2 Korin 11:3 - Telefol

³ Kuta nimi aget fugunin uyo, Saatan ko age inap beyo atin bisop bagamin kuguup boyo utam kulasa kale, sugamiyok uyo beyo tebe numi afek Iv uyo bisop bogobesa kale, mungkup, kanupmin bisop bagamin tinum iyo tebe ipmi aget fugunin uyo kufak daabelip e, ipmi tambaliim kup bom Krais imi aget kup fugun-bomip uyo kupka-nimip o age-nilita, bota niyo finan-bii ko.

2 Korin 11:3 Iomraidhean Croise

Matyu 24:24

Kale nimi weng kaa bogoli koyo dok uta ba kale, bisop bagamin tinum iyo tebe-nilip e, God imi ulula ilami ilak doiin unang tinum ibo bisop bogobe-nulupta, ipmi aget fugunin uyo kufak daabelupta, yang iinin o age-nilipta, ipmi finang uyo teleman-temip kale, maak iyo tal bogobe-nala e, ‘Niyo God imi ulaa nimdula kamok kesi tinum Krais o,’ agela e, minte maak iyo tal bogobe-nala e, ‘Niyo God imi profet ko age weng kem baga-emin tinum o,’ agela no keman-temip kale, iyo mirakel ko age kuguup ugulumi migik migik uyo kafaleman-temip ko.

Jon imi tebe Yesus imi sang dola kosa uta ko 8:44

“Ipmi aalap iyo Tinum Mafagim ita kale, ibo imi man kale, ibo, imi aget fugunin uta kup waafulum o agan-nuubip ko. Magam tem ilota beyo unang tinum an-nuubata ko. Beyo suun kup kuguup mafak umi aget kup fugun-boma kale, kuguup tambal umaak waafusaala binim ko. Beyo bisop bagamin miit kayaak e minte, bisop bagamin tinum bilip imi aalap no kale, beyo bisop bogolan-tema uyo, ilami suun kuguup uta kup waafulan-tema ko.

Fol tebe Rom kutam imi suuk kon dola kobesa uta ko 12:8

aa mungkup tinum dok ita God yagal ulaa dula ipkumal aget kufu-emin tinum umdii, mungkup yagal ipkumal imi aget uyo kufu-e-bom baga-e-bala e minte, tinum iyo dok ita God yagal aget fugunin kobela ipkumal mufekmufek kupka-emin tinum umdii, beyo ipkumal iyo mufekmufek kwiin tagang uyo kupka-e-bala e minte, tinum iyo dok ita God yagal ulaa dula Kristen unang tinum imi dubom ke tiin mola umdii, beyo tambaliim kup tiin mo-bala e minte, tinum dok ita God yagal aget fugunin kobela ipkumal iyo i-filin daa dong daga-ema umdii, begal mungkup deng tebe-bom-nalata, ipkumal iyo dong daga-e-bom no ke-bilipta o ageta ko.

2 Korin 1:12

Kale ninggil nuyo dulul weng maak tolong dobup uyo, Korin kasel iip maak maak iyo bogo-nilip, “Fol ninggil bilip iyo nuyo bisop baga-em-nak-bilip o,” agelip tinangkubup kuta, ninggil numi tolong do utabup uyo, boyo fen tuluun weng ba kalaa agan-bulup kale, nuyo utamupta, God imi tiin diim uyo nuyo kuguup mafak umaak ibo kupka-em-nuubaalup kale, nuyo kuguup tambal uta kup ibo kupka-em-nuubup kalaa age-nulupta, numi aget uyo bilili agebebu ko. Kale God iyo suun kup numi dong daga-e-bomta titil kupka-e-boma kale, kafin diim komi utamsip tinum imi aget fugunin uyo kupka-nulupta, God imi aget fugunin tol kup tebesu uta ku fugun-bom e minte, alugum unang tinum iyo tuluun weng so kem weng so uta kup baga-e-bom e minte, kuguup tambal uta kup kupka-e-bom-nulup e minte, ipkil mungkup kanupmin kuguup uyo suun kup kupka-e-bom no kem tebesup ko.

2 Korin 11:20

kanube tinum iyo tebe suun kup ibo imak kalila ogok kemip min, beyo tebe ipmi mufekmufek uyo alugum binimanu kupkabela min, ibo bisop bogobe imdep yang tem tilila kaal fuyap uyo kulip min, “Ibo win binim kale nita kup o,” agan-kala min, iyo tebe kul baang binola yak tibit diim abe-bom min kema kalaa agelip uyo, ibo tiin kup ata-bom-bilip kanu-e-boma kale bole, ibo nimkalipta, nalami win uta kufuman o ageta ko.

2 Korin 11:29

boyo ki, tinum iyo titil binim kela kalaa agelan-temi uyo, bomi aget afek uyo kuga-bom-nili e minte, utamita, tinum iyo fenga kola kalaa agelan-temi uyo, bomi aget iluum uyo kuga-bom no kem tam tam tebesi ko.

2 Korin 2:17

Kale ninggil nuyo fen Krais imi ogok ke-emin tinum kale, minte tam tinum migik kwiin tagang imi aget fugunin uyo, weng uyo baga-e-bulupta, unang tinum iyo mani kuga-e-bilipta, mitam mufekmufek soyaap kelum o age-nilipta, God imi weng uyo kafalemup ko age bisop baga-e-bilip kuta minte, ninggil nuyo ilitap ba kale, God yagal nuyo ulaa imdula imi sang uyo baga-e-bulup e minte, nuyo Krais imi ogok ke-emin tinum kale, nuyo imi weng uyo baga-e-bomta, mani kwaamum o ageta ba kale, nuyo imi aget fomtuup kobe-nulupta, imi tiin diim uyo tuluun weng uta kup baga-e-bulupta, iyo deng tebemak o ageta baga-e-bulup ko.

2 Korin 4:2

tinum iip maak maak iyo bogo-nilip, “Fol ninggil iyo unang tinum bilip iyo bisop baga-e-bilip o,” agan-bilip kuta, ninggil nuyo kuguup mafak kubasu umaak kanu-bomta God imi ogok uyo waafubaalup kale, nuyo bisop baga-e-bom ipmi aget duko-ebaalup e minte, nuyo God imi weng boyo fupkela kup-kiit mo kup-kalaak mo ke-bom kufak daganbaalup no kale, nuyo God imi tuluun weng uta kup kufu-bom-nulup e minte, God imi tiin diim so unang tinum imi tiin diim so uyo tol kuguup uta kup waafuu no ke-bulupta, utamipta e, nuyo God imi bogobe, “Kanumin o,” ageba uta kup kanu-bulup kalaa agebip ko.

Galesia 1:6

Kale God iyo ibo Krais imi i-filin daa-se umi diim ilep God ita ibo olabela imi daang begebe talan-bilip kuta, niyo utamita e, ibo Yesus iyo yuut dupka-nilipta, yak weng tambal ko age migik uta waafula waafula ke-bilip kalaa age-nilita, kumang mobi ko.

Galesia 2:4

Kuta Kristen ko age atuk atuk kemin tinum iip maak maak iyo, Yesus Krais tebe numi kuguup kobe-se bota utamum o age-nilipta, mitam-nilipta, nuso ton-bom-nilipta kale, siin uyo nuyo Moses imi ulo uyo tebe sok de imolin kesuta, Krais iyo tebe talaa imkan kela waalan-sulup kuta, ise tinum mitam tilip bilip ita tebe, bogobelupta, Moses imi ulo uyo asok waafulin o ageta kam agan-bilip kuta minte, Banabas alop nuyo asok Moses imi ulo uyo tebe sok de imolin kelu umi ogok kemin kuguup boyo waafulan-temaalup o age-sulup ko.

Galesia 3:1

Galesia kasel ilum ilum bii tonsip ibaa. Nuyo Yesus Krais iyo ibo kafalebelup atam-silip kale, boyo at diim kaana ilipmi tiin fala atamip ulutap ke-silip kale minte, kamano koyo ibo intaben o age-nilipta, ilum ilum kem-nak-bilip a?

Galesia 4:11

Kale niyo ipmi aget kwiin tagang uta fugun-bom-nilita, siin nimi tebe ipmi dital fagaa dong daga-emsi boyo atin daak abe-numu o agan-bii ko.

Efesis 4:14

Kale kanumup umdii, nuyo suun kup man kangkang ilitap nan-temaalup e minte, alugum uget tagamin tinum bilip imi bisop bagamin weng uyo baga-e-bilipta, nuyo man kuguup kanubelin tap ke, boyo aafen ko age kupkaa yang iinon-temaalup no kale, imi bisop weng bagamin uyo yol ok daang kun umi aliin iit o daak o ke-bom-nulu bot kwaalu unbu talbu kem-nuubu ulutap e minte, dulul tebe at kon kwaalu tam tam unan-nuubu ulutap no kale, nuyo bisop weng bo tinangkamin ba kale,

Efesis 4:22

Kale siin uyo ipmi intap intap mok unan-bii-silip uyo, ibo kuguup tambal ko ageta no kuguup mafak boyo kanu-bomta ilipmi kaal uyo kufak dagan-bii-silip kuta, ipmi kanupmin siin aget fugunin boyo kwaalip kot iinu kupka-nilipta,

Efesis 6:24

ipso e minte alugum unang tinum dok ita suun kup numi Kamogim Yesus Krais imi aget kup ugel kalasip sino ibo God iyo tebe telele-bom tiin mola tambaliim kup bom-bilipta o ageta ko.

Kolosi 2:18

Kale tinum iyo, “Kanube ilam tambal dugami o,” age-nala, “Nita kup utamsi o,” agan-bom-nala e minte, ipmi bogobe-nala e, “Ibo ipkumal numi afak tem iinin o,” agan-bom-nala e minte, bogobe-nala e, “Ibo God imi aman duga-ebip ulutap, mungkup ensel iyo kanube aman duga-emin o,” agan-bom no kema umdii, beyo dupkalip tebe ibo imdaak tamagamin ba ko. Kanupmin tinum beyo fen dital fagaa Krais imi weng uyo waafu-nalata ba kale, bemi aget fugunin uyo kafin diim kasel ilimi aget fugunin uta ku-nalata, “Nita kup o,” agan-nuuba kuta, bomi magam uyo binim ko. Krais beyo Kristen numi dubom e minte, nuta imi dam ulutap no kale, dubom beta tebe-nalata, dam alugum bomi unan-kalin uyo kupka-emin kup ke-balata, kun kuso dam kuso malaang kup tonta tambaliim bom-nuluta, God ilami om kun diim ilep mitamta senganan-nuubu ko.

Kolosi 2:4

Nimi weng bogobeli boyo, tinum iyo maak tebe ibo bisop baga-e-bom uget togola fen ko age-nimip o age-nilita, ipmi bogobeli ko.

Kolosi 2:8

Tinum iip maak maak iyo bisop weng uyo ibo baga-e-bom kafale-bilipta, ipmi aget fugunin uyo, bilip iyo, tuluun weng tambal uyo bagan-bilip ko agelan-temip kuta, kanupmin tinum bilip iyo Krais imi weng bagan-bii-se uta baga-bom-nilipta ba kale, amalap imi kuguup sang uta baga-bom-nilip e, kafin diim komi kuguup mafak mafak umi sang uta baga-bom no kem-nuubip kale, bilip iyo uget togolip ibo tinangkamip umdii, yang timin dagaa kulan-temip kale, ibo imi weng boyo tinangkamin ba kale, tele utama-bom-nilipta o ageta ko.

1 Tesalonaika 3:5

Kale niyo tinangkulita e, kek kek iyo tebe ibo kuguup mafak uyo kupka-e-bilip kalaa age-nilita, aget kwiin tagang fugun-bom-nili, ipmi God imi ilak dugamin boyo kupka-nimip o age-nilita, niyo tebe Timoti be daali no-nala ibo itamata, titil faga-bom mobip kalaa age-nalata, weng uyo kwep tal bogopnelata, utaman o ageta daali no ti-se kale, nimi aget fugunin uyo, boyo ki Saatan iyo tebe numi ogok bong faga-bom dong daga-emsup uyo alugum kufak daa-nala ibo uget togola God imi ilak dugamin uyo kupkaa yang iin-silip tap o age-nilita, aget kwiin tagang uyo fugun tebesi ko.

1 Timoti 1:3

Kale siin uyo Provins Masedonia unon o agan-som-nili bogopke-sii uta asok bogopkelan-temi kale, abiip Efesis kugol nin kup bom-nalap e, tinum iyo dogap ita bisop weng uyo unang tinum imi kafale-bom min,

1 Timoti 2:14

Adam iyo Tinum Mafagim imi bisop bagamin weng uyo tinangkusaala kale, unang uta bisop bagamin weng uyo tinangku-nuluta, fenga kosu ko.

2 Timoti 3:13

tinum mafak mafak sino bisop bagamin tinum isino kulip ita tebe-nilip unang tinum iyo bisop baga-e-bilip e, Saatan yagal bisop baga-e-bom no ke-e-balata, kulip imi kuguup mafak uyo kanum top top senganan-temu ko.

Taitas 1:10

Kale tinum kutaang tibin iyo kwiin tagang kale, bilip iyo amon amon weng bagamin e minte, bisop baga-bom no kem-nuubip kuta, Juda kasel imi kuguup waafulin tinum ita kanum tolomta ki kwiin tagang iyo kufosip ko.

Hibru 13:9

Kale tinum iyo maak tebe weng ugulumi migik migik uyo kafale-bilipta, tal ipmi aget tem iinon-temu uyo, ibo God imi kuguup uyo kup-kaga-emin ba kale, God iyo dagaga-bilipta, ibo kuguup tambal kup kupka-e-balata, bota tebe ipmi aget tem uyo kuntuk mobe dong daga-emuk o ageta kale, kanube nuyo kupkaa yak unan-kalin umi ulo migik migik uta waafulan-temup uyo, boyo bagang-kale tebe numi aget tem uyo kuntuk mobelan-temaalu binim kale, kanupmin kuguup bota tebe-nuluta, unang tinum iyo dong daga-em tebesaalu ko.

2 Fita 3:17

Kuta nalami duup ibe. Mufekmufek ko mitam tolon-temu boyo ipkil utamsip kale, God imi ulo kwaasulemin tinum bilip imi bisop bagamin weng boyo tebe ibo imdep yang iinu ibo titil fagaa molin-tem kelan-temip kale, ipkil utama-bom-nilipta, ilipmi tiinemin tonamin uyo tele tiin mo-bom-nilipta o ageta ko.

2 Fita 3:3

Kale niyo, kamaki uyo ibo boyo utam-nilipta o agan-bii kale, son-temu nala Yesus Krais imi asok tal kafin diim tolon o agelan-tema uyo, aban faga-emin tinum isiik tal-nilip e, ilimi aget fugunin mafak uta kup weng mafak uyo kanube baga-e-bom-nilip e,

1 Jon 2:18

Nimi mulup tan ibe. Afungen tem boyo mep so talan-bo ko. Kale ibo siin uyo tinangkulipta, “Krais imi waasi iyo mitam tolon-tema o,” agelip tinangku-silip kale, kamano kota Krais imi waasi iyo kwiin tagang mitam tebebip kale, bota utamupta e, kamano koyo afungen tem uyo mep so so talan-bo kalaa agan-bulup ko.

1 Jon 4:1

Atin nugumal ibe. Tinum bisop bagamin kwiin tagang iyo kafin diim komi abiip maak kugol na na bom albip kale, iyo bisop bogobe, “Nuyo God imi weng bagan-bulup o,” agan-bilip kale, ibo imi weng uyo tinangku waafunamin ba kale, ibo bilip imi sinik igalak bala iyo atam dup-kugu-nilipta, “God imi diim ilep ti-se bele o?” age atam dup-kugu-bom-nilipta o ageta ko.

Revelesen 12:15

Kale inap imi aget fugunin uyo ki, unang boyo ok tebe ungkwaa kwep unom mimilepmuta, kaanuk ko age-nalata bole, imi bon tem ilep ok foga kulala unang umi umik tem unu kuta,

Revelesen 12:9

God imi ensel Maikel ninggil iyo tebe inap mafak ninggil iyo alugum bagaa imdalip malaak kafin diim e tilip ko. Kale inap kiim ko age Tinum Mafagim beyo sugamiyok uyo God imi waasi kebe-bom weng mafak uyo baga-e-bom no ke-bii-se kale, imi win uyo Saatan ita kale, beta tebe-nalata, kafin diim unang tinum iyo bisop baga-e-balata, alugum iyo imi weng uta tinangka-bom-nilipta, fengam-nuubip ko.

Revelesen 20:2

inap kiim sugamiyok God imi waasi ke-bom God imi unang tinum imi weng mafak baga-e-bom kem titin-e-bii-se Saatan iyo aafuu sen tuup sok de do daala unanbu daak kafin umi tem kiim kalo kosu kulaak iina e, faal uyo ilobe fomtuup nagat mobe dupkalata, waantap ita faal bitobe-nama binim kela e, Saatan iyo kulagal bom-balata bii, atol ulumi kup wan tausen (1,000) komi dakan kelan-tema kwek uyo, iyo dogonubeta mitamta kafin kaa kutufosu komi unang tinum iyo bisop baga-e-bom ifak daga-bom keman-temaala binim bii, atol ulumi kup wan tausen (1,000) koyo dakan kela binimanan-temu kota, God iyo bogobelata, asok talaa daalipta, mitam abe tiinan-siit ilugolan-tema ko.