Aposel 23:12 - Telefol

¹² Am daanu kutim kota Juda kasel iip maak maak iyo tala tala ke bantap weng tegen-bom-nilip e, God imi tiin diim weng kwep daa bogo-nilip e, “Iman so ok so fala-som Fol iyo angkolup kaanata, asok iman so ok so unelum a. Kale angkolin-tem ke-nulup unelup umdii, God iyo tebe nuyo inola kaanan-temup o,” agan-kalip ko.

Aposel 23:12 Iomraidhean Croise

Matyu 26:4

weng en-bom-nilip e, kanube-nulupta, Yesus iyo maagalo bantap aafuta angkolup kaanak o age-nilip e,

Matyu 26:74

Fita iyo fomtuup weng uyo bogobe-nala e, “E-e. Niyo beyo atin atamsaali binim kale, niyo weng bisop umaak bogobeli umdii, God iyo tebe niyo kaal fuyap kop-naman-tema o,” agan-sala e, kota uun kakaluk aalap umdii olala e,

Matyu 27:25

alugum maagup albip iyo yan kebe-nilip e, “Aa. Nuyo utamupta e, imi kaanan-tema uyo nulumi san kalaa agelup kale, boyo kuguup mafak kelup umdii, God yagal nusino e numi man ilop sino nuyo kaal fuyap kopmoma o,” agan-kalip ko.

Aposel 23:13

Kale tinum ilimi kup 40 e minte anung no iyo kam age-nilip e bole,

Aposel 23:14

no tinum amem ko age pris imi kamogimal so Juda kasel imi kamogimal so imi bogobe-nilip e, “Alugum nuyo God imi tiin diim weng kwep daa bogo-nulup e, ‘Fol iyo angkolin-tem ke-nulup iman uyo unelup umdii, God iyo tebe nuyo inola kaanan-temup o,’ agelup kale,

Aposel 23:21

kabo bilip imi uget tagaman-temip weng uyo tinangku-nalap Fol iyo dep unemin ba ko. Bilip imi tinum ilimi kup 40 e minte anung no iyo, ilep kugol fiko-nulupta, angkolum o age-nilipta, God imi tiin diim bogo-nilip e, ‘Nuyo angkolin-tem ke-nulup iman une ok une kelup umdii, God iyo tebe nuyo inola kaanan-temup o,’ agelip kale, kota kan ke-nilipta, kapmi weng uta, ‘O,’ agelap kalaa age-nulupta o age-nilipta, fen-bilip o,” age man iyo kamogim imi bogobela ko.

Aposel 23:30

tinum maak iyo weng kupkem daa bogopne-nala e, ‘Juda kasel maak iyo bantap weng tegen-bom bogo-nilip e, “Angkolup kaanak o,” agelip o,’ agelata, maak fagalin tap niyo daap-kami no tala kale, an-togon-bilip bilip imi bogobe-nili e, ‘Ibo, intaben kalan an-togon-bulup kalaa age-nilipta, no kiyap Feliks imi bogobelin o,’ ageli o,” age-nalata, suuk kon uyo dola kobela ko.

Aposel 9:23

Kale Sol iyo kanu-bom am kwiin tagang dakan kelata, Juda kasel iyo bantap tala tala ke tegen-bom-nilip e, angkolum o age-nilip e,

Aposel 9:24

no abiip umi daam tem uyo no-nilip e, yang amitem fikola meng amitem fikola ke-bom-nilipta, taap so mililep so fikamip kuta, tinum maak tal Sol imi bogobela e, mililep kota ilami okumop man iyo dep no daalip basket afalik tem kulaak iina e, basket uyo sok dup-dii-nilip e, sok kegal aafu-nilipta, dep tam abiip umi tuum daam umi dong tem ilep bilit bilit daalip daak kafin diim abe daagin-se ko.

1 Korin 16:22

Unang tinum waantap ita, Kamogim Yesus imi aget uyo kopmaali o agela umdii, beyo maagalo kelan-tema ko. Numi Kamogim kabaa. Kabo talaal o ageta ko.

2 Korin 11:26

Kale minte suun kup ilep simanim tiine-bom-nili uyo, ok tebe nimtamo unon agin ke-bulu e minte, tinum mafak ilep bigi-bom tinum ano kulep to-bom mufekmufek daga-emin imi sagaal diim kal maagalo kelan agin ke-bom-nili e minte, nalami duup Juda kasel igil tebe nafak daalum o agan-bilip e minte, tinum miit migik igil mungkup tebe nafak daa no kelum o agan-bilip e minte, abiip bisel min, iibaan bagan min, yol ok daang kun diim min uyo umtal daalan agin ke-bom-nili e minte, bisop bogo, “Nuta Kristen o,” agan-bilip imi sagaal diim kal maagalo kelan agin ke-bom no kem tam tam tebesi ko.

Galesia 3:13

Kale God imi suuk kon tem uyo bogo-nulu kano, “Tinum iyo dok ita kuguup mafak ke-bala angkolip kaana dep tam at diim kal dup-diilip umdii, utamupta e, God iyo tinum bemi win uyo mafak bogobelata, angkolip kalaa agelan-temup o,” agelu e minte, Moses imi ulo uyo numi win uyo mafak bogobe-nulu e, “Fengam-nuubip ibo maagalo win binim kelan-temip o,” age no kesu kale, God iyo Krais imi win uyo mafak bogobela uyo ku-nala at diim kaan-se bomi uyo ki, numi abiin uyo ku kaan-nalata, numi win mafak bogobesu uyo ku-nalata, nuyo asok molata, waalan-sulup ko.

1 Tesalonaika 2:16

Kale Juda kasel kulip imi aget fugunin uyo, Fol ninggil iyo tebe Krais imi sang uyo unang tinum asit kek kek iyo baga-e-bilip imi aget uyo fupkela ko-nilip tal God imi unang tinum numi iibak tem uyo e tolon-temip kale, Fol ninggil imi ilep uyo ugaa kwaabelupta o agan-bilip kuta, bilip iyo bagang-kale numi ilep uyo ugaa kwaabe-nimip binim kale, asit kek kek iyo baga-e-bulupta, Krais imi ilak uyo dolipta, imdep meng ilami miit tem daagan tebesa ko. Kale Juda kasel iyo suun kup bota kanu-bilipta kale, bomi tem ku-tele imi fengmin uyo sengan mitam mitam kem tebesu kuta, kamano kota God imi olsak afalik umdii tal bilip imi diim abe-buluta, ogen uyo utaman-bilip ko.