Efesis 1:3 - Telefol

³ God iyo numi Kamogim Yesus Krais imi God e minte imi Aalap no kale, God beyo Krais imi sagaal diim ilep ilami mufekmufek tambal uyo alugum kobela numi aget fugunin uyo dong daga-em-nuubu kalaa age-nulupta, God imi win kufu-bom imi tok bagamum o ageta ko.

Efesis 1:3 Iomraidhean Croise

Luk imi tebe Yesus imi sang dola kosa uta ko 2:28

Simeon ita man iyo du-migi-nala e, God iyo, “Suguul o,” age-nala e, bogola ko.

Jon imi tebe Yesus imi sang dola kosa uta ko 14:20

Kale kaan-nili fen tigi molan-temi kota, ibo nitamipta, niyo Aatum imi diim kal ni e minte, ibo nimi diim kal nip e, niyo ipmi diim kal ni no kesup kalaa agon-temip ko.

Jon imi tebe Yesus imi sang dola kosa uta ko 17:21

Kale ulim maagup ke-bom aget maagup bubul maagup kesupta, ti-sii kale, ulutap kale, unang tinum nimi ilak dobip igil mungkup ulim nulutap ke aget maagup bubul maagup kebe no kebelipta, kafin diim komi unang tinum iyo imi kuguup tambal uyo utamipta e, aafentap Aatum kapkal nimdalap ti-sii kalaa agelin o ageta ko.

Jon imi tebe Yesus imi sang dola kosa uta ko 20:17

Yesus iyo bogobela, “Niyo abiil tigiin tam Aatum imi finang uyo unin-tem kale, kubo naafunmin ba. Kubo no-nalap nimi tinum ninggil iyo bogobe-nalap, ‘Yesus iyo bogopne-nala e, “Tam abiil tigiin kayaak imi finang unon-temi kale, beyo nimi Aatum e minte ipmi Aalap no, beyo nimi God e minte ipmi God no o,” age Yesus iyo bogopnela atam tili o,’ age nimi tinum ninggil iyo bogobelal o,” agela e,

Fol tebe Rom kutam imi suuk kon dola kobesa uta ko 12:5

ulutap mungkup unang tinum nugol kwiin tagang kuta, Krais imi diim febalup umdii, nuyo dam maagup ulutap kale, alugum maagup maagup nuso numi duup-afin iso nuyo kwego dego ke dam maagup kesup ko.

Fol tebe Rom kutam imi suuk kon dola kobesa uta ko 15:6

God beyo Kamogim Yesus Krais imi Aalap kale, ibo alugum maagup weng maagup uyo baga-bom God imi tok uyo baga-bom-nilipta o ageta ko.

1 Korin 1:30

Kale God iyo ibo imdep daala Yesus Krais imi diim kal tiiba-silip kale, God iyo tebe Krais iyo ulaa dulata, yagal aget fugunin tambal uyo nuyo kupka-em-nuuba kale, tinum unang mitam God imi tiin diim umi tol kup kemin umi ilep uyo Krais maagup beta kup ilep uyo kulba kale, bemi tolop diim God iyo imdep meng daalata, nuyo God imi man aligaap ke-bom-nulup e minte, God iyo fengmin tebe nuyo sok de imolin kesu uyo, talaa imdalata, kaal binim tambaliim ke-bom no kem-nuubup ko.

1 Korin 12:12

Kale niyo, God imi Sinik imi tebe titil migik migik kuga-em-nuuba bomi sang uta felep yak tinum numi dam komi diim tota bogobelan o ageta kale, tinum numi dam koyo maagup kuta minte, dam umi atuk atuk uyo kwiin tagang kale minte, atuk atuk kwiin tagang kuta, bomi kwego dego kesu uyo dam maagup uta kup kale, Yesus Krais imi ilak dolin unang tinum nugol mungkup kanube albup ko.

2 Korin 1:3

Kale numi Kamogim Yesus Krais imi Aalap God beyo numi Aalap no kale, beyo nuyo bet bubul kupka-em-nuuba kale, numi aget fugunin iluum kulup uyo, beta suun kup dong daga-e-boma kale, mangkal ninggil nugol bemi win uyo kufu-e-bom, “Suguul o,” agan-kalon-temip bota felepman-temu ko.

2 Korin 11:31

Kale God beyo Kamogim Yesus imi God e minte ilami Aalap no kale, nuyo bemi win uta kup suun kufu-bomup kale, beyo nitamsa kale, nimi titil binim kem talan-bii komi sang kaa ipmi bogobelan-temi koyo dam bogobelan-temi kale, tinangku-silipta.

2 Korin 5:17

Kale kanube unang tinum iyo maak Krais imi diim kal feba-bom albip umdii, God iyo tebe bilip iyo telela imola mitam atin kamaa unang tinum kelipta, bilip imi siin aget fugunin boyo alugum binimanuta, kamaa aget fugunin bota kup mitam tolon-temu ko.

2 Korin 5:21

Kale Krais beyo fengmin binim kuta, God yagal tebe nulumi ilak uta do-nalata, numi fengmin uyo alugum afeta ko kulupma yak Krais imi diim abeluta, beyo fen fengmin tinum ilatap ke-nalata, kaan-se kale, God imi aget fugunin uyo, bilip iyo fengmin unang tinum kuta, kanubelita, iyo Krais imi diim kal feba-nilipta, mitam nimi tiin diim kagal tol unang tinum kelin o age-nalata, God yagal tebe boyo kanube-se ko.

Galesia 3:9

Ulutap kale, unang tinum God imi ilak dolip ita God iyo kuguup tambal tambal uyo kobe Abraham imi kanube kobe-se ulutap kelan-tema ko.

Efesis 1:10

God imi aget fugunin uyo ki, “Mufekmufek alugum uyo du mo abe-bilita, nimi Man imi kobelan-temi kalaa agesi uyo mitam tulu kalaa age-nilita, kota abiil tigiin umi mufekmufek so kafin diim umi mufekmufek so unang tinum so uyo alugum nimi Man imi diim kal fagalita, yagal kamok ke tiin molan-tema o,” agesata, kupkem daa-se ko.

Efesis 1:17

Kale numi Kamogim Yesus Krais imi God iyo numi Aalap abiil tigiin kayaak iyo kulba kale, niyo aman duga-e-bilita, aget fugunin tambal uyo ibo kupka-e-bom-nala e, imi weng magam uyo ipmi diim kal kupkem daga-e-bom no kelata, God iyo kulba kalaa age tele atamin o age-nilita, aman duga-em-nuubi kale,

Efesis 1:20

imi titil ku-nala siin Krais imi kaana uyo dufo dep no abiil tigiin daala God ilami sagaal ipkuk diim tonsa uyo kulbu ko.

Efesis 2:6

Kale God imi aget fugunin uyo, “Son-temu uyo, nimi Man Yesus Krais imi ilak dolin iyo ifo imdep mitam abiil tigiin daalita, nimi Man so bilip iso mufekmufek uyo tiin molin o,” age-nalata, numi mitam Kristen ke-sulup uyo numi sinik uyo kufola tigi moluta, isino tambaliim tebesup kale,

Filipai 2:11

bogo-nilip e, “Yesus Krais beyo numi kamok miton o,” age-nilip e, Aatum God imi tok uyo bagaman-temip ko.

Hibru 8:5

Kale alugum tinum amem Jerusalam umi ulotu am miton umi ogok waafunam-nuubip boyo kafalebeluta, nuyo utamupta, Yesus beyo abiil tigiin kal tinum amem imi ogok uyo waafuba kalaa agan-bulup kale, boyo God imi Moses bogobe-se ulutap kale, kota Moses iyo sel am ko age ulotu am uyo delan o agan-salata, God iyo bogobe-nala e, “Kabo tambaliim kup tele utama-bom-nalapta, atin mufekmufek uyo amdu tigiin umi kafalepke-sii ulutap telelalal o,” age-se kuta,

Hibru 9:23

Kale ulotu am ko age sel am kutam umi mufekmufek boyo abiil tigiin umi mufekmufek albu ulutap kale, ulotu kemin umi ulo uta Moses iyo bogobeluta, tolop isak uyo kulu felet-bom-nalata, kafin kutam umi ulotu am umi mufekmufek boyo tambalanu kupka-se kuta, tolop umi isak boyo bagang-kale-nuluta, tebe abiil tigiin umi mufekmufek fen albu uyo telela kolu mitam atin tambalanan-temaalu kale, God iyo tebe mufekmufek migik atin tambaliim tebesu uta kup ku numi God imi finang unemin ilep uyo telela kola mitam atin tambalanan-temu ko.

1 Fita 1:3

God beyo numi Kamogim Yesus Krais imi God e minte imi Aalap no kale, bemi tok uyo baga-bom-nulup imi win uyo waafuu kwep tebe-bulupta o ageta kale, bomi magam uyo dok uta ba kale, Yesus Krais imi kaana God tebe dufola fen-se bomi diim ilep God iyo nuyo i-filinin afegen uyo kobe-nalata, kan ke imola mitam kamaa unang tinum ke-sulup kale, nuyo utamupta e, suun nin unang tinum ke-sulup kalaa age-nulupta, Kamogim imi ilep uyo tele bigim tebesup ko.