Galesia 5:1 - Telefol

¹ Kale Krais imi aget fugunin uyo, nuyo sok de imolin binim ilitap tambaliim bom-bilipta o age-nalata, numi Moses imi ulo tebe-nulu sok de imolin ke-suu uyo talaa imda-se kale, ibo imkalip Juda kasel iyo tebe sok de imolin kelip Moses imi ulo uyo asok maak so waafunamin ba kale, titil fagaa mo bom-bilipta o ageta ko.

Galesia 5:1 Iomraidhean Croise

Matyu 23:4

Kale unang uyo mufekmufek iluum digi talan-bulu umi ipkum bisop talan-bo uta tebe mufekmufek uyo maak sino kulep iit tip tobe yakyak keman-temu boyo kuguup mafak kale, ulutap mungkup, kamogimal bilip iyo tebe unang tinum imi bogobe-nilip, ‘Ibo numi weng kem tagang baga-em-nuubup boyo tele tinangka-bom-nilipta o,’ agan-bilipta, waafulum o agan-nuubip kuta, bong fagan-bii umtal daasip kuta, kamogimal iyo tebe i-filin daa-nilipta, dong daga-em-nuubaalip kale, bogal mungkup kuguup mafak no ko.

Luk imi tebe Yesus imi sang dola kosa uta ko 5:38

tinum iyo, kamaa umi wain ok uyo ilu kolan o agela umdii, meme kaal uyo kamaa dalaa kwep daala totanin binim albu uta kup ku-nalata, wain ok uyo ilu kwep tal daalan-tema bota tambaliim nan-temu ko.

Aposel 15:10

Kale Juda kasel numi ulotu kemin umi ulo waafunamin boyo bong fagamin kale, sugamiyok numi olal so nuso dogonubeta bagang-kale waafu-numup binim kale, di kamaa kota ipkil weng uyo Yesus imi ilak dolin unang tinum bilip imi kobe-nilip e, ‘Waafulin o,’ agelipta, bong fagan-bii mafaganan-temip kuba. Kale intaben o ageta ipkil God imi kamaa weng bogo-nala, ‘Kupkalin o,’ age-se uyo kupka-nilipta, bogo-nilip e, ‘E-e. Ibo kanumin o,’ agan-bilip a? Umbae.

Fol tebe Rom kutam imi suuk kon dola kobesa uta ko 6:14

Kale ibo Moses imi ulo umi diim kal albaalip kale, ibo God imi i-filinin umi diim kal albip kale, ibo tebe-nilip kupkalip fengmin uyo tebe ibo de imkamin ba ko.

Fol tebe Rom kutam imi suuk kon dola kobesa uta ko 6:18

ibo kuguup mafak umi ogok kemin unang tinum kesip kuta, fengmin tebe ipmi sok de imolin kesu uyo God iyo tebe talaa imda-nalata, imdep yak tol kuguup umi diim daalata, ibo tol kuguup umi ogok kemin unang tinum ke-silip ko.

Fol tebe Rom kutam imi suuk kon dola kobesa uta ko 7:3

fen imak iyo kaanin-tem bom-bala yak tinum migik dulu umdii, bota kek kek iyo bogobe-nilip e, “Unang boyo tinum digin kuta, imak iyo dupkeng daalu o,” agelan-temip kale minte, imak iyo kaana umdii, bota ulo boyo tebe unang bo maak so de kolan-temaalu kale, kanube yak tinum migik dulan o agelu umdii, “Boyo imak iyo dupkeng daalu o,” agelan-temaalip kale, ulutap kale, kaanan-temup uyo, ulo uyo tebe maak so yaafulan-temaalu ko.

Fol tebe Rom kutam imi suuk kon dola kobesa uta ko 7:6

nuyo Krais imi kaan-se ulutap ke-nulupta, mufekmufek ko tebe numi yaafu-suu uyo kupka-sulup kale, ulo uyo tebe-nuluta, nuyo maak so yaafulan-temaalu kale, kamano koyo numi God imi kuguup kanu-bulup bomi ilep uyo ki kanumin kale, siin ulo God imi tebe Moses imi kobela dola-se umi bogobelu kanu-bii-sulup boga ba kale, kamano kaa God imi Sinik imi tebe dong daga-e-bala kuguup migik ku-nulup kanu-bulup bota ko.

Fol tebe Rom kutam imi suuk kon dola kobesa uta ko 8:15

ipmi God imi Sinik du-silip iyo tebe ibo bisop de imo ipmi finanin boyo kupka-em-nuubaala kale, Sinik beta dulipta, ibo ulaa imdulata, mitam God imi man ke-em-nuubip kale, Sinik imi titil diim ilep God iyo ole-bomta, “Aatum aa. Aatum aa,” agan-bom olemin kup kem-nuubup ko.

Fol tebe Rom kutam imi suuk kon dola kobesa uta ko 8:2

bomi magam uyo kulbu kale, kanube nuyo Yesus Krais imi kelup e, kota God imi Sinik Tambal iyo tebe telela imola suun nin unang tinum kem-nuubup kale, fengmin so kaanamin so uyo tebe nuyo sok de imolin kelu bii-sulup kuta, niyo de namolu bii-sii uyo God imi Sinik Tambal imi titil uta tebe talaa nimdalu tambaliim albi kale,

1 Korin 15:58

Agelu kale, atin ki nimi duubal ibaa. Ipkil utamsip kale, ipmi Kamogim Yesus imi ogok kwiin kiim ke-bilip boyo tegep daak abelan-temaalu binim kale, ibo bamban keng keng kemin ba kale, titil fagaa mo-bom-nilipta, suun kup ipmi Kamogim Yesus imi ogok uyo dital fagaa waafu-bom-bilipta o ageta ko.

1 Korin 16:13

Kale ibo tele utama-bom-nilipta, Yesus imi ilak dugamin boyo dital fagaa waafu-bom-nilip finanin ba kale, titil fagaa mo-bom-nilipta o ageta kale,

1 Korin 7:22

Kale minte tinum ko sok de dolip tinum maak imi ogok ke-bom bom-bala God tebe olabela meng Kamogim Yesus imi miit tem ti-se beyo kamano koyo Kamogim Yesus ilami keba kale, beyo sok de dolip tinum maak imi ogok ke-be kuta, Kamogim Yesus imi tiin diim uyo tinum beyo fengmin uyo tebe maak so sok de dolin kelan-temaalu ko. Minte tinum dok ita ko sok de dolin binim bisop bom-bala God tebe olabela meng Yesus Krais imi miit tem ti-se umdii, beyo sok de dolip ogok kemin binim alba kuta, kota Yesus Krais imi sok de dolin tinum ilatap ke-nalata, yak alugum mufekmufek boyo Krais ilami bogo-nala, “Bota kanubelal o,” agan-be uta kup kanum-nuuba ko.

2 Korin 11:20

kanube tinum iyo tebe suun kup ibo imak kalila ogok kemip min, beyo tebe ipmi mufekmufek uyo alugum binimanu kupkabela min, ibo bisop bogobe imdep yang tem tilila kaal fuyap uyo kulip min, “Ibo win binim kale nita kup o,” agan-kala min, iyo tebe kul baang binola yak tibit diim abe-bom min kema kalaa agelip uyo, ibo tiin kup ata-bom-bilip kanu-e-boma kale bole, ibo nimkalipta, nalami win uta kufuman o ageta ko.

2 Korin 3:17

Kale nimi weng kaa bogo-nili, “Kamogim o,” agan-bii boyo ki Yesus imi Sinik Tambal imi sang kale, kanube Kamogim Yesus imi Sinik numi diim kal nan-tema uyo, dogap uta tebe-nuluta, nuyo imdaak tamalan-temu? Moses imi ulo ugo ba e minte, mufekmufek migik umaak tebe-nuluta, nuyo sok de imolan-temaalu kale, Yesus imi Sinik iyo tebe numi siin kuguup umi sok uyo tiila imolata, bam daabup ko.

Galesia 2:4

Kuta Kristen ko age atuk atuk kemin tinum iip maak maak iyo, Yesus Krais tebe numi kuguup kobe-se bota utamum o age-nilipta, mitam-nilipta, nuso ton-bom-nilipta kale, siin uyo nuyo Moses imi ulo uyo tebe sok de imolin kesuta, Krais iyo tebe talaa imkan kela waalan-sulup kuta, ise tinum mitam tilip bilip ita tebe, bogobelupta, Moses imi ulo uyo asok waafulin o ageta kam agan-bilip kuta minte, Banabas alop nuyo asok Moses imi ulo uyo tebe sok de imolin kelu umi ogok kemin kuguup boyo waafulan-temaalup o age-sulup ko.

Galesia 3:25

Kale kamano koyo Yesus imi ilak dugamin kuguup boyo mitam ti-suu kale, ulo numi aalap kebe tiin mo-suu bomi diim uyo maak so albaalup ko.

Galesia 4:26

Jerusalam migik ko age God imi Jerusalam kasel ita sok de imolin binim albip kale, unang maak Sara bota God imi Jerusalam ulutap e minte, boyo God ilami Abraham imi weng kwep daabe-nala, “Kanubelan-temi o,” age-se ulutap e minte, boyo unang tinum God imi weng kwep daabe, “Kanubelan-temi o,” age-se uyo utamupta, fen kalaa agan-kalin numi ogen no ko.

Galesia 4:31

Agesu kale, duubal ibaa. Unang tinum nuyo God imi weng kwep daabe, “Kanubelan-temi o,” age-se uyo utamupta, boyo aafen kalaa age-sulup nuyo unang sok de kolin bomi man kulatap ba kale, nuyo unang sok de kolin binim bomi man kulatap kale, sok de imolin binim bisop nin imi kuguup uta waafulum o ageta ko.

Galesia 4:9

Kuta kamano koyo ibo God iyo atam-silip kuta, ipkil tele atamsaalip kale, God yagal ibo itam-nalata, ulaa imdulata, atam-silip ko. Kale intaben o ageta ibo asok alula yang kafin diim komi sinik mafak mafak imi afak tem iin-silip a? Bilip iyo titil binim e minte, bilip iyo ogok tambal umaak kem-nuubaalip binim kale, ibo intaben o ageta, no tamupta, bilip iyo asok sok de imolin kelipta, imi ogok uyo ke-emum o age-nilipta a?

Galesia 5:13

Duubal ibaa. Dam kale, God iyo ibo olabelata, te tam Moses imi ulo waafunamin bomi ilep uyo kupkaa sok de imolin binim ilitap ke-silip kuta, ibo ilipmi aget uta fugun-bom-nilip e, “Nuyo nugol nulumi aget uta kup fugun-bom mufekmufek kemin tinum ke-sulup kale, kanube nuyo siin kuguup boyo kanubelum o agelup uyo kanube-numup o,” agan-kalin ba kale, ibo ipmi ipkumal imi aget uyo kobe-nilip e, ilami bon tem kup kiit fen-bom dong dogobina tala ke-bom-nilipta o ageta ko.

Efesis 6:14

Kale kabo mo-nalap fikolan-temap uyo kalbu kotam. Kabo tam waasi dinan-kalin imi ol tiil uyo ku migilip nagat molu tambaliim dinbip ulutap ke-bom-nalapta, tuluun weng uta kup baga-bom-nalapta, tambaliim bom-balapta o ageta kale, waasi dinan-kalin imi ilim ko age naam kwaak kalilipta, un uyo tal bubul uyo bigipman-temaalu binim kale, ulutap kale, kabo te tam kuguup tambal waafulan-temap uta tebe-nuluta, kapmi tiin kafan sinik uyo de kubaluta, tambaliim nan-temap e minte,

Filipai 1:27

Intap intap mitam telemu uyo, ibo kupkek kupkek ke-bom-nilipta, Yesus Krais imi weng tambal bogosa uta kup abo dulu-bom-nilipta o ageta ko. Talaa nimdalipta, no tolon-temi e? Tolon-temaali e? tap kuta, nimi tolong dolan o agan-bii uyo ki, ibo titil faga-bom-nilip e, mangkal ninggil kwego dego aget maagup bubul maagup ke-bom-nilip e, abu binim, daal binim, Krais imi weng tambal uyo unang tinum iyo kafale-bom baga-e-bilipta, imi ilak do no kelan-temip bota niyo tolong dolan o agan-bii ko.

2 Tesalonaika 2:15

Numi nugumal ibaa. Ibo God imi unang tinum ke-silip kale, God imi weng tambal atuk uyo bon tem weng baga-e-bom-nulup e minte, atuk uyo suuk kon tem dola kobe no ke kafalebe-sulup kale, ibo suun kup titil bigi-bom-nilip e, tambaliim kup aget fugun-bom God imi tuluun weng boyo suun kup waafuu no ke-bom-nilipta o ageta ko.

Hibru 10:23

Kale nugol utamsup kale, God imi alugum mufekmufek, “Kanuman-temi o,” age-se boyo aafen kanuman-tema kale, nugol kanubelan-tema kalaa age imi fen-bom-nulup bomi sang uyo unang tinum imi baga-e-bom no kem-nuubup kale, fomtuup fenin kup kem tebe-bom-bulupta o ageta ko.

Hibru 3:14

kamaki kutop uyo nuyo Krais imi ilak uyo dosup kale, imi ilak dosup bomi aget uyo fomtuup kobe-nulupta, tam tam abe-bulupta unanbu top numi kaanan-temup kwek diliit kemum o ageta kale, kanube bom kanumup umdii, nuyo Krais ilami fen unang tinum ke-nulupta, boyo kanuman-temup ko.

Hibru 3:6

Kale Krais beyo God imi Man kale, beyo yagal God imi tinum miit imi dubom ke-nalata, tiin mo-nalata, ise ogok boyo kupkasaala binim kale, suun kup waafusa ko. Kale kanube suun nuyo aget alop tagamin binim ke-bom utamupta, dam God iyo kuguup tambal uyo kobelan-tema kalaa agan-bom deng kup tebe-bom fenin kup kemup umdii, God imi unang tinum ke-nulupta, boyo kanuman-temup kale,

Hibru 4:14

Kale numi atin ki tinum amem miton ko age numi dong daga-emin iyo daage tam God imi tibit diim kal alba kale, beyo God imi man Yesus ita kale, nuyo Yesus imi ilak do bom-nulup unang tinum baga-em tiinan-bomup boyo telela fomtuup waafu-bom-nulupta o ageta ko.

1 Fita 2:16

Kale God iyo ibo asok molata, alugum kafin diim komi ulo umi diim uyo kaal binim tambaliim albip kuta, God iyo, “Ibo molita, kaal binim tambaliim bomta kuguup mafak uta waafulin o,” age-nalata ba kale, God iyo ibo ilami, “Bota kanumin o,” agan-be uta kup waafu-bom-nilipta o age-nalata, tebe asok mola ibo ilami ke-silip ko.

2 Fita 2:19

Kale kafalemin tinum mafak bilip iyo bogo-nilip e, “Boyo tambaliim kale, ulo umaak tebe-nuluta, ilipmi aget fugunin uta kup yang kuguup mafak o agan-nuubip bomi kanumin boyo tiin mobaalu kale, kaya. Boyo kanumin uta kup o,” agan-nuubip kuta, kafalemin tinum mafak bilip iyo kuguup mafak uyo tebe de imosu kale, kanube tinum iyo kuguup min, ilami aget fugunin uyo, bota kanuman o agan-bala bomi aget uyo mitam sengan dupdaak tamalu atin mafagana umdii, kanupmin kuguup bota tebe tinum beyo de dolu kale, dogobeta ise kanupmin kuguup boyo kupkalan-temaala binim ko.

Jut imi suuk kon dola kosa uta ko 1:3

Kale atin duubal ibe. Kamaki nimi aget fugunin afek uyo, God imi ogok tambal maak ke-bom alugum numi telela imo-se umi sang uta dola kobelan o agan-nak-bii kuta, kamano koyo itamita, ipmi nin uyo kanube albip kalaa ageli kale, kupkaa maak komi sang uta yuut dola kobelan o ageta ko. Kale tam tinum iip maak maak iyo bisop bogo, “God imi ilak dosup o,” agan-nuubip iyo no ipmi iibak tem iinbip kuta, bilip iyo God iyo umik uga-e-bom-nilip e minte, imi aget fugunin uyo, “Intaben intaben nulup umdii, God iyo tebe kuguup tambal uta kup kupka-eman-tema o,” age-nilipta, ilimi aget fugunin uta kup kuguup mafak mafak uyo ke-bom-nilipta, igil tebe God imi i-filinin kuguup bomi sang uyo fupkela kup-kiit kup-kalaak kelip weng ugulumi migik keluta, baga-em-nuubip kale, bilip iyo kamogim maagup Yesus Krais numi tiin molin tinum beyo umik ugobe-nilipta, kanum-nuubip ko. Sugayok uyo God imi suuk kon tem uyo bogo-nulu kano, “Kanupmin tinum bilip iyo no God imi weng telelmin baan diim uyo no-nilipta, ogen umtal daa maagalo ke imi win binim kelan-temip o,” agesu kuta, God imi weng tambal uyo God iyo tebe ilami unang tinum numi kobe-se kale, beyo tebe ilami weng uyo fupkela kup-kiit kup-kalaak kemin binim kale, niyo wit saane-bilita, ibo God imi weng tambal bomi utafinonin tinum imi weng uyo kwaasule-bom-nilip e minte, ibo dital fagaa unang tinum iyo God imi weng uyo atin telela dupkop daga-e-bilip igil utamipta, God imi kuguup boyo atin tambaliim kalaa agan-bom no ke-bom-nilipta o age-nilita, suuk kon koyo ipmi dole-bii ko.

Revelesen 2:25

ilipmi kuguup kanum-nuubip boyo fomtuup waafulin kup ke-bom bom-bilipta biita, tolon o ageta ko.

Revelesen 3:3

Kale siin uyo ibo God imi weng uyo tinangkulipta, tambal kalaa age-silip kale, bomi aget uyo asok fugun-bom-nilipta, aget fupkela ko fengmin kup kemin boyo kupka-nilip e, God imi weng uyo fomtuup waafulin o ageta ko. Ale minte kanube ibo fen kafan nan-temaalip uyo, niyo maagalo tem tolon-temi kale, ibo dogonubeta utamta, dok kota beyo numi fengmin umi yan uyo kupka-em tolon-tema kalaa nagelan-temaalip kuba.