Efesis 2:14 - Telefol

¹⁴ Kale Krais yagal tebe-nalata, Juda kasel nuyo imago som, minte tinum migik ibo imago no ke afeta kolata, tinum miit maagup keta abiin tambal tonbup ko. Kale siin tinum miit alop numi atafinono una tala kemsup uyo daam fogolin ulutap ke iip kalagal fogo-nulu e, ugaa daalu una tala kesupta, Krais ita at diim kal kaan-nalata, daam fogosup boyo dalata kolata, binimanuta, tala tala keta tambaliim albup ko.

Efesis 2:14 Iomraidhean Croise

Luk imi tebe Yesus imi sang dola kosa uta ko 2:14

“Boyo unang tinum iyo iit abiil tigiin kayaak God imi tok uyo bagaman-temip kale, God iyo tebe tinum maak kafin diim kagal albip imi bet bubul kobelata, bilip imi aget tem uyo bilili agebeluta, nan-temip o,” agan-kalip ko.

Jon imi tebe Yesus imi sang dola kosa uta ko 10:16

Kale nimi sipsip migik maak daam tem katam umi albaalip iyo maak so albip kale, niyo iso kulep mitam tolita, nimi weng uyo tele tinangkulin o ageta kale, sipsip bilip iyo daam maagup kelip e minte, bilip imi tiin molan-tema iyo maagup nita kup no kelan-temi ko.

Jon imi tebe Yesus imi sang dola kosa uta ko 11:52

Kuta Yesus iyo Juda kasel bilip imi fengmin tem uta kup diin kaansaala kale ki, alugum unang tinum segela daa un-silip iyo God imi man kelipta, alugum afeta koli miit maagup kelin o age-nalata, bilip imi fengmin tem uta diin kaan-se ko.

Jon imi tebe Yesus imi sang dola kosa uta ko 16:33

Bo kanube bogobelita, ipkil tolong do-nilipta, bilili age titil faga-bomta bom-bilipta o ageta kale, ibo kafin diim kaa nip koyo, kaal fuyabok, aget ilumok uyo mitam telemu kuta, aget fugunolin. Nita nita ke-nili kafin diim kamok ko age Tinum Mafagim iyo kubagana dupkalan o angbi o,” age baga-ema ko.

Aposel 10:28

Fita iyo bogobe-nala e, “Ipkil Juda kasel numi kuguup uyo utamsip kale, nuyo yagalami tinum miit maak iso alop nin min, no atamup alop ton siit-nulupta, dupkaa telemin min boyo amem kuta, God iyo kafalepne bogopne-nala e, ‘Kabo yagalami tinum miit migik imi sang uyo bogo-nalap e, “Amem kale, felep-namuta, tinum bemi mep so yang unon-temaali o,” agan-kalin ba o,’ age-maansa kale,

Aposel 10:36

Ipkil utamsip kale, God iyo Israel kasel numi bogobe-nala e, ‘Yesus Krais beyo alugum unang tinum imi Kamogim maagup kale, unang tinum waantap ita Kamogim bemi ilak uyo dola umdii, Kamogim iyo tebe telela dolata, bemi aget tem uyo bilili age-nalata, tambal kup nan-tema o,’ age-nalata, God iyo weng tambal koyo kwaala ti-suu kale,

Fol tebe Rom kutam imi suuk kon dola kobesa uta ko 5:1

Kale nuyo utamupta, God iyo tii kanupmoma kalaa age-nulupta, ilami ilak uyo dolupta, tam numi Kamogim Yesus Krais ita tebe numi ilim uyo bolata, God iyo numi bogobe-nala, “Ipmi fengmin umi yuum uyo binimanebeluta, tol kup unang tinum kelip o,” agelata, God iyo nuso aget maagup bubul maagup ke-sulup kale,

Galesia 3:28

Kale God iyo tinum unang iyo itama-bomta, keyo Juda kayaak kalaa minte, maak beta tinum miit migik kalaa agan-bom-nala e minte, keyo sok de dolip ogok kemin tinum kalaa minte, maak beta yagal ilami aget kup fugunin kup nin tinum kalaa agan-bom-nala e, mungkup keyo tinum kalaa minte, bota unang kalaa agan bom no ke-bom iliba imkan-nuubaala binim kale, alugum ibo Krais imi diim kal feba-silip kale, ibo yagalami yagalami ba kale, atin maagup ko.

Efesis 2:15

Kale Juda kasel imi ulo umi bogo-nulu, “Yak maak bota kanumin ba kale minte, yak maak bota kanumin o,” agesu uta fomtuup waafuu kwep tebesip kale, Krais imi aget fugunin uyo, “Niyo ulo boyo dagaa kwaali daak kaanu kupkalita, unang tinum sok de imolin kesu uyo binimanuta, tinum miit alop bilip iyo meng nimi diim febalipta, telela imoli mitam tinum miit migik ke miit maagup ke-nilipta, abiin tambal tonin o,” age-nalata, ulo boyo dagaa kwaala daak kaanu kupka-se ko.

Efesis 2:17

Kale nimi weng miton uyo kulbu kale, Krais imi tal unang tinum imi God imi weng tambal baga-emsa uyo, asok mitam duup kiina tala kemin umi sang uta baga-emsa kale, boyo tinum miit migik God imi simanim albip ipso Juda kasel God imi mep so albup nuso numi sang uta baga-emsa kale,

Efesis 3:15

Alugum abiil tigiin kasel so alugum kafin diim kasel nuso nuyo tinum yagalami miit maak kela kela kesup kuta minte, Aatum God beyo alugum numi miit kayaak iyo kulba kale,

Efesis 4:16

Kale numi dubom beyo tiin mo-bom-balata, ilami yaan, sagaal, tiin nuyo ilami mufekmufek, “Kanupmin bota kanumin o,” age-nala maagup maagup numi baga-e-be uyo tambaliim kanum-nuubup kale, tinum imi mamel uyo tulu tulu ke dam uyo alugum de koluta, atin dam maagup kesu ulutap kale, dam umi atuk nuyo dong dogobina tala ke-bomta alugum maagup kem-nuubup kale, kanube aget kobina tala kem-nuubup uyo dam nuyo mitam titil fagaa senganan-nuubup ko.

Kolosi 1:20

God imi aget fugunin uyo, “Nimi Man beyo dong dogopnelata, atin alugum mufekmufek so unang tinum sino uyo kulep meng nalami miit tem tolan o,” age-nalata, Man iyo daala malaak at diim kal kaan-nalata, alugum mufekmufek so abiil tigiin kasel so kafin diim komi unang tinum sino iyo afeta kulep meng Aalap imi miit tem tolata, bilip iyo imi siin God imi waasi kebesip uyo kupka-silip ko.

Kolosi 2:20

Kamaki Krais imi diim feba-silip uyo, ibo tinum imi kaan-nala kafin diim komi mufekmufek kupkaa uneba ulutap ke-nilip ibo kek kek imi kafin diim komi aget fugunin kuguup uyo kupka-nilipta, Krais imi ilak uta do-silip kale, kamano kota ibo intaben o ageta kafin diim tinum imi kuguup kupka-silip uyo asok ku-bomta kanu-bilip a? Bilip iyo weng kwep daa-nilip e, “Ibo bo waafunamin ba. Bo fong ku atamin ba. Bo mala-emin ba o,” agesip kale, ibo intaben o ageta kanupmin weng boyo abo dulu-bilip a? Umbae. Ibo weng boyo abo dulu waafunamin ba ko.

Kolosi 3:11

kamaa umi kuguup uyo kanumin kale, ibo unang tinum kanumin kanumin albip imi aget afek uyo fugunin ba kale, Krais imi aget uta kup fugunin o ageta kale, Krais iyo Juda kasel min, tinum yagalami miit maak maak min, tinum iyo dok ita man tinum imi kaal ukan ke-emin kuguup waafulin min, bomi kuguup waafulin binim min, tinum utamsip min, tinum utamsaalip binim min, sok de dolip tinum maak imi ogok kemin min, ilami aget kup fuguno tiinemin min, alugum unang tinum yagalami miit maak maak dogap ipta Krais imi ilak dosip ipmi iibak tem kal alba ko.

Kolosi 3:15

Kale ibo Krais iyo dagalip dong dogobelata, bilili agan-kalin aget uyo ku-nilipta, aget fugunin tambal uta kup waafu-bom-nilipta o ageta kale, dok uta ba kale, God imi aget uyo, unang tinum imi weng kobelita, dam maagup ulutap ke-nilipta, bilili agan-kalin aget uyo kulin o age-nalata, weng boyo ibo kobe-se ko. Kale ibo God iyo, “Misam o,” agan-bomta o ageta ko.

Hibru 13:20

Kale Yesus imi angkolip kaan-se boyo tolop kwep no God imi kupka-emin ulutap kelipta, imi isak bota tebe-nuluta, God imi aaltam weng migik de ko-se boyo kuntuk mopmuta, suun kup nuubu kale, God iyo asok numi Kamogim Yesus iyo dufo-se kale, bemi kaan-se bota, beyo imi sipsip nuyo atin ki tambaliim kup tiin molin kup boma ko. Kale God beyo aget bilili agan-kalin umi miit kayaak kale, yagal tebe kuguup tambal kwiin tagang uyo ibo kupka-e-balata, ibo tii tebe imi, “Bota kanubelin o,” agan-be uta waafulin o ageta kale, God imi, “Bota kanubelan o,” agan-be uyo alugum Yesus Krais imi kobelata, yagal alugum numi aget tem kwek uyo kafale-balata, kanum-nuubup kale, Krais imi deng uyo suun kup suun kup tebe-bom-nulupta o ageta kale, bota kwa.

Hibru 7:2

Abraham iyo alugum waasi imi mufekmufek dugu kulep talan-be uyo fegela-bii ko baan nagaal kal ke yakyak ke-nala e, baan tugal uta ilami kulu-nala e minte, baan maagup uta kup Melkisedek imi kobe-se ko. Kale Melkisedek o age fupkela kup-kiit molan-temup uyo, “Beyo kuguup tambal uta waafu-bom-nalata, king kesa o,” agelu e minte, beyo Salem kasel imi king kale, umi magam uyo, “Beyo bet bubul aget fugunin kuguup waafu-bom-nalata, king kesa o,” age no kesu ko.