi aget tem uyo kefobe-numu binim kelu kale, Krais maagup beta kup Aalap God ilatap kale, ilata kup God imi ilak dolin unang tinum nuyo God imi kuguup tambal uyo kafalebe-nala e, “God iyo kanupmin o,” agelata, nugol utaman-bulup ko.

2 Korin 5:17

Kale kanube unang tinum iyo maak Krais imi diim kal feba-bom albip umdii, God iyo tebe bilip iyo telela imola mitam atin kamaa unang tinum kelipta, bilip imi siin aget fugunin boyo alugum binimanuta, kamaa aget fugunin bota kup mitam tolon-temu ko.

Galesia 1:4

Kale Krais iyo numi Aatum God ilami aget fugunin bota kanubelal o agan-be uta kup waafu-nalata, kafin diim komi kuguup mafak umi diim albup uta nuyo tagaa imkan kelan o age-nalata, ilami kaal sigim uyo ke-nalata, numi fengmin uyo mobe-se kale,

Efesis 1:18

nimi beten uyo God iyo ipmi aget fugunin uyo telela kobelata, atin tele utamipta e, God tebe numi olabela imi ilak dolup bogo-nala, “Kanubelan-temi bomi uyo fen-bilipta o,” agesa bomi magam uyo kulbu kalaa age-nilip e minte, ibo utamipta e, God imi weng kwep daa bogo-nala, “Nimi unang tinum ibo dong daga-e-bilita, nisino tambaliim nan-temip o,” agesa boyo atin mufekmufek tambal kalaa age-nilip e minte,

Efesis 2:2

siin boyo ibo kuguup mafak uyo kafin diim komi unang tinum imi kanum-nuubip ulutap ke-bii-silip kale, boyo ibo sinik mafak imi kamok imi weng uta tinangka-bomta kanu-bii-silip kale, kamano koyo sinik mafak beyo tinum unang waantap ita God imi weng kwaasulemin imi igalak balata, kanu-bilip ko.

Efesis 5:17

Kale kanube amon amon nin kuguup uyo waafunamin ba kale, kup-kugu utamipta, Bisel God imi ipmi bogobe-nala, “Bota kanumin o,” agan-be uyo kulbu kalaa age utam-nilipta, bo kanumin o ageta ko.

Kolosi 1:9

Kale kanum kwep talan-bo kalaa ageta alop nuyo kamaki ipmi sang tinangku-sulup kota, suun kup ipmi aget uyo fugun-bom beten ke-em tebesup kale, numi beten weng uyo God iyo dagaga-bulupta, yagal ilami aget fugunin, “Bo kanumin o,” agan-be uyo kafalebelata, ipkil tele utam-nilip e minte, God imi Sinik yagal dong dogobelata, aget fugunin tambal uyo ku-nilip e minte, utamsip unang tinum ke no kelin o age-nulup e minte,

Kolosi 3:10

God ita tebe telela imolata, ibo mitam kamaa unang tinum ke-silip kale, yagal tebe ipmi aget tem uyo suun telela kupka-e-bala ibo ilatap kem tam tam tebesip kale,

Kolosi 4:12

Kale Epafras aa yagal mungkup ibo weng umobe no kela kale, beyo mungkup ilipmi tinum kale, begal Yesus Krais imi ogok waafulin tinum kale, ibo suun kup dong daga-e-bom God iyo fomtuup aman duga-e-bom-nala e, “Aatum God kabo bilip iyo dong dogobelap bilip imi kapmi ilak dugamin uyo senganuta, man mitam fito kola ilatap ke titil fagaa mo-nilip e, bilip imi aget tem uyo titil faga-nilipta, God kapmi, ‘Bota kanumin o,’ agan-balap uyo tele utam ku-nilipta o,” age-nalata, aman daga-em tebesa ko.

1 Tesalonaika 4:3

kanupmin kuguup bota waafu-bom-bilipta, God iyo deng tebeman-tema kale, ibo God imi ilak uyo atin fomtuup do ilami aligaap ke-nilipta, ibo sa dagamin kuguup boyo atin fen kupkalin o ageta ko.

Taitas 3:5

yagal numi ilim uyo bobe-se kale, boyo numi kuguup tambal uta utam-nalata ba kale, God yagal alugum numi i-filin daa-nalata, numi ilim uyo bobe-se ko. Kale boyo ki, nuyo diing daa imola mitam kamaa unang tinum kelup imka-nala e minte, ilami Sinik Tambal iyo daala tal dong dogobelata, siin umi kuguup mafak kanumsup uyo kupka-nulupta, kamaa kuguup uta ku no ke-sulup ko.

Jems 1:27

Aatum God iyo dogonupmin tinum ita atamata, beyo atin fen Kristen kesa kalaa agon-tema a? Iyo? Tinum iyo mulkon man min, unang kaluun min bong fagan-bilip iyo dong daga-e-bom-nala e minte, yagal kuguup mafak tebe, dufak daalan o agan-bo uyo titil fagaa tol kup ke-bom no kemin tinum beta kuba.

Jems 4:4

Ibo kafin diim komi mufekmufek aget uyo ugaa kwaalip umdii, God imi umik ugobe yang iinom imi waasi ke-em-nuubip ko. Bo utamip aga? Kale waantap ita, kafin diim komi mufekmufek aget ugaa kwaalan o agela umdii, beyo God imi waasi kepma ko.

1 Fita 1:14

Kale ibo mitam God imi man ke-silip kale imi, “Bota kanubelin o,” agan-be uta kup waafu-bom-nilipta o ageta kale, ipmi siin Yesus Krais imi weng tambal bomi utamin-tem bom-nilip fomtuup kuguup mafak mafak kemum o agan-bom waafu-bii-silip boyo ibo asok maak so yang kanumin ba kale,

1 Fita 1:18

Kale bomi magam uyo kulbu kale, siin uyo olal ilimi kuguup mafak uyo kafale-bilipta, ipsiik kanupmin kuguup uyo waafu-bii-silip kuta, boyo tebe ibo dong daga-emsaalu kale, God iyo tebe ipmi ilim uyo bobe-nala e, kuguup mafak bomi diim uyo ibo tagaa imkan ke-se kale, tisol ku mo-se boyo ibo utamsip kale, unang tinum imi aget fugunin uyo gol so tuumon so boyo mufekmufek kwiin kiim o agan-nuubip kuta, boyo kafin diim komi mufekmufek kale, son-temu uyo, atin binimanan-temu kale, God iyo gol sino tuumon so uta ku-nalata, ipmi ilim uyo bosaala binim kale,

1 Fita 4:2

ibo tiin kafan bom kafin diim kaa nip koyo, ipmi aget fugunin uyo tebe, fengmin kuguup uyo maak so kemin o agelu uyo, ibo yang kafin diim unang tinum imi kanubip ulutap uyo kemin ba kale, God ilami, “Kuguup tambal bota kup kanumin o,” agan-be uta waafu-bom-nilipta o ageta kale,

2 Fita 1:4

ilami, “Kanubelan-temi o,” agesa uta waafu-nalata, ilami win tibin kemin kuguup sino kuguup tambal sino bomi diim ilep alugum mufekmufek afalik tambal tambal uyo nuyo kobe-se kale, kuguup mafak utam aget kup ugaa kwaagamin boyo kafin diim unang tinum numi diim kal bom-nuluta, nuyo atin ifak dagan-nuubu kuta, God imi alugum mufekmufek afalik tambal tambal ko numi kupka-em-nuuba bota tebe nuyo dong dogobeluta, nuyo kuguup mafak uyo kupkaa bilii yang iinom waalan-nulupta, God ilatap ke-nulupta, ilami kuguup so suun nin so uta kulan-temup ko.

2 Fita 2:20

Aa bole, unang tinum iip maak maak iyo utamipta, fen Yesus Krais beyo numi Kamogim kalaa, beyo numi ilim bobe-se iyo beta kalaa age-nilipta, bota kafin diim unang tinum imi kuguup mafak mafak kanum-nuubip boyo kupka-nilipta, waalan-silip kuta, asok te yang kuguup mafak uyo ke-bilip ise kuguup mafak bota tebe sengan imdaak tamalu uyo, dogobeta nan-temip a? Iyo kamaki kutop uyo ki kuguup mafak uyo waafu-bom-nilipta, mafak so bii-silip kale minte, aaltam yang asok fengmin uyo waafulin kup keman-temip bota ki, atin fen mafaganan-temip ko.

1 Jon 3:13

Nimi nugumal ibe. Mungkup kanube kafin diim kasel kalip iyo ibo waasi ke-emip umdii, ibo aget yamyam taga-bom aget afalik fugunin ba ko.

1 Jon 5:19

Nuyo utamsup kale, nuyo God imi man kelup iyo nuyo igalak bom tiin moba kuta, Tinum Mafagim ita kafin diim tinum migik imi kamok ke-bom-nalata, biinga imdala unbip talbip ke-bomta, kuguup mafak kem-nuubip ko.

Revelesen 12:9

God imi ensel Maikel ninggil iyo tebe inap mafak ninggil iyo alugum bagaa imdalip malaak kafin diim e tilip ko. Kale inap kiim ko age Tinum Mafagim beyo sugamiyok uyo God imi waasi kebe-bom weng mafak uyo baga-e-bom no ke-bii-se kale, imi win uyo Saatan ita kale, beta tebe-nalata, kafin diim unang tinum iyo bisop baga-e-balata, alugum iyo imi weng uta tinangka-bom-nilipta, fengam-nuubip ko.

Revelesen 13:8

Kamaki God imi kafin komi telela kolin-tem som-nala uyo, unang tinum iyo kalip ita nimi unang tinum kepnelan-temip kalaa age-nala e, imi win uyo suuk kon tem kal dola ko-nala e, kalip ita nisino suun kup nan-temip kalaa age no kesa kale, Sipsip Man Yesus angkolip kaan asok fen tigi mo-se ita suuk kon boyo tiin mo waafusa kale, kafin kaa kutufosu komi unang tinum iyo dimduum bemi deng uyo tebe-bom aman duga-eman-temip kuta, God imi suun nin unang tinum bilip ita kup dimduum bemi deng uyo tebe-bom aman duga-eman-temaalip ko.