Jon imi tebe Yesus imi sang dola kosa uta ko 1:4 - Telefol

⁴ God imi Weng ita suun nin miit kayaak e minte, ita dong miit kayaak no kale, imi dong boyo kafin diim kasel imi aget tem uyo kefobe bam daa imoluta, utamipta e, God iyo kanupmin kalaa age-silip ko.

Jon imi tebe Yesus imi sang dola kosa uta ko 1:4 Iomraidhean Croise

Matyu 4:16

Kale kamano koyo kafin bomi kasel iyo mililep ko age fengmin umi baan diim kal albip kale, kaan maagalo ke imi win uyo binimanan agin kuta, siit ilugolan-temu uyo, ilagenamin kwiin kiim uyo tulu utam-nilipta, bilip iyo ilagenin diim kal nan-temip o,” age Aisaya iyo Yesus imi sang uyo dola ko-se ko.

Luk imi tebe Yesus imi sang dola kosa uta ko 2:32

keyo yogon dong ilatap kale, Israel kasel imi aget fugunin uta kup ba kale, unang tinum asit kek kek imi aget tem uyo kefobe bam daa imolata, kapmi tuluun weng uyo dagaa kulan-temip e minte, iyo kalapmi unang tinum Israel kasel iyo imdep meng kapmi miit tem tola nan-temip o,” age Simeon iyo kam agan-kala ko.

Jon imi tebe Yesus imi sang dola kosa uta ko 11:25

Yesus isiik bogobe-nala e, “Kaan fenamin magam uyo nita kup e minte, tiin kafan magam uyo nita kup no kale, tinum iyo maak nimi ilak dola umdii, beyo bemi dam uyo kaanan-tema kuta, bemi sinik uyo kaanan-temaala binim, suun kup nan-tema kale,

Jon imi tebe Yesus imi sang dola kosa uta ko 12:35

Yesus isiik bogola, “Yogon dong uyo ipsino bom kefo-siit ilugoluta, mep sino mililanan-temu kale, tinum mililep tem unan-be iyo ilep uyo tele utamta unon-temaala kale, yogon dong kaa kefobu kota, ibo ilep uyo tele utam-nilipta, unin o ageta ko.

Jon imi tebe Yesus imi sang dola kosa uta ko 12:46

Niyo tal kafin diim komi unang tinum imi yogon dong ulutap kefobe-sii kale, waantap ita nimi ilak uyo dolip umdii, iyo mililep tem uyo nan-temaalip kale, nimi dong uyo imi aget tem dubom tem uyo kefopman-temu ko.

Jon imi tebe Yesus imi sang dola kosa uta ko 14:6

Yesus iyo bogobe-nala e, “Nagal ipmi God siinemin ilep uyo kalbi e minte, nagal tuluun weng bagamin umi magam kayaak iyo kalbi e minte, nagal tiin kafan umi magam kayaak iyo kalbi no kale, tinum iyo dok ita ilep migik ilep te nimi Aatum siinon-temaala kale, maagup nita kup kwa.

Jon imi tebe Yesus imi sang dola kosa uta ko 3:19

Kale weng telelmin bomi magam uyo ki, God iyo ilami man daala malaak kafin diim abe yogon kefolata, unang tinum imi kuguup uyo ilagen-suu kuta, unang tinum imi kuguup uyo mafak kale, mililep tem kweng tilinom-nilipta, God imi ilagenin diim boyo kupka-silip ko.

Jon imi tebe Yesus imi sang dola kosa uta ko 5:21

Kale kanube Aatum imi tinum kaanip ifola fen tigi mo asok kafan so kem-nuubip ulutap kale, imi Man nagal mungkup unang tinum iyo ulaa imdu-nilita, telela imolita, suun nin unang tinum kem-nuubip no ko.

Jon imi tebe Yesus imi sang dola kosa uta ko 5:26

Kale Aatum beyo tiin kafan miit kayaak kale, om kun kopnelata, nagal Aatum ilatap ke-nilita, tiin kafan miit kayaak kesi kale,

Jon imi tebe Yesus imi sang dola kosa uta ko 8:12

Yesus iyo asok Falosi iyo bogobe-nala e, “Kafin diim unang tinum imi yogon dong uyo nita kale, waantap ita daang begep-namip umdii, nimi dong uyo imi aget tem uyo ilagenepmuta, iyo mililep tem nan-temaala kale, ilagenin diim tinum ke suun kup nan-tema o,” agela e,

Jon imi tebe Yesus imi sang dola kosa uta ko 9:5

Niyo kafin diim kagal albi koyo, niyo alugum kafin diim komi unang tinum imi yogon dong kesi o,” agela ko.

Aposel 26:23

bilip iyo bogo-nilip e, ‘Biilan-temu uyo, God imi ulaa dula kamok kesa tinum iyo kaal fuyap uyo ku-som-nalata, kaan-siit-nalata, isiik fen tigi mola son-temuta, unang tinum igil mungkup fen tigi molan-temip kale, beyo tebe God imi unang tinum telela imola waalanan-temip umi sang uyo Juda kasel so asit kek kek so imi baga-e-balata, ilagenin diim teleman-temip o,’ agesip o,” age-nalata, Fol iyo Agripa imi baga-ema ko.

1 Korin 15:45

aa mungkup, God imi suuk kon tem weng uyo bogo-nulu e, “Sugamiyok uyo God iyo tebe-nala kamaki umi tinum Adam beyo dam so mam so kobesa o,” agesu kuta minte, aaltam komi tinum Adam migik ko age Krais beta yagal sinik kale, bom-nalata, nuyo kafan so sinik boyo kupka-em-nuuba ko.

Efesis 5:14

Kristen nuyo bomi sang uta baga-bom do weng koyo bogo-nulup e, “Kabo yuut kapmi agaal unbap ko age kapmi kaanbap uyo kupkaa fen mitam tigi molapta, Krais iyo tebe kamdep yang ilami ilagenin diim daalan-tema o,” agan-nuubup ko.

Kolosi 3:4

Kale ipmi kamaa unang tinum ke-silip bomi magam uyo Krais ita kale, son-temu nala imi mitam kemanan-tema kota, ipkil mungkup God imi titil diim ilep iso ipso kemanan-temip ko.

1 Jon 1:1

Ibe. Yesus Krais imi win maak uyo, God imi Weng o agesip kale, beta numi suun nin unang tinum kemin umi magam iyo kulba kale, bemi sang uta ibo baga-eman o agan-bii ko. Beyo kamaki magam tem kutop uyo nuubata kale, siin uyo bemi okumop man nuyo bemi weng uyo tinangka-bom-nulup e, nulumi tiin fala atama-bom-nulup e minte, nugol aafuna-bom no kemsup ko.

1 Jon 1:2

Kale numi suun nin unang tinum kemin umi magam beyo mitam kemana atam-nulupta, bemi sang uyo ibo baga-em tebesup kale minte, suun tiin kafan miit kayaak beyo Aalap God so nuubata kale, beyo mitam kemanata, nuyo atam-nulupta, bemi sang uyo baga-em tebesup kale,

1 Jon 5:11

God imi weng kam agesa umi weng miton uyo kulbu kale, God imi aget uyo ki, suun nin unang tinum kelin o age-nalata, imi Man daala tal at diim kaan-nalata, numi ilim uyo bolata, kota mitam imi suun nin unang tinum ke-sulup ko.

Revelesen 22:1

Kale ensel iyo Jon nimi kafalepnelata, utamita, suun nin umi ok uyo iliip tem umi ok kale, God sino Sipsip Man Yesus sino ulim imi tonamin baan diim umi afak tem ku-tele fogo kulalu tam abiip ilep miton kutop-tele abe unu kale, ok bomi iibak tem uyo webaal kup sigin-bii kota fen kem am umi glas ulutap kale, unang tinum iyo waantap ita ok bo unan-kalon-temip iyo suun nan-temip e minte, yak ok milii so mek milii so ok magaang tem umi suun nin umi at mobu boyo dum abubu kale, umi abumin uyo abumin ulumi kup tuluun kal fagalu e, atol uyo dakan ke yakyak kemin kale, boyo maagup abulu e, kayop maagup ke yakyak kemin no kale, unang tinum waantap ita tal at dum bomi dagaa ku unelan-temip iyo suun nan-temip ko. Kale alugum kafin kaa kutufosu komi tinum miit maak maak iyo suun nin umi at bomi kon uyo marasin ulutap kalaa age-nilipta, unan-nuubip kale, uta dong daga-e-buluta, imi dam sino aget fugunin so uyo mafak binim, tambaliim kup nan-temip ko.

Revelesen 22:16

“Kale Yesus niyo King Devit imi man ilop kale, God iyo ulaa nimdula Devit imi abiin ku-sii kale, am kel diim biningok afaligen bigiduluup umi mitam molu boyo utamupta, am uyo, mep so daanan o angbu kalaa age-nuluta, mitam tulu kalaa angbup kale, ulutap nagal mungkup, nimi unang tinum abiip maak maak ko albip ibo bogobe-nili, ‘Alugum mufekmufek komi mitam migik kelan-temu uyo mep so tulu o,’ agelan o age-nilita, nimi ensel iyo daabeli tal ibo weng kem boyo baga-e-be o,” age Yesus iyo kam ageba ko.